Yoozuuwee Takayaɣ 9

Yoozuuwee nɛ Gabawɔɔ ñɩma panɩʋnɩ ɖama yɔ

¹ Pɩlabɩ ḿbʋ lɛ, ageeta wena awɛnɩ Yɔɔrɩdaŋ pɔɔ wɩsɩ ɖɩɖʋyɛ hɔɔlʋʋ taa yɔ, a-tɩŋa a-taa awiya nɩɩ se Izirɛɛlɩ ñɩma yɔkɩ Ayɩ tɛtʋ. Ageeta ana, awɛ pʋʋ nɛ piyisi nɛ kɛdɛɛŋa ńga kɛwɛ kpaɣ Mediteraanee teŋgu nɔɔ kpɛɛɛ nɛ piwolo Liibaɣ pʋŋ yɔ, pa-taa. Peeye awiya ana, Hɛɛtɩ liɖe taa ñɩma ñɩnʋ nɛ Amoorii liɖe taa ñɩma ñɩnʋ nɛ Kanaanɩ liɖe taa ñɩma ñɩnʋ nɛ Periizii liɖe taa ñɩma ñɩnʋ nɛ Hiwii liɖe taa ñɩma ñɩnʋ nɛ Yeebuusii liɖe taa ñɩma ñɩnʋ ² panɩnɩ ɖama se pakʋyɩ Yoozuuwee nɛ Izirɛɛlɩ ñɩma pɔ-yɔɔ.

³ Gabawɔɔ ñɩma ñɔkɔm panɩɩ mbʋ Yoozuuwee labɩ Yeeriikoo nɛ Ayɩ pɛ-tɛtʋ yɔ lɛ, ⁴ paɖʋ pa-taa se pakpakɩɣ Izirɛɛlɩ ñɩma nɛ ajiitu. Ɖɩnɛɛ pañɩnɩ tɔɔnaɣ ŋga paatɔɔ yɔ, nɛ pasʋʋ pa-kpaŋasɩ kutokiŋ cɛkɩŋ nɛ sʋlʋm huyiŋ ^a kɩbɩŋ weyi ɛcɩyaa nɛ pɛñɛyɩ yɔ. ⁵ Posuu wondu ndʋ tɩcɩyaa yɔ nɛ pɛlɛɛ naatangbala kɩbɩŋcaazɩnaa wena atɛma nɛ acɩyɩ nɛ pɛñɛyɩ yɔ. Pʋwayɩ lɛ pakpaɣ kpɔnɔ ŋgʋ kɩwɩlaa nɛ kɩpʋʋtɩ yɔ ^b. ⁶ Palabɩ ḿbʋ lɛ, pakpaɣ nʋmɔʋ se powoki Giligaalɩ, Izirɛɛlɩ ñɩma ɖikpeɣliye taa. Powoba lɛ, peheyi paba nɛ Yoozuuwee se, ḿba lɩnɩ ɖooo polindaa nɛ powolo se, pa nɛ wɛ panɩnɩ ɖama. ⁷ Pɔyɔɔdɩ ḿbʋ lɛ, Izirɛɛlɩ ñɩma tɔ se, pɩtatɩlɩ pɛwɛ ḿba cɔlɔ peeye kpam. Ye mbʋ, ḿba ɛɛpɩzɩɣ nɛ pa nɛ wɛ panɩnɩ ɖama. ⁸ Ɖɩnɛɛ pakaɖɩ Yoozuuwee se, ḿba kɛ e-tʋmlaɖaa. Peeye ɛ́lɛ pɔzɩ-wɛ se, mbaa lɛ mba? Lee palɩnaa? ⁹ Pocosi se, mbaa ɛ-tʋmlaɖaa, palɩnɩ ɛjaɖɛ poliŋ ñɩnɖɛ naɖɩyɛ taa. Se, toovenim lɛ, ḿba nɩ ɛ-KƖPAƔLƲ Ɛsɔ taŋ nɛ mbʋ pɩtɩŋa ɛ́lɛ labɩ Ejipiti ɛjaɖɛ taa yɔ. ¹⁰ Se, ḿba nɩ ɖɔɖɔ ɛzɩma mbʋ ɛlabɩ Hɛsɩbɔɔnɩ wiyaʋ Sihɔɔnɩ nɛ Baasaanɩ ñɩnʋ Ɔɔgɩ weyi ɛɛwɛ Asetaarɔɔtɩ yɔ. Pɩtɛkɛ ḿba lɛ, Amoorii ñɩma mba paawɛ Yɔɔrɩdaŋ pɔɔ wayɩ yɔ, pa-awiya naalɛ yaa we? ¹¹ Se, ḿba sɔsaa nɛ ḿba tɛtʋ taa ñɩma tɩŋa peheyi ḿba se, ḿba ɛɖɔkɩ pa-nʋmɔʋ tɔɔnaɣ nɛ powolo pakatɩ mbaa Izirɛɛlɩ ñɩma. Se, ḿba ɛkatɩ-wɛ lɛ, ḿba ɛkɛ pa-tʋmlaɖaa nɛ ḿba heyi-wɛ se pa nɛ wɛ panɩnɩ ɖama. ¹² Se, pɔcɔnɩ ḿba kpɔnɔ nɛ pána! Se, kɩyakʋ ŋgʋ ḿba kʋyaa se powoki peeye yɔ, pakpaɣ-kʋ lɛ, kɩ nɛ ki-miŋ. Lɛɛlɛɛyɔ, kɩwɩlaa nɛ kɩpʋʋtɩ. ¹³ Se, pána ḿba sʋlʋm huyiŋ! Se, ḿba suwaɣ ɛ-taa sʋlʋm lɛ, ɛɛkɛ kɩfaŋ. Se, lɛɛlɛɛyɔ pɔcɔnɩ pana, ɛcɩyaa. Se, halɩ ḿba wondu cɩyaa nɛ ḿba naataŋgbala ñɛtɛ, nʋmɔʋ poliŋ ñɩŋgʋ ŋ́gʋ kʋ-yɔɔ.

¹⁴ Pɔyɔɔdɩ ḿbʋ lɛ, Izirɛɛlɩ ñɩma tisi nɛ pamʋ pɔ-tɔɔnaɣ nɛ pɔtɔɔ, ɛlɛ, pɔtɔpɔzɩ KƖPAƔLƲ se pana. ¹⁵ Peeye pa nɛ Yoozuuwee panɩnɩ ɖama se eyeki-wɛ pɛwɛɛ laŋhɛzɩyɛ taa nɛ piyele pɛwɛɛ wezuu. Samaɣ ñʋndɩnaa kɛpɛlʋʋ ñɩyʋʋ se palakɩ mbʋ.

¹⁶ Pa nɛ wɛ panɩnɩ ɖama mbʋ nɛ pɩla kiyakɩŋ naadozo lɛ, Izirɛɛlɩ ñɩma nɩɩ se, ɛyaa ḿba ña se pɛwɛ pɔ-cɔlɔ kpam. ¹⁷ Panɩ ḿbʋ lɛ, pakpaɣ nʋmɔʋ nɛ pɛɖɛɛ. Palabɩ kɩyakɩŋ naadozo lɛ, patalɩ ɛyaa ḿba pɛ-tɛtʋ taa. Tɛtʋ ńdʋ, ńdʋʋ yɔ: Gabawɔɔ nɛ Kefiiraa nɛ Beerooti nɛ Kiriyaatɩ Yeyaarim. ¹⁸ Patalɩ pɛ-tɛtʋ taa ḿbʋ lɛ, pamaɣnɩ-wɛ. Ɛlɛ, patakʋ-wɛ. Mbʋ pʋyɔɔ yɔ, samaɣ ñʋndɩnaa koɖuuni KƖPAƔLƲ, Izirɛɛlɩ Ɛsɔ se, paakʋʋ-wɛ. Ɖɩnɛɛ Izirɛɛlɩ ñɩma tɩŋa pazɩ mindinaʋ pa-ñʋndɩnaa. ¹⁹ Ɛlɛ, paba ñeheyi-wɛ se, ḿba tɛm ɖuunaʋ KƖPAƔLƲ, Izirɛɛlɩ Ɛsɔ se, ḿba ɛɛlakɩ-wɛ ɛzaɣtʋ natʋyʋ. ²⁰ Se, pɩwɛɛ se ḿba eyele-wɛ nɛ pɛwɛɛ wezuu, ɖuú mbʋ ḿba ɖuwaa yɔ, pʋ-yɔɔ. Pɩtɛkɛ mbʋ yɔ, KƖPAƔLƲ pana kpaɣnɩ ḿba. Se, pána mbʋ ḿba lakɩ-wɛ yɔ. ²¹ Se, paa ḿba eyeki-wɛ se pɛwɛɛ wezuu yɔ, pɛkɛɣ ḿba ɖasɩ cayaa nɛ ḿba lɩm luyaa. Mbʋʋ ñʋndɩnaa ɖʋwa. ²² Ɖɩnɛɛ Yozuuwee kpeɣli Gabawɔɔ ñɩma nɛ ɛpɔzɩ-wɛ se, pɩlabɩ ɛzɩma nɛ pɛcɛtɩ ḿba se palɩnɩ ɖooo poliŋ, nɛ ña se lɛ, pɛwɛ ḿba cɔlɔ kpam? ²³ Se, pɩkpaɣʋnɩ puwiye yɔ, pawɩlɩɣ-wɛ kpalʋʋ. Se, pɛkɛɣ yomaa paa ɖooye, pácaɣ Ɛsɔ ɖɩɣa taa tʋmlaɖaa ɖasɩ nɛ poluu-wɛ lɩm. ²⁴ Ɛyɔɔdɩ ḿbʋ lɛ, paba heyi-i se, ḿba labɩ ḿbʋ, mbʋ pʋyɔɔ yɔ, ḿba nɩwa se, ɛ-KƖPAƔLƲ Ɛsɔ heyi ɛ́lɛ tʋmlaɖʋ Mooyiizi se, ɛcɛlɩɣ-wɛ ɛjaɖɛ ńɖɩ ɖɩ-tɩŋa nɛ pakʋ ɖɩ-taa ñɩma tɩŋa. Se, sɔɔndʋ kakpa ḿba nɛ wɛ siŋŋ. ²⁵ Se, lɛɛlɛɛyɔ, ḿba wɛ e-nesi taa. Se, ɛla mbaa mbʋ pɩtʋʋzaa nɛ pɩtɛ pɩwɛɛ ɖeu yɔ.

²⁶ Pʋ-yɔɔ Yoozuuwee ɖʋwa se, ɛɖaŋɩɣ Izirɛɛlɩ ñɩma se pataakʋ Gabawɔɔ ñɩma. ²⁷ Piyele ɛɖʋ paba se ḿba caɣnɩ samaɣ nɛ kɩlaŋ ɖɩlayɛ, ɖasɩ nɛ poluu-wɛ lɩm. Se, pala mbʋʋ ɖenɖe KƖPAƔLƲ lɩzɩɣ se ɛ-kɩlaŋ ɖɩlayɛ ɛwɛɛ yɔ. Halɩ nɛ sɔnɔ tʋmɩyɛ ńɖɩɩ pɛ-sɛyɩnaa lakɩ.