Yoozuuwee Takayaɣ 10

Izirɛɛlɩ ñɩma wabʋ Amoorii awiya yɔ

¹ Pɩlabɩ ḿbʋ lɛ, Yeruusalɛm wiyaʋ Adonicɛdɛɛkɩ nɩɩ se Yoozuuwee kamʋ Ayɩ tɛtʋ nɛ ɛyɔkɩ-tʋ naŋa naŋa. Se, ɛlabɩ tɩ nɛ ti-wiyaʋ ɛzɩ ɛɛlabʋ Yeeriikoo ñɩndʋ nɛ ti-wiyaʋ yɔ. Se, ɛnɩwa ɖɔɖɔ se Gabawɔɔ ñɩma woba nɛ pa nɛ Izirɛɛlɩ ñɩma panɩnɩ ɖama se, paba eyebi-wɛ nɛ pɛwɛɛ laŋhɛzɩyɛ taa. Se, panɩnɩ ɖama ḿbʋ lɛ, pɛwɛɛ pɔ-cɔlɔ. ² Tɔm ńdʋ tiyebina nɛ sɔɔndʋ kpa Yeruusalɛm ñɩma siŋŋ. Mbʋ pʋyɔɔ yɔ, Gabawɔɔ kɛkɛ tɛtʋ sɔsɔtʋ ɛzɩ tɛtʋ ndʋ tɩ-taa awiya wɛʋ yɔ. Tɩkɩlɩ Ayɩ ñɩndʋ. Sɔdɩŋ ɖeke kɛwɛnɩ tɩ-taa. ³ Pʋ-yɔɔ Yeruusalɛm wiyaʋ Adonicɛdɛɛkɩ tiyi ɛyaa Hɛbɩrɔɔnɩ wiyaʋ Hoham nɛ Yaarimuuti ñɩnʋ Pireyam nɛ Lakiisi ñɩnʋ Yaafiya nɛ Ɛgɩlɔɔnɩ ñɩnʋ Deviiri pɔ-cɔlɔ ^a. Etiyaa se peheyi-wɛ se, ⁴ powolo pasɩnɩ-ɩ nɛ pɔyɔkɩ Gabawɔɔ tɛtʋ. Mbʋ pʋyɔɔ yɔ, tɩ-taa ñɩma nɛ Yoozuuwee nɛ Izirɛɛlɩ ñɩma panɩnɩ ɖama.

⁵ Mbʋʋ Yeruusalɛm wiyaʋ nɛ Hɛbɩrɔɔnɩ ñɩnʋ nɛ Yaarimuuti ñɩnʋ nɛ Lakiisi ñɩnʋ nɛ Ɛgɩlɔɔnɩ ñɩnʋ panɩnɩ ɖama nɛ pata nɔɔ Gabawɔɔ ñɩma yɔɔ. Amoorii awiya kagbaanzɩ ana, anɩnɩ ɖama nɛ a nɛ a-youlaɖaa tɩŋa powolo papa Gabawɔɔ tɛtʋ nɛ ɛza nɛ pakʋyɩ tɩ-taa ñɩma yɔɔ. ⁶ Peeye Gabawɔɔ ñɩma tiyi Giligaalɩ ɖikpeɣliye taa nɛ peheyi Yoozuuwee se, ɛ́lɛ ɛtaakizi se ɛɛsɩŋnɩ mbaa e-yomaa. Se, ewolo lɔŋ nɛ ɛsɩnɩ ḿba nɛ ɛlɩzɩ-wɛ! Se, Amoorii pʋŋ hɔɔlʋʋ taa awiya tɩŋa nɩnɩ ɖama nɛ pakʋyɩ ḿba yɔɔ. ⁷ Powobi peheyi Yoozuuwee ḿbʋ lɛ, ɛ nɛ ɛ-sɔdɩŋ nɛ e-youlaɖaa tɩŋa patɩkʋyɩ Giligaalɩ se powoki. ⁸ Ɖɩnɛɛ KƖPAƔLƲ heyi-i se, sɔɔndʋ ɛtaakpa-ɩ! Se, ɛnʋ ɖʋzɩ ɛyaa mbaa e-nesi taa, pa-taa nɔɔyʋ ɛɛpɩzɩɣ ɛkaɖɩnɩ-ɩ. ⁹ Pɩlabɩ ḿbʋ lɛ, Yoozuuwee nɛ e-youlaɖaa pakʋyɩ Giligaalɩ nɛ pɔɖɔmnɩ ɖoó nɛ patalɩ potudi Amoorii ñɩma nɛ pakʋyɩ pɔ-yɔɔ. ¹⁰ Peeye KƖPAƔLƲ yeba nɛ Amoorii ñɩma se Izirɛɛlɩ ñɩma ɛsɩndaa nɛ paba naŋ-wɛ taɣtaɣ Gabawɔɔ tɛtʋ cɔlɔ. Paɖʋ pa-wayɩ nʋmɔʋ ŋgʋ kɩ́kpaɣ Bɛtɩhɔrɔɔnɩ piyaɣ yɔɔ yɔ, kɩ-taa nɛ pakʋ-wɛ ḿbʋ nɛ halɩ pɔkɔɔ patalɩ Azekaa tɛtʋ nɛ Maakeedaa ñɩndʋ pa-taa. ¹¹ Amoorii ñɩma seɣaɣ Izirɛɛlɩ ñɩma ḿbʋ lɛ, pɔkɔɔ patalɩ Bɛɛtɩhɔrɔɔtɩ. Patalɩ peeye nɛ petikini wayɩ lɛ, KƖPAƔLƲ yele nɛ ɖɔmbɛ sɔsɔna naayɛ lɩnɩ ɛsɔdaa nɛ ayakɩ-wɛ. Ayaɣ-wɛ mbʋ nɛ pɔkɔɔ patalɩ Azekaa nɛ akʋ ɛyaa nɛ pɩkɩlɩ mba Izirɛɛlɩ ñɩma kʋnɩ sɛsɩ yɔ.

¹² Kɩyakʋ ŋgʋ KƖPAƔLƲ ɖʋzɩ Amoorii ñɩmaa Izirɛɛlɩ youlaɖaa nesi taa yɔ́ɔ, Yoozuuwee pɔzɩ-ɩ nɛ ɛtɛ ɛyɔɔdɩ Izirɛɛlɩ ñɩma tɩŋa ɛsɩndaa se,

Wɩsɩ! Sɩ́ŋ Gabawɔɔ tɛtʋ yɔɔ!

Piyele ña fenaɣ, ñasɩŋ Ayalooni kajalaŋa yɔɔ!

¹³ Ɛyɔɔdɩ ḿbʋ lɛ, wɩsɩ nɛ fenaɣ pasɩŋ nɛ pɩkɔɔ pɩsɩnɩ alɩwaatʋ ndʋ Izirɛɛlɩ ñɩma wabɩ po-koyindinaa yɔ. Ɛzɩ pamaʋ Kʋtʋʋzʋ Takayaɣ ^b taa yɔ. Pamawa se, wɩsɩ sɩŋ ɛsɔtɔnʋʋ hɛkʋ taa, siyebi ɖɔm kɩyakʋ nɛ kɩ-tɛɛ pilim, sitowolo se sɩɖʋ. ¹⁴ Kpaɣ ɛzɩ dooo kedeŋa wɛʋ nɛ pɩkɔɔ pɩsɩnɩ pu-wiye yɔ, kɩyakʋ nakʋyʋ fɛyɩ ɛzɩ kɩyakʋ ŋgʋ yɔ. Kɩyakʋ ŋ́gʋ kiwiyee KƖPAƔLƲ laba ɛzɩ ɛyʋ yɔɔdʋʋ yɔ. Mbʋ pʋyɔɔ yɔ, KƖPAƔLƲ maɣmaɣ yowaɣnɩ Izirɛɛlɩ ñɩma nɔɔ.

¹⁵ Pʋwayɩ lɛ, Yoozuuwee nɛ Izirɛɛlɩ ñɩma tɩŋa pekiti pa-ɖikpeɣliye taa, Giligaalɩ.

Yoozuuwee kʋʋ Amoorii awiya kagbaanzɩ yɔ

¹⁶ Ŋgʋ Amoorii awiya kagbaanzɩ ana, aasewa nɛ awolo amɛlɩ Maakeedaa tɛtʋ taa, ɛwaɣ pɔʋ taa. ¹⁷ Amɛlɩ ḿbʋ lɛ, nɔɔyʋ na-yɛ nɛ ewolo eheyi Yoozuuwee. ¹⁸ Peeye ɛ́lɛ heyi e-youlaɖaa se pepilisi pɛ sɔsɔna nɛ paɖɩɣ ɛwaɣ pɔʋ ŋgʋ kʋ-nɔɔ, nɛ pasɩɩ nabɛyɛ nɛ paɖaŋ kʋ-nɔɔ. ¹⁹ Se, piyele pɩkazɩ mba yɔ, pataacaɣ peeye, paɖʋ po-koyindinaa wayɩ. Se, pɛcɛbɩ-wɛ nɛ pataayele paba sʋʋ paba tɛtʋ taa. Se, toovenim lɛ, pa-KƖPAƔLƲ Ɛsɔ ɖʋzɩ pabaa pe-nesi taa. ²⁰ Pɩlabɩ ḿbʋ lɛ, Yoozuuwee nɛ Izirɛɛlɩ ñɩma pɔtɔyɩtɩ Amoorii ñɩma siŋŋ, pakʋ pa-tɩŋa. Ɛlɛ, pa-taa nabɛyɛ ɖeke pɩzɩnɩ pese nɛ patʋlɩ nɛ papɩsɩ pɛ-tɛtʋ ndʋ pɔcɔzɩ-tʋ kolonzi yɔ tɩ-taa. ²¹ Piyele Izirɛɛlɩ ñɩma tɩŋa lɛ, pekiti Yoozuuwee cɔlɔ, Maakeedaa ɖikpeɣliye taa nɛ laŋhɛzɩyɛ. Nɔɔyʋ tatasɩɣ katʋʋ se ɛyɔɔdɩ-wɛ natʋyʋ.

²² Pʋwayɩ lɛ, Yoozuuwee heyi ɛ-ɛyaa se pokuli pɛ ɛwaɣ pɔʋ nɔɔ nɛ palɩzɩ Amoorii awiya kagbaanzi ana nɛ powoni-i-yɛ. ²³ Paba ñala ḿbʋ nɛ powoni-i Yeruusalɛm nɛ Hɛbɩrɔɔnɩ nɛ Yaarimuuti nɛ Lakiisi nɛ Ɛgɩlɔɔnɩ pa-awiya. ²⁴ Powoni-yɛ Yoozuuwee cɔlɔ lɛ, ɛ́yaa Izirɛɛlɩ ñɩma tɩŋa se palɩɩ. Palɩwa lɛ, eheyi mba pasɩnɩ-ɩ you yɔ, pa-ñʋndɩnaa se, powolo pɛfɛyɩ awiya ana a-pondona yɔɔ, ^c nɛ paba la ḿbʋ ɖɔɖɔ. ²⁵ Peeye ɛtasɩ-wɛ heyuu se, sɔɔndʋ ɛtaakpa-wɛ, pɩtaatii po-tome taa! Se, pákpa ɖoŋ nɛ pɛ́wɛɛ abalɩtʋ! Se, mbʋ ɖɔɖɔ KƖPAƔLƲ kaɣ labʋ, koyindinaa mba pa nɛ wɛ pakaɣ you yɔ. ²⁶ Pʋwayɩ lɛ, Yoozuuwee kʋ awiya ana nɛ eyele paɖɩ a-liŋ tɛɛ nɩme nɛ popuzini tɩŋ kagbaanzɩ nɛ awɛɛ peeye ḿbʋ ɖanaɣ nɛ kaɖanʋʋ. ²⁷ Wɩsɩ kɔm sɩɖʋ lɛ, Yoozuuwee ha nɔɔ se petisi-yɛ ^d nɛ pɔlɔ-yɛ ɛwaɣ pɔʋ taa ɖenɖe aamɛlaa yɔ. Se, pɛtɛm-yɛ lɔʋ lɛ, pepilisi pɛ sɔsɔna nɛ paɖɩɣ pɔʋ ŋgʋ kʋ-nɔɔ. Pɛ ana, awɛ peeye halɩ nɛ sɔnɔ.

Yoozuuwee mʋʋ tɛtʋ ndʋ tɩwɛnɩ hadɛ kiŋ yɔ.

²⁸ Kɩyakʋ ŋgʋ Yoozuuwee kʋ awiya ana a-kagbaanzi yɔ́ɔ, ɛmʋ Maakeedaa tɛtʋ nɛ ɛkʋ ti-wiyaʋ nɛ tɩ-taa ñɩma tɩŋa, pɩtakazɩ nɔɔyʋ. Ɛlabɩ Maakeedaa wiyaʋ ɛzɩ ɛɛlabʋ Yeeriikoo ñɩnʋ yɔ.

²⁹ Yoozuuwee nɛ Izirɛɛlɩ ñɩma pakʋyɩ Maakeedaa lɛ, powolo Libinaa tɛtʋ taa nɛ pakʋyɩ tɩ-taa ñɩma yɔɔ. ³⁰ KƖPAƔLƲ ɖʋzɩ ɖɔɖɔ tɩ nɛ ti-wiyaʋ pe-nesi taa nɛ pakʋ tɩ-taa ñɩma, pɩtakazɩ nɔɔyʋ. Palabɩ ti-wiyaʋ ɛzɩ paalabʋ Yeeriikoo ñɩnʋ yɔ.

³¹ Pakʋyɩ Libinaa lɛ, powolo pacaɣ Lakiisi tɛtʋ cɔlɔ nɛ pakʋyɩ tɩ-taa ñɩma yɔɔ. ³² Pakʋyɩ pɔ-yɔɔ nɛ pɩla kɩyakɩŋ naalɛ lɛ, KƖPAƔLƲ ɖʋzɩ Lakiisi tɛtʋ, pe-nesi taa. Peeye pakʋ tɩ-taa ñɩma pɩtakazɩ nɔɔyʋ ɛzɩ paalabʋ Libinaa ñɩma yɔ. ³³ Ɖɩnɛɛ Gɛzɛɛrɩ wiyaʋ Horam wobi se ɛsɩŋnɩ Lakiisi ñɩma. Ɛlɛ, Yoozuuwee hɔɔ ɛ nɛ e-youlaɖaa pɩtakazɩ nɔɔyʋ.

³⁴ Yoozuuwee nɛ Izirɛɛlɩ ñɩma pakʋyɩ Lakiisi lɛ, powolo pacaɣ Ɛgɩlɔɔnɩ tɛtʋ cɔlɔ nɛ pakʋyɩ tɩ-taa ñɩma yɔɔ. ³⁵ Kɩyakʋ kʋɖʋmʋʋ ŋgʋ kiwiye pamʋ-tʋ nɛ pakʋ tɩ-taa ñɩma tɩŋa payɩ. KƖPAƔLƲ yɔɔ lɛ, pɔtɔyɩtɩ mba pɛwɛ tɩ-taa yɔ, patɩŋa ɛzɩ paalabʋ Lakiisi ñɩma yɔ.

³⁶ Pʋwayɩ lɛ, pɛɖɛɛ pakpa Hɛbɩrɔɔnɩ tɛtʋ taa nɛ pakʋyɩ tɩ-taa ñɩma yɔɔ. ³⁷ Pakʋyɩ pɔ-yɔɔ lɛ, pamʋ pɛ-tɛtʋ nɛ pakʋ pa nɛ pe-wiyaʋ. Pamʋ ɖɔɖɔ tɛtʋ ndʋ tɩcɔ Hɛbɩrɔɔnɩ ñɩndʋ yɔ nɛ pakʋ tɩ-taa ñɩma. KƖPAƔLƲ yɔɔ lɛ, Yoozuuwee yɔkɩ tɛtʋ ńdʋ tɩ-tɩŋa naŋa naŋa nɛ ɛtɔyɩtɩ tɩ-taa ñɩma, pɩtakazɩ nɔɔyʋ ɛzɩ ɛɛlabʋ Ɛgɩlɔɔnɩ ñɩma yɔ.

³⁸ Pʋwayɩ lɛ, Yoozuuwee nɛ Izirɛɛlɩ ñɩma pekiti nɛ powolo Deviiri tɛtʋ taa nɛ pakʋyɩ tɩ-taa ñɩma yɔɔ. ³⁹ Powoba lɛ, pamʋ tɩ nɛ ti-wiyaʋ nɛ tɛtʋ ndʋ tɩcɔ-tʋ yɔ. KƖPAƔLƲ yɔɔ lɛ, pɔtɔyɩtɩ tɩ-tɩŋa tɩ-taa ñɩma, pɩtakazɩ nɔɔyʋ. Yoozuuwee labɩ Deviiri tɛtʋ nɛ ti-wiyaʋ ɛzɩ ɛɛlabʋ Hɛbɩrɔɔnɩ tɛtʋ nɛ Libinaa ñɩndʋ nɛ ti-wiyaʋ yɔ.

⁴⁰ Mbʋʋ Yoozuuwee mʋ ɛjaɖɛ tɩŋa. Ɛwabɩ pʋŋ egeetiye taa awiya nɛ hadɛ kiŋ egeetiye taa ñɩna nɛ piyisi egeetiye taa ñɩna nɛ tibu yɔɔ ageetiye taa ñɩna. Ɛkʋ mbʋ pɩwɛ wezuu yɔ pɩtɩŋa, pɩtakazɩ nabʋyʋ ɛzɩ KƖPAƔLƲ, Izirɛɛlɩ Ɛsɔ keheyuu-i yɔ. ⁴¹ Ɛmʋ tɛtʋ ńdʋ yɔ, ńdʋʋ yɔ: kpaɣ Kadɛɛsɩ Baarɩneya nɛ Gaaza, hadɛ kiŋ nɛ piwolo pɩsɩnɩ Goosɛɛnɩ egeetiye ^e nɛ Gabawɔɔ, hayo kiŋ. ⁴² Tɔm kʋɖʋm ɛlɩwa nɛ ɛwa tɛtʋ ńdʋ tɩ-awiya nɛ ɛmʋ-tʋ. Mbʋ pʋyɔɔ yɔ, KƖPAƔLƲ, Izirɛɛlɩ Ɛsɔ maɣmaɣ yowaɣnɩnɩ ɛ-samaɣ nɔɔ. ⁴³ Pʋwayɩ lɛ, ɛ nɛ Izirɛɛlɩ ñɩma tɩŋa pekiti pa-ɖikpeɣliye taa Giligaalɩ tɛtʋ taa.