11
Yoozuuwee wabʋ Kanaanɩ awiya, Meeroom hiɖe taa yɔ
1 Hacɔɔrɩ wiyaʋ Yaviini kɔm ɛnɩɩ se Yoozuuwee wabɩ e-you ndɩ ndɩ taa lɛ, etiyi nabɛyɛ se powolo peheyi Maadooni wiyaʋ Yovaavɩ nɛ Simirooni ñɩnʋ nɛ Akɩsaafɩ ñɩnʋ. 2 Etiyi ɖɔɖɔ nabɛyɛ se powolo peheyi awiya wena awɛ hayo kiŋ pʋŋ hɔɔlʋʋ taa yɔ nɛ Jeneezaarɛɛtɩ teŋgu a hadɛ kiŋ, Aaraaba egeetiye taa, pʋ-tɔbʋʋ se, Yɔɔrɩdaŋ pɔɔ kajalaŋa taa nɛ piyisi egeetiye nɛ Dɔɔrɩ kɛdɛɛŋa taa, wɩsɩ ɖɩɖʋyɛ hɔɔlʋʋ taa yɔ. 3 Etiyaa ɖɔɖɔ se, powolo peheyi Kanaanɩ ñɩma mba pɛwɛ Yɔɔrɩdaŋ pɔɔ wɩsɩ ɖɩlɩyɛ nɛ wɩsɩ ɖɩɖʋyɛ pa-taa yɔ nɛ Amoorii ñɩma nɛ Hɛɛtɩ liɖe taa ñɩma nɛ Periizii ñɩma nɛ Yebuusii ñɩma mba pɛwɛ pʋŋ taa yɔ nɛ Hiwii liɖe taa ñɩma mba pɛwɛ Hɛɛrɩmɔɔ pʋʋ liu tɛɛ, Micipaa egeetiye taa yɔ. 4 Peeye awiya ana a-tɩŋa nɛ a-youlaɖaa sakɩyɛ sakɩyɛ palɩwa pakpaɣ nʋmɔʋ. Pɔɖɔwa ɛzɩɩ teŋgu nɔɔ kañɩŋa yɔ. Pa nɛ lɔɔɖa wena kpaŋnaŋ hɔŋ yɔ sakɩyɛ nɛ you ñɩna sakɩyɛ. 5 Awiya ana, aanɩnɩ ɖama se, powolo pacaɣ Meeroom hiɖe cɔlɔ nɛ pakʋyɩ Izirɛɛlɩ ñɩma yɔɔ.
6 Peeye KƖPAƔLƲ heyi Yoozuuwee se, sɔɔndʋ ɛtaakpa-ɩ nɛ wɛ. Mbʋ pʋyɔɔ yɔ, kifeŋ ñɩɣyʋʋ ŋgʋ kʋ-yɔɔ ɖeyiɖeyi lɛ, ɛnʋ ɖʋzʋʋ-wɛ Izirɛɛlɩ ñɩma nesi taa, ɛnʋ yeki nɛ pasɩ pa-tɩŋa. Se, pʋbʋ, ɛsɛtɩ pa-kpaŋnaŋ nɩŋgbanzɩ nɛ ɛsɔ po-youlɔɔɖa miŋ. 7 Pʋwayɩ lɛ, Yoozuuwee nɛ e-youlaɖaa powolo potudi po-koyindinaa Meeroom hiɖe nɔɔ nɛ pakʋyɩ pɔ-yɔɔ. 8 Ɖɩnɛɛ KƖPAƔLƲ ɖʋzɩ-wɛ Izirɛɛlɩ ñɩma nesi taa nɛ paba wabɩ-wɛ. Paaɖʋ pa-wayɩ nɛ pɔkɔɔ patalɩ hayo kiŋ tɛtʋ sɔsɔtʋ ndʋ payaɣ se Sidɔɔ yɔ nɛ ndʋ payaɣ se Miisireefɔɔtɩmayim yɔ, pa-taa nɛ Micipee kajalaŋa taa, wɩsɩ ɖɩlɩyɛ hɔɔlʋʋ taa. Peeye pawabɩ-wɛ nɛ pakʋ patɩŋa pɩtatɩɩkazʋʋ pa-taa nɔɔyʋ. 9 Yoozuuwee labɩ-wɛ ɛzɩ KƖPAƔLƲ keheyiɣ-i yɔ. Ɛsɛtɩ pa-kpaŋnaŋ naŋgbanzɩ nɛ ɛsɔ po-youlɔɔɖa miŋ.
Yoozuuwee mʋʋ Hacɔɔrɩ tɛtʋ yɔ
10 Alɩwaatʋ ndʋʋ Yoozuuwee kitaa nɛ ɛkʋ Hacɔɔrɩ tɛtʋ wiyaʋ nɛ you sɩɣa nɛ ɛmʋ-tʋ. Ńdʋ kɛkɛnɩ hayo kiŋ kewiisi tɩŋa taa tɛtʋ sɔsɔtʋ. 11 Ɛ nɛ e-youlaɖaa pakʋ ɖɔɖɔ tɩ-taa ñɩma mbʋ naŋa naŋa, pɩtakazɩ paa kʋɖʋm. Pʋwayɩ lɛ, pɔsɔbɩ-tʋ miŋ. 12 Mbʋʋ Yoozuuwee wabɩ awiya wena atam nɔɔ yɔ a-tɩŋa nɛ ɛmʋ a-tɛtʋ. Ɛkʋ tɛtʋ ndʋ tɩ-awiya nɛ tɩ-taa ñɩma ɛzɩ KƖPAƔLƲ tʋmlaɖʋ Mooyiizi keheyuu-i yɔ. 13 Paa mbʋ yɔ, Izirɛɛlɩ ñɩma taasɔ piisi yɔɔ tɛtʋ taa natʋyʋ miŋ nɛ pɩtasɩnɩ Hacɔɔrɩ ñɩndʋ ndʋ Yoozuuwee sɔba yɔ. 14 Paakpaɣ ñɩm nɛ kpɩna mba paawɛ tɛtʋ ndʋ tɩ-taa yɔ, ɛzɩ ñɩm mbʋ pehiɣ you taa yɔ. Piyele pakʋ tɩ-taa ñɩma tɩŋa, pɩtakazɩ paa kʋɖʋm. 15 Mbʋʋ KƖPAƔLƲ keheyi ɛtʋmlaɖʋ Mooyiizi se ɛla. Ɛ́lɛ ñeheyi-tʋ Yoozuuwee nɛ Yoozuuwee ñala ɖɔɖɔ mbʋ ɖeyiɖeyi.
Yoozuuwee tɛzʋʋ Kanaanɩ ɛjaɖɛ mʋʋ yɔ
16 Mbʋʋ Yoozuuwee mʋ tɛtʋ tɩŋa. Ɛmʋ pʋʋ egeetiye nɛ hadɛ ñɩnɖɛ nɛ Goosɛɛnɩ ñɩnɖɛ nɛ piyisi yɔɔ tɛtʋ nɛ Aaraaba ñɩndʋ, pʋ-tɔbʋʋ se, Yɔɔrɩdaŋ pɔɔ kajalaŋa nɛ Izirɛɛlɩ pʋŋ egeetiye nɛ hayo kiŋ kɛdɛɛŋa. 17 Ɛwabɩ awiya wena awɛ kpaɣ Halaakɩ pʋʋ nɛ Seyiiri hɔɔlʋʋ taa, hadɛ kiŋ hɔɔlʋʋ taa nɛ piwolo pɩsɩnɩ Baalɩgaatɩ, Liibaɣ kajalaŋa taa, Hɛɛrɩmɔɔnɩ pʋʋ liu tɛɛ, hayo kiŋ yɔ a-tɩŋa nɛ ɛkʋ-yɛ. 18 Ɛ nɛ awiya ana a-tɩŋa po-you leɖi kɩyakɩŋ sakɩyɛ. 19 Ɛlɛ, Hiwii liɖe taa ñɩma mba pɛwɛ Gabawɔɔ yɔ, pa nɛ Izirɛɛlɩ ñɩma pe-ɖeke panɩŋnɩ ɖama. Piyele tɛtʋ lɛɛtʋ yɔ, you palaba nɛ pʋcɔ pamʋ-tʋ. 20 Toovenim lɛ, KƖPAƔLƲ keyebina nɛ ɛjaɖɛ ndɩ ɖɩ-taa ñɩma la ñʋʋ taa ɖoŋ nɛ pa nɛ Izirɛɛlɩ ñɩma poyoo. Pʋwɛɛ se paba ɛkʋ-wɛ pataana pa-pʋdɔtɩyɛ nɛ pɔtɔyɩtɩ-wɛ naŋa naŋa ɛzɩ KƖPAƔLƲ keheyuu Mooyiizi yɔ.
21 Alɩwaatʋ ndʋ tɩ-taa Yoozuuwee woba nɛ ɛkʋyɩ Anaakɩ liɖe taa ñɩma yɔɔ. Paba kɛwɛ pʋŋ taa, Hɛbɩrɔɔnɩ nɛ Deviiri nɛ Anaavɩ pɛ-tɛtʋ taa, nɛ Yuuda nɛ Izirɛɛlɩ pa-pʋŋ ageeta tɩŋa taa. Yoozuuwee tɔyɩtɩ-wɛ nɛ ɛyɔkɩ pɛ-tɛtʋ tɩ-tɩŋa payɩ. 22 Pɩtakazɩ Anaakɩ liɖe taa tʋ nɔɔyʋʋ Izirɛɛlɩ ɛjaɖɛ taa tɛtʋ natʋyʋ taa nɛ pɩtasɩnɩ Gaazaa nɛ Gaatɩ nɛ Asidoodi pɛ-tɛtʋ taa. 23 Mbʋʋ Yoozuuwee mʋ ɛjaɖɛ tɩŋa ɛzɩ KƖPAƔLƲ keheyuu Mooyiizi yɔ. Pʋwayɩ lɛ, ɛtayɩ-tʋ Izirɛɛlɩ cejewee ndɩ ndɩ taa ñɩma. Mbʋʋ pɩlaba nɛ samaɣ hɛzɩnɩ you.