Yoozuuwee Takayaɣ 12

Awiya wena Izirɛɛlɩ ñɩma waba yɔ a-tɔm

¹ Izirɛɛlɩ ñɩma kawabɩ awiya naalɛ, Yɔɔrɩdaŋ pɔɔ, wɩsɩ ɖɩlɩyɛ hɔɔlʋʋ taa. Pawabɩ-yɛ nɛ pamʋ a-tɛtʋ, kpaɣ Arinooni pɔɔ nɛ piwolo Hɛrɩmɔɔnɩ pʋʋ. Pɩɩkpɛndɩnɩ hɔɔlʋʋ ŋgʋ kɩwɛ Yɔɔrɩdaŋ pɔɔ kajalaŋa wɩsɩ ɖɩlɩyɛ hɔɔlʋʋ taa yɔ. ² Amoorii wiyaʋ Sihooni lɛ, kajalaɣ-tʋ. Ɛɛwɛ Hɛsɩbɔɔnɩ tɛtʋ taa nɛ ɛkɛ wiyaʋ Arinooni kajalaŋa hɔɔlʋʋ lɛɛkʋ taa, kpaɣnɩ Arowɛɛrɩ. Ɛɛkɛ ɖɔɖɔ wiyaʋ kpaɣ Galaadɩ ɛjaɖɛ hɔɔlʋʋ lɛɛkʋ taa nɛ piwolo pɩsɩnɩ Yabɔɔkɩ pɔɔ ŋga kɛkɛ pa nɛ Amoonii ñɩma pa-ajɛɛ kámaɣ yɔɔ yɔ. ³ Ɛcɔŋaɣnɩ ɖɔɖɔ Yɔɔrɩdaŋ pɔɔ kajalaŋa wɩsɩ ɖɩlɩyɛ hɔɔlʋʋ taa nɛ kpaɣ Jeneezaarɛɛtɩ teŋgu ^a nɛ hayo kiŋ nɛ piwolo sɩm teŋgu, Beyitiyesiimɔɔtɩ tɛtʋ cɔlɔ, nɛ hadɛ kiŋ, egeetiye nɖɩ ɖɩwɛ Pisigaa pʋʋ liu tɛɛ yɔ. ⁴ Payaɣ wiyaʋ lɛlʋ se Ɔɔgɩ. Ɛkɛ Refayii ñɩma mba pakazaa yɔ pa-taa lɛlʋ ^b. Ɛɛwɛ Asetaarɔɔtɩ tɛtʋ taa yaa Edireeyi ñɩndʋ taa nɛ ɛkɛ wiyaʋ Basaanɩ ɛjaɖɛ taa. ⁵ Hɛɛrɩmɔɔnɩ pʋʋ nɛ Salɩkaa tɛtʋ nɛ Basaanɩ ñɩndʋ tɩŋa nɛ piwolo pɩsɩnɩ Gesuuri ñɩma tɛtʋ nɛ Maakatii ñɩma ñɩndʋ pa-kámaɣ yɔɔ nɛ kpaɣ Galaadɩ egeetiye hɔɔlʋʋ lɛɛkʋ nɛ piwolo Hɛsɩbɔɔnɩ wiyaʋ Sihooni ɛjaɖɛ, paawɛ e-nesi taa. ⁶ KƖPAƔLƲ tʋmlaɖʋ Mooyiizi nɛ Izirɛɛlɩ ñɩma paawabɩ awiya ana a-naalɛ nɛ Mooyiizi ɛnʋ ɛkpaɣ pɛ-tɛtʋ nɛ ɛcɛlɩ Ruubɛɛnɩ nɛ Gaadɩ pe-cejewe nɛ Manaasee cejewiye hɔɔlʋʋ lɛɛkʋ pa-taa ñɩma.

⁷ Pʋwayɩ lɛ, Yoozuuwee nɛ Izirɛɛlɩ ñɩma pawa Yɔɔrɩdaŋ pɔɔ nɛ wɩsɩ dɩɖʋyɛ hɔɔlʋʋ taa awiya. Pa-ajɛɛ kɛwɛ kpaɣ Baalɩgaadɩ, Liibaɣ kajalaŋa taa nɛ hayo kiŋ nɛ piwolo pɩsɩnɩ Haalakɩ pʋʋ ŋgʋ kɩwɛnɩ, Seyiiri tɛtʋ cɔlɔ yɔ nɛ hadɛ kiŋ. Ɖɩnɛɛ Yoozuuwee kpaɣ ageeta ana nɛ ɛtayɩ Izirɛɛlɩ cejewe taa ñɩma. ⁸ Ageeta anaa yɔ: pʋŋ egeetiye nɛ piyisi ñɩnɖɛ nɛ Yɔɔrɩdaŋ pɔɔ kajalaŋa nɛ tibu taa egeetiye nɛ lakʋ taa ñɩnɖɛ nɛ hadɛ kiŋ ñɩnɖɛ. A-taa Hɛɛtɩ liɖe taa ñɩma nɛ Amoorii ñɩnɖɛ taa ñɩma nɛ Kanaanɩ ñɩma nɛ Periizii liɖe taa ñɩma nɛ Hiwii ñɩnɖɛ taa ñɩma nɛ Yebuusii ñɩma, paawɛɛ. ⁹ Awiya wena pawabɩ-yɛ yɔ, anaa yɔ: Yeeriikoo wiyaʋ nɛ Ayɩ tɛtʋ ndʋ tɩwɛ Beetɛɛlɩ tɛtʋ cɔlɔ yɔ, tɩ-ñɩnʋ, ¹⁰ nɛ Yeruusalɛm ñɩnʋ nɛ Hɛbɩrɔɔnɩ ñɩnʋ ¹¹ nɛ Yaarimuuti ñɩnʋ nɛ Lakiisi ñɩnʋ ¹² nɛ Ɛgɩlɔɔnɩ ñɩnʋ nɛ Gɛzɛɛrɩ ñɩnʋ ¹³ nɛ Deviiri ñɩnʋ nɛ Gɛdɛɛrɩ ñɩnʋ ¹⁴ nɛ Harɩmaa ñɩnʋ nɛ Araadɩ ñɩnʋ ¹⁵ nɛ Libinaa ñɩnʋ nɛ Aduulam ñɩnʋ ¹⁶ nɛ Maakeedaa ñɩnʋ nɛ Beetɛɛlɩ ñɩnʋ ¹⁷ nɛ Tapuwa ñɩnʋ nɛ Hɛfɛɛrɩ ñɩnʋ ¹⁸ nɛ Afɛɛkɩ ñɩnʋ nɛ Sarooni ñɩnʋ ¹⁹ nɛ Madooni ñɩnʋ nɛ Hacɔɔrɩ ñɩnʋ ²⁰ nɛ Simirooni nɛ Merooni ñɩnʋ nɛ Akɩsaafɩ ñɩnʋ ²¹ nɛ Taanaakɩ ñɩnʋ nɛ Meegiidoo ñɩnʋ ²² nɛ Kɛdɛɛsɩ ñɩnʋ nɛ Kaarɩmɛɛlɩ hɔɔlʋʋ taa, Yokineyam ñɩnʋ ²³ nɛ Dɔɔrɩ kɛdɛɛŋa taa ñɩnʋ nɛ Gaaliilee egeetiye taa Goyim ñɩnʋ ²⁴ nɛ Tiricaa ñɩnʋ. Akpɛndɩ awiya niidozo nɛ kʋɖʋm (31).