5
1 Amoorii awiya tɩŋa wɛ Yɔɔrɩdaŋ pɔɔ wɩsɩ ɖɩɖʋyɛ kiŋ nɛ Kanaanɩ ñɩna ñɛwɛɛ ɖɔɖɔ hɔɔlʋʋ ŋgʋ kɩ-taa, Mediteraanee teŋgu nɔɔ. Awiya ana a-tɩŋa anɩwa se KƖPAƔLƲ yeba nɛ Yɔɔrɩdaŋ pɔɔ taa lɩm sɔɔ nɛ Izirɛɛlɩ ñɩma ɖɛzɩ nɛ powokini pɔ-yɔɔ. Anɩ ḿbʋ lɛ, pitii a-tome taa yɔɔɔ nɛ ana se aapɩzɩɣ akaɖɩnɩ-wɛ.
Pɛpɛlʋʋ Izirɛɛlɩ ñɩma Giligaalɩ tɛtʋ taa yɔ
2 Alɩwaatʋ ńdʋ lɛ, KƖPAƔLƲ heyi Yoozuuwee se, ɛkpaɣ pɛ nɛ ɛkpalɩ-yɛ nɛ apɩsɩ ɛzɩ sɛsɩ nɛ ɛpɛlɩnɩ Izirɛɛlɩ ñɩma taa piya kɩfasɩ. 3 Peeye Yoozuuwee kpaɣ pɛ nɛ ɛsaɣ sɛsɩ nzɩ nɛ ɛpɛlɩnɩ Izirɛɛlɩ ñɩma. Payaɣ peeye se, pɛlʋʋ piyaɣ. 4 Ɩɩnaɣ mbʋ piyeba nɛ Yoozuuwee pɛlɩ-wɛ yɔ. Alɩwaatʋ ndʋ Izirɛɛlɩ ñɩma kʋyɩ Ejipiti nɛ pɛɖɛɣ lɛ, abalɩbiya nzɩ sɩɩtalɩ you labʋ yɔ, sɩɩsɩbɩ sɩtɩŋa, nʋmɔʋ taa lakʋ taa. 5 Ŋgʋ paapɛlɩ mba pa-tɩŋa payɩ paakʋyɩ Ejipiti nɛ paatalɩ you labʋ yɔ. Ɛlɛ, mba palʋlɩ-wɛ nʋmɔʋ taa lakʋ taa yɔ, pataapɛlɩ-wɛ. 6 Toovenim lɛ, Izirɛɛlɩ ñɩma kɔɖɔm pɩnzɩ nɩɩnaza (40), lakʋ taa. Pɩnzɩ nzɩ sɩkɔm se sɩtɛŋ lɛ, abalaa mba paakʋyɩ Ejipiti nɛ patalɩ you labʋ yɔ, pasɩbɩ pa-tɩŋa. Mbʋ pʋyɔɔ yɔ, pataña KƖPAƔLƲ. Pʋ-yɔɔ ɛ́lɛ ɖuwaa se eeyeki-wɛ nɛ pana ɛjaɖɛ nɖɩ eheyi pɔ-cɔzɔnaa se ɛhaɣ ḿba yɔ. Ɛjaɖɛ ńɖɩ ɖɩ-taa, tɩŋnum nɛ naalɩm pɔtɔyaa a. 7 Pa-pɩyalaa, KƖPAƔLƲ yeba nɛ pasʋʋ ɛjaɖɛ nɖɩ ɖɩ-taa, po-lone taa. Pa-pɩyalaa mbaa Yoozuuwee pɛlaa mbʋ pʋyɔɔ yɔ ataatɩɩpɛlɩdɩ-wɛ. 8 Pɛpɛlɩ-wɛ ḿbʋ lɛ, pacaɣ pa-ɖikpeɣliye taa nɛ pɩkɔɔ pɩwaa. 9 Pʋwayɩ lɛ, KƖPAƔLƲ heyi Yoozuuwee se, ɛnʋ kʋsɩ pa-ñʋʋ yɔɔ Ejipiti fɛyɛ, kɩyakʋ ŋ́gʋ b.
Pʋ-yɔɔ paya lone ńɖɩ se, Giligaalɩc halɩ nɛ sɔnɔ.
10 Izirɛɛlɩ ñɩma caɣ Giligaalɩ nɛ kɩyakʋ hiu nɛ naanza (14) ñɩŋgʋ wiye ɖanaɣ yɔɔ pɔtɔɔ yomiye taa lɩʋ kazandʋ, Yeeriikoo cɔlɔ kɛdɛɛŋa taa. 11 Tɛʋ fema lɛ, pɔtɔɔ ɛjaɖɛ nɖɩ ɖɩ-taa tɔɔnaɣ: sɔsɔɔna fɛyɩ tindine nɛ tɔɔnaɣ pe kiɖoŋa. 12 Pɩkpaɣʋnɩ alɩwaatʋ ńdʋ yɔ, patatasɩ hiɣu tɔɔnaɣ ŋga payaɣ se maanɩ d yɔ. Tɔɔnasɩ nzɩ sɩñɔʋ Kanaanɩ e yɔ pɔtɔɔ pɩnaɣ ŋga.
Yoozuuwee katʋʋ KƖPAƔLƲ youlaɖaa ñʋʋdʋ yɔ
13 Nakʋyʋ wiye Yoozuuwee kɛwɛ Yeeriikoo tɛtʋ cɔlɔ. Pɩkɛdaa lɛ, ɛnaɣ abalʋ nɔɔyʋ ɛ-ɛsɩndaa, ɛɖɔkɩ sɛɣ nakɛyɛ e-nesi taa, kapɩɣ cenje. Peeye Yoozuuwee ñɔtɩnɩ-ɩ nɛ ɛpɔzɩ-ɩ se, ɛwɛ pɔ-yɔɔ yaa po-koyindinaa yɔɔ ɛwɛɛ? 14 Ɖɩnɛɛ ɛ́lɛ cosi-i se, ɛnʋ fɛyɩ pa-taa nɔɔyʋ yɔɔ. Se, ɛnʋ kɛ KƖPAƔLƲ youlaɖaa ñʋʋdʋ, se, ɛnʋ talʋʋ taa lɛ. Ɛyɔɔdɩ ḿbʋ lɛ, Yoozuuwee luŋ ɛ-tɛɛ nɛ ɛpa ɛ-ɛza nɛ tɛtʋ nɛ ɛtɔ se, ɛnʋ kɛ ɛ-tʋmlaɖʋ, nɛ ɛpɔzɩ-ɩ se, eheyiɣ ɛnʋ se we? 15 Peeye KƖPAƔLƲ youlaɖaa ñʋʋdʋ cosi-i se, ɛhɔzɩ ɛ-naataŋgbala f mbʋ pʋyɔɔ yɔ, lone nɖɩ ɖɩ-taa ɛwɛ ḿbʋ yɔ, ɖɩkɛ Ɛsɔ ñɩnɖɛ. Yoozuuwee la ḿbʋ ɖɔɖɔ.