4
Pakaʋ pɛ hiu nɛ naalɛ (12) se paatɔzɩnɩ pɔɔ ɖɛzʋʋ yɔɔ yɔ
1 Samaɣ tɩŋa tɛm Yɔɔrɩdaŋ pɔɔ ɖɛzʋʋ ḿbʋ lɛ, KƖPAƔLƲ heyi Yoozuuwee se, 2 palɩzɩ pe-cejewe taa abalaa hiu nɛ naalɛ (12). Paa nɖɩ ɖɩ-taa, ɛyʋ kʋɖʋm 3 nɛ peheyi-wɛ se, petii pɔɔ taa ɖenɖe cɔjɔnaa sɩŋaa yɔ ɖeyiɖeyi nɛ pokuli pɛ hiu nɛ naalɛ (12) nɛ pɛkpɛndɩnɩ-yɛ pasɩɩ ɖenɖe pasʋʋ ɖoó ána yɔ. 4 Peeye Yoozuuwee ya abalaa hiu nɛ naalɛ (12) ḿba eeyeba nɛ palɩzɩ-wɛ yɔ 5 nɛ eheyi-wɛ se, patɩŋnɩ pa-KƖPAƔLƲ Ɛsɔ Aɖakaɣ ɛsɩndaa nɛ petii Yɔɔrɩdaŋ pɔɔ hɛkʋ taa. Se, petiba lɛ, paa weyi ekuli pɩyɛ kʋɖʋmɖɩyɛ nɛ ɛhɔɔlɩ ɛ-hazaɣ yɔɔ. Se, pala ḿbʋ nɛ paa Izirɛɛlɩ cejewiye nɖɩ lɛ, ɖɩwɛnɩ ɖɩ-pɩyɛ. 6 Se, pɛ ána ayeki nɛ samaɣ taa ñɩma tɔzʋʋ mbʋ pɩɩlabɩ peeye yɔ pʋ-yɔɔ. Se, ye wiɖiyi pe-piya ɛpɔzɩ-wɛ se, ɛbɛɛ pɛ ána akɛnɩ-wɛ lɛ? 7 Pocosi-wɛ se, Yɔɔrɩdaŋ pɔɔ taa lɩm sɩŋ alɩwaatʋ ndʋ pɛɖɛzaɣnɩ KƖPAƔLƲ Nɔɔ Haʋ Aɖakaɣ yɔ. Se, toovenim lɛ, Yɔɔrɩdaŋ pɔɔ taa lɩm sɩŋ alɩwaatʋ ndʋ pɛɖɛzaɣnɩ KƖPAƔLƲ Ɛsɔ Nɔɔ Haʋ Aɖakaɣ yɔ nɛ pɛ ana ayeki nɛ mbaa Izirɛɛlɩ ñɩma pɔtɔzʋʋ mbʋ pɩɩlabɩ peeye yɔ, pʋ-yɔɔ tam yɔɔ.
8 Mbʋʋ abalaa ḿba, palabɩ ɛzɩ Yoozuuwee heyuu-wɛ yɔ. Pokuli pɛ hiu nɛ naalɛ (12) Yɔɔrɩdaŋ pɔɔ hɛkʋ taa, paa Izirɛɛlɩ cejewiye nɖɩ nɛ ɖɩ-pɩyɛ kʋɖʋɖɩyɛ ɛzɩ KƖPAƔLƲ maɣmaɣ keheyuu Yoozuuwee yɔ. Pokuli-yɛ lɛ, pɛkpɛndɩnɩ-yɛ nɛ powoni pasɩɩ ɖenɖe pasʋ ɖoó ána yɔ. 9 Pʋwayɩ lɛ, Yoozuuwee kpaɣ ɖɔɖɔ pɛ lɛɛna hiu nɛ naalɛ (12) nɛ esiɣ-yɛ Yɔɔrɩdaŋ pɔɔ hɛkʋ taa ɖenɖe cɔjɔnaa mba pɔhɔɔlɩ Ɛsɔ Nɔɔ Haʋ Aɖakaɣ yɔ paasɩŋa yɔ. Pɛ ána awɛ peeye halɩ nɛ sɔnɔ.
10 Se, ɛnʋ heyiɣ-wɛ se, cɔjɔnaa mba pɔhɔɔlɩ Aɖakaɣ yɔ, paasɩŋ Yɔɔrɩdaŋ pɔɔ hɛkʋ taa ḿbʋ nɛ pʋkɔɔ pɩsɩnɩ alɩwaatʋ ndʋ samaɣ labɩ mbʋ pɩ-tɩŋa payɩ KƖPAƔLƲ tɩŋnɩ Yoozuuwee yɔ nɛ eheyi-kɛ yɔ. Mbʋʋ Yoozuuwee labɩ mbʋ Mooyiizi keheyi-i yɔ pɩtɩŋa. Pʋwayɩ lɛ, samaɣ kpedesi se kɛɖɛzɩ pɔɔ. 11 Samaɣ tɩŋa tɛm ɖɛzʋʋ pɔɔ nɛ kakpa kideŋ lɛɛkʋ yɔɔ lɛ, cɔjɔnaa hɔɔlɩ KƖPAƔLƲ Aɖakaɣ nɛ patasɩ ɖɛʋ kɔ-nɔɔ. 12 Ruubɛɛnɩ cejewiye nɛ Gaadɩ ñɩnɖɛ nɛ Manaasee ñɩndɛ hɔɔlʋʋ lɛɛkʋ pa-taa youlaɖaa kɛɖɛnɩ samaɣ nɔɔ nɛ pɛɖɛzɩ pɔɔ ɛzɩ Mooyiizi keheyuu-wɛ yɔ a. 13 Pɩlabɩ ḿbʋ lɛ, youlaɖaa kutokiŋ nɩɩnaza (40000) mba pɔñɔɔzɩ pa-tɩ yɔ, patɩŋnɩ KƖPAƔLƲ ɛsɩndaa nɛ pɛɖɛzɩ pɔɔ se powolo Yeeriikoo kɛdɛɛŋa taa. 14 Kɩyakʋ ŋgʋ kiwiyee, KƖPAƔLƲ kpazɩ Yoozuuwee nɛ Izirɛɛlɩ ñɩma tɩŋa na kaɣlaa nɛ pañam-ɩ ɛzɩ paañam Mooyiizi yɔ, e-wezuu caɣʋ tɩŋa.
15 Pʋwayɩ lɛ, KƖPAƔLƲ heyi Yoozuuwee se, 16 éheyi cɔjɔnaa mba pɔhɔɔlɩ Ɛsɔ Nɔɔ Haʋ Aɖakaɣ ŋga yɔ se, palɩɩ Yɔɔrɩdaŋ pɔɔ taa. 17 Ɖɩnɛɛ Yoozuuwee ha cɔjɔnaa nɔɔ se, palɩɩ peeye. 18 Nɛ paba la ḿbʋ ɖɔɖɔ. Pɔkɔm patɩɖʋʋ nɩŋgbaŋgaɣ kideŋ yɔɔ lɛ, lɩm pazɩ kpem pɔɔ taa nɛ pisu ɛzɩ ɖooo lɛ yɔ. 19 Fenaɣ kajalaɣ ñɩŋga, kɩyakʋ hiu ñɩŋgʋ wiye b, Izirɛɛlɩ ñɩma mba patɩŋa pɛɖɛzɩ Yɔɔrɩdaŋ pɔɔ mbʋ. Pɛɖɛzaa lɛ, pakpa nɛ pesiɣ pa-kɩɖanɖɩŋ Giligaalɩ tɛtʋ taa nɛ pacaɣ. Giligaalɩ wɛ Yeeriikoo nɛ wɩsɩ ɖɩlɩyɛ kiŋ.
20 Piyele pɛ hiu nɛ naalɛ (12) wena paakpaɣ Yɔɔrɩdaŋ pɔɔ taa yɔ, Giligaalɩ peeye, Yoozuuwee siɣ-yɛ. 21 Peeye eheyi Izirɛɛlɩ ñɩma se, ye wiɖiyi pe-piya ɛpɔzɩ-wɛ se, palɩzɩ-wɛ pɛ ana a-tɔbʋʋ lɛ, 22 peheyi-wɛ se, atɔzʋʋ-wɛ, ɛzɩma mbʋ Izirɛɛlɩ ñɩma ɖɛzɩ Yɔɔrɩdaŋ pɔɔ nɩŋgbanzɩ waɣ waɣ yɔ. 23 Se, toovenim lɛ, pa-KƖPAƔLƲ Ɛsɔ yeba nɛ Yɔɔrɩdaŋ pɔɔ taa lɩm sɔɔ se ḿba ɛpɩzɩ pɛɖɛzɩ. Mbʋ ɖɔɖɔ eeyeba nɛ Kañɩŋgbala teŋgu taa lɩm sɔɔ nɛ ḿba ɖɔ nɛ pɛɖɛɛ waɣ waɣ c. 24 Se, ɛlabɩ mbʋ se tɛtʋ yɔɔ ajɛɛ tɩŋa taa ñɩma ɛna ɛzɩma mbʋ ɛnʋʋ KƖPAƔLƲ e-ɖoŋ fɛyɩ kamaɣ yɔ. Piyele ḿba ña pa-KƖPAƔLƲ Ɛsɔ tam yɔɔ.