3
Izirɛɛlɩ ñɩma ɖɛzʋʋ Yɔɔrɩdaŋ pɔɔ nɩŋgbanzɩ waɣ waɣ yɔ
1 Kifema lɛ, Yoozuuwee nɛ Izirɛɛlɩ ñɩma pakʋyɩ Sitim, tanandɛɛ cu nɛ petii Yɔɔrɩdaŋ pɔɔ nɔɔ. Petiba lɛ, pacaɣ peeye se pɩcɔ pɛɖɛzɩ-kɛ. 2 Pɛwɛ peeye ḿbʋ lɛ, Samaɣ nɔsɩ yɔɔ ɖɛyaa kpaɣ kɩyakɩŋ naadozo nɛ pɔcɔɔ ɖikpeɣliye taa payɩ 3 nɛ peheyiɣ samaɣ se, Leevii liɖe taa cɔjɔnaa a kɔŋ hɔɔlʋʋ pa-KƖPAƔLƲ Ɛsɔ Nɔɔ Haʋ Aɖakaɣ nɛ pɛɖɛɛ. Ye pana-wɛ ḿbʋ lɛ, pákʋyɩ lone nɖɩ ɖɩ-taa pɛwɛɛ yɔ nɛ patɩŋ pa-wayɩ. 4 Pʋbʋ panaɣ nʋmɔʋ ŋgʋ patɩŋ yɔ. Mbʋ pʋyɔɔ yɔ, patatɩŋ peeye wiɖiyi nɛ pana. Se, patɩŋɩɣ pa-wayɩ lɛ, pataakɩlɩ Aɖakaɣ ñɔtɩnaʋ kpam. Ɛlɛ, peyele nɛ koposini-wɛ ɛzɩ kiiloomɛta kʋɖʋmʋʋ yɔ.
5 Pʋwayɩ lɛ, Yoozuuwee heyi samaɣ taa ñɩma se, pala cɩɖɩ cɩɖɩ wɛtʋ sɔnzɩ . Mbʋ pʋyɔɔ yɔ, kɩfeŋ yɔ, KƖPAƔLƲ lakɩ hama lakasɩ pɛ-hɛkʋ taa. 6 Tɛʋ kɔm kife lɛ, eheyi cɔjɔnaa se, pakpaɣ Nɔɔ Haʋ Aɖakaɣ nɛ pɔhɔɔlɩ nɛ pɛɖɛɛ samaɣ taa ñɩma nɔɔ. Nɛ pala ḿbʋ ɖɔɖɔ.
7 Pɩlabɩ ḿbʋ lɛ, KƖPAƔLƲ heyi Yoozuuwee se, pɩkpaɣʋnɩ puwiye yɔ, ɛnʋ yeki nɛ ɛtɛzɩ kpaʋ ɖoŋ Izirɛɛlɩ ñɩma tɩŋa ɛsɩndaa nɛ pana se, ɛnʋ wɛɣ ɛ-cɔlɔ ɛzɩ ɛnʋ kɛwɛʋ Mooyiizi cɔlɔ yɔ. 8 Se, ɛnʋʋ Yoozuuwee lɛ, éheyi cɔjɔnaa mba pɔhɔɔlɩ Nɔɔ Haʋ Aɖakaɣ yɔ se, pɔkɔm petii Yɔɔrɩdaŋ pɔɔ taa lɛ, pasɩŋ lɩm taa. 9 Pʋwayɩ lɛ, Yoozuuwee heyi Izirɛɛlɩ ñɩma se, pɔ́ñɔtɩnɩ-ɩ nɛ panɩɩ ndʋ pa-KƖPAƔLƲ Ɛsɔ heyiɣ-wɛ yɔ. 10 Se, pʋwɛɛ se petisi se, Ɛsɔ wezuu tʋ wɛ pɛ-hɛkʋ taa, se, ɛkaɣ ɖɔɔnʋʋ Kanaanɩ nɛ Hɛɛtɩ nɛ Hiwii nɛ Periizii nɛ Girigaasii nɛ Amoorii nɛ Yeebuusii pe-liɖe taa ñɩma nɛ pɩcɔ patalɩ. 11 Se, toovenim lɛ, cɔjɔnaa mba pɔhɔɔlɩ kedeŋga kpeekpe KƖPAƔLƲ Nɔɔ Haʋ Aɖakaɣ yɔ, pakaɣ-wɛ ɖɛʋ nɔɔ nɛ pɛɖɛzɩnɩ-kɛ Yɔɔrɩdaŋ pɔɔ. 12 Se, lɛɛlɛɛyɔ, palɩzɩ ɛyaa hiu nɛ naalɛ (12) Izirɛɛlɩ ñɩma cejewe taa. Se, palɩzɩ paa cejewiye nɖɩ ɖɩ-taa ɛyʋ kʋɖʋm. 13 Se, cɔjɔnaa mba pɔhɔɔlɩ kedeŋa kpeekpe KƖPAƔLƲ Ɛsɔ Nɔɔ Haʋ Aɖakaɣ yɔ, patɩkɔŋ paɖʋ nɩŋgbaŋaɣ Yɔɔrɩdaŋ pɔɔ taa lɩm taa lɛ, lɩm mbʋ pɩlɩɣnɩ hayo yɔ, piyele kpem. Pɩsɩŋɩɣ ɛzɩ koloŋa yɔ.
14 Mbʋʋ pɩlaba nɛ samaɣ kʋyɩ ka-ɖikpeɣliye taa se kɛɖɛzɩɣ Yɔɔrɩdaŋ pɔɔ. Kakʋyɩ ḿbʋ lɛ, cɔjɔnaa mba pɔhɔɔlɩ Ɛsɔ Nɔɔ Haʋ Aɖakaɣ yɔ, pɛɖɛɛ-wɛ nɔɔ. 15 Pɩɩkɛ tɔɔnaɣ kʋm alɩwaatʋ. Tɩ-taa, lɩm suu Yɔɔrɩdaŋ pɔɔ taa nɛ pɩwadɩɣ b. Ɛlɛ, Ɛsɔ Aɖakaɣ hɔɔlɩyaa talɩ Yɔɔrɩdaŋ pɔɔ taa nɛ patɩɖʋʋ nɩŋgbaŋaɣ lɩm taa lɛ, 16 lɩm mbʋ pɩlɩɣnɩ hayo yɔ, piyele kpem. Pɩsɩŋaa ɛzɩ koloŋa yɔ. Pɩsɩŋ kpaɣ tɛtʋ ndʋ payaɣ se Adam yɔ tɩ-taa, Carɩtaanɩ cɔlɔ nɛ pɩɖɛɛ ɖooo poliŋ. Piyele mbʋ pɩwɛnɩ hadɛ kiŋ yɔ, pɩtɛzɩ kpem nɛ pitii Sɩm Teŋgu taa. Mbʋ hanɩ samaɣ waɖɛ nɛ kɛɖɛzɩ Yɔɔrɩdaŋ pɔɔ, Yeeriikoo tɛtʋ ɛsɩndaa. 17 Cɔjɔnaa mba pɔhɔɔlɩ KƖPAƔLƲ Nɔɔ Haʋ Aɖakaɣ yɔ, petibi pɔɔ hɛkʋ taa ɖenɖe pɩwɩlɩ waɣ waɣ yɔ nɛ pasɩŋ nɛ Izirɛɛlɩ ñɩma ɖɛzɩɣ pɔɔ nɩŋgbanzɩ waɣ waɣ nɛ pɩkɔɔ pɩsɩnɩ alɩwaatʋ ndʋ pɛɖɛzɩ pa-tɩŋa payɩ yɔ.