2
Yoozuuwee tiyuu cɔŋɩyaa naalɛ Yeeriikoo tɛtʋ taa yɔ
1 Nakʋyʋ wiye Nuuni pɩyalʋ Yoozuuwee kʋsɩ ɛyaa nabɛyɛ naalɛ Sitim a ɖikpeɣliye taa se powolo mɛsaɣ tɛɛ nɛ pɔcɔŋ Yeeriikoo tɛtʋ nɛ ɛjaɖɛ nɖɩ ɖɩ-taa tɩ-wɛɛ yɔ. Paba woba lɛ, pasʋʋ halʋ acɛyɛ tʋ weyi payaɣ se Rahaabɩ b yɔ, ɛ-tɛ nɛ pɛhɛnɩ peeye. 2 Peeye nɔɔyʋ woba nɛ ɛtaɣzɩ Yeeriikoo wiyaʋ se Izirɛɛlɩ ñɩma nabɛyɛ wobi ɖoó ána a-taa tɛtʋ taa se pɔcɔŋ-tʋ. 3 Wiyaʋ nɩ ḿbʋ lɛ, etiyi se peheyi Rahaabɩ se, ɛyaa mba pasʋ ɛ́lɛ tɛ yɔ, powobi tɛtʋ taa se pɔcɔŋ nɛ patɩlɩ-tʋ siŋŋ. Se, ɛlɩzɩ-wɛ nɛ ɛ́cɛlɩ ḿba. 4-5 Powobi peheyi Rahaabɩ ḿbʋ lɛ, ɛ́lɛ heyi-wɛ se, toovenim ɛyaa mba powobi ɛnʋ tɛ, ɛlɛ, ɛnʋ tana se pɛ-tɛ lɛ le. Se, ɖoó kɔm piyu nɛ pacaɣ se paɖɩɣ tɛtʋ nɔnɔɔ lɛ, palɩɩ nɛ ɛnʋ tana ɖenɖe pɛɖɛnaa yɔ. Se, ye patɩŋ pa-wayɩ kpɛdɛɛ yɔ, papɩzɩɣ pehiɣ-wɛ.
Ŋgʋ ɛɛkpaɣ pa-naalɛ nɛ ɛmɛsɩ.
6 Toovenim lɛ, ɛɛkpaɣ ɛyaa ḿba nɛ ɛkpanɩ-wɛ ɛ-ɖɩɣa ñʋʋ taa nɛ ɛmɛsɩ-wɛ ñɩyʋʋ nakʋyʋ ɖaŋ weyi ɛɛsɩ peeye yɔ ɛ-tɛɛ. 7 Eheyi mba wiyaʋ tiyaa yɔ́ɔ ḿbʋ lɛ, pakpaɣ nʋmɔʋ se paɖʋʋ pa-wayɩ. Patɩkʋyɩ tɛtʋ taa nɛ palɩɩ lɛ, paɖɩɣ tɩ-nɔnɔɔ. Peeye pakpaɣ nʋmɔʋ ŋgʋ kiwokini ɖenɖe pɛɖɛzɩɣ Yɔɔrɩdaŋ pɔɔ nɛ nɩŋgbanzɩ yɔ nɛ pañɩnɩɣ-wɛ. 8 Alɩwaatʋ ńdʋ lɛ, Rahaabɩ ñaakpa ɛ-ɖɩɣa ñʋʋ taa. Ɛkpawa lɛ, ɛyaa ḿba pa-naalɛ potoɖoda. 9 Peeye eheyi-wɛ se, ɛnʋ nawa se KƖPAƔLƲ ɖʋzɩ ɛjaɖɛ ńɖɩɩ pa nɛ pa-samaɣ pe-nesi taa. Se, sɔɔndʋ kpa mbaa ɛjaɖɛ taa ñɩma tɩŋa siŋŋ nɛ wɛ nɛ ḿba seliɣ. 10 Se, toovenim lɛ, ḿba nɩwa se alɩwaatʋ ndʋ palɩnɩ Ejipiti yɔ, KƖPAƔLƲ yeba nɛ Kañɩŋgbala teŋgu c lɩm sɔɔ d nɛ pɛɖɛzɩ nɩŋgbanzɩ waɣ waɣ. Se, ḿba nɩwa ɖɔɖɔ se, pakʋ Amoorii ñɩma awiya naalɛ, Sihɔɔnɩ nɛ Ɔɔgɩ e, Yɔɔrɩdaŋ pɔɔ wɩsɩ ɖɩlɩyɛ kiŋ nɛ pɛwɛɛkɩ a-ñɩm tɩŋa. 11 Se, ḿba nɩ tɔm ńdʋ lɛ, pitii ḿba tome taa yɔɔɔ nɛ ḿba tatasɩ wɛnaʋ abalɩtʋ se pakaɖɩnɩ-wɛ. Toovenim lɛ, pa-KƖPAƔLƲ Ɛsɔ lɛ ɛsɔdaa nɛ tataa peeye Ɛsɔ. 12 Se, póɖuuni KƖPAƔLƲ se palakɩ ɛnʋ hɔʋ taa ñɩma ɖeu ɖɔɖɔ ɛzɩ ɛnʋ labʋ-wɛ yɔ. Se, pawɩlɩ ɛnʋʋ mbʋ pɩwɩlɩɣ se, 13 peyeki ɛnʋ caa nɛ e-ɖoo nɛ ɛ-ɖalaa nɛ ɛ-kɔɔnaa nɛ pɔ-hɔŋ taa ñɩma tɩŋa payɩ nɛ pɛwɛɛ wezuu yɔ. Se, paayeki nɛ pakʋ ḿba. 14 Ɖɩnɛɛ ɛyaa ḿba pocosi-i se, ḿba ɖuwaa se, ye eteheyi nɔɔyʋ mbʋ pʋyɔɔ ḿba woba yɔ́ɔ yɔ, paa sɩm yɔ, ḿba sɩkɩ ɛ-yɔɔ. Se, alɩwaatʋ ndʋ KƖPAƔLƲ ɖʋzʋʋ tɛtʋ ndʋʋ ḿba nesi taa yɔ, ḿba lakɩ-ɩ ɖeu nɛ ḿba ɖɔ mbʋ ḿba ɖʋwa yɔ pʋ-yɔɔ.
15 Rahaabɩ ɖɩɣa kɛwɛ koloŋa sɔsɔɔ ńga kɔjɔ tɛtʋ nɛ kata yɔ, kɔ-yɔɔ. Ɛ nɛ wɛ pɛtɛm yɔɔdʋʋ lɛ, ɛkpaɣ nimiye naɖɩyɛ nɛ etisini-wɛ nɛ muntoɖe pɔʋ tataa. 16 Etisaɣ-wɛ ḿbʋ lɛ, eheyi-wɛ se, powolo pɛmɛlɩ pʋŋ taa nɛ ḿba pañɩnɩɣ-wɛ yɔ, pataana-wɛ. Se, pɛ́mɛlɩ peeye mbʋʋ kɩyakɩŋ naadozo nɛ pɩkɔɔ pɩsɩnɩ alɩwaatʋ ndʋ paba kitaa yɔ. Pʋbʋ papɩzɩɣ pakpaɣ pa-nʋmɔʋ nɛ pɛɖɛɛ. 17 Peeye ɛyaa ḿba peheyi-i se, ḿba lakɩ ɖuúu mbʋ eyeba nɛ ḿba ɖuu yɔ pʋ-yɔɔ. 18 Se, mbʋ pɩwɛɛ se ɛla yɔ lɛ se, ḿba nɛ pa-ñɩma pɔkɔm pasʋʋ ɛjaɖɛ taa lɛ, ɛkpaɣ nimaɣ kɩsɛmaɣ nɛ ɛta muntoɖe nɖɩ ɛlɩzɩnɩ ḿba yɔ ɖɩ-yɔɔ nɛ ɛ́yaa ɛ-caa nɛ e-ɖoo nɛ ɛ-ɖalaa nɛ e-newaa nɛ ɛ-hɔʋ taa ñɩma tɩŋa nɛ pekpeɣli ɛ-tɛ. 19 Se, ye nɔɔyʋ ɛlɩ ɛnʋʋ Rahaabɩ ɛ-tɛ nɛ pakʋ pʋdʋ yɔ, pʋdʋ ñɩndʋ lɛ, pɩtɛkɛ ḿba ñɩndʋ. Ɛlɛ, ye ḿba ɛkʋ nɔɔyʋ ɛ-ɖɩɣa taa yɔ, ḿba ñʋʋ taa pɩtɛŋ. 20 Se, ɛlɛ, ye eheyi ɛyaa, ḿba lɩmaɣza yɔ, ɖɩnɛ ḿba lɩ ɖuúu ḿbʋ eheyi ḿba nɛ poɖuu yɔ pɩ-taa. 21 Pɔyɔɔdɩ ḿbʋ lɛ, Rahaabɩ tisi se ɛɛɛ! Peeye etisi ɛyaa ḿba pa-naalɛ se pɛɖɛɛ. Pɛɖɛwa lɛ, ɛkpaɣ nimaɣ kɩsɛmaɣ nɛ ɛta muntoɖe yɔɔ. 22 Cɔŋɩyaa ḿba pɛɖɛwa nɛ pɔkɔɔ patalɩ pʋŋ taa lɛ, pɛmɛlɩ peeye nɛ pɩkɔɔ pɩsɩnɩ alɩwaatʋ ńdʋ ḿba paɖʋwaɣ pa-wayɩ yɔ, papɩsɩ Yeeriikoo tɛtʋ taa yɔ. Paamɛlɩ peeye kɩyakɩŋ naadozo nɛ paba ñɩnɩ-wɛ hɔɔlɩŋ tɩŋa nɛ patana-wɛ. 23 Ɖɩnɛɛ cɔŋɩyaa ḿba pa-naalɛ palɩnɩ pa-ɖɩmɛlɩyɛ taa nɛ petii pʋŋ nɛ pɛɖɛzɩ Yɔɔrɩdaŋ pɔɔ nɛ powolo Yoozuuwee cɔlɔ. Patalaa lɛ, pɛkɛdɩ ɛ́lɛ mbʋ pɩtɩŋa payɩ pɩɩtalɩ-wɛ yɔ. 24 Peheyi-i se, paa pɩɩla ɛzɩma, KƖPAƔLƲ kpaɣ ɛjaɖɛ nɖɩ ɖɩ-tɩŋa nɛ ɛɖʋzɩ pa-tɩŋa pe-nesi taa. Se, halɩ sɔɔndʋ kakpa ɛjaɖɛ ńɖɩ ɖɩ-taa ñɩma nɛ nɔɔyʋ taawɛnɩ abalɩtʋ se ɛkaɖɩnɩ ḿba.