2
Palakʋʋ Daaviidi sɔnzɩ Hɛbɩrɔɔnɩ tɛtʋ taa se ɛkɛ wiyaʋ yɔ
1 Pʋwayɩ lɛ, Daaviidi pɔzɩ KƖPAƔLƲ se, ɛnʋ pɩzɩɣ ewolo Yuuda cejewiye taa ñɩma tɛtʋ natʋyʋ taa yaa we? KƖPAƔLƲ cosi se, ɛɛɛ. Daaviidi tasɩ-ɩ pɔzʋʋ se, ɛnʋ ewolo tɛtʋ ndʋ tɩ-taa? KƖPAƔLƲ cosi-i se, ewolo Hɛbɩrɔɔnɩ ñɩndʋ taa. 2 Peeye Daaviidi nɛ ɛ-halaa pakʋyaa nɛ powolo peeye. Paba wɛ naalɛ. Payaɣ lɛlʋ se, Ahiinowam, ɛ-tɛ lɛ Yiizireeyɛɛlɩ tɛtʋ taa, nɛ lɛlʋ se, Aviigayiili. Ɛ́lɛ ñɛkɛ Naavaalɩ lelu, ɛ-tɛ lɛ Kaarɩmɛɛlɩ tɛtʋ taa. 3 Ɛɛkpɛndɩnɩ ɖɔɖɔ ɛ- taabalaa nɛ paba hɔŋ taa ñɩma nɛ powolo pɛwɛɛ tɛtʋ ndʋ ndʋ tɩñɔtɩnɩ Hɛbɩrɔɔnɩ ñɩndʋ yɔ, tɩ-taa. 4 Ɖaaviidi wɛ Hɛbɩrɔɔnɩ ḿbʋ lɛ, Yuudaa cejewiye taa ñɩma wolo nɛ papɩyɩ ɛ-ñʋʋ taa num nɛ ɛkɛ pe-wiyaʋ.
Nakʋyʋ wiye lɛ, nɔɔyʋ wolo eheyi Daaviidi se, Gaalaadɩ egeetiye taa Yaavɛɛsɩ tɛtʋ taa ñɩma pimni Sawʋlɩ. v 5 Peeye ɛ́lɛ tiyaa se peheyi-wɛ se, KƖPAƔLƲ ɛwazɩ pɔ-yɔɔ, mbʋ pʋyɔɔ yɔ, pepim ɛnʋ caa Sawʋlɩ nɛ pawɩlɩ se palakɩ mbʋ ɛ́lɛ ɖʋwa yɔ. 6 Se, KƖPAƔLƲ labɩ-wɛ ɖeu nɛ mbʋ ɛɖʋwa yɔ ɖɔɖɔ nɛ piyele ɛnʋ ñalabɩ-wɛ ɖeu ɖɔɖɔ mbʋ pʋyɔɔ yɔ, palabɩ mbʋ. 7 Se, lɛɛlɛɛyɔ, pañaɣ pana nɛ pɛwɛɛ abalɩtʋ. Se pa-caa sɩba nɛ Yuuda cejewiye taa ñɩma labɩ-ɩ sɔnzɩ nɛ ɛkɛ pe-wiyaʋ
Palɩzʋʋ Iseebaalɩ se ɛkɛ Izirɛɛlɩ ñɩma wiyaʋ yɔ
8 NaKʋyʋ wiye Sawʋlɩ sɔɔjanaa ñʋʋdʋ sɔsɔ, Avɩnɛɛrɩ kpaɣ Isiboosɛɛtɩa nɛ ewoni-i Mahanayim tɛtʋb. taa. 9 Peeye ɛlabɩ-ɩ sɔnzɩ nɛ ɛkɛ Gaalaadɩ nɛ Asɛɛrɩ nɛ Yiizireeyɛɛlɩ nɛ Efiraayim nɛ Bineyaamiini pa-ageeta taa ñɩma pe-wiyaʋ. Tobi taa se Izirɛɛlɩ ɛjaɖɛ tɩŋa payɩ. 10 Isiboosɛɛtɩ tɔkaɣ Izirɛɛlɩ ɛjaɖɛ kewiyaɣ lɛ, ɛɛwɛnɩ pɩnzɩ nɩɩnaza (40). Ɛtɔɔ-kɛ pɩnzɩ naalɛ. Yuudaa cejewiye taa ñɩma ɖeke ketizina se Daaviidi lɛ pe-wiyaʋ. 11 Hɛbɩrɔɔnɩ tɛtʋ taa ɛɛwɛɛ nɛ ɛkɛ pe-wiyaʋ pɩnzɩ lʋbɛ (7) nɛ hɔɔlʋʋ.
Yuuda ñɩma nɛ Izirɛɛlɩ ñɩma poyou Gabawɔɔ tɛtʋ taa yɔ
12 Nakʋyʋ wiye Nɛɛrɩ pɩyalʋ Avɩnɛɛrɩ nɛ Sawʋlɩ ñɩnʋ siboosɛɛtɩ pa-tʋmlaɖaa kʋyɩ Mahanayim tɛtʋ taa nɛ pakpaɣ Gabawɔɔ ñɩndʋ nʋmɔʋ. 13 Yowaabɩ weyi payaɣ e-ɖoo se Ceruyaa yɔ nɛ Daaviidi tʋmlaɖaa paba ñakpaɣ ɖɔɖɔ nʋmɔʋ. Pɛɖɛɣaɣ lɛ, pakatɩ kajalaɣ ñɩma Gabawɔɔ kujomuu cɔlɔ nɛ tikasɩ nzɩ sɩ-naalɛ lɛlaa caɣ kujomuu ŋgʋ kɩ-hɔɔlʋʋ lɛɛkʋ, nɛ lɛlaa hɔɔlʋʋ lɛɛkʋ. 14 Pɛwɛ peeye mbʋ lɛ, Avɩnɛɛrɩ heyi Yowaabɩ se, ɛnʋ caɣ se pɔ-sɔɔjanaa ɛlɩɩ nɛ poyoo ḿba ɛsɩndaa. Yowaabɩ se ɛnʋ tisaa se poyoo. 15 Peeye sɔɔjanaa lɩwa. Bineyaamiini cejewiye taa ñɩma mba pɛkɛ Sawʋlɩ pɩyalʋ sɔɔjanaa yɔ, pɛwɛ hiu nɛ naalɛ (12) nɛ Daaviidi ñɩma ɖɔɖɔ mbʋ. 16 Pa-lɩwa lɛ, paa sɔɔja weyi ɛkpa weyi ɛ nɛ ɩ poyou yɔ ɛ-ñʋʋ nɛ pɔsɔ ɖama hʋyɩŋ taa sɩsɩ nɛ pɛkpɛndɩ pɔtɔlɩ pa-tɩŋa. Payaɣ Gabawɔɔ tɛtʋ hɔɔlʋʋ ŋgʋ se "Ɛwasɩ hayɩm".
17 Kɩyakʋ ŋgʋ ɖɔɖɔ poyo you sɔsɔʋ nakʋyʋ, nɛ Daaviidi sɔɔjanaa wa Avɩnɛɛrɩ ñɩma. 18 Ywaabɩ nɛ Avisayi nɛ Asahɛɛlɩ mba po-ɖoo lɛ Ceruyaa yɔ, paawɛ peeye. Asahɛɛlɩ seaɣ ɛ-wayɩ fɛyɩ ɛzɩ nam seɣu tayɛ siŋŋ yɔ. 19 Pɩkɛdaa lɛ, ɛpazɩ Avɩnɛɛrɩ ɖɔɔnʋʋ kaahɛzaɣ. 20 Peeye Avɩnɛɛrɩ kisaa nɛ ɛpɔzʋʋ-ɩ se, ɛnʋʋ Asahɛɛlɩ toovenim naa we? Ecosi-i se, ɛnʋ maɣmaɣ. 21 Avɩnɛɛrɩ tasɩ-ɩ heyuu se, eyele ɛnʋ nɛ ɛɖɔɔnɩ nɔɔyʋ ɛ-nɩwaŋ yɔɔ, yaa ɛ-nɩmɩyɛ yɔɔ. Se ɛla hɛɛ nɛ ɛkpa sɔɔjanaa kɩfama mba pa-taa nɔɔyʋ nɛ ɛmʋ ɛ́lɛ you wondu. Ɛlɛ, Asahɛɛlɩ kizi, nɛ ɛwɛɛ Avɩnɛɛrɩ ɖɔɔnʋʋ yɔɔ. 22 Avɩnɛɛrɩ tasɩ-ɩ heyuu ɖɔɖɔ se, eyele ɛnʋʋ ɖɔɔnʋʋ. Se pɩlabɩ ɛzɩma nɛ ɛcaɣ se ɛnʋ ɛkʋ-ɩ. Se, pʋbʋ, ɛnʋ ɛɛpɩzɩɣ ɛtasɩ cɔnaʋ ɛ-ɖalʋ Yowaabɩ ɛsɩndaa. 23 Ɛlɛ, paa mbʋʋ yɔ, Asahɛɛlɩ kizaa nɛ ɛwɛɛ Avɩnɛɛrɩ wayɩ tam. Peeye ɛ́lɛ kitini ɛ-kɩkpɛzɛŋ nɛ ɛsɔ Asahɛɛlɩ lotu taa nɛ pɩlɩnɩ e-siɣye taa nɛ ɛtɔlɩ peeye nɛ ɛsɩ kpaagbaa. Pɩlabɩ ḿbʋ lɛ, Ɛyaa mba pɛɖɛɣaɣnɩ ɖenɖe Asahɛɛlɩ sɩbɩ mbʋ yɔ, patalɩɣ nɛ pasɩŋɩɣ. 24 Asahɛɛlɩ sɩbɩ ḿbʋ lɛ, Yowaabɩ nɛ Aviisayi papazɩ ɖɔɔnʋʋ Avɩnɛɛrɩ. Wɩsɩ kɔm se sɩɖʋʋ lɛ, patalɩ Giveyaatamaa tɛtʋ taa. Tɩwɛ Giyaatɩ tɛtʋ wɩsɩ ɖɩlɩyɛ hɔɔlʋʋ taa Gabawɔɔ lakʋ nʋmɔʋ taa. 25 Pɩlakaɣ ḿbʋ lɛ, Bineyaamiini cejewiye taa sɔɔjanaa lɩɩ papɩlɩ ɖama Avɩnɛɛrɩ wayɩ nɛ pɛwɛɛ piyaɣ ñʋʋ taa nɛ paɖaŋ. 26 Ɖɩnɛɛ Avɩnɛɛrɩ ya Yowaabɩ nɛ ɛpɔzɩ-ɩ se, pɛwɛɣ pakʋyʋʋ ɖama yɔɔ mbʋ nɛ sɛsɩ nɛ pɛtɛzɩ ɖama yaa we? Se, ɛtana se lakasɩ nzɩ stɛnɩ mbʋ yɔ, pɩwɛ pʋtɔdɩyɛ naa we? Se, ye mbʋ, ɛɖaŋ we se eheyi ɛ-sɔɔjanaa se peyele pa-ñɩma ɖɔɔnʋʋ mbʋ? 27 Peeye Yowaabɩ heyi-i se, ɛnʋ ɖuuni Ɛsɔ se ye ɛtaapɔzɩ ɛnʋʋ mbʋʋ yɔ, ɛnʋ ɛyaa kɛwɛ pa-wayi mbʋʋ nɛ pʋkɔɔ pife tanaŋ tɛɛ, pataayebi-wɛ.
28 Yowaabɩ yɔɔdɩ mbʋ lɛ, eyele nɛ pahʋlɩ ŋgandɩyɛ. Peeye ɛ-sɔɔjanaa yebi Izirɛɛlɩ ñɩma ɖɔɔnʋʋ nɛ you sɩɩ tɩnaɣ. 29 Ɖɩnɛɛ Avɩnɛɛrɩ nɛ ɛ-ɛyaa pɔɖɔm yɔɔrɩdaŋ kajalaŋa taa ɖoo ana ɖoo nɛ a-tɛɛ pilim nɛ powolo pɛtɛzɩ pɔɔ ŋga, nɛ patɩŋnɩ Bitirooni t;rtʋ taa nɛ pɔkɔɔ patalɩ Mahanayim ñɩndʋ taa. 30 Yowaabɩ yebi Avɩnɛɛrɩ ɖɔɔnʋʋ mbʋ lɛ, ekpeɣli ɛ-sɔɔjanaa tɩŋa. Paya pa-hɩla lɛ, Daaviidi sɔɔjanaa hiu nɛ nakʋ (19) ɖeke fɛyɩna nɛ pɩtasɩnɩ Asahɛɛlɩ. 31 Piyele Daaviidi sɔɔjanaa ñakʋ Bineyaamiini cejewiye taa sɔɔjanaa nɛ Avɩnɛɛrɩ ñɩma nasidozo nɛ nɩɩnʋwa nɛ hiu (360). 32 Pakpaɣ Asahɛɛlɩ nɛ powoni Bɛtɩlɛhɛm nɛ pepi ɛ-caa pɩlaʋ taa. Pʋwayɩ lɛ, Yowaabɩ nɛ ɛ-sɔɔjanaa pɔɖɔ ɖoo nɛ a-tɛɛ pilim. Pʋkɔm se pɩñalɩɣ lɛ, patalɩ Hɛbɩrɔɔnɩ tʋtʋ taa.