YOONAASƖ
TAKAYAƔ
Tɔm kiheyitu
Yoonaasɩ takayaɣ fɛyɩ ɛzɩ takayɩsɩ nzɩ pama lɔɔyɩsɩ tɩnaa lɛlaa yɔɔ yɔ. Weyi ɛma Yoonaasɩ takayaɣ yɔ, eteheyi-ɖʋ Ɛsɔ tɔm ndʋ Yoonaasɩ heyi Niiniivi ñɩma yɔ, ɛlɛ, ɛkɛdɩ-ɖʋ ndʋ tɩtalɩ lɔɔyaɣ tʋ Yoonaasɩ yɔ.
Takayaɣ ŋ́ga, kɛwɛ ndɩ, mbʋ pʋyɔɔ yɔ, lɔɔyaɣ tʋ ɛnʋ, ekizaa se ɛɛlakɩ ndʋ Ɛsɔ heyi-i yɔ. Ɛsɔ tiyi Yoonaasɩ se ewolo nɛ ɛyɔɔdɩnɩ Niiniivi tɛtʋ taa ñɩma lɛ, ekizi nɛ ese. Niiniivi kɛ Asiirii ɛjaɖɛ nɖɩ wiyaʋ sɔsɔ cɔŋnɩ ɖɩ-yɔɔ yɔ ɖɩ-taa tɛtʋ sɔsɔtʋ. Ɛtaacaɣ se ewolo eheyi tɔm nɖʋ Ɛsɔ tiyi-i se ewolo eheyi yɔ. Mbʋ pʋyɔɔ yɔ, ɛjaɖɛ nɖɩ ɖɩ-taa ñɩma kɛ Izirɛɛlɩ ñɩma koyindinaa.
Heelim sɔsɔm nabʋyʋ nɛ kpakpayaɣ sɔsɔɔ nakɛyɛ po-ɖoŋ taa Yoonaasɩ ñam Ɛsɔ nɛ ewolo eheyi tɔm ndʋ Ɛsɔ heyi-i yɔ. Ɛlɛ, Niiniivi ñima há pa-kɩwɛɛkɩm siɣye nɛ Ɛsɔ na pa-pʋtɔdɩyɛ lɛ, Yoonaasɩ pana kpanɩ-ɩ.
Pawɩlɩɣ-ɖʋ Yoonaasɩ takayaɣ taa se pɩtɛkɛ Izirɛɛlɩ piya deke Ɛsɔ sɔɔlaa. Ɛsɔɔla kedeŋa kpeekpe yɔɔ ɛyaa nɛ ekpeɣiɣ mba pahaɣ pa-kɩwɛɛkɩm siɣye yɔ patɩŋa payɩ.