YOONAASƖ
TAKAYAƔ
1
Ɛsɔ tiyuu Yoonaasɩ nɛ ekizi nɛ eseɣ yɔ
1 Abalʋ nɔɔyʋ wɛnɩ mbʋ, payaɣ-ɩ se Yoonaasɩ. Ɛkɛ abalʋ weyi payaɣ se Amiitayɩ yɔ ɛ-pɩyalʋ. Nakʋyʋ wiye KƖPAƔLƲ Ɛsɔ heyi Yoonaasɩ ɛnʋ se 2 ɛ́kʋyɩ nɛ éwolo tɛtʋ sɔsɔtʋ ndʋ payaɣ se Niniivi yɔ tɩ-taa nɛ éheyi tɩ-taa ñɩma se ɛnʋʋ KƖPAƔLƲ ɛna ɛzaɣtʋ ndʋ palakɩ yɔ nɛ pɩlɩɩ-ɩ sɔŋ. 3 Ɛlɛ, Yoonaasɩ kizi ɛ-tʋmɩyɛ nɛ ɛkʋyɩ se eseɣ nɛ ewolo tɛtʋ ndʋ payaɣ se Taarɩsiisi yɔ, tɩ-taa nɛ eposini KƖPAƔLƲ. Peeye ewoba tɛtʋ ndʋ payaɣ se Yaafaa yɔ tɩ-taa nɛ ɛmaɣnɩ mɛlɛ nakʋyʋ, kuwokaɣ Taarɩsiisi peeye nɛ ɛhɛyɩ ɛ-ñʋʋ yɔɔ nɛ ɛsʋʋ-kʋ nɛ ɛɖɛɛ peeye se eposini KƖPAƔLƲ.
4 Mɛlɛ ŋgʋ kɩɖɛaɣ lɛ, KƖPAƔLƲ yele nɛ heelim sɔsɔm nabʋyʋ pazɩ mabʋ teŋgu yɔɔ. Pɩmakaɣ ɖoŋ yem fii fii nɛ halɩ pɩcaɣ se pɩpɛlɩ-kʋ. 5 Peeye sɔɔndʋ kpa kɩ-taa tʋmlaɖaa nɛ paa anɩ ɛmakɩ kubusi nɛ ɛyaɣ ɛ-sɩʋ nɛ palɩzɩɣ mɛlɛ taa wondu nɛ pɔlɔʋ teŋgu taa se ku-yuŋ ɛpasɩ. Pɩlakaɣ ḿbʋ lɛ, Yoonaasɩ ñaatibi ɖooo mɛlɛ taa ɖenɖe paɖʋʋ wondu yɔ nɛ ɛhɛnɩ nɛ eɖou ɛzɩ ɛsɩba yɔ.
6 Pɩkɛdaa lɛ, mɛlɛ taa tʋmlaɖaa ñʋʋ tʋ ñɔtɩnɩ Yoonaasɩ nɛ ɛpɔzɩ-ɩ se ɛbɛ lakɩ-ɩ nɛ eɖou? Nɛ eheyi-i se ɛ́kʋyɩ nɛ ɛ́yaa ɛ-sɩʋ ɖɔɖɔ nɛ pʋtɔma yɔ, kɩɩna pa-pʋtɔdɩyɛ nɛ pataatɛŋɛlɩ. 7 Ɛlɛ, mɛlɛ taa tʋmlaɖaa ñanɩnɩ ɖama se páɖʋ miika nɛ pána weyi ɛtɩnɩ pe-kikiluu yɔ. Peeye paɖʋ-kɛ nɛ pɩkpa Yoonaasɩ. 8 Ɖɩnɛɛ petendi-i se eheyi-wɛ ɖenɖe kikiluu ŋ́gʋ kɩlɩnaa yɔ. Ɛpɔpɔzɩ-ɩ se tʋmɩyɛ nɖɩɩ ɛlakɩ? Le ɛlɩnaa? Ɛjaɖɛ nɖɩ ɖɩ-taa tʋ ɛkɛnaa? Kʋnʋŋ ŋgʋ kʋ-tʋ ɛkɛnaa? 9 Ecosi se ɛkɛ Ebiree tʋ nɛ eluŋuu KƖPAƔLƲ Ɛsɔ weyi ɛwɛ ɛsɔdaa yɔ ɛ-tɛɛ. ɛ́lɛ labɩnɩ teŋgu nɛ tɛtʋ. 10 Ecosi ḿbʋ lɛ, ɛkɛdɩ-wɛ ɛ-tɔm tɩŋa nɛ pana se ekizi ɛ-tʋmɩyɛ nɛ eseɣ se eposini KƖPAƔLƲ. Peeye sɔɔndʋ kpa mɛlɛ taa tʋmlaɖaa ḿba nɛ pɔpɔzɩ-ɩ se pɩlabɩ ɛzɩma nɛ ɛla ḿbʋ?
11 Patasɩ-ɩ pɔzʋʋ se ɛzɩma palakɩ-ɩ nɛ teŋgu lɩm hɛɛ? Mbʋ pʋyɔɔ yɔ, pɩtɛzaɣ huu kuhuu. 12 Ecosi-wɛ se pakpaɣ-ɩ nɛ pɔlɔ teŋgu taa, pʋbʋ, kɩ-taa lɩm hɛɣ. Ɛnawa se ɛ-yɔɔ heelim sɔsɔm ḿbʋ pɩcaɣ se pɩkpaɣ-wɛ.
13 Alɩwaatʋ ńdʋ lɛ, mɛlɛ taa tʋmlaɖaa ḿba, pañakaɣ pana se pasaa-kʋ nɛ palɩɩ kidiiliŋ yɔɔ, ɛlɛ, paapɩzɩɣ. Mbʋ pʋyɔɔ yɔ, teŋgu lɩm tɛzaɣ huu kuhuu nɛ pɩcaɣ se pɩkpaɣ-wɛ. 14 Peeye paya KƖPAƔLƲ se ɛ́sɩnɩ-wɛ. Pɔtɔŋaɣ se KƖPAƔLƲ ɛɛ́aayebi-wɛ nɛ pasɩ abalʋ ɛnʋ ɛ-yɔɔ, ɖɔɖɔ lɛ, ɛ́taakpaɣ ɛyʋ weyi patatɩɣyɩ ɛ-tɔm yɔ ɛ-sɩm nɛ ɛsʋʋ pa-ñʋʋ taa. Mbʋ pʋyɔɔ yɔ, ɛnʋʋ KƖPAƔLƲ ɛ-maɣmaɣ e-liu wɛna nɛ eyele nɛ pɩla ḿbʋ. 15 Pʋwayɩ lɛ, pakpaɣ Yoonaasɩ nɛ pɔlɔ teŋgu taa nɛ kɩ-taa lɩm hɛɛ niɣ niɣ. 16 Pɩlabɩ ḿbʋ lɛ, sɔɔndʋ kpa-wɛ nɛ KƖPAƔLƲ nɛ palaa-ɩ kɩlaʋ nɛ pɛpɛlɩ ñɩyʋʋ.