Yoonaasɩ lɛɣzʋʋ wɛtʋ nɛ Ɛsɔ ya ɛ-ñʋʋ yɔ
2
1 Pɔlɔ Yoonaasɩ teŋgu taa ḿbʋ lɛ, KƖPAƔLƲ yele nɛ kpakpayaɣ sɔsɔɔ nakayɛ wolo kelibi-i nɛ ɛwɛɛ ka-taa kɩyakɩŋ naadozo wɩsɩ nɛ ɖoó. 2 Ɛwɛ ka-taa ḿbʋ lɛ, ɛsɛɛ ɛ-KƖPAƔLƲ Ɛsɔ. Ndʋ ɛyɔɔdaa yɔ, ndʋʋ yɔ:
3 Maawɛ laŋpɩsɩyɛ taa nɛ mayaa ñaa KƖPAƔLƲ nɛ ŋnɩnɩ-m.
Maawɛ ɖenɖe sɩɖaa wɛɛ yɔ nɛ mama kubusi nɛ ŋwelisini-m.
4 Ŋkpaɣ-m nɛ ŋlɔ teŋgu taa nɛ mentii ɖooo lɩm tɛɛ
Lɩm hola cɔ-m nɛ pɩta nɛ pɩkpaɣ nɛ pitiki nɛ pɩfalɩɣ mɔ-yɔɔ.
5 Manɖʋ man-taa se: ŋlɔ-m nɛ momposini-ŋ
Ŋgʋ me-liu wɛɛ se mantasɩ naʋ ña-ɖɩɣa.
6 Lɩm walɩ mɔ-yɔɔ, teŋgu lɩm libi-m
Lɩm tɛɛ ñɩtʋ mɛyɩ ma-ñʋʋ.
7 Pitisi-m lɩm tɛɛ limlim a.
Mantalɩ ɖenɖe sɩɖaa wɛɛ yɔ nɛ paɖɩɣ mɔ-yɔɔ kpaagbaa ɖɩɣʋ
Ɛlɛ ñaa man-KƖPAƔLƲ Ɛsɔ, ŋlɩzɩ-m sɩm pɔʋ taa.
8 Mɔntɔm tɛŋaɣ lɛ, mɔntɔzɩ ñaa KƖPAƔLƲ ñɔ-yɔɔ.
Mentendi-ŋ lɛ, ŋnɩɩ ña-ɖɩɣa taa.
9 Mba poluŋuu sɩɩnaa tɛɛ yɔ,
Paha Ɛsɔ sɔɔlɩm siɣye.
10 Piyele ma lɛ, menteɣ hendu nɛ mansamɩ-ŋ nɛ mala-ŋ kɩlaʋ.
Mɛmpɛlɩ ñɩyʋʋ se malakɩ mbʋ yɔ, malakɩ pʋ-nɔɔ taa.
Ña KƖPAƔLƲ, ñayakɩnɩ ɛyaa ñʋʋ.
11 Peeye KƖPAƔLƲ yɔɔdaa nɛ kpakpayaɣ kɛlɛ kohoo Yoonaasɩ nɛ kɔtɔ-ɩ kidiiliŋ yɔɔ.