Yoonaasɩ susuu ɛsɔtɔm Niiniivi yɔ
3
1 Kpakpayaɣ tɔ Yoonaasɩ ḿbʋ lɛ, KƖPAƔLƲ Ɛsɔ heyi-i nabʋlɛ ɖeɖe se 2 ɛ́kʋyɩ nɛ éwolo Niniivi tɛtʋ sɔsɔtʋ taa nɛ éheyi tɩ-taa ñɩma ndʋ ɛnʋʋ KƖPAƔLƲ eheyiɣ-i yɔ.
3 Peeye Yoonaasɩ kʋyaa nɛ ewolo Niniivi ɛzɩ KƖPAƔLƲ heyuu-i yɔ. Niniivi tɛtʋ ńdʋ tɩpaɣlaa pɩtɩɩfɛyɩ nɛ yee ŋsʋ tɩ-taa yɔ, ŋlakɩ kɩyakɩŋ naadozo nɛ pʋcɔ ŋtalɩ tɩ-tɩnaɣ yɔɔ. 4 Ɛtalɩ tɩ-taa lɛ, ɛɖɔ kɩyakʋ nɛ kɩ-tɛɛ nɛ esuzuu se pɩkazɩ kɩyakɩŋ nɩɩnaza (40) nɛ Ɛsɔ pɩsɩ tɛtʋ ndʋ kpɛndɛlɛ.
5 Niniivi ñɩma nɩ ḿbʋ lɛ, pɛwɛnɩ lidaʋ Ɛsɔ yɔɔ nɛ paɖʋ se ɛyaa tɩŋa payɩ ɛ́hɔkɩ nɔɔ kpaɣ sɔsaa nɛ puwolo pɩsɩnɩ piya paa anɩ ésuu kutokiŋ nɛ pɩwɩlɩ se pacaɣ kʋñɔŋ. 6 Niniivi wiyaʋ sɔsɔ nɩ tɔm ndʋ Yoonaasɩ susaɣ yɔ lɛ, ɛ́kʋyɩ e-kiwiyaɣ kpelaɣ yɔɔ nɛ ɛ́hɔzɩ ɛ-awiitoko nɛ esuu kutoku nɛ ewolo ɛcaɣ tɔlɩma taa. 7 Pʋ-wayɩ lɛ, eyele posusi tɛtʋ tɩŋa se ɛ nɛ ɛ-awiibiya paɖʋwa se kpaɣ ɛyaa nɛ puwolo pɩsɩnɩ ɖɩɣa kpɩna tɩŋa payɩ, pa-taa nɔɔyʋ ɛtaatɔɔ pʋyʋ, ɛtaañɔɔ. 8 Pʋwɛɛ se ɛyaa nɛ ɖɩɣa kpɩna pe-kpeekpe pósuu kutokiŋ nɛ pama kubusi payaa Ɛsɔ nɛ paa anɩ ɛlɛɣzɩ lɩmaɣza nɛ ɛlɩzɩ e-nesi ɛ-lakasɩ kɩtɛkɛdɩsɩ tɩŋa payɩ taa. 9 Pɩtatɩlɩ, Ɛsɔ naɣ pa-pʋtɔdɩyɛ nɛ ɛlɛɣzɩ lɩmaɣza nɛ ɛ-pana hɛɛ nɛ pataatasɩ tɛŋɛlʋʋ.
10 Ɛsɔ na mbʋ palakaɣ se pɛlɛɣzɩ lɩmaɣza nɛ palɩzɩ pe-nesi pa-lakasɩ kɩtɛkɛdɩsɩ tɩŋa taa yɔ lɛ, ɛlɛɣzɩ lɩmaɣza nɛ eyele ɛzaɣtʋ ndʋ ɛɛɖʋwa se tɩtalɩɣ-wɛ yɔ.