Ɛsɔ naʋ Niiniivi ñɩma pʋtɔdɩyɛ nɛ Yoonaasɩ pana kpa yɔ
4
1 Yoonaasɩ na mbʋ Ɛsɔ laba yɔ lɛ, pɩcɛyɩ-ɩ pɩŋŋ nɛ halɩ ɛ-pana kpa. 2 Peeye ɛsɛ KƖPAƔLƲ Ɛsɔ. Ndʋ ɛyɔɔda Ɛ-sɛʋ taa yɔ, ndʋʋ yɔ: KƖPAƔLƲ! Pɩtɛkɛ ndʋʋ maayɔɔdɩ alɩwaatʋ ndʋ maawɛ mɛ-ɛjaɖɛ taa yɔ yaa we? Pɩ-maɣmaɣ pʋ-yɔɔ menseɣaɣ se mowolo Tarisiisi. Tovenim lɛ, manawa se ñaa Ɛsɔ, ŋlakɩ ɛyaa camɩyɛ lakasɩ, ŋnaɣ pa-pʋtɔdɩyɛ, ña-pana ɛɛkpaɣnɩ-wɛ yem yem, ŋlakɩ-wɛ lootiye nɛ ŋyeki ɛzaɣtʋ ndʋ ŋɖʋwa se tɩtalɩ-wɛ yɔ. 3 Lɛɛlɛɛyɔ, KƖPAƔLƲ, kpáɣ-m nɛ mɛhɛzɩ. Pɩkɩlɩ weewee se mansɩ ɛzɩ maawɛɛ wezuu yɔ.
4 Ɛlɛ KƖPAƔLƲ pɔzɩ-ɩ se: Ɛwɛnɩ toovenim se ɛ-pana ɛkpa mbʋ yaa we?
5 Pɔpɔzɩ Yoonaasɩ ḿbʋ lɛ, ɛ́kʋyɩ nɛ ɛlɩɩ tɛtʋ nɛ wayɩ wɩsɩɖɩlɩyɛ hɔɔlʋʋ taa nɛ esiɣ kɩɖanɖʋʋ nakʋyʋ nɛ ɛcaɣ kɩ-tɛɛ kusotuu taa se ɛna mbʋ pɩkaɣ labʋ tɛtʋ taa yɔ. 6 Peeye KƖPAƔLƲ Ɛsɔ yeba nɛ loyuu nakʋyʋ ñɔ nɛ kɩkpa kʋlɔ kɩɖanɖʋʋ ŋgʋ kʋ-yɔɔ nɛ kusotuu la Yoonaasɩ yɔɔ nɛ ɛ-laŋɩyɛ hɛɛ. Pɩlabɩ ḿbʋ lɛ, Yoonaasɩ taa la leleŋ nɛ loyuu ŋ́gʋ. 7 Kifem tanaŋ cu lɛ, Ɛsɔ yele nɛ sonzooye naɖɩyɛ wolo ɖɩsɛtɩ loyuu ŋ́gʋ kɩ-tɛɛ nɛ kɩwɩlɩ wɔɔɔ. 8 Wɩsɩ kɔm sɩkpa lɛ, Ɛsɔ yele nɛ heelim nabʋyʋ lɩnɩ wɩsɩɖɩlɩyɛ hɔɔlʋʋ taa nɛ pɩmakɩ, pɩ-taa wɛ houu nɛ wɩsɩ ñaɣ Yoonaasɩ ñʋʋ taa nɛ efiɣni. Peeye ɛ́ya Ɛsɔ se ɛ́kpaɣ-ɩ. Ɛtɔm se pɩkɩlɩ weewee se ɛnʋ ɛsɩ ɛzɩ ɛnʋ kɛwɛ wezuu yɔ.
9 Peeye Ɛsɔ pɔzɩ Yoonaasɩ se: Ɛwɛna toovenim se ɛ-pana ɛkpanɩ loyuu ŋgʋʋ mbʋ yaa we? ɛ́lɛ kɩtɩnɩ Ɛsɔ se: ɛnʋ pana ɛtaakpa se we? Ɛnʋ pana kpawa nɛ halɩ ɛnʋ ñɩnɩɣ sɩm.
10 Ɛlɛ, KƖPAƔLƲ heyi-i se: ña ñanaɣ loyuu pʋtɔdɩyɛ. Ŋgʋ, pɩtɛkɛ ɛnʋʋ Yoonaasɩ eɖuni-kʋ, pɩtɛkɛ ɛnʋ labɩna nɛ kɩpaɣlɩ. Ɖoó naayɛ kʋñɔwa nɛ kɩwɩlɩ ɖoó lɛɛna. 11 Ɛzɩma ɛnʋ Kɩpaɣlʋ ɛɛpɩzɩɣ ɛna Niniivi tɛtʋ pʋtɔdɩyɛ? Tɩkɛ tɛtʋ sɔsɔtʋ, tɩ-taa ñɩma ɖɛ kutokiŋ mɩnʋʋ nɛ nɩɩlɛ (120.000). Paasɩŋ mbʋ pʋwɛ ɖeu nɛ mbʋ pɩfɛyɩ ɖeu yɔ. Ɖɔɖɔ lɛ, kpɩna sakɩyɛ wɛ tɩ-taa.