LAŊHƐZƖYƐ TƆM NDƲ
MAATIYEE
MAWA YƆ
Yesu liɖe tɔm
(Luk 3.23-38)
1
1 Yesu Krɩstʋ weyi ɛ-cɔzɔ lɛ *Daaviidi nɛ ɛlɛ cɔzɔ lɛ *Abraham yɔ, ɛ-cɔzɔnaa hɩla yɔ:
2 Abraham lʋlɩ Izaakɩ, Izaakɩ ñalʋlɩ Yakɔɔbʋ, Yakɔɔbʋ ñalʋlɩ Yuda nɛ ɛ-ɖalaa nɛ e-newaa. 3 Yuda ñalʋlɩ Faarɛɛzɩ nɛ Zaaraa. Payaɣ po-ɖoo se Tamaarɩ. Faarɛɛzɩ ñalʋlɩ Ɛsrɔm, Ɛsrɔm ñalʋlɩ Aram, 4 Aram ñalʋlɩ Aminaadaabɩ, Aminaadaabɩ ñalʋlɩ Naasɔɔnɩ, Naasɔɔnɩ ñalʋlɩ Salɩmɔɔ, 5 Salɩmɔɔ ñalʋlɩ Boozi. Payaɣ Boozi ɛnʋ e-ɖoo se Rahaabɩ. Boozi ñalʋlɩ Obɛɛdɩ. Payaɣ ɛlɛ ɖoo se Ruti. Obɛɛdɩ ñalʋlɩ Yesee 6 nɛ Yesee ñalʋlɩ wiyaʋ sɔsɔ Daaviidi.
*Daaviidi ñalʋlɩ Salomɔɔ. Salomɔɔ ɛnʋ e-ɖoo kɛkɛ sɔɔja Urii halʋ. 7 Salomɔɔ ñalʋlɩ Roboam, Roboam ñalʋlɩ Abiya, Abiya ñalʋlɩ Asafʋ, 8 Asafʋ ñalʋlɩ Yozafatɩ, Yozafatɩ ñalʋlɩ Yoram, Yoram ñalʋlɩ Oziyaasɩ, 9 Oziyaasɩ ñalʋlɩ Yoatam, Yoatam ñalʋlɩ Ahazɩ, Ahazɩ ñalʋlɩ Ezekiyasɩ, 10 Ezekiyasɩ ñalʋlɩ Manaasee, Manaasee ñalʋlɩ Amɔɔnɩ, Amɔɔnɩ ñalʋlɩ Yoziyaasɩ, 11 Yoziyaasɩ ñalʋlɩ Yekooniyaasɩ nɛ e-newaa. Alɩwaatʋ ndʋ tɩ-taa pɛkɛzɩ *Izrɛɛlɩ ñɩma tɛtʋ Babilooni. 12 Pʋbʋ wayɩ Yekooniyaasɩ ñalʋlɩ Salaatɩyɛlɩ, Salaatɩyɛlɩ ñalʋlɩ Zorobaabɛɛlɩ, 13 Zorobaabɛɛlɩ ñalʋlɩ Abiyudi, Abiyudi ñalʋlɩ Eliyaakim, Eliyaakim ñalʋlɩ Azɔɔrɩ, 14 Azɔɔrɩ ñalʋlɩ Sadɔɔkɩ, Sadɔɔkɩ ñalʋlɩ Akim, Akim ñalʋlɩ Eliyudi 15 Eliyudi ñalʋlɩ Eleyazaarɩ, Eleyazaarɩ ñalʋlɩ Maataɣ, Maataɣ ñalʋlɩ Yakɔɔbʋ 16 nɛ Yakɔɔbʋ ñalʋlɩ *Yozɛɛfʋ nɛ ɛlɛ kpaɣ *Maarɩɩ. Maarɩɩ ɛnʋ ɛlʋlɩnɩ Yesu weyi payaɣ se Krɩstʋ yɔ, pʋ-tɔbʋʋ se *Weyi Ɛsɔ Lɩzaa Yɔ. 17 Ye mbʋ, pɩkpaɣʋnɩ Abraham nɛ puwolo pɩsɩnɩ *Daaviidi yɔ, cɔzɔnaa wɛ hiu nɛ naanza. Pɩkpaɣ Daaviidi alɩwaatʋ nɛ puwolo pɩsɩnɩ ndʋ tɩ-taa pɛkɛzɩ *Izrɛɛlɩ ñɩma tɛtʋ *Babiloon yɔ, paba ñɛwɛ hiu nɛ naanza ɖɔɖɔ. Pɩkpaɣʋnɩ alɩwaatʋ ndʋ nɛ puwolo pɩsɩnɩ Krɩstʋ yɔ, cɔzɔnaa wɛ hiu nɛ naanza ɖɔɖɔ.
Yesu Krɩstʋ lʋlʋʋ tɔm
(Luk 2.1-7)
18 Ɩna ɛzɩma pɩtɩŋaa nɛ palʋlɩ Yesu Krɩstʋ yɔ. *Maarɩɩ weyi ɛlʋlɩ-ɩ yɔ, ɛɛkɛ pɛlɛ weyi posu *Yozɛɛfʋ yɔ. Ɛ nɛ ɩ pataacaɣ wiɖiyi. Ɛlɛ, Maarɩɩ haɣ hoa nɛ Ɛsɔ Kalɩzaɣ ɖoŋ. 19 Yozɛɛfʋ ɛnʋ, ɛkɛ ɛyʋ kʋtʋʋzʋ. Mbʋ yebina nɛ ɛna-ɩ mbʋ lɛ, ɛtɔsɔɔlɩ se ɛɖʋ-ɩ fɛyɛ ɛyaa hɛkʋ taa. Ɛlɛ ɛɖʋ se ekiziɣ-i mɛsaɣ tɛɛ. 20 Ɛwɛɛ ɛmaɣzɩɣ mbʋ lɛ, Kɩpaɣlʋ *tiyiyu nɔɔyʋ lɩɩ ɛ-yɔɔ ɖoziye taa nɛ eheyi-i se: “*Daaviidi sayɩ Yozɛɛfʋ! Sɔɔndʋ ɛtaakpa-ŋ nɛ Maarɩɩ kpaɣʋ. Mbʋ pʋyɔɔ yɔ, Ɛsɔ Kalɩzaɣ ɖoŋ ɛhaɣnɩ hoa ŋga. 21 Ɛlʋlʋʋ pɩɣa ŋga lɛ, ŋyaa-kɛ se *Yesu, mbʋ pʋyɔɔ yɔ, ŋga kɔŋnɩ ɛyaa ñʋʋ yabʋ nɛ kalɩzɩ-wɛ pa-kɩwɛɛkɩm taa.”
22 Pʋnɛ yɔ, pɩtɩŋa payɩ pɩlabɩ se tɔm ndʋ Kɩpaɣlʋ katɩŋnɩ *lɔɔyaɣ tʋ nɔɔyʋ yɔɔ nɛ ɛyɔɔdɩ yɔ, tɩla. Ndʋ lɛ se:
23 “Ɩnaɣ, pɛlɛ nɔɔyʋ kɔŋ haɣʋ nɛ ɛlʋlɩ pɩɣa nɛ
payaa-kɛ se Emaanʋyɛɛlɩ.”