Lɔŋsɩnɖaa mba powoba se pana Yesu yɔ
2
1 Palʋlɩ Yesu Bɛtlɛhɛm Yudee egeetiye taa. Alɩwaatʋ ndʋ lɛ, *Eroodi kɛkɛnɩ wiyaʋ sɔsɔ ɖɩ-taa. Palʋlɩ-ɩ lɛ, lɔŋsɩnɖaa mba pasɩm tɩɩnzɩ camɩyɛ yɔ, palɩnɩ ɖooo wɩsɩ ɖɩlɩyɛ nɛ pɔkɔɔ Yeruusalɛm. 2 Patalaa lɛ, pɔpɔzʋʋ se: “Le pɩɣa ŋga palʋlɩ-kɛ se kɔkɔŋ kɛʋ Yuda ñɩma wiyaʋ sɔsɔ yɔ kɛwɛɛ? Ɖɩna tɩɩŋa ŋga kawɩlɩɣ se palʋlɩ pɩɣa ŋga yɔ wɩsɩ ɖɩlɩyɛ. Pʋ-yɔɔ ɖɩkɔm se ɖiluŋ kɛ-tɛɛ.” 3 Ɛlɛ, *Eroodi nɩɩ mbʋ nɛ pɩcɛyɩ-ɩ pɩŋŋ nɛ pɩkpɛndɩnɩ Yeruusalɛm ñɩma tɩŋa. 4 Peeye ekpeɣli ɛ-ɛjaɖɛ taa *cɔjɔnaa sɔsaa nɛ paɣtʋ wɩlɩyaa patɩŋa payɩ nɛ ɛpɔzʋʋ-wɛ se: “Le palʋlʋʋ *Weyi Ɛsɔ Lɩzaa Yɔ yee?” 5 Pocosi-i se: “Bɛtlɛhɛm, Yudee egeetiye taa. Mbʋ pʋyɔɔ yɔ, *lɔɔyaɣ tʋ nɔɔyʋ kamawa se:
6 ‘Ña Bɛtlɛhɛm tɛtʋ lɛ!
Pʋtɔtɔyɩnɩ-ŋ kpem Yudee egeetiye taa.
Mbʋ pʋyɔɔ yɔ, ña-taa pɔkɔŋ lʋlʋʋ wiyaʋ sɔsɔ
weyi ɛkɔŋ ɖɔkʋʋ *Izrɛɛlɩ ñɩma yɔ.’ ”
7 Peeye *Eroodi ya lɔŋsɩnɖaa mba mɛsaɣ tɛɛ nɛ ɛpɔzɩ-wɛ se: “Alɩwaatʋ ndʋ tɩ-yɔɔ ɖeyi ɖeyi tɩɩŋa ŋga kalɩwa?” 8 Pʋwayɩ lɛ, etiyi-wɛ se: “Iwolo Bɛtlɛhɛm nɛ ɩñɩnɩ pɩɣa ŋga camɩyɛ. Ɩna-kɛ lɛ, ɩpɩsɩ iheyi-m nɛ mowolo moluŋ kɛ-tɛɛ ɖɔɖɔ.”
9 *Eroodi tɛm lɔŋsɩnɖaa mba yɔɔdɩnaʋ lɛ, palɩɩ se pɛɖɛɣ Bɛtlɛhɛm. Peeye pana tɩɩŋa ŋga paana wɩsɩ ɖɩlɩyɛ yɔ nɛ patɩŋɩɣ-kɛ. Katalɩ ɖenɖe pɩɣa ŋga kɛwɛɛ yɔ lɛ, kasɩŋ. 10 Peeye pɩlabɩ-wɛ leleŋ pɩtɩɩfɛyɩ 11 nɛ pasʋʋ ɖɩɣa nɛ pana pɩɣa ŋga nɛ ko-ɖoo *Maarɩɩ nɛ poluŋ kɛ-tɛɛ paɖʋ-kɛ hɩɖɛ. Pʋwayɩ lɛ, pɛyɛɖɩ po-wondu nɛ paha-kɛ sika nɛ tɩlaaɖɩ ŋgʋ pɔhɔkɩ yɔ nɛ num mbʋ payaɣ se miiri yɔ. 12 Pɛtɛm labʋ mbʋ lɛ, Ɛsɔ heyi-wɛ nɛ ɖoziye taa se pataapɩsɩ *Eroodi cɔlɔ. Peeye pakpaɣ nʋmɔʋ lɛɛkʋ nɛ pekpe.
*Ejiptɩ wobu tɔm
13 Lɔŋsɩnɖaa mba pɛɖɛwa lɛ, Kɩpaɣlʋ *tiyiyu nɔɔyʋ lɩɩ *Yozɛɛfʋ yɔɔ ɖoziye taa nɛ eheyi-i se: “*Eroodi caɣ se ɛkʋ pɩɣa ŋga. Pʋ-yɔɔ lɛ, kʋyɩ ŋkpaɣ ka nɛ ko-ɖoo nɛ ña nɛ wɛ ise iwolo *Ejiptɩ nɛ ɩcaɣ peeye nɛ pʋkɔɔ pɩsɩnɩ alɩwaatʋ ndʋ meheyiɣ-ŋ se ɩpɩsɩ yɔ.”
14 Peeye Yozɛɛfʋ kʋyɩ ɖoo ana a-taa nɛ ɛkpaɣ pɩɣa ŋga nɛ ko-ɖoo nɛ ɛ nɛ wɛ pɛɖɛɛ Ejiptɩ. 15 Pacaɣ peeye nɛ pʋkɔɔ pɩsɩnɩ alɩwaatʋ ndʋ Eroodi sɩba yɔ. Pʋnɛ yɔ, pɩlaba se ndʋ Kɩpaɣlʋ katɩŋnɩ *lɔɔyaɣ tʋ nɔɔyʋ yɔɔ nɛ ɛyɔɔdɩ yɔ, tɩla. Ndʋ lɛ se: “Maya man-pɩyalʋ nɛ Ejiptɩ se ɛlɩɩ.”
Piya kʋʋ tɔm
16 *Eroodi kɔm ɛna se lɔŋsɩnɖaa mba pɛcɛtɩ-ɩ kɩcɛtʋ, paapɩsɩɣ ɛ-cɔlɔ lɛ, ɛ-pana kpa pɩŋŋ nɛ ɛkʋsɩ sɔɔjanaa nɛ etiyi-wɛ se pɔcɔɔ Bɛtlɛhɛm tɛtʋ nɛ tɩ-cɔlɔ ñɩndʋ pa-taa nɛ pakʋ abalɩbiya nzɩ sɩtɩŋa payɩ sɩwɛnɩ pɩnzɩ naalɛ nɛ pɩkpaɣ pitii yɔ. Eheyi-wɛ mbʋ nɛ ɛkɛdɩnɩ alɩwaatʋ ndʋ lɔŋsɩnɖaa keheyi-i yɔ. 17 Mbʋ pɩlaba ɛzɩ *lɔɔyaɣ tʋ *Yereemii kɔyɔɔdʋʋ se:
18 “Ɖɩnɩ nɔɔyʋ makɩ kubusi nɛ
ewiliɣ nɛ ɛtɩmɩɣ pɩtɩɩfɛyɩ Raamaa tɛtʋ taa.
Ɖo-ɖoo Rakɛɛlɩ wiɣni e-piya nɛ
ɛtɔsɔɔlɩ se pɛhɛzɩ ɛ-laŋɩyɛ.
Mbʋ pʋyɔɔ yɔ, sifetaa.”
*Ejiptɩ ɛjaɖɛ taa kʋyʋʋ tɔm
19 *Eroodi sɩba lɛ, Kɩpaɣlʋ *tiyiyu nɔɔyʋ lɩɩ *Yozɛɛfʋ yɔɔ ɖoziye taa *Ejiptɩ 20 nɛ eheyi-i se: “Kʋyɩ ŋkpaɣ pɩɣa nɛ ko-ɖoo nɛ ña nɛ wɛ ɩpɩsɩ Izrɛɛlɩ. Mbʋ pʋyɔɔ yɔ, mba pañɩnaɣ se pakʋ pɩɣa ŋga yɔ, pasɩba.”
21 Peeye Yozɛɛfʋ kʋyaa ɖɔɖɔ ɛkpaɣ pɩɣa nɛ ko-ɖoo nɛ papɩsɩ Izrɛɛlɩ. 22 Patalɩ peeye lɛ, Yozɛɛfʋ nɩɩ se Arcɛlaayuusi lɛɣzɩnɩ ɛ-caa Eroodi lone taa Yudee egeetiye taa. Pʋ-yɔɔ sɔɔndʋ kpa-ɩ nɛ ɖɩ-taa caɣʋ. Ɛlɛ, pʋyɔɔdɩnɩ-ɩ ɖoziye taa nɛ ɛkʋyɩ ewolo Galilee egeetiye taa 23 nɛ ɛcaɣ tɛtʋ ndʋ payaɣ se Nazarɛɛtɩ yɔ tɩ-taa.
Pɩlabɩ mbʋ se tɔm ndʋ lɔɔyɩsɩ tɩnaa kɔyɔɔdaa yɔ, tɩla. Ndʋ lɛ se: “Pɔkɔŋ pɩɣa ŋga yaʋ se Nazarɛɛtɩ tʋ.”