Maatiyee 3

*Lɩm Sɔʋ Sɔnzɩ Laɖʋ Yohanɛɛsɩ susuu tɔm yɔ

(Mrk 1.1-8; Luk 3.1-18; Yoh 1.19-28)

¹ Alɩwaatʋ ndʋʋ Lɩm Sɔʋ Sɔnzɩ Laɖʋ Yohanɛɛsɩ pazɩ susuu Ɛsɔtɔm Yudee lakʋ taa. ² Eheyaɣ ɛyaa se: “Ɩlɛɣzɩ wɛtʋ, mbʋ pʋyɔɔ yɔ, Ɛsɔ Kewiyaɣ wɩzɩ talʋʋ.”

³ Yohanɛɛsɩ tɔm *lɔɔyaɣ tʋ Ezaayii yɔɔdaa se:

“Nɔɔyʋ susuu lakʋ taa se

pɔñɔɔzɩ Kɩpaɣlʋ nʋmɔʋ nɛ

pala nɛ kʋtʋʋzɩ camɩyɛ.”

⁴ Yohanɛɛsɩ ɛnʋ, esuwaɣ toko ŋgʋ palʋnɩ kʋyʋndʋʋ kpaŋnɔ hʋndʋ yɔ nɛ ɛtɔɔlʋʋ tambaɖɛ nɖɩ palabɩnɩ tɔnɛ yɔ. Kutoloŋ nɛ tʋŋ num ɛtɔkaɣ.

⁵ Yohanɛɛsɩ susaɣ lakʋ taa mbʋ lɛ, Yeruusalɛm ñɩma nɛ Yudee hɔɔlɩŋ tɩŋa taa ñɩma nɛ hɔɔlɩŋ weyi ɩtɩŋa payɩ ɩñɔtɩnɩ Yɔɔrdaŋ pɔɔ yɔ ɩ-taa ñɩma palɩɣ powoki ɛ-cɔlɔ ⁶ nɛ paa weyi ɛyɔɔdʋʋ ɛ-kɩwɛɛkɩm mbʋ ɛlaba yɔ nɛ Yohanɛɛsɩ ɛnʋ ɛlakɩ-wɛ *lɩm sɔʋ sɔnzɩ Yɔɔrdaŋ pɔɔ taa.

⁷ Yohanɛɛsɩ nawa se *Farɩsɩ ɛgbɛyɛ taa ñɩma nɛ *Saduki ɛgbɛyɛ taa ñɩma mba powoki ɛ-cɔlɔ se ɛlabɩ-wɛ *lɩm sɔʋ sɔnzɩ yɔ, pɔɖɔwa siŋŋ. Peeye eheyi-wɛ se: “Ɖʋmaa mɩ! Aheyi-mɩ se ise Ɛsɔ pana wena akɔŋ-mɩ kpanaʋ yɔ? ⁸ Ɩla lakasɩ nzɩ sɩwɩlɩɣ se ɩlɛɣzɩ wɛtʋ yɔ. ⁹ Ɩtaamaɣzɩ se mɩ-cɔzɔ lɛ *Abraham yɔ, pɩtɛma. Mbʋ pʋyɔɔ yɔ, meheyiɣ-mɩ se Ɛsɔ pɩzɩɣ ɛla nɛ pɛɛ anɛ apɩsɩ Abraham liɖe taa ñɩma.” ¹⁰ Peeye etuu-wɛ eduuye se: “Halɩ pɛtɛm kpaɣʋ laɖɩyɛ se pɛsɛtɩɣ tɩŋ nɛ ɩ-tɛɛ: tɩʋ ŋgʋ kɩɩlʋlʋʋ pee kɩbana yɔ, pɛsɛtɩɣ-kʋ nɛ paɖʋ miŋ taa.” ¹¹ Meheyiɣ-mɩ se: “Ma lɛ, malakɩ-mɩ *lɩm sɔʋ sɔnzɩ nɛ pɩwɩlɩ se ɩlɛɣzɩ wɛtʋ. Ma-wayɩ lɛ, weyi ɛkɔŋ yɔ, ɛkɩlɩ-m. Halɩ mantatɩɩmʋna se mankpaɣ ɛ-naataŋgbala nɛ mɔnɖɔkɩ. Ɛkɔŋ-mɩ labʋ sɔnzɩ nɛ Ɛsɔ Kalɩzaɣ haʋ nɛ miŋ. ¹² Ɛwɛ ɛzɩ falɩyʋ ɖɔkʋʋ ɖaakuɖe nɛ ɛfalɩɣ nɛ esuu pee kpou taa nɛ piyele ɛɖʋʋ lɔtʋ miŋ weyi eeɖeŋ wiɖiyi kaʋ yɔ ɛ-taa yɔ.”

Palabʋ Yesu *lɩm sɔʋ sɔnzɩ yɔ

(Mrk 1.9-11; Luk 3.21-22)

¹³ Yohanɛɛsɩ lakaɣ ɛyaa *lɩm sɔʋ sɔnzɩ Yɔɔrdaŋ pɔɔ taa mbʋ lɛ, Yesu lɩnɩ Galilee egeetiye taa nɛ ewolo ɛ-cɔlɔ peeye se ɛlabɩ-ɩ-sɩ. ¹⁴ Peeye Yohanɛɛsɩ tacaɣ tisuu nɛ ekitini Yesu se: “Ma pʋmʋnaa se mɔnkɔɔ ñɔ-cɔlɔ nɛ ŋlabɩ-m-sɩ nɛ ña ñakʋyɩ ŋkɔŋ mɔn-cɔlɔ tuliŋa na!” ¹⁵ Ɛlɛ, Yesu cosi-i se: “Yele pɩla mbʋ lɛɛlɛɛyɔ. Mbʋ pʋmʋnaa se ɖɩla mbʋ pɩtɩŋa payɩ pʋtʋʋzaa yɔ.” Eheyi Yohanɛɛsɩ mbʋ lɛ, ɛlɛ tisi nɛ ɛlabɩ-ɩ lɩm sɔʋ sɔnzɩ.ILLUSTRATION 01

¹⁶ Yohanɛɛsɩ tɩtɛm Yesu labʋ sɔnzɩ nzɩ lɛ, Yesu lɩɣnɩ lɩm taa. Peeye ɛsɔtɔnʋʋ tʋlaa nɛ ɛna Ɛsɔ Kalɩzaɣ lɩ ɛsɔdaa ɛzɩ halikuku yɔ nɛ ketiki Yesu ɛnʋ ɛ-yɔɔ ¹⁷ nɛ pʋyɔɔdʋʋnɩ ɛsɔdaa se: “Ɛnɛ lɛ man-Pɩyalʋ kʋsɔɔlʋ, maahʋʋ ɛ-yɔɔ kaʋ.”