LAŊHƐZƖYƐ TƆM NDƲ
MAARKƖ
MAWA YƆ
*Lɩm Sɔʋ Sɔnzɩ Laɖʋ Yohanɛɛsɩ susuu Ɛsɔtɔm yɔ
(Mat 3.1-12; Luk 3.1-18; Yoh 1.19-28)
1
1 Ɩna ɛzɩma mbʋ Ɛsɔ Pɩyalʋ Yesu Krɩstʋ*fa* *Laŋhɛzɩyɛ Tɔm pazaa yɔ. \fm a \fr (1.1) \fk Krɩstʋ: \f pʋ-tɔbʋʋ se *Weyi Ɛsɔ Lɩzaa nɛ Etiyi-i se ɛya ɛyaa ñʋʋ yɔ. 2 Tɩpazɩ ɛzɩ pamaʋ *lɔɔyaɣ tʋ *Ezaayii Takayaɣ taa yɔ. Pamawa se Ɛsɔ heyi ɛ-Pɩyalʋ se:
“Na, mancalɩɣ men-tiyiyu tiyuu nɛ ɛñɔɔzɩ ña-nʋmɔʋ.”
3 Tɩpazɩ ɖɔɖɔ ɛzɩ pamaʋ ka-taa se:
“Nɔɔyʋ susuu lakʋ taa se
pɔñɔɔzɩ Kɩpaɣlʋ nʋmɔʋ nɛ
pala nɛ kʋtʋʋzɩ camɩyɛ” yɔ.
4 Mbʋ Yohanɛɛsɩ kɔm ɛwɛɛ lakʋ taa nɛ ɛyaa woki ɛ-cɔlɔ nɛ esusuu-wɛ se pɛlɛɣzɩ wɛtʋ nɛ ɛlabɩ-wɛ *lɩm sɔʋ sɔnzɩ nɛ Ɛsɔ kpeɣ-wɛ pa-kɩwɛɛkɩm. 5 Peeye Yeruusalɛm ñɩma tɩŋa nɛ Yudee egeetiye taa hɔɔlɩŋ tɩŋa taa ñɩma powokaɣ ɛ-cɔlɔ nɛ paa weyi ɛyɔɔdʋʋ ɛ-kɩwɛɛkɩm mbʋ ɛlaba yɔ nɛ ɛlakɩ-wɛ lɩm sɔʋ sɔnzɩ Yɔɔrdaŋ pɔɔ taa. 6 Yohanɛɛsɩ ɛnʋ, esuwaɣ toko ŋgʋ palʋnɩ kʋyʋndʋʋ kpaŋnɔ hʋndʋ yɔ. Ɛtɔɔlaɣ tambaɖɛ nɖɩ palabɩnɩ tɔnɛ yɔ, nakaŋ nɛ tɩŋ num ɛtɔkaɣ. 7 Ɛyɔɔdɩ ɛyaa samaɣ taa se: “Ma-wayɩ lɛ, weyi ɛkɔŋ yɔ, ɛkɩlɩ-m. Mantatɩɩmʋna se moluŋ nɛ mɛyɛɖɩ ɛ-naataŋgbala tɔnzɩ. 8 Ma lɛ, malakɩ-mɩ lɩm sɔʋ sɔnzɩ, ɛnʋ lɛ, ɛkɔŋ-mɩ labʋ sɔnzɩ nɛ Ɛsɔ Kalɩzaɣ haʋ.”
Yesu *lɩm sɔʋ sɔnzɩ nɛ ɛ-takʋʋ pɔ-tɔm
(Mat 3.13-4.11; Luk 3.21-22; 4.1-13)
9 Alɩwaatʋ ndʋ tɩ-taa ɖɔɖɔ Yesu lɩnɩ Nazarɛɛtɩ, Galilee egeetiye taa nɛ ewolo Yohanɛɛsɩ cɔlɔ Yɔɔrdaŋ pɔɔ taa nɛ ɛlɛ labɩ-ɩ *lɩm sɔʋ sɔnzɩ. 10 Yesu lɩɣaɣnɩ lɩm taa lɛ, ɛna ɛsɔtɔnʋʋ tʋlaa nɛ Ɛsɔ Kalɩzaɣ lɩɩ nɛ ketiki ɛ-yɔɔ ɛzɩ halikuku yɔ. 11 Peeye pʋyɔɔdʋʋnɩ ɛsɔdaa se: “Ña lɛ man-Pɩyalʋ kʋsɔɔlʋ, maahʋʋ ñɔ-yɔɔ kaʋ.”
12 Kpaagbaa mbʋ lɛ, Ɛsɔ Kalɩzaɣ ŋga kotolisi-i nɛ ɛɖɛɛ lakʋ taa. 13 Ɛcaɣ peeye kɩyakɩŋ nɩɩnaza nɛ *Kañadʋ Satanɩ wolo ɛ-cɔlɔ nɛ ɛtakɩɣ-ɩ. Tɛtɛ kpɩna hɛkʋ taa ɛɛwɛɛ nɛ Ɛsɔ *tiyiyaa wolo ɛ-cɔlɔ nɛ pasɩŋnɩ-ɩ.
Yesu yaʋ kpakpasɩ kpayaa naanza yɔ
(Mat 4.12-22; Luk 4.14-15; 5.1-11)
14 Paɖʋ Yohanɛɛsɩ salaka wayɩ lɛ, Yesu wolo Galilee egeetiye taa nɛ ɛpazɩ ɛyaa heyuu Ɛsɔ Laŋhɛzɩyɛ Tɔm. 15 Ɛtɔŋaɣ se: “Lɛɛlɛɛyɔ, alɩwaatʋ talaa se Ɛsɔ Kewiyaɣ ɛkɔɔ. Pʋ-yɔɔ lɛ, ɩlɛɣzɩ wɛtʋ nɛ itisi ɛ-Laŋhɛzɩyɛ Tɔm.”
16 Kɩyakʋ nakʋyʋ Yesu cɔlaɣ Galilee teŋgu. Pɩkɛdaa lɛ, ɛna kpakpasɩ kpayaa naalɛ: Siimɔɔ nɛ e-neu Andree, pɔlɔwaɣ piyuu. 17 Ɛlɛ ɛyaa-wɛ nɛ eheyi-wɛ se: “Ɩkɔɔ ɩtɩŋ-m nɛ manpɩsɩ-mɩ ɛyaa kpayaa ɛzɩ ɩkpaɣʋ kpakpasɩ yɔ.” 18 Peeye patiyebi pe-piyiŋ nɛ patɩŋ-ɩ.
19 Ɛtasɩ wobu ɛsɩndaa pazɩ lɛ, ɛna Zebedee nɛ ɛ-pɩyalaa: Yakubu nɛ e-neu Yohanɛɛsɩ, pɛwɛ pa-kpɩyʋʋ taa nɛ paɖaɣnɩɣ pe-piyiŋ. 20 Ɛlɛ, ɛtɩyaʋ Zebedee pɩyalaa mba nɛ peyele pa-caa nɛ tʋmlaɖaa kpɩyʋʋ taa nɛ patɩŋ ɛ-wayɩ.
Ɛyʋ weyi eleeu pɩsɩ-ɩ kpɛndɛlɩsɩ yɔ
(Luk 4.31-37)
21 Yesu ya ɛyaa mba lɛ, ɛ nɛ wɛ powolo Kapɛrnayum. *Kɩyakʋ kɩhɛzʋʋ talaa lɛ, pasʋʋ Ɛsɔ ɖɩsɛyɛ taa nɛ ɛpazɩ ɛyaa Ɛsɔtɔm wɩlʋʋ. 22 Ɛyaa mba pewelesaɣ ɛ-tɔm yɔ, pɩlabɩ-wɛ piti nɛ ɛzɩma mbʋ ɛwɩlaɣ yɔ. Mbʋ pʋyɔɔ yɔ, ɛtawɩlɩɣ-wɛ ɛzɩ pa-paɣtʋ wɩlɩyaa yɔ. Ɛlɛ, ɛwɩlaɣ-wɛ nɛ abalɩtʋ.
23 Abalʋ nɔɔyʋ kɛwɛ peeye, eleeu wɛ ɛ-wayɩ nɛ ɛpɩsɩɣ-ɩ kpɛndɛlɩsɩ. Alɩwaatʋ ndʋ tɩ-yɔɔ ɖeyi ɖeyi lɛ, ɛma kubuka se: 24 “Yesu Nazarɛɛtɩ tʋ, ɛbɛ ŋcaɣnɩ-ɖʋ? Ŋkɔm se ŋkʋ-ɖʋ yaa we? Mansɩm mbʋ ŋkɛnaa yɔ ɖeu, ŋkɛ Ɛsɔ Ɛyʋ.” 25 Peeye Yesu holini-i se: “Hei! Su peeye nɛ ŋse abalʋ ɛnʋ ɛ-wayɩ.” 26 Eleeu ɛnʋ ɛma kubuka nɛ ɛñamsɩ abalʋ ɛnʋ pɩŋŋ nɛ ese ɛ-wayɩ. 27 Peeye pɩlabɩ ɛyaa tɩŋa piti pɩŋŋ nɛ pɔpɔzʋʋ ɖama se: “Ɛbɛ lɛ mbʋ? Ɛwɩlɩɣ tɔm kɩfatʋ nɛ abalɩtʋ! Halɩ pɩkpɛndɩnɩ alewaa nɛ pañaŋ-ɩ.” 28 Kpaagbaa mbʋ lɛ, Yesu hɩɖɛ sɛɛ Galilee egeetiye tɩŋa payɩ.
Kʋdɔndɩnaa sakɩyɛ yɔɔ cɛbʋ yɔ
(Mat 8.14-15; Luk 4.38-39)
29 Yesu nɛ Yakubu nɛ Yohanɛɛsɩ nɛ Siimɔɔ nɛ Andree palɩ Ɛsɔ ɖɩsɛyɛ taa lɛ, patɩŋ Siimɔɔ nɛ Andree pɛ-tɛ. 30 Kɩnamɩyɛ kakpa Siimɔɔ yɔsɔ nɛ ɛhɛnɩ. Patalaa lɛ, pakpaɣ halʋ ɛnʋ ɛ-wɩzasɩ tɔm nɛ peheyi Yesu. 31 Peeye Yesu wobi ɛ-cɔlɔ nɛ ɛɖɔkɩ e-nesi taa ɛkʋsɩ-ɩ nɛ ɛ-kʋdɔŋ ŋgʋ kɩcɛ nɛ ɛkʋyɩ ɛha-wɛ lɩm.
32 Wɩsɩ ɖʋwa lɛ, pakpaɣ kʋdɔndɩnaa nɛ ɛyaa mba pa-wayɩ wɛ alewaa yɔ nɛ powoni-wɛ Yesu cɔlɔ Siimɔɔ nɛ Andree pɛ-tɛ peeye. 33 Tɛtʋ taa ɛyaa tɩŋa payɩ kpeɣli ɖɩɣa ŋga kɔ-nɔnɔɔ taa lɛ, 34 Yesu la nɛ kʋdɔndɩnaa sakɩyɛ ndɩ ndɩ yɔɔ cɛ nɛ ɛɖɔɔnɩ alewaa tɩŋa payɩ. Ɛzɩma mbʋ ɛtɛm naʋ se alewaa sɩma se ɛnʋ lɛ *Weyi Ɛsɔ Lɩzaa Yɔ lɛ, etetisi se pokuli ɛ-wayɩ.
Yesu cɔʋ Galilee egeetiye taa yɔ
(Luk 4.42-44)
35 Yesu fem kajalaɣ kalɩmaŋ kou nɛ ɛlɩɩ lɛ, ewolo ɖenɖe ɛyaa fɛyɩ yɔ nɛ ɛpazɩ Ɛsɔ sɛʋ. 36 Peeye Siimɔɔ nɛ ɛ-taabalaa papazɩ-ɩ ñɩnʋʋ. 37 Pana-ɩ lɛ, peheyi-i se: “Ɛyaa tɩŋa ñɩnɩɣ-ŋ.” 38 Ɛlɛ, Yesu cosi-wɛ se: “Ɖɩcɔɔ tɛtʋ lɛɛtʋ taa nɛ monsusi Ɛsɔtɔm ɖɔɖɔ. Pɩ-maɣmaɣ pʋ-yɔɔ mɔnkɔma.” 39 Peeye ɛpazɩ cɔʋ Galilee egeetiye tɩŋa taa nɛ esusuu Ɛsɔtɔm Ɛsɔ ɖɩsɛyɛ ndɩ ndɩ taa nɛ ɛɖɔɔnʋʋ alewaa ɖɔɖɔ ɛyaa wayɩ.
Canaɣ nakɛyɛ yɔɔ cɛbʋ yɔ
(Mat 8.1-4; Luk 5.12-16)
40 Pʋwayɩ lɛ, canaɣ nakɛyɛ wolo Yesu cɔlɔ nɛ koluŋ ɛ-tɛɛ nɛ ketendi-i se: “Ye ŋtisiɣ yɔ, ŋla nɛ mɔ-yɔɔ cɛ nɛ manpɩsɩ ɛyʋ weyi ɛmʋnaa yɔ.” 41 Peeye kɔ-tɔm labɩ Yesu pʋtɔdɩyɛ pɩŋŋ nɛ ɛkʋsɩ e-nesi nɛ etukuni-kɛ nɛ eheyi-kɛ se: “Mentisaa, pɩsɩ ɛyʋ weyi ɛmʋnaa yɔ.” 42 Ɛlɛ, canaɣ ŋga kɔ-yɔɔ tɩcɛbʋ nɛ kapɩsɩ ɛyʋ weyi ɛmʋnaa yɔ 43 nɛ Yesu heyi-i se ɛɖɛɛ. Ɛlɛ ɛka ɛ-ñʋʋ taa se: 44 “Taaheyi-tʋ nɔɔyʋ. Ɛlɛ, wolo *cɔjɔ cɔlɔ nɛ ɛna se ñɔ-yɔɔ cɛba, nɛ ŋwoni kileku ɛzɩ *Mooyiizi kadʋʋ yɔ nɛ pɩwɩlɩ ɛyaa tɩŋa se ñɔ-yɔɔ cɛba.” 45 Ɛɖɛwa lɛ, ɛpazɩ Yesu tɔm susuu paa le. Mbʋ labɩna nɛ Yesu tapɩzɩɣ se ɛtasɩ sʋʋ tɛtʋ natʋyʋ taa keɣlee. Pɩtɛkɛ mbʋ, ɛyaa kɩlɩɣ-ɩ cɛyʋʋ. Peeye ɛcaɣ lakʋ taa nɛ ɛyaa lɩɣnɩ paa le nɛ powoki ɛ-cɔlɔ.