Yesu fem tɔm
(Mrk 16.1-8; Luk 24.1-12; Yoh 20.1-10)
28
1 *Kɩyakʋ kɩhɛzʋʋ ɖɛwa nɛ kife *kujuka lɛ, Magdala Maarɩɩ nɛ *Maarɩɩ lɛlʋ pakʋyɩ tanaŋ cu nɛ powolo se pana Yesu pɩlaʋ. 2 Kpaagbaa mbʋ lɛ, tɛtʋ ñamsɩ siŋŋ nɛ Kɩpaɣlʋ *tiyiyu nɔɔyʋ lɩnɩ ɛsɔdaa nɛ etii epilisi pɩlaʋ nɔɔ pɩyɛ nɛ ɛsɩɩ kɩjaʋ nɛ ɛcaɣ ɖɩ-yɔɔ. 3 Ɛñɩlɩzaɣ ɛzɩ tɛʋ ñɩlɩzʋʋ yɔ nɛ e-wondu hʋlʋmɩ layɩ layɩ. 4 Peeye sɔɔndʋ kpa mba paaɖaŋ kʋ-yɔɔ yɔ siŋŋ nɛ peseli yem kpa kpa kpa nɛ pe-feziŋ li. 5 Ɛlɛ, Ɛsɔ *tiyiyu heyi halaa mba se: “Mɩ lɛ, sɔɔndʋ ɛtaakpa-mɩ. Manawa se Yesu weyi paakam *kaamaŋkaɣ yɔɔ yɔ, ɛnʋ ɩñɩnɩɣ. 6 Ɛfɛyɩ cɩnɛ, efema ɛzɩ ɛɛyɔɔdʋʋ yɔ. Ɩkɔɔ ɩna ɖenɖe paahɛzɩ-ɩ yɔ 7 nɛ iwolo lɔŋ iheyi ɛ-tɔmkpɛlɩkɩyaa se efema nɛ ɛlɩnɩ sɩɖaa taa. Ewoki Galilee nɛ ɛɖaŋ-wɛ, peeye pakaɣ-ɩ naʋ. Ndʋ maawɛna se meheyiɣ-mɩ.”
8 Peeye patɩkʋyɩ pɩlaʋ yɔɔ nɛ sɔɔndʋ nɛ laŋhʋlʋmɩyɛ siŋŋ nɛ peseɣ se powoki peheyi ɛ-tɔmkpɛlɩkɩyaa.
9 Pɩkɛdaa lɛ, Yesu katɩ-wɛ nɛ ɛtɔ se: “Mɛnsɛ-mɩ!” Peeye powobi poluŋ ɛ-tɛɛ nɛ pakpa ɛ-naŋgbanzɩ nɛ paɖʋ-ɩ hɩɖɛ. 10 Ɛlɛ, Yesu heyi-wɛ se: “Sɔɔndʋ ɛtaakpa-mɩ. Iwolo iheyi man-taabalaa se powolo Galilee, peeye pakaɣ-m naʋ.”
Sɔɔjanaa kɛdʋʋ mbʋ panawa yɔ
11 Halaa mba pakʋyɩ pɩlaʋ yɔɔ nɛ pɛɖɛɣ lɛ, sɔɔjanaa mba paɖaŋ kʋ-yɔɔ yɔ, pa-taa lɛlaa wolo tɛtʋ taa nɛ pɛkɛdɩ *cɔjɔnaa *sɔsaa mbʋ pɩtɩŋa pɩlaba yɔ. 12 Peeye paba nɛ ɛgbɛyɛ taa *sɔsaa pekpeɣli ɖama nɛ pɔyɔɔdɩ nɛ pañɩnɩ liidiye sakɩyɛ nɛ pɛcɛlɩ-wɛ 13 nɛ paka pa-ñʋŋ taa se: “Iheyi ɛyaa se iɖowaɣ ɖoo taa nɛ ɛ-tɔmkpɛlɩkɩyaa kɔɔ pamɩlɩ-ɩ. 14 Ye wiyaʋ sɔsɔ ɛnɩ mbʋ lɛ, ɖɩtɩlɩ mbʋ ɖɩɩla nɛ ɖɩhɛzɩ ɛ-laŋɩyɛ nɛ ɛtaalabɩ-mɩ pʋyʋ yɔ.” 15 Ɛlɛ sɔɔjanaa mba pamʋ liidiye nɖɩ nɛ pala ɛzɩ peheyuu-wɛ yɔ. Pʋ-yɔɔ tɔm ndʋ tɩwɛɛ tɩcɔʋ Yuda ñɩma cɔlɔ halɩ nɛ sɔnɔ.
Yesu wɩlʋʋ ɛ-tɩ ɛ-tɔmkpɛlɩkɩyaa yɔ
(Mrk 16.14-18; Luk 24.36-49; Yoh 20.19-23; Tʋma 1.6-8)
16 Yesu tɔmkpɛlɩkɩyaa hiu nɛ kʋɖʋm kowobi Galilee pʋʋ ŋgʋ ɛɛwɩlɩ-wɛ yɔ kʋ-yɔɔ nɛ paɖaŋ-ɩ peeye. 17 Pɩkɛdaa lɛ, pana-ɩ nɛ poluŋ ɛ-tɛɛ nɛ paɖʋ-ɩ hɩɖɛ. Ɛlɛ, pa-taa lɛlaa wɛɛ nɛ papʋtʋʋ pa-taa. 18 Peeye Yesu wobi pɔ-cɔlɔ nɛ eheyi-wɛ se: “Ɛsɔ ha-m ɖoŋ tɩŋa payɩ ɛsɔdaa nɛ tataa. 19 Iwolo ajɛɛ kpeekpe taa ɛyaa cɔlɔ nɛ ɩla nɛ papɩsɩ mɔn-tɔmkpɛlɩkɩyaa nɛ ɩlabɩ-wɛ *lɩm sɔʋ sɔnzɩ Caa Ɛsɔ nɛ ɛ-Pɩyalʋ nɛ ɛ-Kalɩzaɣ pa-hɩɖɛ taa. 20 Ɩkpɛlɩkɩ-wɛ nɛ pɔɖɔ mbʋ pɩtɩŋa payɩ maaɖʋ-mɩ yɔ pʋ-yɔɔ. Ɩtɩlɩ se mɛwɛɣ mɩ-cɔlɔ kɩyakɩŋ tɩŋa nɛ pʋkɔɔ pɩsɩnɩ kedeŋa tɛm wiye.”