Powonaʋ Yesu Room wiyaʋ *Pilaatɩ tɛ yɔ
(Mrk 15.1; Luk 23.1-2; Yoh 18.28-32)
27
1 Pakpa Yesu nɛ kife tanaŋ tɛɛ cu lɛ, *Yuda ñɩma *cɔjɔnaa sɔsaa nɛ pɛ-ɛgbɛyɛ taa *sɔsaa pɔyɔɔdɩ patɩŋa payɩ se pakʋ-ɩ. 2 Peeye pɔhɔkɩ-ɩ nɛ powoni-i Room wiyaʋ *Pilaatɩ tɛ.
Yudaasɩ sɩm tɔm
(Tʋma 1.18-19)
3 Yudaasɩ weyi ɛɖʋzɩ Yesu koyindinaa nesi taa yɔ, ɛnawa se pakʋʋ Yesu lɛ, ɛpazɩ kpiɖuu nɛ ɛkpaɣ liidiye pɔɔyɩsɩ niidozo nzɩ paahɛyɩ-ɩ yɔ se ɛpɩsɩɣna ɛcɛlɩ *cɔjɔnaa sɔsaa nɛ pɛ-ɛgbɛyɛ taa *sɔsaa. 4 Ewoba lɛ, eheyi-wɛ se: “Malabɩ kɩwɛɛkɩm: mankpa ɛyʋ ɛnɛ ɖulum nɛ mɛncɛlɩ se pakʋ-ɩ.” Ɛlɛ pocosi-i se: “Ñɔ-cɔlɔ lɛ! Pɩtana-ɖʋ.” 5 Peeye ɛkpaɣ liidiye nɖɩ nɛ ɛmɩzɩ Ɛsɔ ɖɩɣa taa nɛ ewolo ɛɖɩ ɛ-tɩ nimiye nɛ ɛsɩ.
6 Ɛlɛ, cɔjɔnaa sɔsaa tɔzɩ liidiye nɖɩ nɛ pɔtɔ se: “Ɖa-paɣtʋ taa lɛ, pɩtaha nʋmɔʋ se paɖʋ-ɖɩ Ɛsɔ ɖɩɣa koozaɣ taa, mbʋ pʋyɔɔ yɔ, pɩkɛnɩ ɛyʋ sɩm liidiye.” 7 Panɩnɩ ɖama lɛ, pakpaɣ-ɖɩ nɛ payabɩnɩ tɛtʋ pɛŋ mayʋ cɔlɔ se pepi agɔma. 8 Mbʋ yebina nɛ pɩkpaɣʋnɩ kɩyakʋ ŋgʋ yɔ, payaɣ tɛtʋ ndʋ se: “Sɩm Tɛtʋ.”
9 Pɩlabɩ ɛzɩ *lɔɔyaɣ tʋ *Yereemii maʋ Yesu tɔm Ɛsɔtɔm Takayaɣ taa yɔ. Ɛmawa se: “Pakpaɣ liidiye pɔɔyɩsɩ niidozo nzɩ Izrɛɛlɩ ñɩma ɖʋ ɛ-yɔɔ yɔ 10 nɛ payabɩnɩ tɛtʋ pɛŋ mayʋ cɔlɔ. Mbʋ Kɩpaɣlʋ kaɖʋwa se mala.”
Wiyaʋ *Pilaatɩ pɔzʋʋ Yesu tɔm yɔ
(Mrk 15.2-5; Luk 23.3-5; Yoh 18.33-38)
11 Powoni Yesu Room wiyaʋ *Pilaatɩ cɔlɔ lɛ, ɛpɔzɩ-ɩ se: “Ña lɛ *Yuda ñɩma wiyaʋ sɔsɔ naa we?” Yesu cosi-i se: “Ñɔyɔɔdʋʋnɩ mbʋ.” 12 Cɔjɔnaa sɔsaa nɛ pɛ-ɛgbɛyɛ taa sɔsaa pakʋyɩ ɛ-yɔɔ, ɛlɛ, etocosi-wɛ natʋyʋ. 13 Peeye Pilaatɩ pɔzɩ-ɩ se: “Ŋŋnɩɣ ɛzɩma mbʋ pakʋyʋʋ ñɔ-yɔɔ yɔ yaa we?” 14 Ɛlɛ, esuma, ɛtatasɩ cosuu natʋyʋ. Peeye pɩɖɩɣzɩ Pilaatɩ yem ɖɩɣ ɖɩɣ.
Pakʋʋ Yesu tɔm yɔ
(Mrk 15.6-15; Luk 23.13-25; Yoh 18.39-19.16)
15 Paa Yomiye Taa Lɩʋ *Kazandʋ ndʋ lɛ, *Pilaatɩ lɩzɩɣ salaka tɩnaa taa kʋɖʋm weyi ɛyaa samaɣ sɔɔlaa se palɩzɩ-ɩ yɔ. 16 Ŋgʋ, alɩwaatʋ ndʋ lɛ, abalʋ weyi payaɣ se [Yesu] Baraabaasɩ nɛ pasɩm-ɩ paa le yɔ, ɛɛwɛ salaka taa. 17 Pʋ-yɔɔ *Pilaatɩ pɔzɩ ɛyaa samaɣ ŋga kekpeɣlaa yɔ se: “[Yesu] Baraabaasɩ nɛ Yesu weyi payaɣ se Krɩstʋ yɔ, pa-taa weyi mi-liu wɛɛ se meyele?” 18 Ɛpɔzɩ-wɛ mbʋ, mbʋ pʋyɔɔ yɔ, ɛnawa se paanaɣ Yesu nɛ ɛzɩyɛ yɔɔ pakpa-ɩ nɛ powoni ɛ-cɔlɔ.
19 Pilaatɩ kacaɣ tɔm ɖɩhʋyɛ. Pɩkɛdaa lɛ, ɛ-halʋ tiyi se peheyi-i se: “Taaɖʋ ñɔ-nɔɔ ɛyʋ kʋtʋʋzʋ ɛnʋ ɛ-tɔm taa. Monɖozi-i ɖeɖe ɖoo taa nɛ ɛ-tɔm labɩ-m kʋñɔŋ pɩtɩɩfɛyɩ.” 20 Peeye cɔjɔnaa sɔsaa nɛ pɛ-ɛgbɛyɛ taa sɔsaa peheyi ɛyaa samaɣ se keheyi Pilaatɩ se eyele Baraabaasɩ nɛ pɩkazɩ pakʋ Yesu. 21 Ɛtasɩ-wɛ pɔzʋʋ se: “Anɩ mi-liu wɛɛ se meyele pa-naalɛ pa-taa?” Pocosi-i se: “Baraabaasɩ!” 22 Ɛlɛ ɛpɔzɩ-wɛ se: “Mala Yesu weyi payaɣ se Krɩstʋ yɔ ɛzɩma?” Pocosi-i patɩŋa se: “Kam-ɩ *kaamaŋkaɣ yɔɔ!” 23 Peeye ɛtasɩ-wɛ pɔzʋʋ se: “Ɛlɛ, kɩdɛkɛdɩm mbʋ kpem ɛlaba?” Pɛtɛzɩ kobusi mabʋ ɖoŋ se: “Kam-ɩ kaamaŋkaɣ yɔɔ!” 24 Pilaatɩ nawa se paa ɛwɛɛ ɛyɔɔdʋʋ, pɩɩlɛɣzɩɣ pʋyʋ, Ɛlɛ, pɩtɛzɩɣ miŋ saʋ kɩsaʋ. Alɩwaatʋ ndʋʋ etiyaa se pɔkɔnɩ-ɩ lɩm. Pɔkɔnɩ-pʋ lɛ, ɛsɩŋ ɛyaa ɛsɩndaa nɛ ɛsaŋ e-nesi nɛ ɛtɔ se: “Pɩtɛkɛ mɔntɔmna se pakʋ ɛyʋ kʋtʋʋzʋ ɛnɛ! Mɩ-cɔlɔ lɛ!” 25 Ɛlɛ ɛyaa samaɣ tɔ se: “Ɛ-sɩm sʋʋtʋ ɛpɩsɩ ɖa nɛ ɖe-piya ɖɔ-yɔɔ!”
26 Pʋ-yɔɔ ɛlɩzɩ Baraabaasɩ nɛ eyele polu Yesu agbazɛɛ nɛ ɛkpaɣ-ɩ ɛcɛlɩ-wɛ se powoni-i pakam-ɩ *kaamaŋkaɣ yɔɔ.
Sɔɔjanaa pɛɛŋʋʋ Yesu tɛtɛ yɔ
(Mrk 15.16-20; Yoh 19.2-3)
27 Pʋwayɩ lɛ, sɔɔjanaa woni Yesu *Pilaatɩ tɛ kadaɣ taa. Peeye powobi patɩŋa payɩ nɛ pekpeɣlini-i 28 nɛ pɔhɔzɩ e-wondu nɛ posuu-i awiitoko kɩsɛmʋʋ waaa 29 nɛ palʋʋ awiya hulaɣ nɛ sɔɔɔ nɛ papam-ɩ nɛ pɛcɛlɩ-ɩ ɖaʋ nɛ ɛɖɔkɩ e-nesi kɩbanzɩ taa ɛzɩ wiyaʋ yɔ. Ɛlɛ papazɩ ɛ-tɛɛ luŋuu nɛ pɛsɛɣ-ɩ nɛ woŋa se: “*Yuda ñɩma wiyaʋ sɔsɔ! Sɛɛ ɖeu!” 30 Nɛ pɔtɔʋ ɛ-yɔɔ ndaatʋ nɛ pamʋʋ ɖaʋ ŋgʋ paacɛlɩ-ɩ yɔ nɛ pamakɩ ɛ-ñʋʋ taa. 31 Pɛtɛm-ɩ tɛtɛ pɛɛŋʋʋ mbʋ lɛ, pɔhɔzɩ toko kɩsɛmʋʋ ŋgʋ nɛ papɩsɩnɩ e-wondu posuu-i nɛ powoni-i se pakam-ɩ kaamaŋkaɣ yɔɔ.
Pakam Yesu *kaamaŋkaɣ yɔɔ yɔ
(Mrk 15.21-32; Luk 23.26-43; Yoh 19.17-27)
32 Palɩɣaɣnɩ Yesu tɛtʋ wayɩ se pakam-ɩ lɛ, pakatɩ Siirɛɛnɩ abalʋ nɔɔyʋ nɛ pakpa-ɩ se ɛsɩɣlɩ Yesu *kaamaŋkaɣ, payaɣ-ɩ se Siimɔɔ. 33 Pɩkɛdaa lɛ, patalɩ ɖenɖe payaɣ se Goligota yɔ, pʋ-tɔbʋʋ se ñʋmbɔɔyaɣ lone. 34 Ɛlɛ pɛcɛlɩ-ɩ sʋlʋm se ɛñɔɔ, paasidi pɩ-taa kɔyɛ nɖɩ ɖɩwɛ ñaŋ yɔ. Ɛɖɩŋ-pʋ lɛ, ekizi se ɛɛñɔʋ.
35 Peeye sɔɔjanaa kpa-ɩ pakam-ɩ *kaamaŋkaɣ yɔɔ nɛ pɩsɛɣ paɖʋ miika nɛ patayɩ ɖama e-wondu. 36 Pɛtɛma lɛ, pacaɣ peeye nɛ paɖaŋ ɛ-yɔɔ. 37 Paama kpata nakʋyʋ yɔɔ mbʋ pʋ-yɔɔ pakam-ɩ yɔ nɛ paka kaamaŋkaɣ yɔɔ ɛ-ñʋʋ taa. Pamawa se: “Ɛnɛ lɛ Yesu weyi ɛkɛ *Yuda ñɩma wiyaʋ sɔsɔ yɔ.” 38 Pʋwayɩ lɛ, paka ɖɔɖɔ mɩlaa naalɛ nabɛyɛ ɛ-cɔlɔ: lɛlʋ ɛ-nɩwaŋ yɔɔ nɛ lɛlʋ ɛ-nɩmɩyɛ yɔɔ.
39 Nʋmɔɖɔnaa mba pɛɖɛɣaɣnɩ peeye yɔ, pekpiɣyiɣ ñʋŋ nɛ patʋʋ-ɩ 40 se: “Weyi ña ŋtɔŋaɣ se ŋyɔkʋʋ Ɛsɔ ɖɩɣa nɛ ŋɖaɣnɩ-kɛ maʋ nɛ kɩyakɩŋ naadozo yɔ, ya ña-maɣmaɣ ña-ñʋʋ! Ye ŋkɛ Ɛsɔ Pɩyalʋ yɔ, tibini kaamaŋkaɣ yɔɔ nɛ ɖɩna!” 41 *Cɔjɔnaa *sɔsaa nɛ paɣtʋ wɩlɩyaa nɛ *Yuda ñɩma ɛgbɛyɛ taa *sɔsaa pɛpɛɛŋaɣ Yesu tɛtɛ mbʋ ɖɔɖɔ nɛ pɔpɔzʋʋ se: 42 “Ɛyabɩ lɛlaa ñʋŋ ɛzɩma tɛ, ɛɛpɩzɩɣ se ɛya ɛ-maɣmaɣ ɛ-ñɩŋgʋ! Pɩtɛkɛ ɛnʋ tɔmna se ɛnʋ lɛ Izrɛɛlɩ ñɩma wiyaʋ sɔsɔ naa we? Etibini kaamaŋkaɣ yɔɔ lɛɛlɛɛyɔ nɛ ɖɩwɛnɩ lidaʋ ɛ-yɔɔ! 43 Ɛɛta Ɛsɔ liu nɛ ɛkaɖɩ se ɛnʋ lɛ Ɛsɔ Pɩyalʋ. Tɔɔ! Lɛɛlɛɛyɔ, ɖɩcɔna ɖɩna se Ɛsɔ liu wɛɛ se ɛya ɛ-ñʋʋ naa ɛɛyakɩ?” 44 Halɩ pɩkpɛndɩnɩ mɩlaa mba paakam ɛ-cɔlɔ yɔ nɛ patʋʋ-ɩ ɖɔɖɔ mbʋ.
Yesu sɩm tɔm
(Mrk 15.33-41; Luk 23.44-49; Yoh 19.28-30)
45 Puwiye nɖɩ wɩsɩ siɣa lɛ, cɩkpɛndʋʋ yu ɛjaɖɛ tɩŋa kpemm nɛ pʋkɔɔ pɩsɩnɩ ɖanaɣ ñɩɣtʋ naadozo. 46 Pʋkɔma ɛzɩ ɖanaɣ ñɩɣtʋ naadozo yɔ lɛ, Yesu ma kubuka ɖoŋ se: “Elii, Elii! Lamaa sapaktanɩɩ.” Pʋ-tɔbʋʋ se: “Mɛ-Ɛsɔ, Mɛ-Ɛsɔ! Pɩlabɩ ɛzɩma nɛ ŋlɔ-m?”
47 Mba paawɛ peeye yɔ, pa-taa lɛlaa nɩ mbʋ lɛ, pɔtɔŋ se: “Ɩnɩɩ ɛyaɣʋ *Elii!” 48 Peeye pa-taa lɛlʋ tisewa nɛ ewolo ɛkpaɣ kʋca nɛ ewona elii sʋlʋm kɩñɩŋɩm nabʋyʋ taa nɛ ɛtʋʋ ɖaʋ nɔɔ taa nɛ ɛwɩlɩɣ-ɩ se ɛmʋzɩ. 49 Ɛlɛ, pa-taa lɛlaa tɔ se: “Iyele ɖɩna se Elii kɔŋ nɛ ɛya ɛ-ñʋʋ naa we?” 50 Peeye Yesu tasɩ mabʋ kubuka ɖoŋ nɛ ɛhɛɛ.
51 Alɩwaatʋ ndʋ tɩ-yɔɔ pɩsaʋ sɔsɔʋ ŋgʋ paakaɣ Ɛsɔ ɖɩɣa taa yɔ, kɩkpaɣnɩ ñʋʋ taa faɣʋ nɛ kitii kɩkaɖɩnɩ pɩ-tɛɛ hɔɔlɩŋ naalɛ. Tɛtʋ kañamsaa nɛ ɛwasɩ ya 52 nɛ pɩlaŋ yɔɔ kuli nɛ Ɛsɔ ñɩma sakɩyɛ mba paasɩba yɔ, pefe 53 nɛ palɩnɩ pɩlaŋ taa. Yesu kɔma efe lɛ, powolo Yeruusalɛm*fɛ* nɛ ɛyaa sakɩyɛ na-wɛ. \fm ɛ \fr (27.53) Yeruusalɛm: ɩcɔnɩ Mat 4.5.
54 Room sɔɔja sɔsɔ nɛ lɛlaa mba ɛ nɛ wɛ paaɖaŋ Yesu yɔɔ yɔ, pana tɛtʋ ñamsʋʋ nɛ mbʋ pɩtɩŋa payɩ pɩlabɩ mbʋ yɔ lɛ, sɔɔndʋ kpa-wɛ siŋŋ nɛ pɔtɔ se: “Toovenim, ɛnɛ ɛɛkɛ Ɛsɔ Pɩyalʋ!” 55 Halaa nabɛyɛ kɛwɛ poliŋ taa nɛ pɔcɔŋnɩ ɖɔɖɔ, pɔɖɔ sakɩyɛ. Mba katɩŋnɩ-ɩ nɛ ɖooo Galilee nɛ pasɩŋnɩ-ɩ. 56 Pa-taa lɛlaa yɔ: Magdala tɛtʋ taa *Maarɩɩ nɛ Yakubu nɛ *Yozɛɛfʋ po-ɖoo *Maarɩɩ nɛ Zebedee pɩyalaa ɖoo.
Yesu pim tɔm
(Mrk 15.42-47; Luk 23.50-56; Yoh 19.38-42)
57 Ɖanaɣ ɖanaa lɛ, Ariimatee ñɩm tʋ weyi payaɣ se *Yozɛɛfʋ nɛ ɛkɛ Yesu tɔmkpɛlɩkɩyʋ ɖɔɖɔ yɔ, 58 ewolo Room wiyaʋ *Pilaatɩ cɔlɔ. Ewoba lɛ, etendi-i se ye etisiɣ yɔ, ɛcɛlɩ-ɩ Yesu nɛ ewona epi. Ɛlɛ Pilaatɩ tisi nɛ ɛha nɔɔ se powolo pakpaɣ-ɩ nɛ pɛcɛlɩ-ɩ. 59 Peeye ɛkpaɣ-ɩ nɛ ɛhɔkɩ-ɩ pɩsaʋ kɩfalʋʋ kʋhʋlʋmʋʋ nakʋyʋ taa 60 nɛ ewona epi pɩlaʋ kɩfalʋ ŋgʋ eeyeba nɛ pɛcɛsɩ-ɩ ɛwaɣ taa yɔ kɩ-taa nɛ epilisi pɩyɛ sɔsɔɖɛ naɖɩyɛ nɛ ɛɖɩɣ kʋ-nɔɔ nɛ ɛcaŋ ɛɖɛɛ.ILLUSTRATION 06
61 Magdala Maarɩɩ nɛ *Maarɩɩ lɛlʋ paacaɣ peeye nɛ patʋʋzɩnɩ ɖenɖe pɩlaʋ ŋgʋ kʋ-nɔɔ wɛna yɔ nɛ pɔcɔŋnɩ-kʋ.
Paɖaŋʋʋ Yesu pɩlaʋ yɔɔ yɔ
62 Kɩyakʋ ŋgʋ Yuda ñɩma ñɔɔzʋʋ pa-tɩ se pʋcɔ pɩtalɩ *kɩyakʋ kɩhɛzʋʋ yɔ, kɩɖɛwa nɛ tɛʋ fe lɛ, *cɔjɔnaa *sɔsaa nɛ *Farɩsɩ ñɩma powolo pekpeɣli *Pilaatɩ tɛ 63 nɛ peheyi-i se: “Ɖajaa! Ɖɩtɔzʋʋ se alɩwaatʋ ndʋ pɔbɔtʋ ɛnɛ ɛɛwɛnɩ ɛ-ɛza yɔ, ɛtɔm se kɩyakɩŋ naadozo wayɩ lɛ, efeŋ. 64 Pʋ-yɔɔ lɛ, ɖɩpɔzʋʋ-ŋ se ŋlɩzɩ sɔɔjanaa nɛ powolo paɖaŋ ɛ-pɩlaʋ yɔɔ nɛ pʋkɔɔ pɩsɩnɩ kɩyakɩŋ naadozo ɩnʋ. Pɩtɛkɛ mbʋ, ɛ-tɔmkpɛlɩkɩyaa woki patʋlɩ kʋ-nɔɔ nɛ pamɩlɩ-ɩ nɛ pɔkɔɔ pɛcɛtɩ ɛyaa se efema nɛ ɛlɩnɩ sɩɖaa taa nɛ pɛ-cɛtɩm ñɔkɔɔ pɩkɩlɩ kajalaɣ ñɩmbʋ.” 65 Peeye Pilaatɩ cosi-wɛ se: “Sɔɔjanaa yɔ! Ɩkpaɣ-wɛ nɛ powolo paɖaŋ pɩlaʋ yɔɔ ɛzɩ ɩsɔɔlʋʋ yɔ.”
66 Peeye powobi pañɩ pɩyɛ nɖɩ paɖɩɣ pɩlaʋ ŋgʋ kʋ-nɔɔ yɔ ɖɩ-yɔɔ se nɔɔyʋ etukuni-ɖɩ lɛ, pana. Pɛtɛma lɛ, pasɩɩ sɔɔjanaa se paɖaŋ kpam.