Patam Yesu yɔɔ nɔɔ yɔ
(Mrk 14.1-2; Luk 22.1-2; Yoh 11.45-53)
26
1 Yesu tɛm ɛ-tɔmkpɛlɩkɩyaa tɔm ndɩ ndɩ kɛdʋʋ payɩ lɛ, eheyi-wɛ se: 2 “Ɩnawa se pɩkazɩ kɩyakɩŋ naalɛ se pɔtɔɔ Yomiye Taa Lɩʋ *Kazandʋ. Alɩwaatʋ ndʋ tɩ-taa pɔkɔŋ kpaʋ *Ɛyʋ Pɩyalʋ nɛ paɖʋzɩ-ɩ koyindinaa nesi taa nɛ paba kam-ɩ *kaamaŋkaɣ yɔɔ.”
3 Peeye *cɔjɔnaa sɔsaa nɛ *Yuda ñɩma *sɔsaa pekpeɣli ɖama cɔjɔnaa ñʋʋ tʋ weyi payaɣ se Kayifu yɔ, ɛ-ɖɩɣa taa nɛ 4 panɩnɩ ɖama patɩŋa se pakpa Yesu mɛsaɣ tɛɛ nɛ pakʋ-ɩ. 5 Pɔyɔɔdaɣ se: “Ɖɩtaakpa-ɩ kazandʋ alɩwaatʋ. Pɩtɛkɛ mbʋ, ɛyaa samaɣ kʋyʋʋ ɖɔ-yɔɔ.”
Halʋ nɔɔyʋ pɩyʋʋ tɩlaaɖɩ Yesu ñʋʋ taa yɔ
(Mrk 14.3-9; Yoh 12.1-8)
6 Yesu kowobi Betaanii tɛtʋ cikpetu taa nɛ ɛsʋʋ Siimɔɔ weyi ɛɛkɛ canaɣ yɔ ɛ-ɖɩɣa taa. 7 Pɔtɔkaɣ tɔɔnaɣ lɛ, halʋ nɔɔyʋ sʋʋ pɔ-cɔlɔ, ɛɖɔkɩ tɩlaaɖɩ ŋgʋ kʋwɛ liidiye pɩtɩɩfɛyɩ yɔ, fiɣa kɩñɩlɩzaɣ nakɛyɛ taa ɖo. Pɩkɛdaa lɛ, ɛpɩyɩ-kʋ Yesu ñʋʋ taa waaa.ILLUSTRATION 05
8 Ɛ-tɔmkpɛlɩkɩyaa na mbʋ lɛ, pa-taa wɩnɩ halʋ ɛnʋ nɛ pɔtɔŋ se: “Halʋ ɛnɛ, ɛwɛɛkʋʋ tɩlaaɖɩ ŋgʋ nɛ ɛlɔʋ yem yɔ, pʋwazɩɣ-ɩ we? 9 Ye paapɛdɩ-kʋ, pataayabɩ-kʋ liidiye sɔsɔɖɛ nɛ paha kʋñɔndɩnaa naa we?”
10 Pɔyɔɔdɩ mbʋ lɛ, Yesu nɩɩ nɛ ɛpɔzɩ-wɛ se: “Ɛbɛ yɔɔ ɩcɛyɩɣ halʋ ɛnʋ mbʋ? Mbʋ ɛlabɩ-m yɔ, pʋwɛ ɖeu. 11 Mbʋ pʋyɔɔ yɔ, mɩ nɛ kʋñɔndɩnaa ɩwɛna. Ɛlɛ, ma maawɛɣ mɩ-cɔlɔ mbʋ. 12 Ɛpɩyɩ tɩlaaɖɩ ŋgʋ mon-tomnaɣ yɔɔ se ɛñɔɔzɩ-kɛ nɛ pʋcɔ pepim-m. 13 Toovenim lɛ, meheyiɣ-mɩ se: paa le posusuu Laŋhɛzɩyɛ Tɔm yɔ, pɔkɔŋ kɛdʋʋ mbʋ halʋ ɛnɛ ɛlabɩ mɔ-yɔɔ yɔ pʋ-tɔm nɛ ɛyaa ɛtaasɔɔ ɛ-yɔɔ kaʋ.”
Yudaasɩ ñɩnʋʋ se ɛɖʋzɩ Yesu cɔjɔnaa sɔsaa nesi taa yɔ
(Mrk 14.10-11; Luk 22.3-6)
14 Pʋwayɩ lɛ, Yesu tɔmkpɛlɩkɩyaa hiu nɛ naalɛ taa weyi payaɣ se Yudaasɩ Iskarɩyɔɔtɩ yɔ, ewolo ɛna *Yuda ñɩma cɔjɔnaa sɔsaa 15 nɛ ɛpɔzɩ-wɛ se: “Ye manpɩzaa mankpa Yesu nɛ mɛncɛlɩ-mɩ, ɛbɛ ɩhaɣ-m?” Kpaagbaa mbʋ lɛ, pakalɩ liidiye pɔɔyɩsɩ niidozo nɛ pɛcɛlɩ-ɩ. 16 Pɩkpaɣʋnɩ alɩwaatʋ ndʋ yɔ, ɛpazɩ ñɩnʋʋ nʋmɔʋ ŋgʋ ɛɛtɩŋ nɛ ɛkpa Yesu nɛ ɛɖʋzɩ pe-nesi taa yɔ.
Yesu nɛ ɛ-tɔmkpɛlɩkɩyaa pɔtɔkʋʋ Yomiye Taa Lɩʋ *Kazandʋ yɔ
(Mrk 14.12-21; Luk 22.7-14, 21-23; Yoh 13.21-30)
17 Sɔsɔɔna Fɛyɩ Tindine *Kazandʋ kajalaɣ kɩyakʋ wiye Yesu tɔmkpɛlɩkɩyaa wobi ɛ-cɔlɔ nɛ pɔpɔzɩ-ɩ se le e-liu wɛɛ se patɩzɩ-ɩ kazandʋ ndʋ tɩ-tɔɔnaɣ? 18 Ɛlɛ, ecosi-wɛ se: “Iwolo tɛtʋ taa nɔɔyʋ cɔlɔ nɛ iheyi-i se Wɩlɩyʋ se ɛ-sɩm alɩwaatʋ talaa, ñɛ-tɛ ɛ nɛ ɛ-tɔmkpɛlɩkɩyaa pɔkɔŋ pɔtɔɔ Yomiye Taa Lɩʋ *Kazandʋ.” 19 Ɛlɛ ɛ-tɔmkpɛlɩkɩyaa la ɛzɩ eheyuu-wɛ yɔ nɛ patɩzɩ kazandʋ tɔɔnaɣ.
20 Pɩlɛdaa lɛ, Yesu nɛ ɛ-tɔmkpɛlɩkɩyaa hiu nɛ naalɛ pacaɣ tɔɔnaɣ ɖɩtɔɔyɛ. 21 Pɔtɔkaɣ lɛ, eheyi-wɛ se: “Toovenim lɛ, mankaɖɩɣ-mɩ se: mɩ-taa nɔɔyʋ kɔŋ-m kpaʋ nɛ ɛɖʋzɩ koyindinaa nesi taa.” 22 Ɛyɔɔdɩ mbʋ lɛ, ɛ-tɔmkpɛlɩkɩyaa laŋa wɛɛkɩ pɩŋŋ nɛ pɔpɔzʋʋ-ɩ kʋɖʋm kʋɖʋm se: “Kɩpaɣlʋ! Ma na?” Ɛnɛ se: “Kɩpaɣlʋ! Ma na?” 23 Ɛlɛ ecosi-wɛ se: “Weyi ma nɛ ɩ ɖɩtɔkɩ ñanaɣ kʋɖʋmaɣ taa yɔ, ɛnʋ kɔŋnɩ-m kpaʋ nɛ ɛɖʋzɩ koyindinaa nesi taa. 24 *Ɛyʋ Pɩyalʋ kɔŋ kʋyʋʋ kedeŋa yɔɔ cɩnɛ ɛzɩ pamaʋ ɛ-tɔm Ɛsɔtɔm Takayaɣ taa yɔ. Ɛlɛ, pʋtɔɔ weyi ɛɖʋzʋʋ-ɩ koyindinaa nesi taa yɔ! Ye pataalʋlɩ pʋdʋ yɔ, pɩɩkɩlɩ-ɩ sɛʋ.” 25 Peeye Yudaasɩ weyi ɛɖʋzʋʋ-ɩ koyindinaa nesi taa yɔ, ɛpɔzɩ-ɩ se: “Wɩlɩyʋ! Ma na?” Ɛlɛ, Yesu cosi-i se: “Ñɔyɔɔdʋʋnɩ mbʋ.”
Yesu sɩm nɛ e-fem pɔ-yɔɔ tɔzʋʋ sɔnzɩ tɔm
(Mrk 14.22-26; Luk 22.15-20; 1 Kɔr 11.23-25)
26 Yesu nɛ ɛ-tɔmkpɛlɩkɩyaa pɔtɔkaɣ tɔɔnaɣ lɛ, ɛkpaɣ tindine nɛ ɛsɛɛ ɖɩ-yɔɔ Ɛsɔ nɛ ɛcɩyɩ-ɖɩ nɛ ɛcɛlɩ-wɛ se: “Ɩmʋ nɛ ɩtɔɔ, pʋnɛ lɛ mon-tomnaɣ.” 27 Pʋwayɩ lɛ, ɛkpaɣ sʋlʋm nɛ caɖaɣ nɛ ɛsɛɛ pʋ-yɔɔ Ɛsɔ nɛ ɛcɛlɩ-wɛ nɛ ɛtɔ se: “Ɩmʋ nɛ ɩñɔɔ mɩtɩŋa payɩ. 28 Sʋlʋm pʋnɛ lɛ man-calɩm mbʋ pɩkpɛdɩɣ ɛyaa sakɩyɛ yɔɔ se Ɛsɔ ɛpɩzɩ ekpeɣ-wɛ pa-kɩwɛɛkɩm yɔ. Pʋ-yɔɔ ɛtɩŋɩɣna nɛ ɛɖʋ *nɔɔ haʋ. 29 Mankaɖɩɣ-mɩ se pɩkpaɣʋnɩ lɛɛlɛɛyɔ yɔ, maatasɩɣ sʋlʋm ñɔʋ nɛ pʋkɔɔ pɩsɩnɩ kɩyakʋ ŋgʋ ma nɛ mɩ ɖɩñɔ kɩfam man-Caa Ɛsɔ Kewiyaɣ taa yɔ.”
30 Ɛtɛm-wɛ heyuu mbʋ lɛ, petee kazandʋ hendu nɛ pɛɖɛɛ pakpa *Somiŋ Pʋʋ yɔɔ.
Yesu yɔɔdʋʋ se Pɩyɛ kɔŋ kpɛzʋʋ se ɛtasɩm-ɩ yɔ
(Mrk 14.27-31; Luk 22.31-34; Yoh 13.36-38)
31 Yesu nɛ ɛ-tɔmkpɛlɩkɩyaa pakpa peeye lɛ, eheyi-wɛ se: “Iseɣ mɩtɩŋa payɩ nɛ iyebi-m ɖoo anɛ a-taa maɣmaɣ. Mbʋ pʋyɔɔ yɔ, Ɛsɔ yɔɔdaa se: ‘Mamakɩ ninɖiɣyu sɩbʋ yɔɔ sɩbʋ yɔɔ nɛ piyele heŋ mɩzɩ ɖama.’ Ndʋ pama ɛ-Tɔm Takayaɣ taa. 32 Ɛlɛ, alɩwaatʋ ndʋ menfeŋ yɔ, manɖaŋɩɣ-mɩ Galilee.” 33 Peeye Pɩyɛ heyi-i se: “Paa lɛlaa eseɣ patɩŋa se peyebi-ŋ yɔ, ma maalakɩ mbʋ kaʋ!” 34 Ɛlɛ Yesu heyi-i se: “Toovenim lɛ, meheyiɣ-ŋ se ɖoo anɛ a-taa maɣmaɣ, pʋcɔ kalɩmɔʋ koo lɛ, ŋkpɛzɩɣ tɔm naadozo se ŋtasɩm-m.” 35 Ɛlɛ, Pɩyɛ heyi-i se: “Paa sɩm yɔ, ma nɛ ŋ ɖɩsɩ, maakpɛzɩɣ kaʋ se mantasɩm-ŋ.” Ɛ-tɔmkpɛlɩkɩyaa lɛlaa yɔɔdɩ patɩŋa mbʋ ɖɔɖɔ.
Yesu sɛɣʋ Ɛsɔ Jesemaanɩ yɔ
(Mrk 14.32-42; Luk 22.39-46)
36 Pʋwayɩ lɛ, Yesu nɛ ɛ-tɔmkpɛlɩkɩyaa patalɩ ɖenɖe payaɣ se Jesemaanɩ yɔ. Peeye eheyi ɛ-tɔmkpɛlɩkɩyaa se: “Ɩcaɣ cɩnɛ nɛ mowolo mɛnsɛɛ Ɛsɔ nɛ mɔnkɔɔ.” 37 Ɛɖɛɣaɣ lɛ, ɛyaa Pɩyɛ nɛ Zebedee pɩyalaa naalɛ. Pɛɖɛ tɔmkpɛlɩkɩyaa lɛlaa yɔɔ pazɩ lɛ, ɛ-laŋɩyɛ wɛɛkɩ nɛ sɔɔndʋ kpa-ɩ. 38 Peeye eheyi-wɛ se: “Mɛ-ɛza ñɩŋ sɩm yɔɔ sɩm yɔɔ. Ɩcaɣ cɩnɛ, ma nɛ mɩ ɖɩcaɣnɩ ɖɛ-ɛza.” 39 Ɛlɛ etuzi ɛ-tɩ ɛsɩndaa pazɩ nɛ eluŋ nɛ ɛpa ɛ-ɛza nɛ tɛtʋ nɛ etendi Ɛsɔ se: “Man-Caa! Ye ŋtisiɣ yɔ, taayele nɛ kʋñɔŋ ŋgʋ kɩtalɩ-m. Ɛlɛ, la mbʋ ñe-liu wɛɛ yɔ, taala mbʋ me-liu wɛɛ yɔ.”
40 Ɛtɛm Ɛsɔ sɛʋ lɛ, ɛpɩsɩ ɛ-tɔmkpɛlɩkɩyaa mba pɔ-cɔlɔ nɛ ɛmaɣnɩ pɔɖɔŋ ɖou. Peeye ɛpɔzɩ Pɩyɛ se: “Ye mbʋ, ɩtapɩzɩ ɩsɩnɩ-m caɣʋ paa ñɩɩɩ! 41 Ɩcaɣnɩ mɩ-ɛza nɛ ɩsɛɛ Ɛsɔ, pɩtɛkɛ mbʋ, ɩkɔŋ ɩsʋʋ takʋʋ taa. Ɛyʋ liu wɛɛ se ɛla mbʋ pʋwɛ ɖeu yɔ, ɛlɛ, ɛwɛnɩ kaapɩzɩtʋ.” 42 Ɛyɔɔdɩ mbʋ lɛ, ɛtasɩ ɛ-tɩ tuzuu nɛ etendi Ɛsɔ se: “Man-Caa! Ye ŋŋtisiɣ se kʋñɔŋ kʋnɛ kɩɖɛɛ nɛ mantaasʋʋ kɩ-taa yɔ, ŋla mbʋ ñe-liu wɛɛ yɔ.” 43 Ɛtasɩ pɩsʋʋ ɛ-tɔmkpɛlɩkɩyaa cɔlɔ lɛ, ɛmaɣnɩ ɖɔɖɔ pɔɖɔŋ ɖou, patapɩzɩ pacaɣnɩ pɛ-ɛza. 44 Peeye Yesu tuzi ɛ-tɩ tozo ɖeɖe nɛ ɛtasɩ Ɛsɔ tenduu nɛ ɛyɔɔdɩ tɔm kʋɖʋmtʋ ndʋ. 45 Pʋwayɩ lɛ, ɛpɩsɩ pɔ-cɔlɔ nɛ ɛpɔzɩ-wɛ se: “Ɩwɛ ɖom yɔɔ tam mbʋ? Lɛɛlɛɛyɔ, alɩwaatʋ talaa se paɖʋzɩ *Ɛyʋ Pɩyalʋ kɩwɛɛkɩm laɖaa nesi taa. 46 Ɩkʋyɩ ɖɩkatɩ weyi ɛkpaɣ-m se ɛɖʋzɩ pe-nesi taa yɔ! Ɛkɔŋ naɣ yɔ!”
Pakpaʋ Yesu yɔ
(Mrk 14.43-50; Luk 22.47-53; Yoh 18.3-12)
47 Yesu yɔɔdaɣ mbʋ lɛ, ɛ-tɔmkpɛlɩkɩyaa hiu nɛ naalɛ taa lɛlʋ weyi payaɣ-ɩ se Yudaasɩ yɔ nɛ ɛyaa samaɣ nakɛyɛ patalɩ. Pɔɖɔkɩ sɛsɩ kɩɖaɣlɩsɩ nɛ pɔla. *Cɔjɔnaa sɔsaa nɛ *Yuda ñɩma *sɔsaa petiyini-wɛ. 48 Yudaasɩ ɛnʋ, ɛkpaɣnɩ Yesu se ɛɖʋzɩ kɩwɛɛkɩm laɖaa nesi taa. Ɛɛtɛm ɛyaa samaɣ ŋga kɛdʋʋ ɛzɩma mbʋ ɛlakɩ nɛ pasɩm-ɩ nɛ pakpa-ɩ yɔ. Eheyi-wɛ se: “Ye mowobi mɛnsɛɛ nɔɔyʋ nɛ mamʋzɩ ɛ-laɣzaɣ yɔɔ lɛ, ɛnʋ lɛ. Ɩkpa-ɩ.” 49 Ɛtalaa lɛ, ɛtɩwobu Yesu cɔlɔ nɛ eheyi-i se: “Wɩlɩyʋ, sɛɛ ɖeu!” Ɛlɛ ɛmʋzɩ ɛ-laɣzaɣ yɔɔ. 50 Yesu heyi-i se: “Mɛ-ɛgbaadʋ, la mbʋ ŋkɔm se ŋlakɩ yɔ lɔŋ!” Peeye ɛyaa samaɣ woba kakpa Yesu. 51 Ɛlɛ ɛ-tɔmkpɛlɩkɩyaa taa lɛlʋ sezi ɛkpɛɛ ɛ-sɩɣa kɩɖaɣlaɣ nɛ ɛsɛtɩ *cɔjɔnaa ñʋʋ tʋ tʋmlaɖʋ nɩŋgbaŋʋʋ. 52 Peeye Yesu heyi-i se: “Pɩsɩnɩ ña-sɩɣa ko-huyuu taa, mbʋ pʋyɔɔ yɔ, mba patɩŋa payɩ pakʋʋ lɛlaa nɛ sɛsɩ yɔ, sɩɣa pakʋʋnɩ-wɛ ɖɔɖɔ. 53 Ŋtatɩlɩ se manpɩzaɣ se mayaa man-Caa se ɛkɔɔ ɛsɩnɩ-m nɛ halɩ etiyini-m e-*tiyiyaa tikasɩ hiu nɛ naalɛ kpaagbaa yaa we? 54 Ŋgʋ, ye malabɩ mbʋ, ɛzɩma tɔm ndʋ pama Ɛsɔtɔm Takayaɣ taa yɔ, tɩpɩzɩɣ tɩla? Pamawa se pʋwɛɛ se tɩla mbʋ.”
55 Peeye Yesu pɔzɩ ɛyaa samaɣ se: “Ɩkɔm ma-wayɩ nɛ sɛsɩ kɩɖaɣlɩsɩ nɛ pɔla yɔ, mɛnkɛ mɩlʋ naa we? Ma nɛ mɩ ɖɩɩwɛ Ɛsɔ ɖɩɣa taa kɩyakɩŋ tɩŋa nɛ mawɩlɩɣ Ɛsɔtɔm, ɛlɛ, ɩtakpa-m. 56 Ɛlɛ, pɩtɩŋa pɩlabɩ mbʋ se tɔm ndʋ lɔɔyɩsɩ tɩnaa ma Ɛsɔtɔm Takayaɣ taa yɔ, tɩla.”
Peeye ɛ-tɔmkpɛlɩkɩyaa tɩŋa payɩ mɩzɩ ɖama nɛ peyebi-i.
Yuda ñɩma hʋʋnɩ Yesu tɔm yɔ
(Mrk 14.53-65; Luk 22.54-55, 63-71; Yoh 18.13-14, 19-24)
57 Pakpa Yesu lɛ, pakpaɣ-ɩ se powokini-i *Yuda ñɩma *cɔjɔnaa ñʋʋ tʋ Kayifu tɛ ɖenɖe pɛ-ɛgbɛyɛ taa sɔsaa nɛ pa-paɣtʋ wɩlɩyaa paakpeɣlaa yɔ. 58 Pɛɖɛɣaɣnɩ-ɩ lɛ, Pɩyɛ wɛɛ mɛlʋʋ taa mɛlʋʋ taa nɛ ɛtɩŋɩɣ ɛ-wayɩ. Ɛtalɩ cɔjɔnaa ñʋʋ tʋ ɛnʋ ɛ-taɣ yɔɔ lɛ, ɛcaɣ Ɛsɔ ɖɩɣa yɔɔ ɖaŋɩyaa cɔlɔ se ɛna mbʋ pʋkɔŋ tɛmnaʋ yɔ. 59 Peeye cɔjɔnaa sɔsaa nɛ tɔm hʋyaa lɛlaa tɩŋa pañɩnaɣ aseɣɖe tɩnaa se powolo pɛcɛtɩnɩ Yesu taa nɛ pehiɣ-i pakʋ-ɩ. 60 Ɛlɛ, petehiɣ nɔɔyʋ. Ŋgʋ, ɛyaa sakɩyɛ woba nɛ pɛcɛtɩnɩ ɛ-taa. Pɩkɛdaa lɛ, abalaa naalɛ nabɛyɛ wolo 61 nɛ pɔtɔ se: “Abalʋ ɛnɛ, ɛtɔm se ɛpɩzɩɣ ɛyɔkɩ Ɛsɔ ɖɩɣa nɛ ɛɖaɣnɩ-kɛ maʋ nɛ kɩyakɩŋ naadozo.”
62 Peeye *cɔjɔnaa ñʋʋ tʋ kʋyaa nɛ ɛpɔzɩ Yesu se: “Tɔm ndʋ tɩtɩŋa payɩ ɛyaa panɛ pɔtɔŋ se ŋyɔɔdaa yɔ, ŋfɛyɩnɩ natʋyʋ se ŋcosuu yaa we?” 63 Ɛlɛ, esuma ɖiɣ ɖiɣ. Peeye ɛpɔzɩ-ɩ se: “Ña lɛ *Weyi Ɛsɔ Lɩzaa Yɔ yaa we? Ña ɖɔɖɔ lɛ Ɛsɔ Pɩyalʋ? Ye mbʋ, ɖuuni Ɛsɔ wezuu tʋ.” 64 Yesu cosi-i se: “Ña-tɩ tɩŋa ŋyɔɔdɩnɩ mbʋ. Ɖɔɖɔ lɛ, mankaɖɩɣ-mɩ se: pɩkpaɣʋnɩ lɛɛlɛɛyɔ yɔ, ɩkɔŋ naʋ *Ɛyʋ Pɩyalʋ, ɛcaɣ Ɛsɔ Ɖoŋ Tɩŋa Tʋ cɔlɔ lone kɩbanɖɛ taa. Ɩkɔŋ-ɩ naʋ ɖɔɖɔ ɛsɔmɩndʋ yɔɔ, ɛɖɔŋ kɔm.”
65 Cɔjɔnaa ñʋʋ tʋ ɛnʋ, ɛnɩ mbʋ lɛ, ɛkʋyɩ nɛ ɛcɩyɩ ɛ-cɔjɔtʋ toko nɛ pɩwɩlɩ se pɩwɩzɩ-ɩ pɩŋŋ nɛ ɛpɔzɩ ɛyaa lɛlaa se: “Ɛwɛɛkɩ Ɛsɔ hɩɖɛ! Ɛbɛ yɔɔ pʋwɛɛ se ɖɩtasɩ ñɩnʋʋ aseɣɖe tɩnaa yɔ? Paa weyi ɛnɩnɩ ɛ-nɩŋgbaaŋ! 66 Ɩmaɣzɩɣ se we?” Ɛlɛ pocosi se: “Ɛ-tɔm sɩba, pʋwɛɛ se pakʋ-ɩ.” 67 Peeye papazɩ Yesu ɛsɩndaa tɔʋ ndaatʋ nɛ pamakɩ-ɩ ŋguluma nɛ lɛlaa cɛkɩ-ɩ kadanzɩ 68 nɛ pɔtɔŋ se: “*Weyi ña Ɛsɔ Lɩzaa Yɔ, kpeɣ se amabɩ-ŋ?”
Pɩyɛ kpɛzʋʋ se ɛtasɩ Yesu yɔ
(Mrk 14.66-72; Luk 22.56-62; Yoh 18.15-18, 25-27)
69 Alɩwaatʋ ndʋ Pɩyɛ caɣ taɣ yɔɔ yɔ, tɩ-taa cɔjɔnaa ñʋʋ tʋ tʋmlaɖʋ halʋ ñɩnʋ nɔɔyʋ lɩwa nɛ ɛmaɣnɩ-ɩ nɛ eheyi-i se: “Ña ɖɔɖɔ! Ŋtɩŋaɣ Galilee tʋ Yesu wayɩ.” 70 Peeye ɛkpɛzɩ patɩŋa pɛ-ɛsɩndaa se: “Maasɩŋ ndʋ ŋcaɣ yɔɔdʋʋ yɔ.” 71 Pʋwayɩ lɛ, ɛlɩɩ ewolo nɔnɔɔ taa. Ɛlɛ, tʋmlaɖʋ halʋ ñɩnʋ lɛlʋ tasɩ-ɩ naʋ nɛ eheyi mba pɛwɛ peeye yɔ se: “Ɛnɛ ɖɔɖɔ ɛtɩŋaɣ Nazarɛɛtɩ tʋ Yesu wayɩ.” 72 Ɛlɛ, Pɩyɛ tasɩ kpɛzʋʋ nɛ eɖuu se: “Mantasɩ abalʋ ɛnʋ.” 73 Pɩkɛdaa lɛ, mba pɛwɛ peeye yɔ, potuzi pa-tɩ nɛ pɔñɔtɩnɩ-ɩ nɛ peheyi-i se: “Toovenim, ŋkɛ pa-taa lɛlʋ: ñɔ-yɔɔdaɣ wɩlɩɣnɩ mbʋ.” 74 Peeye ɛkpɛzaa laɣ laɣ nɛ eɖuu se: “Nɛ Ɛsɔ! Mantasɩ abalʋ ɛnʋ!” Kpaagbaa mbʋ lɛ, kalɩmɔʋ koo. 75 Ɛlɛ Pɩyɛ tɔzɩ tɔm ndʋ Yesu keheyi-i se: “Pʋcɔ kalɩmɔʋ koo lɛ, ŋkpɛzɩɣ tɔm naadozo se ŋtasɩm-m” yɔ tɩ-yɔɔ. Peeye ɛkʋyaa ɛlɩɩ nɛ ewili ɛzɩ pɛcɛbɩ e-liu tɛɛ yɔ.