Kalɩkalaɣ nakɛyɛ yɔɔ cɛbʋ yɔ
(Mat 9.1-8; Luk 5.17-26)
2
1 Pɩlabɩ kɩyakɩŋ cabɩ lɛ, Yesu pɩsɩ Kapɛrnayum. Ɛyaa nɩwa se ɛwɛ ɖɩɣa lɛ, 2 pekpeɣli pɩtɩɩfɛyɩ nɛ posu nɛ pɩkpɛndɩnɩ awayɩ nɔnɔɔ taa nɛ ɛtasɩ-wɛ heyuu Ɛsɔtɔm. 3 Ɛyaa nabɛyɛ wokaɣnɩ kalɩkalaɣ nakɛyɛ ɛ-cɔlɔ. Ɛyaa naanza kpaɣnɩ-kɛ. 4 Ɛyaa samaɣ yɔɔ lɛ, patana ɛzɩma mbʋ pala nɛ patanɩ-kɛ yɔ. Peeye pakpa kuduyuu ŋgʋ ɛɛwɛ kɩ-tɛɛ yɔ kʋ-ñʋʋ taa nɛ patʋʋzɩnɩ ɖenɖe ɛɛwɛɛ yɔ nɛ patʋlɩ pɔʋ nɛ petisi-kɛ nɛ ka-ñalʋʋ. 5 Yesu nawa se ɛyaa mba pɛwɛnɩ lidaʋ ɛ-yɔɔ lɛ, eheyi kalɩkalaɣ ŋga se: “Man-taabalʋ! Menkpeɣ-ŋ ña-kɩwɛɛkɩm.” 6 Yuda ñɩma paɣtʋ wɩlɩyaa nabɛyɛ kacaɣ peeye nɛ pahʋʋ pa-taa Yesu tɔm se: 7 “Ɛyʋ ɛnɛ ɛcalɩ ɛ-taa se we nɛ ɛyɔɔdʋʋ mbʋ? Ɛwɛɛkɩɣ Ɛsɔ hɩɖɛ! Apɩzɩɣ ekpeɣ kɩwɛɛkɩm nɛ pɩtasɩnɩ Ɛsɔ?” 8 Kpaagbaa mbʋ lɛ, Yesu tɩlɩ tɔm ndʋ pahʋwaɣ pa-taa mbʋ yɔ nɛ ɛpɔzɩ-wɛ se: “Pɩlabɩ ɛzɩma ɩhʋʋ mɩ-taa mbʋ? 9 Ye meheyi kalɩkalaɣ ŋga se menkpeɣ-kɛ ka-kɩwɛɛkɩm yaa kakʋyɩ kakpaɣ ka-ñalʋʋ nɛ kɛɖɛɛ, tɩ-naalɛ tɩ-taa lɛ, ndʋ tɩfɛyɩ kaɖɛ? 10 Mancaɣ mawɩlɩ-mɩ se *Ɛyʋ Pɩyalʋ wɛnɩ ɖoŋ se ekpeɣ ɛyaa pa-kɩwɛɛkɩm kedeŋa yɔɔ cɩnɛ.”
Peeye eheyi kalɩkalaɣ ŋga se: 11 “Ña! Kʋyɩ ŋkpaɣ ña-ñalʋʋ nɛ ŋkpe” 12 nɛ kakʋyɩ kpaagbaa nɛ kakpaɣ ka-ñalʋʋ ɛyaa tɩŋa ɛsɩndaa nɛ pɔcɔnɩ-kɛ pɩŋŋ nɛ kɛɖɛɛ. Pana-kɛ mbʋ lɛ, pɩla patɩŋa piti pɩŋŋ nɛ pasaŋ Ɛsɔ nɛ pɔtɔŋ se: “Ɖooo yɔ, ɖɩtanata mbʋ Yesu labɩ ɛzʋnɔ yɔ pɩ-lɛzʋʋ.”
Yesu yaʋ *Leevi yɔ
(Mat 9.9-13; Luk 5.27-32)
13 Pʋwayɩ lɛ, Yesu lɩɩ nɛ ɛpɩsɩ Galilee teŋgu nɔɔ nɛ ɛyaa sakɩyɛ wolo ɛ-cɔlɔ nɛ ɛwɩlɩ-wɛ Ɛsɔtɔm. 14 Ɛtɛma nɛ ɛɖɛɣ lɛ, ɛna Alfee pɩyalʋ *Leevi, ɛcaɣ ɛ-tʋmɩyɛ taa *tikee ɖɩmʋyɛ. Peeye eheyi-i se: “Kʋyɩ ŋtɩŋ-m!” Ɛlɛ kʋyɩ nɛ ɛtɩŋ-ɩ.
15 Pʋwayɩ lɛ, Yesu nɛ ɛ-tɔmkpɛlɩkɩyaa nɛ *tikee mʋyaa sakɩyɛ nɛ lɛlaa mba ɛyaa kpakaɣ-wɛ se pɛkɛ kɩwɛɛkɩm laɖaa yɔ, powolo *Leevi tɛ nɛ pacaɣ tɔɔnaɣ ɖɩtɔɔyɛ. Pɩtɛ ɛyaa mba patɩŋaɣ-ɩ yɔ, paaɖɔwa. 16 Alɩwaatʋ ndʋ Yuda ñɩma paɣtʋ wɩlɩyaa mba pɛkɛ *Farɩsɩ ɛgbɛyɛ taa ñɩma yɔ pana ɛyaa mba nɛ Yesu pɔtɔkaɣ tɔɔnaɣ lɛ, pɔpɔzɩ ɛ-tɔmkpɛlɩkɩyaa se: “Pɩlabɩ ɛzɩma ɛ nɛ tikee mʋyaa nɛ kɩwɛɛkɩm laɖaa pɛkpɛndɩɣ pɔtɔkɩ?” 17 Yesu nɩ mbʋ lɛ, ecosi-wɛ se: “Pɩtɛkɛ alaafɩya tɩnaa pʋpɔzʋʋ se powolo fɛɖaa tɛ, kʋdɔndɩnaa pʋpɔzʋʋ se powolo. Pɩtɛkɛ mba pamaɣzɩɣ se pɛkɛ kʋtʋʋzaa yɔ, pa-wayɩ mɔnkɔma. Ɛlɛ, mba pasɩm pa-tɩ se pɛkɛ kɩwɛɛkɩm laɖaa yɔ, pa-wayɩ mɔnkɔm se pɛlɛɣzɩ wɛtʋ.”
*Nɔɔ hɔkʋʋ tɔm
(Mat 9.14-17; Luk 5.33-39)
18 Kɩyakʋ nakʋyʋ Lɩm Sɔʋ Sɔnzɩ Laɖʋ Yohanɛɛsɩ tɔmkpɛlɩkɩyaa nɛ Farɩsɩ ñɩma pɔhɔkaɣ *nɔɔ Ɛsɔtɔm yɔɔ. Peeye ɛyaa woba nɛ pɔpɔzɩ Yesu se: “Pɩlabɩ ɛzɩma Farɩsɩ ñɩma tɔmkpɛlɩkɩyaa nɛ Yohanɛɛsɩ ñɩma pɔhɔkʋʋ nɔɔ nɛ ña-ñɩma ñaahɔkʋʋ?” 19 Peeye Yesu cosi-wɛ se: “Ɩmaɣzɩɣ se mba payaɣ-wɛ halɩkpaɣyɛ kazandʋ ɖeɖe yɔ, powoki pacaɣ ñɔɔsɩ halʋ kɩfalʋ walʋ ɛsɩndaa yaa we? Pɩɩlakɩ mbʋ. 20 Ɛlɛ, pɔkɔŋ lɩzʋʋ walʋ ɛnʋ pɛ-hɛkʋ taa alɩwaatʋ natʋyʋ. Tɩ-taa pɔkɔŋ nɔɔ hɔkʋʋ.”
21 Yesu tasɩ-wɛ heyuu se: “Paakpakɩɣ pɩsaʋ kɩfalʋʋ hɔɔlaɣ nɛ pɔtɔnɩ wonuu kɩbɩnʋʋ. Pɩtɛkɛ mbʋ, pɔcɔtʋʋ-kʋ lɛ, hɔɔlaɣ ŋga kasʋʋ nɛ kɔhɔm-kʋ nɛ kɩtɛzɩ cɩyʋʋ.” 22 Ɛtasɩ-wɛ heyuu ɖɔɖɔ se: “Paasuu sʋlʋm pɛŋ*fb* weyi ɩtɔwaa yɔ ɩ-taa. Pɩtɛkɛ mbʋ, pʋkɔŋ se pɩpɩɣ yɔ, pɩyasɩɣ-ɩ nɛ sʋlʋm wɛɛkɩ pikpe tataa yem nɛ pɛŋ ñala asayʋʋ ɖɔɖɔ. Ɛlɛ, pɛŋ weyi ɩtɔtɔɔ yɔ, ɩ-taa posuu.” \fm b \fr (2.22) \fk Pɛŋ: \f Yuda ñɩma tɛ lɛ, tɔnɛ palabɩnɩ-ɩ, paɖʋʋ ɩ-taa num yaa lɩm yaa sʋlʋm.
Yesu yɔɔdʋʋ *kɩyakʋ kɩhɛzʋʋ tɔm yɔ
(Mat 12.1-8; Luk 6.1-5)
23 *Kɩyakʋ kɩhɛzʋʋ nakʋyʋ wiye Yesu nɛ ɛ-tɔmkpɛlɩkɩyaa pɔɖɔŋaɣ hayɩm nabʋyʋ taa. Pahayɩ tɔɔnaɣ nakɛyɛ pɩ-taa nɛ ɛ-tɔmkpɛlɩkɩyaa pɛlɩɣ nɛ nʋmɔʋ nɛ ponuutuu nɛ pasalɩɣ. Tɔɔnaɣ ŋga, kɛwɛ ɛzɩ amala yɔ. 24 Palakaɣ mbʋ lɛ, Farɩsɩ ñɩma na-wɛ nɛ powolo peheyi Yesu se: “Cɔnɩ ŋna ñɔ-tɔmkpɛlɩkɩyaa lakʋʋ mbʋ paɖʋ *Mooyiizi paɣtʋ taa se pataala kɩyakʋ kɩhɛzʋʋ wiye yɔ.” 25 Peeye Yesu pɔzɩ-wɛ se: “Ye mbʋ, ɩtakalɩdɩ mbʋ *Daaviidi labɩ kɩyakʋ ŋgʋ ñɔɔsɩ cɛyɩ ɛ nɛ ɛ-taabalaa yɔ yaa we? 26 Ɛsʋ Ɛsɔ ɖɩɣa taa nɛ ɛtɔɔ tindine wena paaha Ɛsɔ yɔ. Ŋgʋ, pɩfɛyɩ se nabɛyɛ ɛtɔɔ-yɛ yem nɛ pɛtɛkɛ cɔjɔnaa. Ɛlɛ, Daaviidi kpaɣ-yɛ nɛ ɛ nɛ ɛ-taabalaa pɔtɔɔ. Alɩwaatʋ ndʋ lɛ, Abiyaataarɩ kɛkɛnɩ cɔjɔnaa ñʋʋ tʋ.” 27 Pʋwayɩ lɛ, Yesu tasɩ-wɛ heyuu se: “Paɖʋ kɩyakʋ kɩhɛzʋʋ se pʋwazɩ ɛyʋ. Ɛlɛ, patala ɛyʋ kʋ-yɔɔ. 28 Pʋ-yɔɔ lɛ, Ɛyʋ Pɩyalʋ sɩmnɩ mbʋ pʋwɛɛ se pala kɩyakʋ kɩhɛzʋʋ wiye yɔ.”