LAŊHƐZƖYƐ TƆM NDƲ
LUKA
MAWA YƆ
1
1 Toovenim lɛ, ɛyaa sakɩyɛ ñaɣ pana nɛ pama mbʋ pɩɩlabɩ ɖɛ-hɛkʋ taa yɔ. 2 Pama-tʋ ɛzɩ mba pananɩ pɛ-ɛza kiɖe tɛɛ nɛ papɩsɩ Ɛsɔtɔm susiyaa yɔ, pɛkɛdʋʋ-ɖʋ-tʋ yɔ. 3 Pʋ-yɔɔ ma ɖɔɖɔ mañɩnaa nɛ mana mbʋ pɩtɩŋa payɩ pɩlaba ɖooo kiɖe tɛɛ ɖeyi ɖeyi yɔ lɛ, mana se ña ɖajaa Tewofiili lɛ, pʋmʋnaa se mama-tʋ ti-lona taa nɛ mɛnkɛdɩ-ŋ. 4 Malakɩ mbʋ se ŋpɩzɩ ŋtɩlɩ se tɔm ndʋ tɩtɩŋa payɩ pawɩlɩ-ŋ yɔ, tɩkɛ toovenim.
Ɛsɔ *tiyiyu yɔɔdʋʋ Lɩm Sɔʋ Sɔnzɩ Laɖʋ Yohanɛɛsɩ lʋlʋʋ tɔm yɔ
5 Alɩwaatʋ ndʋ *Eroodi kɛ wiyaʋ sɔsɔ Yudee egeetiye taa yɔ, *cɔjɔ nɔɔyʋ kɛwɛɛ, payaɣ-ɩ se Zakaarii. Ɛɛkɛ Abiya hɔɔlʋʋ taa tʋ lɛlʋ. Payaɣ ɛ-halʋ se Elizaabɛɛtɩ, ɛlɛ ñɛkɛ *Aarɔɔnɩ liɖe taa tʋ. 6 Pe-wezuu caɣʋ wɛ ɖeu Ɛsɔ ɛsɩndaa nɛ pɔɖɔŋ Kɩpaɣlʋ paɣtʋ tɩŋa yɔɔ camɩyɛ, natʋyʋ fɛyɩ se paawanɩ-wɛ. 7 Ɛlɛ, pɛfɛyɩnɩ pɩɣa. Mbʋ pʋyɔɔ yɔ, Elizaabɛɛtɩ kɛ kaalʋlaɣ, ŋgʋ pa-naalɛ pakpaɖɩyɩ pɩŋŋ.
8 Nakʋyʋ wiye pɩtalɩnɩ Zakaarii hɔɔlʋʋ taa ñɩma se pala tʋmɩyɛ Ɛsɔ ɛsɩndaa nɛ Zakaarii wɛɛ ɛlakɩ ɛ-cɔjɔtʋ tʋmɩyɛ. 9 Peeye paɖʋ miika nɛ palɩzɩ-ɩ ɛzɩ palakʋʋ Yuda ñɩma cɔjɔnaa sɔnzɩ yɔ se ɛsʋʋ Kɩpaɣlʋ ɖɩɣa taa lone kaɖɛ ñɩnɖɛ taa nɛ ɛɖʋ tɩlaaɖɩ miŋ taa. 10 Ɛsʋwa nɛ ɛɖʋʋ lɛ, ɛyaa samaɣ tɩŋa wɛɛ awayɩ nɛ pɛsɛɣ Ɛsɔ. 11 Peeye Kɩpaɣlʋ *tiyiyu nɔɔyʋ lɩ ɛ-yɔɔ nɛ ɛsɩŋ lone kɩbanɖɛ taa tɩlaaɖɩ ɖɩhɔɖɛ. 12 Zakaarii na-ɩ lɛ, pɩlabɩ-ɩ yaaa nɛ sɔɔndʋ kpa-ɩ. 13 Ɛlɛ, *tiyiyu ɛnʋ eheyi-i se: “Zakaarii! Taasɔɔndɩ, Ɛsɔ nɩ ñe-tenduu. Ña-halʋ Elizaabɛɛtɩ hakɩ hoa nɛ ɛlʋlɩ abalɩbɩɣa nɛ ŋyaa-kɛ se Yohanɛɛsɩ. 14 Pɩlakɩ-ŋ leleŋ nɛ ña-taa hʋlʋmɩ nɛ ɛyaa sakɩyɛ mayɩ amaya nɛ ka-lʋlʋʋ. 15 Mbʋ pʋyɔɔ yɔ, kɛkɛɣ sɔsɔ Kɩpaɣlʋ ɛsɩndaa. Kaañɔʋ vɛɛ yaa sʋlʋm lɛɛbʋ mbʋ pʋkʋʋ ɛyaa yɔ. Ɛsɔ Kalɩzaɣ wɛɣ kɔ-cɔlɔ ɖooo ko-ɖoo lotu taa. 16 Ŋga yekina nɛ *Izrɛɛlɩ ñɩma sakɩyɛ pɩsɩnɩ pa-Kɩpaɣlʋ Ɛsɔ yɔɔ. 17 Ka-maɣmaɣ kɛwɛɣnɩ *lɔɔyaɣ tʋ *Elii lɩmaɣza nɛ e-ɖoŋ nɛ kɛɖɛɛ Kɩpaɣlʋ ɛnʋ nɔɔ nɛ kɛkpɛndɩ caanaa nɛ pe-piya nɛ kokuli kaañamtʋ tɩnaa ɛza nɛ papɩsɩ kʋtʋʋzaa nɛ kɔñɔɔzɩ ɛjaɖɛ taa ñɩma ɖeu nɛ paɖaŋ Kɩpaɣlʋ ɛnʋ kpam.”
18 Ɛlɛ, Zakaarii pɔzɩ *tiyiyu ɛnʋ se: “Ɛbɛ wɩlɩɣ-m se pɩkɛ toovenim? Ma nɛ ma-halʋ ɖɩtɛm kpadɩyʋʋ!” 19 Peeye tiyiyu ɛnʋ ecosi-i se: “Ma Gabrɩyɛɛlɩ, Ɛsɔ cɔlɔ mɛwɛɛ. Ɛnʋ tiyini-m se mɔnkɔɔ meheyi-ŋ tɔm kɩbandʋ tʋnɛ. 20 Ɖenɖe ŋtetisi se mɔn-tɔm kɔŋ labʋ alɩwaatʋ ndʋ paɖʋwa yɔ tɩ-yɔɔ yɔ, ŋpɩsɩɣ kaayɔɔdaɣ nɛ pʋkɔɔ pɩsɩnɩ kɩyakʋ ŋgʋ mɔn-tɔm ndʋ tɩlaba yɔ.”
21 Alɩwaatʋ ndʋ lɛ, ɛyaa samaɣ kɛwɛ awayɩ nɛ kaɖaŋ Zakaarii nɛ pɩlabɩ-kɛ piti. Mbʋ pʋyɔɔ yɔ, ɛkɩlɩ leɖuu lone kaɖɛ ñɩnɖɛ nɖɩ ɖɩ-taa. 22 Ɛlɩwa lɛ, ɛtapɩzɩ ekuli ɛ-nɔɔ nɛ ɛyɔɔdɩnɩ-wɛ. Nesi yem ɛyɔɔɖaɣnɩ-wɛ. Peeye peɖiɣzinaa se Ɛsɔ wɩlɩ-ɩ pʋyʋ lone nɖɩ ɖɩ-taa. 23 Kɩyakɩŋ weyi pʋwɛɛ se Zakaarii ɛlabɩnɩ tʋmɩyɛ Ɛsɔ ɖɩɣa taa yɔ ɩtɛma lɛ, ɛlɩɩ ekpe. 24 Pɩlabɩ pazɩ lɛ, ɛ-halʋ Elizaabɛɛtɩ haɣ hoa. Ɛlɛ, ɛmɛlɩ ɖɩɣa fenasɩ kagbaanzɩ. Peeye ɛyɔɔdaa se: 25 “Mana mbʋ Kɩpaɣlʋ labɩ-m yɔ: ɛlabɩ-m lootiye nɛ ɛlɩzɩ-m mbʋ pɩkɛnɩ-m fɛyɛ ɛyaa ɛsɩndaa yɔ pɩ-taa.”
Ɛsɔ *tiyiyu yɔɔdʋʋ Yesu lʋlʋʋ tɔm yɔ
26-27 Elizaabɛɛtɩ haɣ hoa nɛ pɩla fenasɩ loɖo lɛ, Ɛsɔ tiyi e-*tiyiyu Gabrɩyɛɛlɩ pɛlɛ nɔɔyʋ cɔlɔ, payaɣ-ɩ se *Maarɩɩ. Ɛɛwɛ Nazarɛɛtɩ, Galilee egeetiye taa. Weyi esu-i yɔ, ɛkɛ wiyaʋ sɔsɔ Daaviidi liɖe taa tʋ, payaɣ-ɩ se *Yozɛɛfʋ. 28 Peeye Ɛsɔ *tiyiyu wobi ɛ-cɔlɔ nɛ ɛsɛɛ-ɩ se: “Weyi ña Ɛsɔ labɩ-ŋ lootiye yɔ, sɛɛ ɖeu! Kɩpaɣlʋ wɛ ñɔ-cɔlɔ.” 29 Ɛyɔɔdɩ mbʋ lɛ, pɩla Maarɩɩ yaaa nɛ ɛpɔzɩ ɛ-tɩ se sɛtʋ ndʋ tɩ-tɔbʋʋ se we? 30 Peeye Ɛsɔ tiyiyu ɛnʋ eheyi-i se: “Maarɩɩ! Taasɔɔndɩ, Ɛsɔ labɩ-ŋ lootiye. 31 Ŋhakɩ hoa nɛ ŋlʋlɩ abalɩbɩɣa nɛ ŋyaa-kɛ se Yesu. 32 Kɔkɔŋ kɛʋ sɔsɔ nɛ payaa-kɛ se Ɛsɔ Caabiyuu Pɩyalʋ nɛ Kɩpaɣlʋ Ɛsɔ ɛnʋ, ɛcɛlɩ-kɛ kewiyaɣ sɔsɔɔ ɛzɩ kɔ-cɔzɔ Daaviidi ñɩŋga yɔ. 33 Ŋga kɔŋnɩ tɔɔʋ kewiyaɣ tam Yakubu liɖe taa. Ke-kewiyaɣ ŋga, kaakɔŋ sɩʋ tɩnaɣ.”
34 Peeye Maarɩɩ pɔzɩ Ɛsɔ *tiyiyu ɛnʋ se: “Ɛzɩma pɩlakɩ mbʋ nɛ mantasɩ abalʋ?”
35 Ɛlɛ cosi-i se: “Ɛsɔ Caabiyuu Kalɩzaɣ tiki ñɔ-yɔɔ nɛ ko-ɖoŋ nɛ kohuuzi ñɔ-yɔɔ ɖeu ɛzɩ kuzotuu yɔ. Pʋ-yɔɔ pɩɣa ŋga ŋlʋlʋʋ yɔ, kɛkɛɣ Ɛsɔ ñɩnʋ nɛ payaa-kɛ se: Ɛsɔ Pɩyalʋ. 36 Ɖɔɖɔ lɛ, ña-ñɩnʋ Elizaabɛɛtɩ weyi pɔtɔŋaɣ-ɩ se ɛkɛ kaalʋlaɣ yɔ, paa ɛkpadɩyaa yɔ, ɛhaɣ hoa. E-fenasɩ loɖo yɔ, ɛlʋlʋʋ abalɩbɩɣa. 37 Mbʋ pʋyɔɔ yɔ, nabʋyʋ fɛyɩ se Ɛsɔ ɛɛpɩzɩɣ ɛlabɩ-pʋ.” 38 Peeye Maarɩɩ heyi-i se: “Mɛnkɛ Kɩpaɣlʋ tʋmlaɖʋ. Pɩla ɛzɩ ŋheyuu-m yɔ.” Ɛlɛ Ɛsɔ *tiyiyu ɛnʋ ɛcaŋ ɛɖɛɛ.
*Maarɩɩ wobu Elizaabɛɛtɩ tɛ yɔ
39-40 Alɩwaatʋ ndʋ tɩ-taa *Maarɩɩ kpaɣ nʋmɔʋ nɛ fezi kalalasɩ se ewoki Elizaabɛɛtɩ cɔlɔ Zakaarii tɛ. Pɛ-tɛ lɛ Yudee egeetiye taa pʋŋ hɔɔlɩŋ taa. Ɛtalaa lɛ, ɛsɛɛ-ɩ. 41 Elizaabɛɛtɩ nɩ Maarɩɩ sɛtʋ lɛ, ɛ-pɩɣa ciɣdi ɛ-taa nɛ Ɛsɔ Kalɩzaɣ tii ɛ-yɔɔ. 42-43 Peeye ɛmabɩ kubuka se: “Ma anɩ nɛ ña weyi ŋlʋlʋʋ Kɩpaɣlʋ yɔ, ŋkɔɔ mɛn-tɛ? Ɛsɔ wazɩ ñɔ-yɔɔ nɛ pɩkɩlɩ halaa tɩŋa payɩ. Ɛwazɩ ɖɔɖɔ pɩɣa ŋga ŋkɔŋ lʋlʋʋ yɔ kɔ-yɔɔ. 44 Mantɩnɩ ñɛ-sɛtʋ lɛ, pɩla man-taa pɩɣa leleŋ nɛ keciɣdi. 45 Ña lɛ, ŋhiɣ ña-tɩ! Mbʋ pʋyɔɔ yɔ, ŋtisaa se tɔm ndʋ Kɩpaɣlʋ tiyaa nɛ peheyi-ŋ yɔ, tɩkɔŋ labʋ yɔ.”
*Maarɩɩ sam Ɛsɔ yɔ
46 Elizaabɛɛtɩ yɔɔdɩ mbʋ lɛ, *Maarɩɩ tɔ se:
“Mansaŋ Kɩpaɣlʋ siŋŋ nɛ
47 ma-laŋɩyɛ hʋlʋmɩnɩ-ɩ.
Ɛnʋ lɛ Ɛsɔ weyi ɛyabɩ ma-ñʋʋ yɔ.
48 Etisi ɛ-ɛza nɛ ɛcɔnɩ weyi ma mɛnkɛ halʋ yem nɛ malakɩ ɛ-tʋmɩyɛ yɔ.
Pʋ-yɔɔ lɛ, pɩkpaɣʋnɩ lɛɛlɛɛyɔ yɔ, ɛyaa kpeekpe wɛɣ yɔɔdʋʋ yɔɔ se mehiɣ man-tɩ.
49 Mbʋ pʋyɔɔ yɔ, Ɖoŋ Tɩŋa Tʋ labɩ-m mbʋ pʋwɛ ɖeu pɩŋŋ yɔ.
Ɛnʋ lɛ Ɛsɔ.
50 Ɖooo ɛzɩ pʋwɛʋ yɔ, mba pañaŋ-ɩ yɔ,
ɛnaɣ pa-pʋtɔdɩyɛ.
51 Ɛ-maɣmaɣ ɛlabɩ tʋma sɔsɔna nɛ e-ɖoŋ:
ɛɖɔɔnɩ mba pakpazɩɣ pa-tɩ yɔ nɛ pese pamɩzɩ ɖama.
52 Etisi awiya sɔsɔna a-kpelisi yɔɔ nɛ
ɛkpazɩ mba patakpaɣ-wɛ payaa pʋyʋ yɔ lone kɩbanɖɛ taa.
53 Ɛha kʋñɔndɩnaa ñɩm sakɩyɛ nɛ piyele
ɛɖɔɔnɩ ñɩm tɩnaa nɛ pɛɖɛɛ nesi kpɛɖɛ yeɣ yeɣ.
54-55 Ɛkɔm ɛ-ɛyaa *Izrɛɛlɩ ñɩma ɖa sɩnaʋ.
Ɛtɔsɔɔ ɛ-camɩyɛ lakasɩ nzɩ ɛɖʋwa se ɛlakɩ *Abraham nɛ e-liɖe taa ñɩma yɔ sɩ-yɔɔ kaʋ.”
56 Ɛtɛm yɔɔdʋʋ lɛ, ɛcaɣ Elizaabɛɛtɩ tɛ ɛzɩ fenasɩ naadozo yɔ nɛ pʋcɔ ɛpɩsɩ ekpe.
Lɩm Sɔʋ Sɔnzɩ Laɖʋ Yohanɛɛsɩ lʋlʋʋ tɔm
57 Elizaabɛɛtɩ fenaɣ talaa lɛ, ɛlʋlɩ abalɩbɩɣa 58 nɛ ɛ-cɔlɔ ñɩma nɛ e-liɖe taa ñɩma panɩɩ se Kɩpaɣlʋ na ɛ-pʋtɔdɩyɛ siŋŋ. Peeye pa nɛ ɩ pɛkpɛndaa pamayɩ amaya. 59 Pɩɣa ŋga kalabɩ kɩyakɩŋ lutozo lɛ, powolo se pɛpɛlɩɣ-kɛ nɛ pɔtɔ se payaa-kɛ ka-caa hɩɖɛ se Zakaarii. 60 Peeye ko-ɖoo cosaa se: “Aayɩ, payaa-kɛ se Yohanɛɛsɩ.” 61 Ɛlɛ, pocosi-i se: “Patayaa ñe-liɖe taa tʋ nɔɔyʋ mbʋ.”
62 Peeye pɔpɔzɩ ka-caa Zakaarii nɛ nesi wɩlʋʋ taa se e-liu wɛɛ se payaa ɛ-pɩɣa se we? 63 Ɛlɛ Zakaarii wɩlɩ se powoni-i maʋ kpata. Powonaa lɛ, ɛma kʋ-yɔɔ se: “Ka-hɩɖɛ lɛ Yohanɛɛsɩ.” Peeye pɩɖɩɣzɩ ɛyaa tɩŋa. 64 Zakaarii tɛm maʋ mbʋ lɛ, ɛ-nzʋlɩmɩyɛ tɩyɛdɩ nɛ ɛpazɩ yɔɔdʋʋ nɛ ɛsaŋ Ɛsɔ. 65 Ɛlɛ sɔɔndʋ kpa ɛ-cɔlɔ ñɩma nɛ Yudee pʋŋ taa ñɩma tɩŋa kɛdɩɣ ɖama mbʋ pɩlaba yɔ. 66 Mba patɩŋa panɩ tɔm ndʋ yɔ, pamaɣzɩ pɩŋŋ nɛ pɔpɔzʋʋ pa-tɩ se: “Ɛbɛ pɩɣa pɩcɩɩcɩyɩm ɛnɛ ɛkaɣ kɛʋ?”
Meheyiɣ-mɩ se Kɩpaɣlʋ ɖoŋ kɛwɛ kɔ-yɔɔ siŋŋ.
Zakaarii sam Ɛsɔ yɔ
67 Pɩɣa pɩcɩɩcɩyɩm ɛnʋ ɛ-caa Zakaarii nzʋlʋmɩyɛ yɛɖaa lɛ, Ɛsɔ Kalɩzaɣ tii ɛ-yɔɔ nɛ ɛpazɩ yɔɔdʋʋ tɔm ndʋ tɩlɩnɩ Ɛsɔ cɔlɔ yɔ. Ndʋ lɛ se:
68 “Pasa ɖa-Kɩpaɣlʋ Ɛsɔ,
mbʋ pʋyɔɔ yɔ, ɛkɔm ɛya ɛ-ɛyaa *Izrɛɛlɩ ñɩma ɖa ɖa-ñʋʋ.
69 Ɛkɔnɩ-ɖʋ ɖoŋ tʋ ɛ-tʋmlaɖʋ wiyaʋ sɔsɔ Daaviidi liɖe taa.
Ɛnʋ yakɩnɩ ɖa-ñʋʋ.
70 Pʋwɛ ɛzɩ eeheyuu ɛ-lɔɔyɩsɩ tɩnaa ɖooo lɔŋ se peheyi-ɖʋ se
71 ɛkɔŋ-ɖʋ lɩzʋʋ ɖo-koyindinaa nɛ mba patɩŋa papaɖɩɣ-ɖʋ yɔ pe-nesi taa yɔ.
72 Mbʋ ɛlakɩ ɖɔ-cɔzɔnaa ɛ-camɩyɛ lakasɩ nɛ ɛtɔzɩ ɛ-nɔɔ haʋ yɔɔ.
73 Mbʋ lɛ mbʋ ɛɛɖʋwa se ɛlakɩ ɖɔ-cɔzɔ *Abraham yɔ.
74 Ɛɖʋwa se ɛkɔŋ-ɖʋ lɩzʋʋ ɖo-koyindinaa nesi taa nɛ
ɖɩla ɛ-tʋmɩyɛ, sɔɔndʋ ɛɛkpaɣ-ɖʋ.
75 Ɖɩkpakɩɣ ɖa-tɩ ɖɩcɛlɩ-ɩ nɛ
ɖɩla mbʋ pʋtʋʋzaa yɔ ɛ-ɛsɩndaa kɩyakɩŋ tɩŋa ɖe-wezuu caɣʋ taa.
76 Piyele ña man-pɩɣa lɛ, pakaɣ-ŋ yaʋ se Ɛsɔ Caabiyuu *lɔɔyaɣ tʋ.
Ŋɖɛɣ Kɩpaɣlʋ nɔɔ nɛ ŋñɔɔzɩ ɛ-nʋmɔʋ nɛ
77 ŋwɩlɩ ɛ-ɛjaɖɛ taa ñɩma ɖa se
ɛkɔŋ-ɖʋ kpeɣu ɖa-kɩwɛɛkɩm nɛ ɛya ɖa-ñʋʋ.
78 Mbʋ pʋyɔɔ yɔ, ɖɛ-Ɛsɔ kɛ pʋtɔdɩyɛ nayʋ siŋŋ:
etiyiɣni ɛ-ñalɩmɩyɛ nɛ ɖɩñalɩ ɖɔ-yɔɔ ɛzɩ wɩsɩ yɔ.
79 Ñalɩmɩyɛ nɖɩ ɖɩñalɩɣ mba pɛwɛ cɩkpɛndʋʋ taa se pɛtɛŋnɩ sɩm yɔ pɔ-yɔɔ.
Ɖɩhɔŋ-ɖʋ ɖɔɖɔ nɛ ɖiwoni laŋhɛzɩyɛ nʋmɔʋ taa.”
80 Zakaarii pɩɣa ŋga kapaɣlaɣ nɛ kɔ-lɔŋ sɔzʋʋ. Kapaɣlaa lɛ, kowolo kacaɣ lakʋ taa nɛ pʋkɔɔ pɩsɩnɩ kɩyakʋ ŋgʋ kapazɩ ka-tʋmɩyɛ labʋ *Izrɛɛlɩ ñɩma hɛkʋ taa yɔ.