Yesu fem tɔm
(Mat 28.1-8; Luk 24.1-12; Yoh 20.1-10)
16
1 *Kɩyakʋ kɩhɛzʋʋ ɖɛwa lɛ, Yoosi nɛ Yakubu po-ɖoo *Maarɩɩ nɛ Magdala Maarɩɩ nɛ Saloomee powolo paya kɔyɛ sɔzɩŋ ñɩnɖɛ se powoni pataa Yesu yɔɔ. 2 Kifem *kujuka lɛ, pakʋyɩ tanaŋ cu se patalɩ pɩlaʋ yɔɔ ɛzɩ wɩsɩ yaɣʋ keɖe yɔ. 3 Pɛɖɛɣaɣ lɛ, pɔpɔzʋʋ ɖama se: “Atʋlʋʋ-ɖʋ pɩyɛ nɖɩ ɖɩwɛ pɩlaʋ nɔɔ yɔ?” 4 Patalaa lɛ, panaɣ pɩtɛm tʋlʋʋ pɩyɛ sɔsɔɖɛ nɖɩ yem nɛ pɩsɩɩ-ɖɩ kɩjaʋ. 5 Pasʋ kɩ-taa lɛ, pamaɣnɩ evebu nɔɔyʋ caɣ pa-nɩwaŋ yɔɔ. Esu toko sɔsɔʋ kʋhʋlʋmʋʋ nakʋyʋ waaa, ɛlɛ sɔɔndʋ kpa-wɛ. 6 Peeye evebu ɛnʋ eheyi-wɛ se: “Sɔɔndʋ ɛtaakpa-mɩ. Nazarɛɛtɩ tʋ Yesu weyi paakam *kaamaŋkaɣ yɔɔ yɔ, ɛnʋ ɩñɩnɩɣ yaa we? Efema, ɛfɛyɩ cɩnɛ. Ɩcɔnɩ ɩna ɖenɖe paahɛzɩ-ɩ yɔ. 7 Iwolo iheyi Pɩyɛ nɛ Yesu tɔmkpɛlɩkɩyaa lɛlaa se ɛɖɛ-wɛ nɔɔ nɛ ewolo Galilee egeetiye taa. Peeye pamakɩnɩ-ɩ ɛzɩ eeheyuu-wɛ yɔ.”
8 Peeye pakpaɣ seya nɛ palɩnɩ pɩlaʋ taa nɛ sɔɔndʋ nɛ peseliɣ. Ɛlɛ, peteheyi nɔɔyʋ natʋyʋ. Mbʋ pʋyɔɔ yɔ, sɔɔndʋ kakɩlɩ-wɛ kpaʋ.
Yesu wɩlʋʋ ɛ-tɩ Magdala tɛtʋ taa *Maarɩɩ yɔ
(Mat 28.9-10; Yoh 20.11-18)
[ 9 *Kujuka ŋga ke-wiye tanaŋ cu Yesu fema yɔ, ɛlɩzɩ ɛ-tɩ nɛ ɛcalɩ wɩlʋʋ Magdala *Maarɩɩ weyi ɛ-wayɩ ɛɛɖɔɔnɩ alewaa lʋbɛ yɔ. 10-11 Peeye Maarɩɩ woba ɛmaɣnɩ Yesu taabalaa caɣ leɣa nɛ pewiliɣ nɛ eheyi-wɛ se: “Yesu fema nɛ ma-maɣmaɣ mana-ɩ nɛ mɛ-ɛza.” Eheyi-wɛ mbʋ lɛ, petetisi.
Yesu wɩlʋʋ ɛ-tɩ ɛ-tɔmkpɛlɩkɩyaa naalɛ yɔ
(Luk 24.13-35)
12 Pʋwayɩ lɛ, Yesu lɩzɩ ɛ-tɩ nɛ ɛwɩlɩ ɛ-tɔmkpɛlɩkɩyaa taa naalɛ nɛ wɛtʋ kɩfatʋ alɩwaatʋ ndʋ petikaɣ tɛyɛ yɔ. 13 Peeye paba pɩsaa nɛ peheyi pa-taabalaa lɛlaa. Ɛlɛ, paba tetisi-tʋ ɖɔɖɔ.
Yesu wɩlʋʋ ɛ-tɩ ɛ-tɔmkpɛlɩkɩyaa hiu nɛ kʋɖʋm yɔ
(Mat 28.16-20; Luk 24.36-49; Yoh 20.19-23; Tʋma 1.6-8)
14 Pʋwayɩ lɛ, Yesu lɩzɩ ɛ-tɩ nɛ ɛwɩlɩ ɛ-tɔmkpɛlɩkɩyaa hiu nɛ kʋɖʋm alɩwaatʋ ndʋ pacaɣaɣ pɔtɔkɩ tɔɔnaɣ yɔ nɛ ɛkalɩ-wɛ se pɩlabɩ ɛzɩma nɛ pa-laŋa wɛɛ kpɩzɩŋ. Mbʋ pʋyɔɔ yɔ, pataatisi ɛyaa mba peheyaɣ-wɛ se efema yɔ pɔ-tɔm. 15 Pʋbʋ wayɩ lɛ, eheyi-wɛ se: “Ɩcɔɔ kedeŋa kpeekpe nɛ isusi ɛyaa Laŋhɛzɩyɛ Tɔm. 16 Ye nɔɔyʋ etisaa lɛ, ɩlabɩ-ɩ *lɩm sɔʋ sɔnzɩ nɛ Ɛsɔ ya ɛ-ñʋʋ. Ɛlɛ, ye nɔɔyʋ ekizaa lɛ, Ɛsɔ kʋ ɛ-tɔm. 17 Ɩɩnaɣ Ɛsɔ hama lakasɩ nzɩ mba pɛwɛnɩ lidaʋ ɛ-yɔɔ yɔ, pɔkɔŋ labʋ yɔ: pɔɖɔɔnʋʋ alewaa nɛ mon-ɖoŋ nɛ pɔyɔɔdɩ kʋnʋmɩŋ ndɩ ndɩ ɖɔɖɔ. 18 Papɩzɩɣ pakpa ɖʋmaa mba pañasɩɣ ɛyaa nɛ pasɩkɩ yɔ nɛ pe-nesi nɛ pɔñɔɔ mbʋ pʋkʋʋ ɛyaa yɔ ɖɔɖɔ, ɛlɛ, pɩɩlakɩ-wɛ pʋyʋ. Patɩnɩɣ kʋdɔndɩnaa yɔɔ nesi ɖɔɖɔ nɛ pɔ-yɔɔ cɛ.”
Yesu kituu ɛ-Caa Ɛsɔ cɔlɔ yɔ
(Luk 24.50-53; Tʋma 1.9-11)