Yesu lʋlʋʋ tɔm
(Mat 1.18-25)
2
1 Alɩwaatʋ ndʋʋ Room wiyaʋ sɔsɔ Ogustɩ ha nɔɔ se pakalɩ ɛyaa mba ɛcɔŋnɩ pɔ-yɔɔ yɔ patɩŋa. 2 Kɩkalʋʋ ŋgʋ kɩkɛnɩ kajalaɣ ñɩŋgʋ. Alɩwaatʋ ndʋ tɩ-taa ɖɔɖɔ Kiriiniyuusi cɔŋaɣnɩ Siirii egeetiye yɔɔ. 3 Peeye paa weyi ewokaɣ ɛ-tɛ se pama ɛ-hɩɖɛ.
4 Pʋ-yɔɔ *Yozɛɛfʋ kʋyɩ Nazarɛɛtɩ, Galilee egeetiye taa se ewoki Bɛtlɛhɛm, Yudee egeetiye taa ɖenɖe paalʋlɩ wiyaʋ sɔsɔ *Daaviidi yɔ. Mbʋ pʋyɔɔ yɔ, ɛkɛ Daaviidi liɖe taa tʋ. 5 Ewokaɣ se pama ɛ nɛ e-kususaɣ *Maarɩɩ weyi ɛhaɣ hoa yɔ pa-yɩla. 6 Patalɩ Bɛtlɛhɛm nɛ pɛwɛɛ lɛ, pɩtalɩ se Maarɩɩ ɛlʋlɩ. 7 Peeye ɛlʋlɩ ɛ-kajalaɣ pɩɣa, kɛkɛ abalɩbɩɣa. Ɛlʋlɩ-kɛ wondu kalakʋ taa nɛ ɛɖʋ-kɛ pɩsaʋ taa nɛ ɛhɛzɩ-kɛ ɖenɖe paɖʋʋ wondu tɔɔnaɣ yɔ. Mbʋ pʋyɔɔ yɔ, pataahiɣ ɖɩsʋyɛ agɔma ɖɩɣa taa.
Ɛsɔ *tiyiyaa nɛ ninɖiɣyaa pɔ-tɔm
8 Ninɖiɣyaa nabɛyɛ kɛwɛ hɔɔlɩŋ ɩnʋ ɩ-taa. Paawɛ tɛyɛ ɖoo ana a-taa nɛ paɖaŋ pe-heŋ. 9 Peeye Kɩpaɣlʋ *tiyiyu nɔɔyʋ lɩ pɔ-cɔlɔ nɛ Kɩpaɣlʋ ñalɩmɩyɛ ñalɩ pɔ-yɔɔ nɛ sɔɔndʋ kpa-wɛ pɩtɩɩfɛyɩ. 10 Ɛlɛ, tiyiyu ɛnʋ eheyi-wɛ se: “Sɔɔndʋ ɛtaakpa-mɩ, mbʋ pʋyɔɔ yɔ, mɔnkɔm se meheyi-mɩ laŋhʋlʋmɩyɛ tɔm natʋyʋ. Tɩkɛdɩɣnɩ ɛyaa tɩŋa payɩ.” 11 Ndʋ lɛ se palʋlɩ-mɩ Ñʋʋ Yaɖʋ ɖoo anɛ a-taa Daaviidi tɛ Bɛtlɛhɛm. Ɛnʋ lɛ Kɩpaɣlʋ, ɛnʋ lɛ *Weyi Ɛsɔ Lɩzaa Yɔ. 12 Ɩɩnaɣ mbʋ pɩwɩlɩɣ-mɩ nɛ ɩtɩlɩ yɔ: ɩtalɩɣ lɛ, paɖʋ pɩɣa pɩcɩɩcɩyɩm ɛnʋ pɩsaʋ taa nɛ pɛhɛzɩ-kɛ ɖenɖe paɖʋʋ wondu tɔɔnaɣ yɔ.
13 Kpaagbaa mbʋ lɛ, Ɛsɔ *tiyiyaa samaɣ tii pɔsɔzɩ tiyiyu ɛnʋ ɛ-yɔɔ nɛ pasaŋ Ɛsɔ nɛ hendu se:
14 “Pasa Ɛsɔ ɖooo ɛsɔdaa nɛ
ɛ-laŋhɛzɩyɛ wɛɛ tataa ɛyaa mba ɛsɔɔlɩ-wɛ yɔ pɔ-cɔlɔ.”
Ninɖiɣyaa wobu Bɛtlɛhɛm yɔ
15 Pʋwayɩ lɛ, Ɛsɔ *tiyiyaa kʋyɩ ninɖiɣyaa cɔlɔ nɛ papɩsɩ ɛsɔdaa. Ɛlɛ ninɖiɣyaa mba pɔyɔɔdɩnɩ ɖama se: “Ɖɩkʋyɩ ɖiwolo Bɛtlɛhɛm peeye nɛ ɖɩna mbʋ pɩlaba nɛ Kɩpaɣlʋ tiyiɣ se peheyi-ɖʋ yɔ.” 16 Peeye pakpaɣ seya nɛ powolo pamaɣnɩ *Maarɩɩ nɛ *Yozɛɛfʋ nɛ pɩɣa pɩcɩɩcɩyɩm ɛnʋ. Pɛhɛzɩ-ɩ ɖenɖe paɖʋʋ wondu tɔɔnaɣ yɔ. 17 Pana-ɩ lɛ, papazɩ kɛdʋʋ ɛ-tɔm ndʋ Ɛsɔ *tiyiyu keheyi-wɛ yɔ. 18 Peeye pɩlabɩ ɛyaa mba patɩŋa panɩ tɔm ndʋ pɛkɛdaa yɔ piti. 19 Ɛlɛ, Maarɩɩ ɖɔkɩ tɔm ndʋ tɩtɩŋa payɩ nɛ ɛmaɣzɩɣ tɩ-yɔɔ siŋŋ. 20 Ninɖiɣyaa mba pana-wɛ lɛ, pakpaɣ nʋmɔʋ kpem yɔɔ nɛ pasaŋ Ɛsɔ nɛ pɛɖɛyɩɣ-ɩ mbʋ pɩtɩŋa panɩwa nɛ pana yɔ pʋ-yɔɔ. Mbʋ pʋyɔɔ yɔ, pɩtɩŋa pɩlabɩ ɛzɩ Ɛsɔ tiyiyu kɛkɛdʋʋ-wɛ yɔ.
Powonaʋ Yesu se paɖʋzɩ-ɩ Ɛsɔ nesi taa yɔ
21 Kɩyakʋ lutozo ñɩŋgʋ wiye lɛ, pɩtalaa se pɛpɛlɩ pɩɣa ŋga nɛ paha-kɛ hɩɖɛ nɖɩ Ɛsɔ *tiyiyu keheyi ko-ɖoo nɛ pʋcɔ ɛhaɣ-kɛ yɔ: nɖɩ lɛ Yesu.
22 Pʋwayɩ lɛ, alɩwaatʋ talɩ se pala cɩɖɩcɩɖɩ wɛtʋ sɔnzɩ ɛzɩ paɖʋʋ *Mooyiizi paɣtʋ taa yɔ. Peeye pakpaɣ pɩɣa ŋga nɛ powoni Yeruusalɛm se paɖʋzɩ-kɛ Kɩpaɣlʋ Ɛsɔ nesi taa. 23 Mbʋ pʋyɔɔ yɔ, paɖʋ Kɩpaɣlʋ paɣtʋ taa se: “Paa abalɩbɩɣa kajalaɣ ñɩŋga ŋga lɛ, pasɩɩ-kɛ nɛ hɔɔlʋʋ nɛ kɛkɛ Kɩpaɣlʋ ñɩŋga.” 24 Peeye Maarɩɩ nɛ Yozɛɛfʋ palaba ɛzɩ paɖʋʋ ɖɔɖɔ Kɩpaɣlʋ paɣtʋ taa se palaa ahoa naalɛ yaa halikukunaa cikpema naalɛ yɔ.
25 Alɩwaatʋ ndʋ lɛ, abalʋ nɔɔyʋ wɛ Yeruusalɛm, payaɣ-ɩ se Siimeyɔɔ. Ɛɛkɛ ɛyʋ kʋtʋʋzʋ nɛ ɛlakɩ mbʋ Ɛsɔ liu wɛɛ yɔ. Ɛɛɖaŋ weyi ɛkɔŋ hɛzʋʋ *Izrɛɛlɩ ñɩma laŋa yɔ. Ɛsɔ Kalɩzaɣ kɛwɛ ɛ-cɔlɔ 26 nɛ keheyi-i se ɛnaɣ *Weyi Kɩpaɣlʋ Lɩzaa nɛ etiyi-i yɔ nɛ pʋcɔ ɛsɩ. 27 Puwiye lɛ, Ɛsɔ Kalɩzaɣ keti Siimeyɔɔ ɛnʋ nɛ kowoni-i Ɛsɔ ɖɩɣa taa. Pɩɣa caa nɛ ko-ɖoo powoni-kɛ se pala kɔ-yɔɔ mbʋ *Mooyiizi kaɖʋ ɛ-paɣtʋ taa yɔ. 28 Peeye Siimeyɔɔ mʋ-kɛ nɛ ɛsɛɛ Ɛsɔ se:
29 “Kɩpaɣlʋ! Lɛɛlɛɛyɔ ŋlabɩ mbʋ ŋɖʋwa se ŋlakɩ yɔ.
Pʋ-yɔɔ lɛ, ŋpɩzɩɣ ŋyele nɛ pɩkpaɣ ña-tʋmlaɖʋ ma laŋhɛzɩyɛ taa.
30 Mbʋ pʋyɔɔ yɔ, ma-maɣmaɣ mana Ñʋʋ Yaɖʋ nɛ mɛ-ɛza,
31 ɛnʋ ŋñɔɔzaa nɛ ɛyaa tɩŋa naɣ-ɩ.
32 Ɛnʋ lɛ ñalɩmɩyɛ nɖɩ ɖɩwɩlɩɣ ajɛɛ kpeekpe nʋmɔʋ yɔ.
Ɛnʋ yekina nɛ patɩŋa pasɩm-ŋ nɛ *Izrɛɛlɩ ñɩma hɩɖɛ sɛɛ.”
Siimeyɔɔ yɔɔdʋʋ tɔm ndʋ tɩlɩnɩ Ɛsɔ cɔlɔ yɔ
33 Siimeyɔɔ yɔɔdɩ mbʋ lɛ, pɩɖɩɣzɩ Yesu caa nɛ e-ɖoo pɩtɩɩfɛyɩ. 34 Pʋwayɩ lɛ, ɛwazɩ pa nɛ Yesu pɔ-yɔɔ nɛ eheyi Yesu ɖoo *Maarɩɩ se: “Ɛsɔ lɩzɩ pɩɣa kanɛ se *Izrɛɛlɩ ñɩma sakɩyɛ ɛtɔlɩ nɛ lɛlaa hiɣ ñʋʋ yabʋ. Ŋga wɩlɩɣnɩ ɛyaa mbʋ Ɛsɔ liu wɛɛ yɔ nɛ paatisiɣ kɔ-tɔm. 35 Peeye eyeki nɛ pukuli mbʋ pɩtɩŋa payɩ ɛyaa sakɩyɛ maɣzɩɣ mɛsaɣ tɛɛ yɔ pʋ-yɔɔ nɛ paa weyi ɛna. Ña ko-ɖoo lɛ, ŋkɔŋ nɩʋ siziŋ ña-lɩmaɣza taa ɛzɩ pɔsɔbɩ-ŋ sɩɣa yɔ.”
*Lɔɔyaɣ tʋ halɩñɩnʋ Ana tɔm
36 *Lɔɔyaɣ tʋ halɩñɩnʋ nɔɔyʋ kɛwɛ Ɛsɔ ɖɩɣa taa peeye ɖɔɖɔ. Payaɣ-ɩ se Ana. Ɛkɛ Asɛɛrɩ liɖe taa tʋ Fanʋyɛɛlɩ pɛlɛ, ɛkpadɩyɩ kuŋgu. Abalʋ weyi ɛɛcɛbɩ ɛ-pɩsatʋ yɔ, ɛ nɛ ɩ pacaɣ pɩnzɩ lʋbɛ lɛ, ɛlɛ ɖɛɛ ɛsɩ. 37 Peeye ɛcaɣ lelitu nɛ ɛkɔɔ ɛtalɩ pɩnzɩ nɩɩnʋwa nɛ niidozo nɛ naanza. Ɛɛwɛ Ɛsɔ ɖɩɣa taa alɩwaatʋ kpeekpe nɛ ɛsaŋ-ɩ wɩsɩ nɛ ɖoo nɛ ɛhɔkʋʋ nɔɔ nɛ ɛsɛɣ-ɩ. 38 Siimeyɔɔ wazaɣ Yesu nɛ ɛ-ñɩma pɔ-yɔɔ mbʋ lɛ, ewolo pɔ-cɔlɔ nɛ ɛsaŋ Ɛsɔ nɛ eheyiɣ mba paaɖaŋaa se Ɛsɔ ɛkɔɔ ɛya Yeruusalɛm ñʋʋ yɔ Yesu ɛnʋ ɛ-tɔm.
Yesu nɛ ɛ-ñɩma papɩsʋʋ Nazarɛɛtɩ yɔ
39 Yesu ñɩma tɛm labʋ mbʋ pɩtɩŋa paɖʋ Kɩpaɣlʋ paɣtʋ taa yɔ lɛ, pakpaɣ pa-pɩɣa nɛ papɩsɩ pɛ-tɛ Nazarɛɛtɩ, Galilee egeetiye taa. 40 Pɩɣa ŋga, kapaɣlaɣ nɛ kɛtɛzɩɣ kpaʋ ɖoŋ. Kaawɛnɩ lɔŋ pɩŋŋ nɛ Ɛsɔ lootiye wɛɛ kɔ-yɔɔ.
Yesu wɛnaʋ pɩnzɩ hiu nɛ naalɛ nɛ ewolo Ɛsɔ ɖɩɣa taa yɔ
41 Paa pɩnaɣ ŋga lɛ, Yesu caa nɛ e-ɖoo powokaɣ Yeruusalɛm Yomiye Taa Lɩʋ *Kazandʋ tɔɔʋ. 42 Yesu wɛnɩ pɩnzɩ hiu nɛ naalɛ nɛ powoki kazandʋ ndʋ ti-ɖeɖe ɛzɩ patɩɩwokuu yɔ lɛ, pɛkpɛndɩnɩ-ɩ. 43 Kazandʋ tɛma lɛ, ɛ-ñɩma kpaɣ nʋmɔʋ se pekpeŋ. Naze lɛ, pɩɣa Yesu ɛnʋ, ɛcaɣ Yeruusalɛm nɛ peteɖiɣzina. 44 Paawɛ yem se ɛwɛ pa-taabalaa nʋmɔɖɔnaa lɛlaa cɔlɔ nɛ pɔɖɔ kɩyakʋ nɛ kɩ-tɛɛ pilim, patana-ɩ. Peeye papazɩ-ɩ ñɩnʋʋ pa-ñɩma nɛ pa-taabalaa pɔ-cɔlɔ. 45 Ɛlɛ, patana-ɩ ɖɔɖɔ. Peeye pakpaɣ-ɩ ñɩnʋʋ ka ka ka nɛ papɩsɩ Yeruusalɛm. 46 Pɩlabɩ kɩyakɩŋ naadozo lɛ, pana-ɩ Ɛsɔ ɖɩɣa taa. Ɛcaɣ paɣtʋ wɩlɩyaa hɛkʋ taa nɛ ewelesiɣ nɛ ɛpɔzʋʋ-wɛ tɔm. 47 Ɛyaa mba paawɛ peeye nɛ pewelesiɣ yɔ, panɩ mbʋ lɛ, pɩla patɩŋa piti nɛ ɛ-lɛɣtʋ nɛ ɛ-tɔm cosuu. 48 Ɛ-ñɩma na-ɩ mbʋ lɛ, pɩɖɩɣzɩ-wɛ ɖɩɣ ɖɩɣ nɛ e-ɖoo pɔzɩ-ɩ se: “Man-pɩɣa! Pɩlabɩ ɛzɩma nɛ ŋlabɩ-ɖʋ mbʋ? Sɔɔndʋ kpa ma nɛ ña-caa siŋŋ nɛ ɖɩwɛ-ŋ ñɩnʋʋ yɔɔ.” 49 Ɛlɛ, Yesu pɔzɩ-wɛ se: “Pɩlabɩ ɛzɩma nɛ ɩñɩnɩɣ-m? Ɩtatɩlɩ se pʋmʋnaa se mɛwɛɛ man-Caa ɖɩɣa taa yaa we?” 50 Ɛlɛ, patanɩɩ tɔm ndʋ ɛpɔzɩ-wɛ yɔ tɩ-tɔbʋʋ.