LAŊHƐZƖYƐ TƆM NDƲ
YOHANƐƐSƖ
MAWA YƆ
Tɔm ndʋ tɩhaɣ ñalɩmɩyɛ nɛ wezuu yɔ
1
1 Pʋcɔ Ɛsɔ pazɩ kedeŋa labʋ lɛ, weyi payaɣ se Tɔm yɔ, ɛɛwɛɛ. Ɛɛwɛ Ɛsɔ cɔlɔ, ɛnʋ lɛ Ɛsɔ. 2 Ɛɛwɛ Ɛsɔ cɔlɔ nɛ pʋcɔ ɛlɛ la kedeŋa. 3 Ɛ-yɔɔ Ɛsɔ tɩŋnaa nɛ ɛla pɩtɩŋa payɩ. Nabʋyʋ fɛyɩ se Ɛsɔ labɩ-pʋ nɛ ɛtatɩŋnɩ ɛ-yɔɔ. 4 Ɛ-cɔlɔ wezuu wɛɛ nɛ kiyeki se ɛyaa ɛwɛɛ ñalɩmɩyɛ taa. 5 Ñalɩmɩyɛ ñalɩɣ cɩkpɛndʋʋ taa, ɛlɛ, cɩkpɛndʋʋ tohuuzi ñalɩmɩyɛ nɖɩ ɖɩ-yɔɔ kaʋ.
6 Nakʋyʋ wiye Ɛsɔ tiyi abalʋ nɔɔyʋ, payaɣ-ɩ se Yohanɛɛsɩ*fa*. \fm a \fr (1.6) Yohanɛɛsɩ: \f ɛnʋ lɛ Lɩm Sɔʋ Sɔnzɩ Laɖʋ Yohanɛɛsɩ. 7 Etiyi-i se ɛlɩzɩ ñalɩmɩyɛ nɖɩ ɖɩ-aseɣɖe nɛ ɛyaa wɛnɩ lidaʋ ɖɩ-yɔɔ. 8 Pɩtɛkɛ Yohanɛɛsɩ ɛnʋ ɛ-tɩ tɩŋa lɛ ñalɩmɩyɛ. Ɛlɛ, ɛkɔm se ɛlɩzɩ ñalɩmɩyɛ aseɣɖe. 9 Nɖɩ lɛ ñalɩmɩyɛ siŋŋ, ɖɩkɔm kedeŋa yɔɔ se ɖɩñalɩ paa weyi ɛ-yɔɔ. 10 Weyi payaɣ se Tɔm yɔ, ɛkɔm kedeŋa yɔɔ. Ɛ-yɔɔ Ɛsɔ tɩŋnaa nɛ ɛlabɩ-kɛ. Ɛlɛ, kɔ-yɔɔ ñɩma tasɩm-ɩ. 11 Ɛkɔm ɛ-maɣmaɣ ɛ-tɛ, ɛlɛ, ɛ-ñɩma tamʋ-ɩ. 12 Piyele mba patɩŋa payɩ pamʋ-ɩ nɛ pɛwɛnɩ lidaʋ ɛ-yɔɔ yɔ, ɛha-wɛ ɖoŋ se papɩsɩ Ɛsɔ piya. 13 Patalʋlɩ-wɛ ɛzɩ ɛyaa sɔɔlʋʋ nɛ palʋlʋʋ pe-piya yɔ. Ɛlɛ, Ɛsɔ hanɩ-wɛ wezuu kɩfalʋʋ. \f*
14 Weyi payaɣ se Tɔm yɔ, ɛpɩsɩ ɛyʋ nɛ ɛkɔɔ ɛwɛɛ ɖɛ-hɛkʋ taa. Ɛkɛ lootiye tʋ siŋŋ nɛ ɛtɛ ɛkɛ toovenim tʋ siŋŋ. Ɖɩna e-koboyaɣ, kɛwɛ ɛzɩ Caa Pɩyalʋ ɛgbamɩyɛ ñɩŋga yɔ.
15 Ɛ-yɔɔ Yohanɛɛsɩ lɩzɩ aseɣɖe nɛ ɛma kubuka se: “Ɛ-tɔm mɔyɔɔdaɣ se: ‘Ma-wayɩ lɛ, weyi ɛkɔŋ yɔ, ɛkɩlɩ-m, mbʋ pʋyɔɔ yɔ, ɛɛwɛɛ nɛ pʋcɔ palʋlɩ-m.’ ” 16 Meheyiɣ-mɩ se mbʋ pɩtɩŋa payɩ ɛwɛna yɔ, pʋ-yɔɔ lɛ, ɖatɩŋa payɩ ɛlabɩ lootiye siŋŋ. 17 Toovenim lɛ, *Mooyiizi yɔɔ Ɛsɔ tɩŋnaa nɛ ɛɖʋ-ɖʋ paɣtʋ. Ɛlɛ, Yesu Krɩstʋ yɔɔ ɛtɩŋnaa nɛ ɛlabɩ-ɖʋ lootiye nɛ ɛwɩlɩ-ɖʋ toovenim. 18 Nɔɔyʋ tana Ɛsɔ wiɖiyi kaʋ. Ɛlɛ, ɛ-Pɩyalʋ ɛgbamɩyɛ nɖɩ ɖɩ nɛ Caa pɛwɛ ɖama taa nɛ ɖɩkɛ Ɛsɔ yɔ, nɖɩ wɩlɩnɩ-ɖʋ mbʋ Ɛsɔ kɛnaa yɔ.
Yohanɛɛsɩ lɩzʋʋ aseɣɖe yɔ
(Mat 3.1-12; Mrk 1.1-8; Luk 3.1-18)
19 Yuda ñɩma ñʋŋ tɩnaa kʋsɩ pɔ-cɔjɔnaa nɛ *Leevi liɖe taa ñɩma nɛ Yeruusalɛm nɛ petiyi-wɛ se powolo pɔpɔzɩ Yohanɛɛsɩ se: “Ña lɛ anɩ?” Ɛlɛ, ɛlɩzɩ aseɣɖe 20 patɩŋa pɛ-ɛsɩndaa yem kpayɩ se: “Pɩtɛkɛ ma lɛ *Weyi Ɛsɔ Lɩzaa Yɔ.” 21 Peeye patasɩ-ɩ pɔzʋʋ se: “Ña lɛ anɩ kpem? Ña lɛ *Elii yaa we?” Ecosi se: “Aayɩ.” Peeye patasɩ-ɩ pɔzʋʋ se: “Ña lɛ *lɔɔyaɣ tʋ weyi ɖɩɖaŋaa yɔ yaa we?” Ecosi se: “Aayɩ.” 22 Ɛlɛ patasɩ-ɩ pɔzʋʋ se: “Ña lɛ anɩ kpem yɔ? Heyi-ɖʋ nɛ ɖiwolo ɖiheyi mba petiyi-ɖʋ yɔ. Ña-maɣmaɣ lɛ, ŋmaɣzɩɣ se ŋkɛ we kpem?”
23 Peeye Yohanɛɛsɩ cosi-wɛ se ma lɛ weyi *lɔɔyaɣ tʋ Ezaayii yɔɔdɩ ɛ-tɔm yɔ. Ɛyɔɔdaa se:
“Nɔɔyʋ susuu lakʋ taa se pɔñɔɔzɩ Kɩpaɣlʋ
nʋmɔʋ nɛ pala nɛ kʋtʋʋzɩ camɩyɛ.”
24 Mba petiyi-wɛ Yohanɛɛsɩ cɔlɔ yɔ, Farɩsɩ ɛgbɛyɛ taa ñɩma kɛwɛ pa-taa. 25 Paba pɔzɩnɩ-ɩ se: “Ŋtɛkɛ *Weyi Ɛsɔ Lɩzaa Yɔ yaa *lɔɔyaɣ tʋ weyi ɖɩɖaŋaa yɔ yaa *Elii lɛ, pɩlabɩ ɛzɩma nɛ ŋlakɩ ɛyaa *lɩm sɔʋ sɔnzɩ?” 26 Ɛlɛ Yohanɛɛsɩ cosi-wɛ se: “Ma lɛ, malakɩ ɛyaa lɩm sɔʋ sɔnzɩ. Ɛlɛ, nɔɔyʋ wɛ mɩ-hɛkʋ taa, ɩtasɩm-ɩ. 27 Ma-wayɩ lɛ, ɛnʋ kɔŋna. Ɛkɩlɩ-m, mantamʋnɩ se moluŋ nɛ mɛyɛɖɩ ɛ-naataŋgbala tɔnzɩ.”
28 Pʋnɛ pɩtɩŋa payɩ pɩlakaɣ tɛtʋ cikpetu ndʋ payaɣ se Betaanii yɔ, tɩ-taa ɖenɖe Yohanɛɛsɩ lakaɣ ɛyaa lɩm sɔʋ sɔnzɩ yɔ. Tɩɩwɛ Yɔɔrdaŋ pɔɔ wayɩ.
Ɛsɔ *Heɣa Yesu tɔm
29 Tɛʋ fema lɛ, Yohanɛɛsɩ na Yesu wokaɣ ɛ-cɔlɔ. Peeye eheyi ɛyaa se: “Ɩnaɣ Ɛsɔ *Heɣa, ŋga mʋʋnɩ ɛyaa tɩŋa payɩ kɩwɛɛkɩm. 30 Kɔ-tɔm mɔyɔɔdaɣ se ma-wayɩ lɛ, nɔɔyʋ kɔŋ. Ɛlɛ, ɛkɩlɩ-m, mbʋ pʋyɔɔ yɔ, ɛɛwɛɛ nɛ pʋcɔ palʋlɩ-m. 31 Mantaasɩm-ɩ. Ɛlɛ, mɔnkɔm mala ɛyaa *lɩm sɔʋ sɔnzɩ se *Izrɛɛlɩ ñɩma tɩŋa ɛsɩm-ɩ.”
32 Yohanɛɛsɩ tasɩ yɔɔdʋʋ se: “Mana Ɛsɔ Kalɩzaɣ lɩnɩ ɛsɔdaa ɛzɩ halikuku yɔ nɛ ketii kacaɣ ɛ-yɔɔ. 33 Mantaasɩmdɩ-ɩ. Ɛlɛ, Ɛsɔ weyi etiyi-m se mala ɛyaa *lɩm sɔʋ sɔnzɩ yɔ, eheyi-m se: ‘Ŋkɔŋ naʋ Ɛsɔ Kalɩzaɣ tiba nɛ kacaɣ nɔɔyʋ yɔɔ. Ɛnʋ kɔŋnɩ ɛyaa labʋ sɔnzɩ nɛ Ɛsɔ Kalɩzaɣ haʋ.’ 34 Lɛɛlɛɛyɔ mana mbʋ, pʋ-yɔɔ mankaɖɩɣ-mɩ toovenim se ɛnʋ lɛ Ɛsɔ Pɩyalʋ.”
Yesu tɔmkpɛlɩkɩyaa kajalaɣ ñɩma tɔm
35 Tɛʋ fema lɛ, Yohanɛɛsɩ nɛ ɛ-tɔmkpɛlɩkɩyaa taa naalɛ papɩsɩ lone nɖɩ ɖɩ-taa peeye. 36 Pɩkɛdaa lɛ, Yohanɛɛsɩ na Yesu ɖɛɣaɣ. Peeye eheyi-wɛ se: “Ɩna Ɛsɔ *Heɣa.”
37 Ɛ-tɔmkpɛlɩkɩyaa mba panɩ mbʋ lɛ, pakʋyɩ patɩŋ Yesu wayɩ. 38 Yesu kisaa nɛ ɛna patɩŋaɣ-ɩ mbʋ lɛ, ɛpɔzɩ-wɛ se: “Ɛbɛ ɩñɩnɩɣ?” Paba ñɔpɔzɩ-ɩ se: “Raabii! Le ŋwɛɛ?” Raabii tɔbʋʋ se Wɩlɩyʋ. 39 Ɛlɛ ecosi-wɛ se: “Ɩkɔɔ nɛ ɩna.” Peeye patɩŋ-ɩ ɖɔɖɔ nɛ powolo pana ɖenɖe ɛwɛɛ yɔ nɛ pa nɛ ɩ pacaɣ peeye kɩyakʋ ŋgʋ. Ɖanaɣ wɩsɩ wɛlʋʋ pɩlakaɣ mbʋ.
40 Tɔmkpɛlɩkɩyaa naalɛ mba Yohanɛɛsɩ yɔɔdɩ Yesu tɔm nɛ panɩɩ nɛ patɩŋ Yesu ɛnʋ ɛ-wayɩ yɔ, payaɣ pa-taa lɛlʋ se Andree. Ɛnʋ lɛ Siimɔɔ Pɩyɛ neu. 41 Mbʋ Andree ɛnʋ ɛcalɩ labʋ yɔ lɛ se: ɛñɩnɩ ɛ-ɖalʋ Siimɔɔ nɛ eheyi-i se: “Ɖɩna Meesii.” Meesii tɔbʋʋ se *Weyi Ɛsɔ Lɩzaa Yɔ. 42 Peeye ɛkpaɣ-ɩ nɛ ewoni-i Yesu cɔlɔ. Patalaa lɛ, Yesu cɔnɩ-ɩ pɩŋŋ nɛ ɛtɔ se: “Ña lɛ Yohanɛɛsɩ pɩyalʋ weyi payaɣ se Siimɔɔ yɔ, pɔkɔŋ-ŋ yaʋ se Sefaasɩ.” Sefaasɩ tɔbʋʋ se Pɩyɛ.
Yesu yaʋ Filiipu nɛ Nataanayɛɛlɩ yɔ
43 Tɛʋ fema lɛ, Yesu ɖʋ se ewoki Galilee egeetiye taa. Ɛɖɛɣaɣ lɛ, ɛna Filiipu nɛ eheyi-i se: “Tɩŋ ma-wayɩ.” 44 Filiipu tɛ lɛ Bɛtsayɩda tɛtʋ cikpetu taa. Andree nɛ Pɩyɛ pɛ-tɛ lɛ peeye ɖɔɖɔ.
45 Pʋwayɩ lɛ, Filiipu na Nataanayɛɛlɩ nɛ eheyi-i se: “Ɖɩna weyi ɛ-tɔm *Mooyiizi ma paɣtʋ takayaɣ taa nɛ lɔɔyɩsɩ tɩnaa yɔɔdɩ ɛ-tɔm yɔ. Ɛnʋ lɛ Nazarɛɛtɩ tʋ *Yozɛɛfʋ pɩyalʋ weyi payaɣ se Yesu yɔ.” 46 Ɛlɛ, Nataanayɛɛlɩ pɔzɩ-ɩ se: “Pʋyʋ kɩbanʋ pɩzɩɣ pɩlɩnɩ Nazarɛɛtɩ yaa we?” Filiipu cosi-i se: “Kɔɔ nɛ ŋna.”
47 Yesu na Nataanayɛɛlɩ wokaɣ ɛ-cɔlɔ lɛ, ɛtɔ se: “Ɩna Izrɛɛlɩ pɩɣa maɣmaɣ. Kaamuluu nɔɔyʋ kaʋ.” 48 Peeye Nataanayɛɛlɩ pɔzɩ Yesu se: “Ɛzɩma ŋlaba nɛ ŋsɩm-m?” Yesu cosi-i se: “Mana-ŋ alɩwaatʋ ndʋ ŋwɛ hiyuu tɛɛ yɔ nɛ pʋcɔ Filiipu ya-ŋ.”
49 Peeye Nataanayɛɛlɩ heyi-i se: “Wɩlɩyʋ! Ña lɛ Ɛsɔ Pɩyalʋ. Ña lɛ *Izrɛɛlɩ ñɩma wiyaʋ.” 50 Yesu cosi-i se: “Ceeke meheyuu-ŋ se mana-ŋ hiyuu tɛɛ yɔ ŋtisaa se ma lɛ Ɛsɔ Pɩyalʋ? Meheyiɣ-ŋ se ŋkɔŋ naʋ mbʋ pɩkɩlɩ mbʋ yɔ.” 51 Yesu tasɩ yɔɔdʋʋ se: “Toovenim lɛ, mankaɖɩɣ-mɩ se ɩkɔŋ naʋ ɛsɔtɔnʋʋ tʋlaa nɛ e-*tiyiyaa tɩŋɩɣnɩ Ɛyʋ Pɩyalʋ ma mɔ-yɔɔ nɛ pakpaɣ nɛ petiki.”