Luka 3

Lɩm Sɔʋ Sɔnzɩ Laɖʋ Yohanɛɛsɩ susuu Ɛsɔtɔm yɔ

(Mat 3.1-12; Mrk 1.1-8; Yoh 1.19-28)

^1-2 Alɩwaatʋ natʋyʋ Ɛsɔ ɖʋzɩ Zakaarii pɩyalʋ Yohanɛɛsɩ nesi taa ɛ-tɔm lakʋ taa. Tɩ-taa Room wiyaʋ sɔsɔ Tiibɛɛrɩ kalabɩ pɩnzɩ hiu nɛ kagbaanzɩ kewiyaɣ kpelaɣ yɔɔ. Pɔɔnsɩ *Pilaatɩ cɔŋaɣnɩ Yudee egeetiye yɔɔ nɛ *Eroodi ñɔcɔŋnɩ Galilee ñɩnɖɛ yɔɔ, ɛ-ɖalʋ Filiipu cɔŋaɣnɩ Ituuree nɛ Traakooniti pa-ageeta yɔɔ nɛ Liisaniyaasɩ ñɔcɔŋnɩ Abiilɛɛnɩ ñɩnɖɛ yɔɔ. Alɩwaatʋ ndʋ tɩ-taa ɖɔɖɔ Ana nɛ Kayifu paakɛ *cɔjɔnaa ñʋŋ tɩnaa.

³ Ɛsɔ ɖʋzɩ Yohanɛɛsɩ nesi taa ɛ-tɔm mbʋ lɛ, ɛpazɩ cɔʋ hɔɔlɩŋ weyi ɩwɛ Yɔɔrdaŋ pɔɔ cɔlɔ yɔ ɩtɩŋa ɩ-taa nɛ esusuu ɛyaa se: “Ɩlɛɣzɩ wɛtʋ nɛ palabɩ-mɩ *lɩm sɔʋ sɔnzɩ nɛ Ɛsɔ kpeɣ-mɩ mɩ-kɩwɛɛkɩm.” ⁴ Ɛ-tɔm *lɔɔyaɣ tʋ Ezaayii ma Ɛsɔtɔm Takayaɣ taa se:

“Nɔɔyʋ susuu lakʋ taa se

pɔñɔɔzɩ Kɩpaɣlʋ nʋmɔʋ nɛ

pala nɛ kʋtʋʋzɩ camɩyɛ.

⁵ Posuyi kajalɩnzɩ tɩŋa nɛ

pɔyɔlɩsɩ pʋŋ nɛ piyisi nɛ pʋwɛɛ ɖeyi ɖeyi.

Patʋʋzɩ ɖenɖe ɖenɖe habɩyɛ kotaa yɔ nɛ

pɔñɔɔzɩ nʋmɔŋ weyi ɩwɛɛkaa yɔ camɩyɛ

⁶ nɛ paa weyi ɛna ɛzɩma mbʋ Ɛsɔ yakɩ ɛyaa ñʋʋ yɔ.”

⁷ Yohanɛɛsɩ yɔɔdaɣ mbʋ lɛ, ɛyaa samaɣ woki ɛ-cɔlɔ nɛ ɛlakɩ-wɛ *lɩm sɔʋ sɔnzɩ. Peeye eheyi-wɛ se: “Ɖʋmaa mɩ! Aheyi-mɩ se ise Ɛsɔ pana wena akɔŋ-mɩ kpanaʋ yɔ? ⁸ Ɩla lakasɩ nzɩ sɩwɩlɩɣ se ɩlɛɣzɩ wɛtʋ yɔ. Ɩtaamaɣzɩ se mɩ-cɔzɔ lɛ *Abraham yɔ, pɩtɛma. Mbʋ pʋyɔɔ yɔ, meheyiɣ-mɩ se Ɛsɔ pɩzɩɣ ɛla nɛ pɛɛ anɛ apɩsɩ Abraham liɖe taa ñɩma.” ⁹ Peeye etuu-wɛ eduuye se: “Halɩ pɛtɛm kpaɣʋ laɖɩyɛ se pɛsɛtɩɣ tɩŋ nɛ ɩ-tɛɛ: tɩʋ ŋgʋ kɩɩlʋlʋʋ pee kɩbana yɔ, pɛsɛtɩɣ-kʋ nɛ paɖʋ miŋ taa.”

¹⁰ Peeye ɛyaa samaɣ pɔzɩ-ɩ se: “Ɛzɩma pʋwɛɛ se ɖɩla yɔ?” ¹¹ Ecosi-wɛ se: “Nɔɔyʋ ɛwɛnɩ tokonaa naalɛ yɔ, ɛpasɩ lɛɛkʋ nɛ ɛha weyi ɛfɛyɩna yɔ. Ye nɔɔyʋ ɛwɛnɩ tɔɔnaɣ yɔ, ɛha ɖɔɖɔ weyi ɛfɛyɩna yɔ.” ¹² Pɩkpɛndɩnɩ *tikee mʋyaa nɛ powolo ɛ-cɔlɔ se ɛlabɩ-wɛ *lɩm sɔʋ sɔnzɩ nɛ pɔpɔzɩ-ɩ se: “Wɩlɩyʋ, ɛbɛ pʋmʋnaa se ɖɩla?” ¹³ Peeye ecosi-wɛ se: “Ɩtaapɔzɩ ɛyaa nɛ pɩɖɛɛ mbʋ paɖʋwa se pɛhɛyɩ yɔ pʋ-yɔɔ.” ¹⁴ Sɔɔjanaa ñɔpɔzɩ-ɩ mbʋ ɖɔɖɔ se: “Nɛ ɖa yɔ, ɛbɛ pʋmʋnaa se ɖɩla?” Ecosi-wɛ se: “Ɩtaakpi nɔɔyʋ nɛ ɩmʋ e-liidiye yaa ɩtaacɛtɩnɩ nɔɔyʋ taa yem. Ɛlɛ, mɩ-laŋa ɩhʋlʋmɩnɩ mbʋ pɛhɛyɩɣ-mɩ yɔ.”

¹⁵ Yohanɛɛsɩ cosi ɛyaa samaɣ ŋga mbʋ lɛ, kɛtɛzɩ maɣzʋʋ se: “Yaa ɛnʋ lɛ *Weyi Ɛsɔ Lɩzaa Yɔ?” Peeye paa weyi ɛɖaŋ kpam se pʋyʋ sɔsɔ nɔɔyʋ kɔŋ labʋ. ¹⁶ Ɛlɛ, eheyi patɩŋa se: “Ma lɛ, malakɩ-mɩ *lɩm sɔʋ sɔnzɩ. Ɛlɛ, nɔɔyʋ kaɣ kɔm, ɛlɛ kɩlɩ-m. Mantatɩɩmʋnɩ se mɛyɛɖɩ ɛ-naataŋgbala tɔnzɩ maɣmaɣ. Ɛkɔŋ-mɩ labʋ sɔnzɩ nɛ Ɛsɔ Kalɩzaɣ haʋ nɛ miŋ. ¹⁷ Ɛwɛ ɛzɩ falɩyʋ ɖɔkʋʋ ɖaakuɖe nɛ ɛfalɩɣ nɛ esuu pee kpou taa nɛ piyele ɛɖʋʋ lɔtʋ miŋ weyi eeɖeŋ wiɖiyi kaʋ yɔ ɛ-taa yɔ.”

¹⁸ Tɔm ndʋ nɛ lɛɛtʋ sakɩyɛ Yohanɛɛsɩ sazaɣnɩ ɛyaa samaɣ nɛ ɛwɩlɩɣ-kɛ Laŋhɛzɩyɛ Tɔm. ¹⁹ Alɩwaatʋ ndʋʋ ɛkalɩ wiyaʋ sɔsɔ *Eroodi, mbʋ pʋyɔɔ yɔ, ɛɛlɛɣ e-neu halʋ weyi payaɣ se Eroodiyaadɩ yɔ nɛ ɛla kɩwɛɛkɩm lɛɛbʋ ɖɔɖɔ sakɩyɛ. ²⁰ Peeye ɛtasɩ kɩwɛɛkɩm lɛɛbʋ labʋ. Mbʋ lɛ se eyebi pakpa Yohanɛɛsɩ ɛnʋ nɛ paɖʋ-ɩ salaka.

Palabʋ Yesu *lɩm sɔʋ sɔnzɩ yɔ

(Mat 3.13-17; Mrk 1.9-11)

²¹ Yohanɛɛsɩ labɩ ɛyaa tɩŋa payɩ *lɩm sɔʋ sɔnzɩ nɛ pɩtɛ lɛ, Yesu wolo ɖɔɖɔ nɛ ɛlabɩ-ɩ-sɩ. Ɛtɛm-ɩ-sɩ labʋ lɛ, Yesu sɛɣ Ɛsɔ nɛ ɛsɔtɔnʋʋ tʋlɩ ²² nɛ Ɛsɔ Kalɩzaɣ lɩɩ ketiki ɛ-yɔɔ nɛ panaɣ-kɛ ɛzɩ halikuku yɔ. Peeye pʋyɔɔdʋʋnɩ ɛsɔdaa se: “Ña lɛ man-Pɩyalʋ kʋsɔɔlʋ, maahʋʋ ñɔ-yɔɔ kaʋ.”

Yesu liɖe tɔm

(Mat 1.1-17)

²³ Yesu kɛwɛnɩ ɛzɩ pɩnzɩ niidozo yɔ nɛ pʋcɔ ɛpazɩ ɛ-tʋmɩyɛ. Ɛyaa maɣzaɣ se ɛkɛ *Yozɛɛfʋ pɩyalʋ. Yozɛɛfʋ ñɛkɛ Helii pɩyalʋ, ²⁴ Helii ñɛkɛ Mataatɩ pɩyalʋ, Mataatɩ ñɛkɛ Leevi pɩyalʋ, Leevi ñɛkɛ Mɛlkii pɩyalʋ, Mɛlkii ñɛkɛ Yanayi pɩyalʋ, Yanayi ñɛkɛ *Yozɛɛfʋ pɩyalʋ, ²⁵ Yozɛɛfʋ ñɛkɛ Matatɩyaasɩ pɩyalʋ, Matatɩyaasɩ ñɛkɛ Amoosi pɩyalʋ, Amoosi ñɛkɛ Nahum pɩyalʋ, Nahum ñɛkɛ Eslii pɩyalʋ, Eslii ñɛkɛ Nagayii pɩyalʋ, ²⁶ Nagayii ñɛkɛ Maatɩ pɩyalʋ, Maatɩ ñɛkɛ Matatɩyaasɩ pɩyalʋ, Matatɩyaasɩ ñɛkɛ Semeyiini pɩyalʋ, Semeyiini ñɛkɛ Yozɛɛkɩ pɩyalʋ, Yozɛɛkɩ ñɛkɛ Yodaa pɩyalʋ, ²⁷ Yodaa ñɛkɛ Yoaanaanɩ pɩyalʋ, Yoaanaanɩ ñɛkɛ Reezaa pɩyalʋ, Reezaa ñɛkɛ Zorobaabɛɛlɩ pɩyalʋ, Zorobaabɛɛlɩ ñɛkɛ Salaatɩyɛlɩ pɩyalʋ, Salaatɩyɛlɩ ñɛkɛ Neerii pɩyalʋ, ²⁸ Neerii ñɛkɛ Mɛlkii pɩyalʋ, Mɛlkii ñɛkɛ Adii pɩyalʋ, Adii ñɛkɛ Koozam pɩyalʋ, Koozam ñɛkɛ Ɛlmaadam pɩyalʋ, Ɛlmaadam ñɛkɛ Ɛɛrɩ pɩyalʋ, ²⁹ Ɛɛrɩ ñɛkɛ Yesu pɩyalʋ, Yesu ñɛkɛ Eliyeezɛɛrɩ pɩyalʋ, Eliyeezɛɛrɩ ñɛkɛ Yoorim pɩyalʋ, Yoorim ñɛkɛ Mataatɩ pɩyalʋ, Mataatɩ ñɛkɛ Leevi pɩyalʋ, ³⁰ Leevi ñɛkɛ Siimeyɔɔ pɩyalʋ, Siimeyɔɔ ñɛkɛ Yuda pɩyalʋ, Yuda ñɛkɛ *Yozɛɛfʋ pɩyalʋ, Yozɛɛfʋ ñɛkɛ Yonam pɩyalʋ, Yonam ñɛkɛ Eliyaakim pɩyalʋ, ³¹ Eliyaakim ñɛkɛ Meleya pɩyalʋ, Meleya ñɛkɛ Mɛnaa pɩyalʋ, Mɛnaa ñɛkɛ Matataa pɩyalʋ, Matataa ñɛkɛ Naataɣ pɩyalʋ, Naataɣ ñɛkɛ Daaviidi pɩyalʋ, ³² Daaviidi ñɛkɛ Yesee pɩyalʋ, Yesee ñɛkɛ Obɛɛdɩ pɩyalʋ, Obɛɛdɩ ñɛkɛ Boozi pɩyalʋ, Boozi ñɛkɛ Sala pɩyalʋ, Sala ñɛkɛ Naasɔɔnɩ pɩyalʋ, ³³ Naasɔɔnɩ ñɛkɛ Aminaadaabɩ pɩyalʋ, Aminaadaabɩ ñɛkɛ Admini pɩyalʋ, Admini ñɛkɛ Arnii pɩyalʋ, Arnii ñɛkɛ Ɛsrɔm pɩyalʋ, Ɛsrɔm ñɛkɛ Faarɛɛzɩ pɩyalʋ, Faarɛɛzɩ ñɛkɛ Yuda pɩyalʋ, ³⁴ Yuda ñɛkɛ Yakɔɔbʋ pɩyalʋ, Yakɔɔbʋ ñɛkɛ Izaakɩ pɩyalʋ, Izaakɩ ñɛkɛ *Abraham pɩyalʋ, Abraham ñɛkɛ Taaraa pɩyalʋ, Taaraa ñɛkɛ Naacɔɔrɩ pɩyalʋ, ³⁵ Naacɔɔrɩ ñɛkɛ Seruuki pɩyalʋ, Seruuki ñɛkɛ Raagoo pɩyalʋ, Raagoo ñɛkɛ Faalɛɛkɩ pɩyalʋ, Faalɛɛkɩ ñɛkɛ Eebɛɛrɩ pɩyalʋ, Eebɛɛrɩ ñɛkɛ Sala pɩyalʋ, ³⁶ Sala ñɛkɛ Kayɩnam pɩyalʋ, Kayɩnam ñɛkɛ Arfaksaadɩ pɩyalʋ, Arfaksaadɩ ñɛkɛ Sem pɩyalʋ, Sem ñɛkɛ Nowee pɩyalʋ, Nowee ñɛkɛ Laamɛɛkɩ pɩyalʋ, ³⁷ Laamɛɛkɩ ñɛkɛ Matuusalaa pɩyalʋ, Matuusalaa ñɛkɛ Enɔɔkɩ pɩyalʋ, Enɔɔkɩ ñɛkɛ Yaarɛɛdɩ pɩyalʋ, Yaarɛɛdɩ ñɛkɛ Maleleyɛɛlɩ pɩyalʋ, Maleleyɛɛlɩ ñɛkɛ Kayɩnaɣ pɩyalʋ, ³⁸ Kayɩnaɣ ñɛkɛ Enɔɔsɩ pɩyalʋ, Enɔɔsɩ ñɛkɛ Sɛɛtɩ pɩyalʋ, Sɛɛtɩ ñɛkɛ Aɖam pɩyalʋ nɛ *Aɖam lɛ weyi Ɛsɔ mawa yɔ.