24
Daaviidi yebu nɛ pakalɩ Izirɛɛlɩ samaɣ yɔ
(Ɩ́cɔna 1Awiya Tɔm Kɛdʋʋ Cɔlɩɩ 21. 1-6)
1 Nakʋyʋ wiye KƖPAƔLƲ pana tasa kpanaʋ Izirɛɛlɩ ñɩma nɛ eseɣdi Daaviidi se eyele nɛ pʋɖʋzɩ-wɛ. Eheya-ɩ se ewolo nɛ ɛkalɩ Izirɛɛlɩ ñɩma nɛ Yuuda ñɩma nɛ ɛna se pɛkpɛnda ɛsɩna. 2 Peeye wiyaʋ Daaviidi heya youlaɖaa ñʋʋdʋ Yowaabɩ weyi ɛɛwɛ ɛ-cɔlɔ yɔ se, ɛ́kʋyɩ nɛ ɛ́cɔɔ Izirɛɛlɩ cejewe tɩŋa taa, kpaɣ Daanɩ nɛ puwolo pɩsɩna Bɛɛrɩseva, nɛ eyele nɛ pakalɩ samaɣ nɛ ɛnʋ na ka-ñʋʋ. 3 Yowaabɩ heya wiyaʋ Daaviidi se, ɛnʋʋ wiyaʋ ɛ-Ɛsɔ eyele nɛ samaɣ huu tɔm mɩnʋʋ taa nɛ piyele ɛnʋʋ ɛnʋ kɩpaɣlʋ ɛnana ɛ-ɛza! Ɛlɛ, ɛnʋ pɔzʋʋ se pɩlaba ɛsɩna nɛ ɛnʋʋ ɛnʋ kɩpaɣlʋ wiyaʋ e-liu wɛɛ se pala pɩtɛ lakasɩ nzɩ?
4 Paa mbʋʋ yɔ, mbʋ wiyaʋ ɖʋwa yɔ, pɩkɩla ɖoŋ ndʋ Yowaabɩ nɛ sɔɔjanaa ñʋŋdɩnaa lɛlaa maɣzaa yɔ. Peeye pakpaɣ nʋmɔʋ se powoki pakalɩ Izirɛɛlɩ samaɣ. 5 Pɔkɔma nɛ pɛtɛzɩ Yɔɔrɩdaŋ pɔɔ lɛ, papazɩ kalʋʋ Aroɛɛrɩ tɛtʋ nɛ ndʋ tɩwɛ ɖooo kajalaŋa taa yɔ, pa-taa ñɩma, nɛ patɩŋna Gaadɩ egeetiye taa nɛ powobina Yazeeri tɛtʋ hɔɔlʋʋ taa 6 nɛ pasʋʋ Gaalaadɩ ɛjaɖɛ taa nɛ powolo Hɛɛtɩ liɖe taa ñɩma ñɩnɖɛ, Hadɩsii taa, nɛ pɔkɔɔ patala Daanɩyaanɩ tɛtʋ nɛ tɩ-hɔɔlɩŋ pa-taa nɛ Siidɔɔnɩ ñɩndʋ taa nɛ pakalɩ ɛyaa. 7 Pasʋ Tiiri tɛtʋ ndʋ pɔcɔza-tʋ koloŋa yɔ, nɛ Hiiwii ñɩma nɛ Kanaanɩ ñɩma pɛ-tɛtʋ tɩŋa taa. Pʋwayɩ lɛ, powolo Negɛɛvɩ egeetiye taa Yuuda cejewiye taa ñɩma hɔɔlʋʋ taa nɛ pakalɩ Bɛɛrɩseva ñɩndʋ taa ñɩma. 8 Mbʋʋ pɔcɔ ɛjaɖɛ tɩŋa nɛ pɔkɔɔ patala Yeruusalɛm tɛtʋ taa fenasɩ nakʋ (9) nɛ kɩyakʋ nɩɩlɛ (20) ñɩŋgʋ wiye. 9 Patalaa lɛ, Yowaabɩ heyi wiyaʋ ɛjaɖɛ taa samaɣ ñʋʋ. Youlaɖaa kɛkpɛnda ɛyaa kutokiŋ taŋga nɛ nasɩdozo (800.000).
Ɛsɔ hɔm Daaviidi nɩŋgbaŋ yɔ
(Ɩ́cɔna 1Awiya Tɔm Kɛdʋʋ Cɔlɩɩ 21.7-17)
10 Daaviidi tɛma samaɣ kalʋʋ ḿbʋ lɛ, ɛ-laŋɩyɛ pazɩ maʋ ɖoŋ. Peeye eheya KƖPAƔLƲ se, mbʋ ɛnʋ laba ḿbʋ yɔ, pɩkɛ kɩwɛɛkɩm sɔsɔm kpem. Ɛlɛ, lɛɛlɛɛyɔ, ɛnʋʋ KƖPAƔLƲ ékpeɣ ɛnʋʋ ɛ-tʋmlaɖʋ mbʋ pʋyɔɔ yɔ, ɛnʋ laba kɩmɛlɛndʋ kpem. 11-12 Peeye KƖPAƔLƲ haya lɔɔyaɣ tʋ Gaadɩ weyi ɛkɛ Daaviidi tɔm tasɩyʋ yɔ se, éwolo Daaviidi cɔlɔ nɛ eheyi-i nɛ ɛnʋ nɔɔ se, ɛnʋʋ KƖPAƔLƲ eheyiɣ-i kʋñɔmɩŋ naadozo (3) nɛ ɛlɩzɩ ɛ-taa kʋɖʋmʋʋ nɛ piyele ɛnʋ ɖʋ-ɩ-kʋ. 13 Ɖɩnɛɛ Gaadɩ woba Daaviidi tɛ nɛ eheyi-i ndʋ KƖPAƔLƲ yɔɔdaa yɔ, nɛ ɛpɔzɩ-ɩ se, e-liu wɛɛ se ñɔɔsɩ ɛlɩɩ ɛ-ɛjaɖɛ taa pɩnzɩ lʋbɛ (7) yaa e-koyindinaa ɛɖɔɔnɩ-ɩ fenasɩ naadozo (3) nɛ eseɣ, yaa kɩsɩkʋ ɛlɩɩ kɩyakɩŋ naadozo (3) ɛ-ɛjaɖɛ taa? Se, ye mbʋ, lɛɛlɛɛyɔ ɛ́maɣzɩ nɛ eheyi ɛnʋʋ ndʋ eecosi weyi etiya ɛnʋ yɔ. 14 Daaviidi heyi Gaadɩ se, sɔɔndʋ kpa ɛnʋ siŋŋ. Ɛlɛ, ɛnʋ liu kɩla wɛʋ se ɛnʋ ɛtɔlɩ KƖPAƔLƲ nesi taa ɛzɩ ɛɛtɔlɩ ɛyaa nesi taa yɔ. Mbʋ pʋyɔɔ yɔ, KƖPAƔLƲ lɛ, ɛpɩzɩɣ ɛna pʋtɔdɩyɛ.
15 Peeye KƖPAƔLƲ tiyina kɩsɩkʋ Izirɛɛlɩ ɛjaɖɛ taa, kpaɣ tanaŋ ŋ́gʋ nɛ puwolo pɩsɩna alɩwaatʋ ndʋ ɛɖʋwa yɔ, nɛ abalaa kutokiŋ nɩɩnʋwa nɛ nɩɩlɛ (70.000) sɩ samaɣ taa, kpaɣ Daanɩ tɛtʋ taa nɛ puwolo pɩsɩna Bɛɛrɩseeva ñɩndʋ taa. 16 Se, KƖPAƔLƲ tiyiyu kɔma eposi e-nesi nɛ Yeruusalɛm tɛtʋ yɔɔ se kɩsɩkʋ ɛsʋʋ tɩ-taa lɛ, KƖPAƔLƲ lɛɣzɩ lɩmaɣza se ɛɛlakɩ ɛzaɣtʋ ndʋ nɛ eheyi tiyiyu ɛkʋwaɣ samaɣ yɔ se, pɩmaɣaɣ! Se, eyele mbʋʋ alɩwaatʋ ńdʋ!
Se, alɩwaatʋ ndʋ lɛ, KƖPAƔLƲ tiyiyu ɛnʋ, ɛɛwɛ Yeebuusii tɛtʋ taa tʋ weyi payaɣ se Aroonaa yɔ, ɛ-tɔɔnaɣ kadaɣ cɔlɔ. 17 Daaviidi kɔma ɛna tiyiyu weyi ɛkʋwaɣ samaɣ yɔ lɛ, ɛtɔ se, ɛnʋ yʋsɩna, ɛnʋ labɩna ɛzaɣtʋ! Ɛpɔzʋʋ se, ɛlɛ, ɛnʋ samaɣ ñalaba we yɔ? Se, ɛnʋʋ pʋwɛɛ se ɛkʋ, ɛnʋ nɛ ɛnʋ hɔʋ taa ñɩma!
18 Peeye Gaadɩ woba Daaviidi cɔlɔ kɩyakʋ ŋ́gʋ nɛ eheyi-i se, ɛ́kpa Yeebuusii tɛtʋ taa tʋ Aroonaa tɔɔnaɣ kadaɣ taa nɛ ɛma KƖPAƔLƲ, kɩlaŋ ɖɩlayɛ. 19 Ɖɩnɛɛ Daaviidi kpa peeye ɛzɩ Gaadi heyuu-i se KƖPAƔLƲ heya ɛ́lɛ yɔ. 20 Pɩkɛdaa Aroonaa cɔŋna lɛ, ɛnaɣ wiyaʋ nɛ ɛ-tʋmlaɖaa powokina ɛ-yɔɔ. Ɛna wiyaʋ ḿbʋ lɛ, ɛlɩɩ nɛ ewolo eluŋ ɛ́lɛ tɛɛ tɛɛtaa, 21 nɛ ɛpɔzɩ-ɩ se, pɩlaba ɛzɩma nɛ ɛnʋʋ wiyaʋ ewoki ɛnʋʋ ɛ-tʋmlaɖʋ ɛ-tɛ? Daaviidi cosi-i se, ɛnʋ woba se ɛyakɩ ɛ-cɔlɔ ɛ-tɔɔnaɣ kadaɣ nɛ ɛnʋ ma KƖPAƔLƲ kɩlaŋ ɖɩlayɛ naɖɩyɛ nɛ piyele asɛyʋʋ ŋgʋ kʋsʋ samaɣ yɔ, kɩsɩɩ tɩnaɣ. 22 Peeye Aroonaa tɔma se, ɛnʋʋ ɛ-kɩpaɣlʋ wiyaʋ ɛ́kpaɣ mbʋ pɩ-tɩŋa e-liu wɛɛ yɔ nɛ ɛlaa kɩlaʋ ŋgʋ pɔhɔkɩ nɛ pɩñaɣ yɔ. Se, ɛ́na ɛnʋ naŋ weyi ɛlaɣ mbʋ yɔ, lɔɔɖɩyɛ ndɩ naŋ hɔŋ yɔ nɛ ɖasɩ nzɩ pɔhɔkɩna naŋ yɔ, pabaa etikiɣ. 23 Se ɛnʋ haɣ wiyaʋ pɩ-tɩŋa. Ɛnʋ taɣ liʋ se, ɛ́lɛ KƖPAƔLƲ Ɛsɔ mʋʋ ɛ́lɛ haɖɛ! 24 Ɛlɛ, wiyaʋ heyi-i se ɛ́taaha ɛnʋʋ pʋyʋ! Se, ɛnʋ caɣ se ɛnʋ yabɩ-wɛ ɛ-cɔlɔ pe-liidiye nɔɔ taa. Ɛnʋ liu fɛyɩ se ɛlaa ɛnʋ KƖPAƔLƲ Ɛsɔ kɩlaŋ weyi pɔhɔkɩ nɛ pɩñaɣ yɔ, nɛ ɛnʋ tɛhɛyɩ pʋyʋ ɛ-yɔɔ!