23
Tɔm ndʋ Daaviidi tɛza yɔɔdʋʋ yɔ
1 Tɔm ndʋ Daaviidi tɛza yɔɔdʋʋ yɔ, ndʋʋ lɛ se:
Péwelisi nɛ panɩɩ ɛnʋʋ Yeesee pɩyalʋ Daaviidi ɛ-tɔm,
ɛnʋʋ ɛyʋ weyi ɛ-yɩɖɛ sɛwa siŋŋ yɔ, ɛ-tɔm,
ɛnʋ weyi Yaakɔɔbʋ Ɛsɔ lɩzaa se ɛkɛ wiyaʋ
nɛ pɩkɛdɩna Izirɛɛlɩ samaɣ se keteɣ-i hendua yɔ.
2 KƖPAƔLƲ Kalɩzaɣ tɩŋna ɛnʋ yɔɔ nɛ kɔyɔɔdʋʋ
kaɖʋʋ tɔm ɛnʋ nɔɔ taa.
3 Izirɛɛlɩ Ɛsɔ yɔɔdaa,
Izirɛɛlɩ ɛwaɣ kaɖa ɛnʋ se,
wiyaʋ weyi ɛcɔŋna ɛyaa yɔɔ nɛ toovenim yɔ,
ɛcɔŋna pɔ-yɔɔ nɛ Ɛsɔ ñamtʋ.
4 Ɛwɛ ɛzɩ tanaŋ tɛɛ wɩsɩ kpaɣʋ nɛ sɩ-ñalɩmɩyɛ wɛɣ yɔ,
tanaŋ ŋgʋ kɩ-tɛɛ mɩndʋ fɛyɩ ɛsɔdaa yɔ,
Sɩñakɩ mbʋ tɛʋ nɩɣ nɛ pɔñɔʋ tɛɛtaa yɔ.
5 Pɩtɛkɛ mbʋʋ ɛnʋ ɖɩɣa wɛ Ɛsɔ cɔlɔ yaa se?
ɛdʋ nɔɔ haʋ ɛ nɛ ɩ pɛ-hɛkʋ taa tam yɔɔ,
ɛɖʋ kɔ-yɔɔ paɣtʋ nɛ tɩkandɩɣ kɔ-yɔɔb.
eyeki se ɛnʋ ñʋʋ yabʋ nɛ mbʋ ɛnʋ liu wɛɛ yɔ, pɔñɔ.
6 Ɛlɛ, mba patakpaɣ Ɛsɔ nɛ payaa pʋyʋ yɔ,
pɛwɛ pa-tɩŋa ɛzɩ sɔɔ wena pɔlɔʋ yɔ,
mbʋ pʋyɔɔ yɔ, nɔɔyʋ ɛɛɖɔkʋʋ-yɛ nɛ nesi yem.
7 Weyi ɛcaɣ se etukuna-sɩ yɔ,
ɛɖɔkʋʋ ñɩɣyʋʋ wonuu nakʋyʋ yaa cʋncʋŋa nakɛyɛ ɖaʋ
paɖʋʋ-wɛ miŋ taa nɛ pañaɣ pa-tɩŋa ɖoli kʋɖʋm.
Daaviidi sɔdɩŋ tɔm
(Ɩ́cɔna 1Tɔm kɛdʋʋ Cɔlɩɩ 11.10-47)
8 Daaviidi sɔdɩŋ hɩla yɔ: Tahɩkemonii tɛtʋ taa tʋ Isebaalɩ, ɛkɛ Daaviidi yɔɔ ɖaŋɩyaa taa lɛlʋ. Ɛnʋ lɔna kɩkpɛzɛŋ nɛ ɛkʋ ɛyaa taŋga nɛ nasidozo tɔm kʋɖʋm taa. 9 Ɛ-wayɩ lɛ, Ahohii tɛtʋ taa tʋ weyi payaɣ se Dodoo yɔ, ɛ-pɩyalʋ Eleyaazaarɩ. Ɛ́lɛ kɛkɛ sɔdɩŋ naadozo weyi paawɛ Daaviidi cɔlɔ, alɩwaatʋ ndʋ pakʋyaɣaɣ Filisitii ñɩma mba paba kpeɣlaa se pakʋyɩ Izirɛɛlɩ ñɩma yɔɔ yɔ. Izirɛɛlɩ ñɩma ḿba, peseɣaɣ, 10 ɛlɛ, Eleyaazaarɩ ɛnʋ ɛɖɔkɩna ɛ-tɩ nɛ ɛkʋ Filisitii ñɩma nɛ halɩ pɩɖɛɛ e-nesi nɛ sɩkɔɔ sɩsɩ e-yousɩɣa yɔɔ. Kɩyakʋ ŋgʋ lɛ, KƖPAƔLƲ yele nɛ pawa kpaagbaa kpem. Youlaɖaa pɩsaɣaɣna pa-wayɩ Eleyaazaarɩ cɔlɔ lɛ, sɩɖaa ñɩm pakpakaɣaɣ. 11 Ɛ́lɛ wayɩ lɛ, Harii tɛtʋ taa tʋ weyi payaɣ se Agee yɔ, ɛ-pɩyalʋ Samaa. Filisitii ñɩma kɔma pekpeɣli ɖama Lehii tɛtʋ taa ɖenɖe pahaya tɔɔnaɣ ŋga payaɣ Lɛnɩtiiyi yɔ lɛ, Izirɛɛlɩ ñɩma youlaɖaa se, 12 ɛlɛ, Samaa ñasɩŋ tɔɔnaɣ ŋga ka-hayɩm taa nɛ ɛpɩsɩna-wɛ nɛ pawa Filisitii ñɩma. Mbʋʋ KƖPAƔLƲ yeba nɛ Izirɛɛlɩ ñɩma wa kpaagbaa kpem.
13 Kʋmtʋ alɩwaatʋ taa nakʋyʋ wiye sɔdɩŋ weyi ɛɖaŋɩɣ Daaviidi yɔɔ yɔ, ɛ-taa ɛyaa naadozo (3) woba ɛ-cɔlɔ Aduulam tɛtʋc taa ɛwaɣ pɔʋ taa, mbʋ pʋyɔɔ yɔ, Filisitii ñɩma woba pekpeɣli ɖama Refaa ñɩma kajalaŋad taa. 14 Daaviidi kɛwɛ ɛ-ɖɩmɛlɩyɛ taa nɛ piye Filisitii ñɩma tikaɣ nakɛyɛ ñɛwɛɛ Bɛtɩlɛhɛm tɛtʋ taa. 15 Pɩkɛdaa lɛ, pɩla Daaviidi liu se ɛñɔɔ lɩm nɛ ɛpɔzʋʋ se, ahaɣ ɛnʋʋ lɔkɔ ŋgʋ kʋwɛ Bɛtɩlɛhɛm tɛtʋ taa yɔ, kɩ-taa lɩm nɛ ɛñɔɔ? 16 Peeye sɔdɩŋ ɛnʋ ɛ-naadozo (3) ɛtɩŋna Filisitii ñɩma ɖikpeɣliye taa nɛ ewolo Bɛtɩlɛhɛm tɛtʋ nɔnɔɔ taa nɛ elu lɩm nɛ ewona-pʋ Daaviidi. Ɛlɛ, ekizi se ɛɛñɔʋ-pʋ nɛ ɛha-pʋ KƖPAƔLƲ nɛ ɛkpɛdɩ-pʋ tataa kɩkpɛdʋ 17 nɛ eheyi KƖPAƔLƲ se, ɛnʋ fɛyɩna waɖɛ se ɛñɔɔ lɩom mbʋ. Mbʋ pʋyɔɔ yɔ, pʋwɛ ɛzɩ ɛyaa mba pelema pa-tɩ sɩm nɔɔ taa nɛ powolo polu-pʋ yɔ pa-calɩm yɔ. Mbʋʋ sɔdɩŋ ɛnʋ ɛ-naadozo ɛlaba.
18 Halʋ weyi payaɣ se Ceruuyaa yɔ, ɛ-pɩyalʋ Aviisayi weyi ɛkɛ Yowaabɩ ɖalʋ yɔ, ɛɛkɛ sɔdɩŋ weyi ɛɖaŋaɣ Daaviidi yɔɔ yɔ ɛ-taa lɛlʋ. Ɛnʋ kpaɣna kɩpɛzɛŋ nakʋyʋ wiye nɛ ɛkʋyɩ koyindinaa nasidozo yɔɔ nɛ ɛkʋ-wɛ. Ḿbʋ yebina nɛ ɛ-yɩɖɛ sɛɛ ɖɔɖɔ ɛzɩ sɔdɩŋ ɛnʋ ɛ-naadozo yɔ. 19 Toovenim lɛ, ɛ-yɩɖɛ kakɩla sɛʋ sɔdɩŋ ɛnʋ ɛ-naadozo nɛ halɩ ɛkɛ pa-ñʋʋdʋ ɛlɛ, ɛtatala ɛ-naadozo.
20 Kaviceyɛɛlɩ tɛtʋ taa tʋ Beneyaahuu, ɛkɛ Yehoyaadaa pɩyalʋ, ɛ́lɛ ñɛkɛ sɔdʋʋ nakʋyʋ pɩyalʋ. Ɛlaba mbʋ pɩfɛyɩ yɔɔdʋʋ kpem yɔ́ɔ, sakɩyɛ. Ɛnʋ Mowaabɩ ñɩma sɔdɩŋ naalɛ. Ɛnʋ ɖɔɖɔ tibina lɔkɔ taa, ɖɔmbɛ kɩyakʋ nakʋyʋ wiye nɛ ɛkʋ tɔɔyʋʋ nakʋyʋ. 21 Ɛnʋ ɖɔɖɔ kʋna Ejipiti tʋ nɔɔyʋ, ɛ́lɛ tala ɛyʋ siŋŋ, e-nesi taa nɛ kɩkpɛzɛŋ. Ɛɖɔka ɖaʋ e-nesi taa nɛ ewolo ɛkʋyɩ ɛ́lɛ yɔɔ nɛ ɛmʋ kɩkpɛzɛŋ Ejipiti tʋ ɛnʋ e-nesi taa nɛ ɛkʋ-ɩ nɛ ɛ́lɛ maɣmaɣ ɛ-kɩkpɛzɛŋ. 22 Mbʋʋ Yehoyaadaa pɩyalʋ, Beneyaahuu laba nɛ ɛ-yɩɖɛ sɛɛ ɛzɩ sɔdɩŋ naadozo ɛnʋ yɔ. 23 Ɛ-yɩɖɛ kakɩlɩna sɛʋ sɔdɩŋ niidozo (30) tikaɣ taa, ɛlɛ, pɩtatala sɔdɩŋ naadozo ɛnʋ. Daaviidi yeba nɛ ɛkɛ mba paɖaŋɩɣ ɛ-yɔɔ yɔ, pa-ñʋʋdʋ.
24 Sɔdɩŋ niidozo tikaɣ taa lɛ, panaɣ ɖɔɖɔ: Yowaabɩ ɖalʋ Asahɛɛlɩ nɛ Bɛtɩlɛhɛm tʋ Dodoo pɩyalʋ Ɛlɩhanaanɩ 25 nɛ Haroodii tɛtʋ taa tʋ Samaa nɛ tɩ-taa tʋ Elika 26 nɛ Palitii tɛtʋ taa tʋ Hɛlɛɛcɩ nɛ Tekoyiiti tɛtʋ taa tʋ Ikɛɛsɩ pɩyalʋ, Iiraa 27 nɛ Anaatɔɔtɩ tɛtʋ taa tʋ Aviyɛɛzɛɛrɩ nɛ Husayi tɛtʋ taa ñɩnʋ Mevunayii 28 nɛ Ahohii tɛtʋ taa ñɩnʋ Calɩmɔɔnɩ nɛ Netooofaa tɛtʋ taa ñɩnʋ Mahɩrayii 29 nɛ tɩ-taa tʋ Baana pɩyalʋ Helevii nɛ Bineyaamiini hɔɔlʋʋ taa Gibeyaa tɛtʋ taa tʋ Riivayii pɩyalʋ Itayi 30 nɛ Piraatooni tɛtʋ taa tʋ Benayaahuu nɛ Gaasɩ pɔsɩ taa tʋ Hidayii 31 nɛ Arɩvaa tɛtʋ taa tʋ Avialɩvooni nɛ Barɩhuumii ñɩndʋ taa ñɩnʋ Azɩmaawɛɛtɩ 32 nɛ Saalɩvoonii tɛtʋ taa tʋ Eliyahɩbaa. Yaseeni pɩyalaa taa lɛlʋ nɛ Yehonaataanɩ 33 nɛ Haraarii tɛtʋ taa tʋ Samaa nɛ Araarii tʋ Saraarɩ pɩyalʋ Ahiyam 34 nɛ Maakaa tɛtʋ taa tʋ pɩyalʋ Ahasɩbayɩ pɩyalʋ Eliifɛlɛɛtɩ nɛ Gilooni tɛtʋ taa tʋ Ahitoofɛɛlɩ pɩyalʋ Eliyam 35 nɛ Kaarɩmelii tɛtʋ taa tʋ Hɛcɩrayɩ nɛ Aarɩbii ñɩndʋ taa ñɩnʋ Paarayɩ 36 nɛ Covaa tɛtʋ taa tʋ Naataanɩ pɩyalʋ Yigeyaalɩ nɛ Gaadɩ tɛtʋ taa ñɩnʋ Banii 37 nɛ Amoonii tɛtʋ taa tʋ Cɛlɛɛkɩ nɛ Beeroo ñɩndʋ taa ñɩnʋ Nahɩrayɩ weyi ɛɖɔkaɣ Yowaabɩ you wondu yɔ. E-ɖoo lɛ Ceruuyaa. 38 Nɛ Yitirii tɛtʋ taa ñɩma Iiraa nɛ garɛɛvɩ 39 nɛ Hiiwii tɛtʋ taa ñɩnʋ Uurii. Pa-tɩŋa pɛkpɛnda niidozo nɛ lʋbɛ (37).