12
Naataanɩ kalʋʋ Daaviidi yɔ
1 Pɩlabɩ ḿbʋ lɛ, Kɩpaɣlʋ tiyi lɔɔyaɣdʋ Naataanɩ Daaviidi cɔlɔa. Naataanɩ woba Daaviidi cɔlɔ lɛ, ehey-i se, abalaa nabɛyɛ wɛnɩ mbʋʋ tɛtʋ natʋyʋ taa, pɛwɛ naalɛ. Lɛlʋ kɛ ñɩmdʋ, nɛ lɛlʋ, kʋñɔndʋ. 2 ñɩmdʋ kɛwɛnɩ heŋ nɛ naŋ pa-kalakɩŋ sɔsɔŋ. 3 Pɩyele kʋñɔndʋ ñɛwɛna heu kʋɖʋm koŋ. Ɛyabɩ-ɩ kɩyabʋ. Ɛɖɔɔ-ɩ nɛ ɛwɛɛ ɛ-tɛ nɛ ɛ nɛ e-piya papaɣlɩɣ. Ɛ nɛ ɩ pɔtɔkaɣ tɔɔnaɣ kʋɖʋmaɣ nɛ pɔñɔʋ naalɩm kʋɖʋmʋm nɛ ɛhɩnɩɣ ɛ-cɔlɔ kpam. Ɛɛwɛ ɛzɩ ɛ-pɛlɛ yɔ. 4 Se, nakʋyʋ wiye lɛ, ɛgɔm nɔɔyʋ wolo ñɩmdʋ tɛ nɛ eyele lɩzʋʋ ɛ-kpɩna taa naɖɩyɛ nɛ ewolo ɛkpa kʋñɔndʋ heu se pñɔɔzɩ nɛ palabɩnɩ ɛlɛɛ tɔɔnaɣ.
Se, Daaviidi nɩ́ ḿbʋ lɛ, ɛ-pana kpana ñɩmdʋ ɛnʋ siŋŋ nɛ eheyi Naataanɩ se, ɛnʋ ɖuuni Kɩpaɣlʋ se, abalʋ eyi ɛlabɩ ḿbʋ yɔ, pʋwɛɛ se pakʋ-ɩ!
6 Mbʋ pʋyɔɔ yɔ, ɛtana kʋñɔndʋ pʋtɔdɩyɛ, ɖɔɖɔ lɛ, ɛhɛyɩɣ heu ɛnʋ e-lone taa heŋ lɛɛŋ naanza (4). 7 Peeye Naataanɩ heyi Daaviidi se, ɛnʋʋ Daaviidi lɛ abalʋ weyi ɛlaba ḿbʋ yɔ. Se, ewelesi nɛ ɛnɩɩ ndʋ Kɩpaɣlʋ Izirɛɛlɩ Ɛsɔ heyiɣ-i yɔ. Se, ɛnʋ labɩ-ɩ sɔnzɩ nɛ num nɛ ɛkɛ Izirɛɛlɩ ñɩma wiyaʋ. Se, lɩzɩ-ɩ Sawʋlɩ nesi taa. 8 Se, ɛnʋ ha-ɩ ɖoŋ ɛ-caa Sawʋlɩ hɔʋ taa ñɩma yɔɔ, nɛ ɛkpaɣ ɛ́lɛ halaa nɛ ɛɖʋzɩ e-nesi taa. Se, ɛnʋ ha-ɩ Izirɛɛlɩ nɛ Yuuda pa-samamaɣ. Se, ye pʋtɔɖɔɔ-ɩ yɔ, ɛnʋ pɩzaɣ se ɛtasɩ-ɩ haʋ ɖɔɖɔ nɛ pɩɖɛɛ pʋ-tɔm naalɛ yɔɔ. 9 Se, pʋ-yɔɔ lɛ, pɩlaba ɛsɩna ɛla mbʋ nɛ ɛpɛɛŋɩnɩ ɛnʋʋ tɛtɛ? Se, ɛkʋ Hɛɛtɩ liɖe taa tʋ Uurii, se, toovenim lɛ, ɛlabɩ pɩ-tɩnɛ payɩ nɛ Amoonii ñɩma kʋ-ɩ nɛ yele ɛkpaɣ ɛ́lɛ halʋ. 10 Se, tɔɔ! kpaɣnɩ lɛɛlɛɛyɔ lɛ, ɛyaa eeyeki sɩbʋ nɛ pe-miŋ ɛ-hɔʋ taa kaʋ, mbʋ pʋyɔɔ yɔ, ɛkpaɣ Hɛɛtɩ liɖe taa tʋ Uurii halʋ nɛ ɛpɛɛŋɩnɩ ɛnʋʋ tɛtɛ. 11 Se, ewelesi camɩyɛ nɛ ɛnɩɩ ndʋ ɛnʋʋ kKɩpaɣlʋ eheyiɣ-i yɔ. Se, ɛnʋ yeki nɛ pɩtɩŋnɩ ɛ-hɔʋ taa ñɩma yɔɔ nɛ asɛyʋʋ sʋʋ-ɩ. Se, ɛnʋ kpakɩɣ ɛ-halaa ɛ-ɛsɩndaa nɛ ɛcɛlɛ ɛ-ñɩnʋ nɔɔyʋ nɛ ɛ nɛ wɛ pasʋʋ wisi nɛ wɩsɩb. 12 Se, toovenim lɛ, mbʋ ɛlaba mɛsaɣ tɛɛ yɔ, ɛnʋ lɩzɩɣ-pʋ wɩsɩ taa kaŋŋ nɛ ɛ-samaɣ tɩnɛ na.
13 Peeye Daaviidi heyi Naataanɩ se ɛnawa se ɛyʋsɩnɩ Kɩpaɣlʋ. Ɛyɔɔdɩ ḿbʋ lɛ, Naataanɩ hey-i se, ye ḿbʋ, Kɩpaɣlʋ kpeɣ-i. Se, ɛɛtasɩɣ sɩbʋ. 14 Se, ɛlɛ, ɛpɩsɩ Kɩpaɣlʋ hɔyɛ siŋŋ tɔm tʋnɛ tɩ-taac Se, pʋ-yɔɔ lɛ, ɛ-pɩɣa ŋga palʋlɩ-ɩ lɛɛlɛɛyɔ, kasɩkɩ. 15 Pʋwayɩ lɛ, Naataanɩ pɩsɩ ɛ-tɛ.pɩɣa sɩm tɔm
Se, piyele Kɩpaɣlʋ tiyini kʋdɔŋ nakʋyʋ nɛ kɩkpa pɩɣa ŋga Batɩseeva lʋlɩ Daaviidi yɔ. 16 Se, Daaviidi tendi Ɛsɔ pɩɣa ŋga kɔ-yɔɔ nɛ ɛpazɩ hɔkʋʋ nɔɔ. Se ɖoo yuwa nɛ ekpe ɛ-tɛ lɛ, ɛhɛnɩ tɛɛtaa. 17 Se, pɩkɛdaa lɛ, ɛ-tʋmlaɖaa mba ɛyaa kɩlɣ-wɛ ñm yɔ, powolo ɛ-cɔlɔ nɛ peheyi-i se ɛkʋyɩ, ɛlɛ, ekizi. Halɩ ekiza se paa tɔɔnaɣ ŋga ɛ nɛ wɛ pɛtɛkpɛndɩ pɔtɔɔ. 18 Se, pʋkɔm pɩla ɛzɩ kpɩtaʋ yɔ lɛ, pɩɣa ŋga kasɩ, nɛ sɔɔndʋ kpaɣ Daaviidi tʋmlaɖaa se peheyi-i tɔm ndʋ. Mbʋ pʋyɔɔ yɔ, pamaɣzaɣ pa-taa se, pɩɣa kɛwɛnɩ kɛ-ɛsɛ nɛ ḿba yɔɔdɩnɩ-ɩ nɛ ɛtanɩnɩ-wɛ. Ɛsɩna ḿba lakɩ nɛ ḿba ñalakɩ nɛ peheyio-i lɛɛlɛɛyɔ se kasɩba yɔ? Ɛpɩzaɣ ɛla mbʋ pɩfɛyɩ ɖeu yɔ! 19 Se, Daaviidi na pɛwɛɛ pemindiɣ pa-taa pe-ɖeke lɛ, ɛtɩlɩ mbʋ pɩlaba yɔ. Se, ɛpɔzɩ-wɛ se ɛ-pɩyalʋ sɩba yaa we? Pocosi-i se ɛɛɛ! Ɛsɩba. 20 Peeye Daaviidi kʋya tataa nɛ ewolo ɛsɔ lɩm nɛ ɛɖʋ tɩlaaɖɩ nɛ esuu e-wondu nɛ ewolo Ɛsɔ kɩɖanɖʋʋ tɛɛ se eluŋ Kɩpaɣlʋ tɛɛ.
Se, ɛkɔma ɛpɩsɩ ɛ-tɛ lɛ, ɛha nɔɔ se paɖʋ-ɩ tɔɔnaɣ! Paɖʋ-ɩ-kɛ, ɛpazɩ tɔɔʋ. 21 Ɖɩnɛɛ ɛ-tʋmlaɖaa pɔzɩo-ɩ se, Dajaa! Lakasɩ nzɩ, sɩ-tɔbʋʋ se we? ña-pɩɣa kɛwɛnɩ kɛ-ɛsɛ lɛ, ŋhɔkaɣ nɔɔ nɛ ŋwiliɣ, nɛ lɛɛlɛɛyɔ kasɩ nɛ ŋkʋyɩ nɛ ŋpazɩ tɔɔʋ na! 22 Daaviidi cosi se, ɛɛɛ! Se, alɩwaatʋ ndʋ ɛnʋ pɩyalʋ wɛ wezuu yɔ, ɛhɔkɩ nɔɔ nɛ ewili se, pʋtɔmaa yɔ, Kɩpaɣlʋ kana ɛnʋ pʋtɔdɩyɛ nɛ eyele nɛ ɛwɛɛ wezuu. 23 Se, ɛpozɩ-wɛ se, lɛɛlɛɛyɔ , kasɩba yɔ, ɛbɛ yɔɔ ɛtasɩɣ hɔɔkʋʋ nɔɔ yɔ? Se, ɛpɩzɩɣ efezi-kɛ yaa we? Se, ɛnʋ kaɣna wobu nɛ ɛmaɣnɩ-kɛ, ɛlɛ, pɩtɛkɛ ŋga pɩsɩɣnɩna ɛnʋ cɔlɔ.
Palʋlʋʋ Saloomɔɔ yɔ
24 Pʋwayɩ lɛ, Daaviidi wolo nɛ ɛhɛzɩ ɛ-halʋ Batɩseeva laŋɩyɛ nɛ ɛ nɛ ɩ pasʋʋ nɛ ɛlʋlɩ Daaviidi abalɩpɩɣa. Payaɣ-kɛ se Saloomɔɔ. Kɩpaɣlʋ kɔsɔɔlɩ-kɛ. 25 Se, Naataanɩ yɔɔ Batɩseeva tɩŋnaa nɛ eheyi Daaviidi. Sɔɔlɩm ḿbʋ pʋ-yɔɔ lɛ, ɛyaa-kɛ se Yediidiya, pʋ-tɔbʋʋ se, weyi Kɩpaɣlʋ sɔɔlaa yɔ.
26 Se, alɩwaatʋ ndʋ tɩ-taa lɛ, sɔɔjanaa ñʋʋdʋ Yowaabɩ ñaakʋyɩ Amoonii ñɩma tɛtʋ sɔsɔtʋ, Raabaa ñɩma yɔɔ, nɛ ɛmʋ hɔɔlʋʋ ŋgʋ kɩ-taa wiyaʋ wɛɣ yɔ. 27 Se, etiyi nabɛyɛ se powolo peheyi Daaviidi se, ɛkʋyɩ Raabaa tɛtʋ taa ñɩma yɔɔ, nɛ halɩ ɛmʋ hɔɔlʋʋ ŋgʋ kɩ-taa lɩm wɛɛ yɔ. 28 Se, ye ḿbʋ, lɛɛlɛɛyɔ, ekpeɣli sɔɔjanaa mba pɩkazaa yɔ nɛ ewolo ɛsʋʋ tɛtʋ taa nɛ ɛmʋ-tʋ ɛ-maɣmaɣ. Se, ɛnʋ tɔsɔɔlɩ se ɛmʋ-tʋ pɩtɛkɛ ḿbʋ, ɛnʋ yɩɖɛ sɛɣna. 29 Peeye Daaviidi kpeɣli sɔɔjanaa mba pɩkazaa yɔ nɛ ɛkʋyɩ Raabaa tɛtʋ taa ñɩma yɔɔ nɛ ɛmʋ-tʋ. 30 Se, ekula ñɩɣlɩm fulaɣ ŋga kaawɛ Amoonii ñɩma sɩʋ kpeɣlaɣ Milikoom ñʋʋ taa yɔ. Fulaɣ ŋga, ko-yuŋ kɛɖɛ ɛzɩ kiiloonaa niidozo yɔ. kɔ-yɔɔ nɛ ñɩɣlɩm pɩyɛ naɖɩyɛ. Pakpaɣ pɩyɛ nɖɩ nɛ paɖʋ wiyaʋ Daaviidi ñɩɣlɩm fulaɣ yɔɔ. Ɖɔɖɔ lɛ, Daaviidi kpaɣ ñɩm sakɩyɛ mbʋ pamʋ tɛtʋ taa yɔ nɛ ɛɖɛna. 31 Piyele tɩ-taa ñɩma lɛ, Daaviidi kɛzɩ-wɛ tɛtʋ. Ewoni-wɛ ɛ-tɛ nɛ ɛkpa-wɛ nɛ ɖoŋ nɛ pɛhɛɣ tɩŋ nɛ pasakɩ pɛ nɛ pɛsɛtɩɣ tɩŋ nɛ polowu filikinaa. Mbʋ ɖɔɖɔ Daaviidi laba Amoonii ñɩma tɛtʋ lɛɛtʋ tɩnɛ taa ñɩma. Pʋwayɩ lɛ, ɛ nɛ ɛ-sɔɔjanaa papɩsɩ Yeruusalɛm.