6
Daaviidi ɖʋʋ se ewokini KƖPAƔLƲ aɖakaɣ, Yeruusalem yɔ
( Awiya tɔm kɛdʋʋ cɔlɩɩ 13.1-14; 15.25–16.3)
1 Nakʋyʋ wiye Daaviidi tasɩ kpeɣluu Izirɛɛlɩ sɔɔjanaa sɔsaa tɩŋa. Paakpɛndɩ kutokiŋ niidozo (30.000) 2 Ekpeɣli-wɛ lɛ, ɛ nɛ wɛ powolo Baaleyehuda tɛtʋa taa se pamʋʋ Ɛsɔ aɖakaɣ. Pama aɖakaɣ ŋga kɔ-yɔɔ se, KƖPAƔLƲ Ɖɔŋ Tɩnɛ tʋ, ɛcaɣ Ɛsɔ tiyiyaa yɔɔb. 3 Aɖakaɣ ŋga, kaawɛ abalʋ weyi payaɣ se Avinaadaavɩ yɔ, ɛ-tɛ, pʋwɛ piyaɣ yɔɔ. Powoba lɛ, pakpaɣ-kɛ nɛ paɖʋ lɔɔɖɩyɛ kɩfaɖɛ naɖɩyɛ nɖɩ kpaŋnaŋ hɔŋ yɔ, ɖɩ-taa nɛ pɛɖɛna. Avinaadaavi pɩyalaa,Uuza nɛ Hiyoo pawɩlaɣnɩ kpaŋnaŋ nʋmɔʋ nɛ ɛ́lɛ ñɔhɔŋ-ɖɩ. 4 Ɖɩ-taa nɛ Nɔɔ Haʋ aɖakaɣ, Ahiyoo, kɛwɛnɩ ɛsɩndaa nɛ ɛɖɔŋ nɛ patɩŋɩɣ-ɩ. 5 Daaviidi nɛ Izirɛɛlɩ ñɩma tɩnɛ pamakaɣ wondu ndʋ palabɩnɩ tɩŋ weyi payaɣ se ciipɩrɛɛsɩ yɔ, tɩ-tɩnɛ nɛ pamayɩɣ amaya Ɛsɔ ɛsɩndaa. Ndʋʋ yɔ: cɩmɩŋ ndɩ ndɩ, nɛ so ndɩ ndɩ, nɛ catasɩ ndɩ ndɩ. 6 Pɔkɔm patalɩ ɖenɖe payaɣ se Naakɔɔnɩ yɔ, pʋ-cɔlɔ lɛ, naŋ caɣaɣ se ɛpɛɖɩ Nɔɔ Haʋ aɖakaɣ. Peeye Uuza pozi e- nɛ ɛkpa-kɛ. 7 Peeye KƖPAƔLƲ pana kpanɩ-ɩ nɛ ɛkʋ-ɩ kpaagbaa ɛ-kɩmɛlɛndʋc ndʋ tʋ-yɔɔ. Uuza sɩbɩ peeye Nɔɔ Haʋ Aɖakaɣ cɔlɔ. 8 Kɩpaɣlʋ yeba nɛ pɩla ḿbʋ lɛ, pitii Daaviidi tome taa, nɛ ɛyaa lone nɖɩ se, Pɛɛrɛɛzuuza, nɛ hɩɖɛ nɖɩ, ɖɩwɛɛ mbʋʋ halɩ nɛ sɔnɔ. 9 Kɩyakʋ ŋgʋʋ sɔɔndʋ kpa Daaviidi nɛ KƖPAƔLƲ nɛ ɛtɔ se, ɛnʋ ɛɛpɩzɩɣ ɛmʋ ɛ́lɛ Nɔɔ Haʋ Aɖakaɣ ɛnʋ tɛ. 10 Mbʋʋ Daaviidi kizaa se eewokini Nɔɔ Haʋ Aɖakaɣ ɛ-tɛ, ɖenɖe payaɣ se Daaviidi tɛtʋ yɔ, nɛ ɛtɔ se powoni-kɛ Gaatɩ tɛtʋ taa tʋ weyi payaɣ se Oovɛɛdɩedom yɔ ɛ-tɛ. 11 Kaawɛ peeye fenasi naadozo (3). Kɛwɛ ḿbʋ lɛ, KƖPAƔLƲ wazɩ Oovɛɛdɩedom nɛ ɛ-ñɩma tɩnɛ payɩ pɔ-yɔɔd.
Nɔɔ Haʋ Aɖakaɣ tabʋ Yeruusalem yɔ
(Ɩcɔnɩ 1Awiya tɔm kɛdʋʋ cɔlɩɩ 15.25-16.3)
12 KƖPAƔLƲ wazɩ Oovɛɛdɩedom nɛ ɛ-ɖɩɣa taa ñɩma pɔ-yɔɔ ḿbʋ lɛ, nɔɔyʋ wolo nɛ eheyi wiyaʋ Daaviidi se, Nɔɔ Haʋ Aɖakaɣ yɔɔ lɛ, KƖPAƔLƲ wazɩ Oovɛɛdɩedom ɖɩɣa taa ñɩma nɛ mbʋ ɛwɛna yɩ pɩ-tɩnɛ payɩ pɔ-yɔɔ. Peeye Daaviidi kʋyaa ɛkpaɣ nʋmɔʋ nɛ ewolo Oovɛɛdɩedom ɖɩɣa taa, nɛ eyele pakpaɣ Ɛsɔ aɖakaɣ nɛ pakpanɩ-kɛ nɛ laŋhʋlɩmɩyɛ Daaviidi tɛtʋ taa. 13 Mba paasɩɣlɩ KƖPAƔLƲ Nɔɔ Haʋ Aɖakaɣ yɔ, pɔkɔm pɛkpɛzɩ nɩŋgbanzɩ loɖo lɛ, Daaviidi laa nɔ abalɩñɩnʋ nɛ neɣye nɖɩ ɖɩwɛ num yɔ. 14 Pʋwayɩ lɛ, ɛpazɩ paʋ KƖPAƔLƲ ɛsɩndaa nɛ ɛ-laŋɩyɛ tɩnɛ. Eepu cɔjɔnaa liidiye pɩsaʋ ɖeke. 15 Daaviidi nɛ Isirɛɛlɩ ñɩma tɩnɛ powoni KƖPAƔLƲ Aɖakaɣ Yeruusalɛm. Pamakaɣ kubusi nɛ laŋhʋlʋmɩyɛ nɛ pahʋlʋʋ agandɛ kpamm. 16 Pɔkɔm patanɩ Aɖakaɣ ŋgaa “Daaviidi Tɛtʋ” taa lɛ, Sawʋlɩ pɛlɛ Miikaalɩ kɛwɛɛ nɛ ɛcɔŋnɩnɩ mundoɖe pɔʋ. Peeye ɛna Daaviidi, ɛmaɣaɣ nɛ ɛpaɣ KƖPAƔLƲ ɛsɩndaa, ɖɩnɛɛ enimi-i ɖooo ɛ-taa. 17 Patanɩ KƖPAƔLƲ Aɖakaɣ lɛ, pasʋnɩ-kɛ pasɩɩ ke-ɖeɖe, kɩɖanɖʋʋ ŋgʋ Daaviidi keyeba nɛ pesiɣ-kɛ yɔ, kɩ-tɛɛ, nɛ piyele Daaviidi laa kɩlaŋ weyi pɔhɔkɩ nɛ pɩñaɣ yɔ, KƖPAƔLƲ ɛsɔndaa, nɛ laŋhɛzɩyɛ ñɩŋ. 18 Daaviidi kɔm ɛtɛ kɩlaŋ ɛnʋʋ laʋ lɛ, ɛwazɩ samaɣ yɔɔ, KƖPAƔLƲ ɖoŋ tɩnɛ tʋ hɩɖɛ taa. 19 Pʋwayɩ lɛ, eyele patayɩ ka-taa ñɩma, halaa nɛ abalaa tɩnɛ tɔɔnaɣ. Paa ka-taa anɩ ɛɛmʋ tɩŋ pe wena payaɣ se daatɩ waa yɔ, a-tindine nɛ wena popuu a-pe sʋlʋm yɔ, a-kɩwɩlɛ ñɩnɖɛ. Pʋbʋ wayɩ lɛ, paa ka-taa anɩ ekpe ɛ-tɛ. 20 Daaviidi ñasʋ ɛ-tɛ se ɛsɛɣ ɛ-hɔʋ taa ñɩma lɛ, Sawʋlɩ pɛlɛ Miikaalɩ lɩɩ ɛkatɩ-ɩ nɛ eheyi-i se, sɔnɔ Izirɛɛlɩ wiyaʋ lem ɛ-tɩ ɛ-tʋmlaɖaa halaa ñɩma nɛ abalaa ñɩma pɛ-ɛsɩndaa ɛzɩ ɛyʋ kaawazaɣdʋ lakʋʋ yɔ, nɛ ɛɖʋnɩ ɛ-tɩ hɩɖɛ! 21 Peeye Daaviidi cosi Miikaalɩ se, KƖPAƔLƲ weyi eyebɩ ɛ-caa nɛ ɛ-hɔʋ taa ñɩma nɛ piyele ɛlɩzɩ ɛnʋ yɔ, ɛ-yɔɔ ɛnʋ labɩ mbʋ. Se, ɛlɩzɩ ɛnʋ nɛ eyele se ɛnʋ ɛkɛ ɛ-samaɣ Izirɛɛlɩ ñɩma wiyaʋ, se ɛ-yɔɔ ɛnʋ tasɩɣ wɩlʋʋ ɛnʋ laŋhʋlʋmɩyɛ. 22 Se, ɛnʋ tasɩɣ ɛ-tɩ tisuu kpaagbaa kpem nɛ ɛnʋ ɛtaatɩɩkɛʋ pʋyʋ ɛnʋ ɛsɩndaa, ɛlɛ, tʋmlaɖaa halaa ñɩma mba ɛyɔɔdʋʋ yɔ, paba cɔlɔ lɛ, ɛnʋ hɩɖɛ sɛɣ. 23 Pɩlabɩ ḿbʋ lɛ, Sawʋlɩ pɛlɛ Miikaalɩ wɛɛ mbʋ, ɛ nɛ ɛ-sɩm ɛtalʋlɩ pɩɣa.