7
Mbʋ Ɛsɔ ɖʋwa se ɛlakɩ Daaviidi nɛ ɛ-sɛyɩnaa yɔ
( Ɩcɔnɩ 1Awiya tɔm kɛɖʋʋ cɔlɩɩ 17:1-15)
1 Wiyaʋ Daaviidi kɔm ɛwɛɛ ɛ-ɖɩɣa lɛ, KƖPAƔLƲ yele nɛ ɛhɛzɩnɩ e-koyindinaa mba paacɔ e-kewiyaɣ nɛ pata yɔ. 2 Nakʋyʋ wiye lɛ, wiyaʋ heyi Ɛsɔlɔɔyaɣdʋ Naataanɩ se, ɛnʋ sʋʋ ɖɩɣa ŋga palabɩnɩ tɩʋ ŋgʋ payaɣ se sɛɛdɩrɩ yɔ, kɩ-ɖasɩ yɔa, kɩ-tɛɛ. Ŋgʋ, Ɛsɔ Aɖakaɣ ñɛwɛ kɩɖanɖʋʋ ŋgʋ palabɩnɩ pɩsaŋ yɔb, kɩ-tɛɛ. 3 Naataanɩ heyi-i se, ewolo nɛ ɛla mbʋ ɛmaɣzaa se ɛlakɩ yɔ, mbʋ pʋyɔɔ yɔ, KƖPAƔLƲ wɛ ɛ-cɔlɔ.
4 Ɛlɛ, ɖoo kɔm puyu lɛ, KƖPAƔLƲ heyi Naataanɩ se, 5 ewolo eheyi ɛnʋ tʋmlaɖʋ Daaviidi se, mbʋʋ ɛnʋʋ KƖPAƔLƲ ɛpɔzʋʋ-ɩ se, ɛnʋ maɣnɩ ɛnʋʋ Ɖɩɣa nɛ ɛcaɣ ka-taa yaa we? 6-7 Se, mbʋ pʋyɔɔ yɔ, ɖooo ɛzɩ ɛnʋ lɩzʋʋ Izirɛɛlɩ ñɩma Ejipiti nɛ pu-wiye yɔ, ɛnʋ tacaɣ ɖɩɣa nakɛyɛ taa kaʋ. Se, ɛlɛ, ɛnʋ nɛ wɛ pɔɖɔŋaɣna nɛ ɛnʋ sʋʋ kɩɖanɖʋʋ tɛɛ. Se, ɖɔɖɔ lɛ, alɩwaatʋ ndʋ tɩ-tɩnɛ payɩ ɛnʋ nɛ Izirɛɛlɩ ñɩma tɩnɛ pɔɖɔŋaɣ ḿbʋ yɔ, ɛnʋ ɖʋ pa-ñʋndɩnaa sakɩyɛ se pɔcɔŋnɩ ɛnʋ samaɣ Izirɛɛlɩ ñɩma ḿba pɔ-yɔɔ, ɛlɛ, ɛnʋ takalɩ pa-taa nɔɔyʋ se pɩlabɩ ɛsɩna nɛ ɛtalabɩ-ɩ ɖɩɣa nɛ tɩʋ ŋgʋ payaɣ sɛɛdɩrɩ yɔ, kɩo-ɖasɩ? 8 Se, pʋ-yɔɔ lɛ, ɛtasɩ heyuu ɛnʋ tʋmlaɖʋ Daaviidi nɛ ɛnʋ nɔɔ se, ɛnʋʋ KƖPAƔLƲ ɖoŋ tɩnɛ tʋ ɛkpaɣ-ɩ nancaɣzaɣ taa e-wondu wayɩ se ɛkɛ ɛnʋ samaɣ Izirɛɛlɩ ñɩma wiyaʋ. 9 Se, ɛnʋ nɛ ɩ powobini ɖenɖe ɖenɖe ewoba yɔ. Se, ɛnʋ kʋ e-koyindinaa mba palɩ ɛ-ɛsɩndaa yɔ. Se, ɛnʋ yeki ɖɔɖɔ ɛ-yɩɖɛ sɛɛ ɖɔɖɔ ɛzɩ kedeŋa yɔɔ cɩnɛ awiya taa sɔsɔna ñɩna sɛʋ yɔ. 10 Se, ɛnʋ haɣ ɛnʋ samaɣ Izirɛɛlɩ ñɩma lone naɖɩyɛ nɛ yele powolo nɛ pɛwɛɛ ɖɩ-taa kaalɛyɩtʋ, ajɛɛ azaɣa taa ɛyaa ɛɛtasɩɣ-mɩ nazʋʋ ɛzɩ ɖooo paalakʋʋ 11 alɩwaatʋ ndʋ ɛnʋ kalɩzɩ nɔɔɖɛyaa se pɔcɔnɩ ɛ-samaɣ Izirɛɛlɩ ñɩma yɔɔ yɔ. Se, ɛnʋ yeki nɛ ɛhɛzɩnɩ e-koyindinaa tɩnɛ. Se, ɛnʋ tɔyʋʋnɩ-ɩ heyuu se ɛnʋʋ KƖPAƔLƲ ɛ-maɣmaɣ ɛmaɣnɩ-ɩ ɖɩɣa. 12 Se, pʋkɔŋ ɛsɩ lɛ, ɛnʋ ɛnʋ lizɩ ɛ-maɣmaɣ e-piya taa nakɛyɛ nɛ kɔtɔɔ kewiyaɣ nɛ ɛnʋ yele kakpa ɖoŋc. 13 Se, ɛnʋ kɔŋnɩ maʋ ɛnʋʋ ɖɩɣad nɛ pɩtɩŋnɩ ɛnʋ yɔɔ nɛ e-kewiyaɣ wɛɛ mbʋʋ tam. 14 Se, ɛnʋ kɛɣnɩ ɛ-caa nɛ ɛ́lɛ ñɛkɛ ɛnʋ pɩyalʋ. Se, ye ɛ́lɛ ɛyʋsaa yɔ, ɛnʋ hɔŋ ɛ-nɩŋgbaŋ ɛzɩ ɛyaa lakʋʋ yɔ, pʋwɛ ɛzɩ caca nɔɔyʋ makʋʋ ɛ-pɩɣa yɔ. 15 Se, paa mbʋʋ yɔ, ɛnʋ ɛɛkaɣ-ɩ lɛɣʋ waɖɛ nɖɩ ɛha-ɩ yɔ ɛzɩ ɛɛlabʋ Sawʋlɩ alɩwaatʋ ndʋ ɛnʋ lɔ-ɩ ɛ-ɛsɩndaa yɔ. 16 Se, ɛ-wayɩ lɛ, ɛ-sayɩ nɔɔyʋ kaɣ tɔɔʋ kewiyaɣ tam yɔɔ. Mbʋ pʋyɔɔ yɔ, nabʋyʋ ɛɛkaɣ ciɣduu ɛ-hɔʋ taa kewiyaɣ kaʋ. 17 KƖPAƔLƲ wɩlɩ Naataanɩ mbʋʋ ɖoziye taa lɛ, ɛ́lɛ ñowolo ɛkɛdɩ Daaviidi pɩ-tɩnɛ payɩ.
Daaviidi sɛʋ Ɛsɔ yɔ
(1Awiya 17:16-27)
18 Se, Naataanɩ kɛdɩ Daaviidi mbʋ lɛ, ɛ́lɛ wolo KƖPAƔLƲ cɔlɔ nɛ ɛyaa-ɩ se KƖPAƔLƲ Ɛsɔ nɛ ɛpɔzɩ-ɩ se, ɛnʋʋ anɩ? Ɛnʋ hɔʋ nɖɛ ŋgʋ nɛ ɛtanɩ ɛnʋʋ ɖenɖe ɛnʋ wɛɛ yɔ? v 19 Se, ɛlɛ, ɛnʋʋ Kɩpaɣlʋ Ɛsɔ ɛ-cɔlɔ lɛ, pɩtamaɣda. Se, ɛɖʋ ḿbʋ pʋkɔŋ labʋ ɛ-tʋmlaɖʋ hɔʋ taa yɔ. Mbʋʋ pʋmʋnaa se pala ɛyʋ naa we? 20 Peeye Daaviidi ya-ɩ se, KƖPAƔLƲ Ɛsɔ! Nɛ eheyi-i se ɛsɩm ɛnʋʋ ɛ-tʋmlaɖʋ, nɛ ɛpɔzɩ-ɩ se, se we ɛnʋʋ Daaviidi ɛpɩzɩɣ ɛtasɩ yɔɔdʋʋ yɔ? 21 Se, mbʋ ɛɖʋwa se ɛlakɩ yɔ, nɛ ɛ-camɩyɛ lakasɩ pɔ-yɔɔ ɛlabɩ mbʋ pɩ-tɩnɛ payɩ pɩfɛyɩ ɖaɣʋ yɔ́ɔ ḿbʋ nɛ ɛlɩzɩ-pʋ nɛ ɛwɩlɩ ɛnʋʋ ɛ-tʋmlaɖʋ. 22 Se, ɛnʋʋ KƖPAƔLƲ Ɛsɔ, ɛkɛ sɔsɔ kpem! Ɛfɛyɩ ɖaɣʋ! Ɛsɔ nɔɔyʋ fɛyɩ ɖɔɖɔ nɛ pɩtasɩnɩ-ɩ, ɛzɩɩ ɛyaa yɔɔdʋʋ nɛ ḿba nɩɣ yɔ. 23 Ḿbʋ ɖɔɖɔ, samaɣ nakɛyɛ fɛyɩ tɛtʋ yɔɔ se kanɩɣzɩnɩ Izirɛɛlɩ ñɩma. Se, ɛnʋ wobina nɛ eholi-wɛ nɛ egipiti ñɩma nɛ pa-agɔlɩma pe-nesi taa nɛ ɛpɩsɩ-wɛ ɛ-ñɩma. Ɛlabɩ-wɛ mbʋ pɩfɛyɩ yɔɔdʋʋ kpem yaa pʋwɛ sɔɔndʋ yɔ, ɛ-ɛjaɖɛ taa nɛ piyele pa-hɩɖɛ sɛɛ. 24 KƖPAƔlƲ! Ŋyeba nɛ Izirɛɛlɩ kɛ ña-samaɣ tam yɔɔ nɛ ña ñapɩsɩ kɛ-Ɛsɔ. 25 Se, tɔɔ! lɛɛlɛɛyɔ, ɛnʋʋ ɛnʋ KɩPAƔLƲ ɛ́la ndʋ ɛyɔɔdaa yɔ, se, ɛla mbʋ ɛɖʋwa se ɛlakɩ ɛnʋ yɔ, nɛ mbʋ ɛɖʋwa se ɛlakɩ ɛnʋ sɛyɩnaa yɔ. 26 Se, pʋbʋ, ɛ-yɩɖɛ sɛɣ tam yɔɔ, nɛ ɛyaa tɔŋ se, Izirɛɛlɩ Ɛsɔ lɛ, KƖPAƔLƲ ɖoŋ tɩnɛ tʋ! Se, eyele nɛ ɛnʋ hɔʋ taa kewiyaɣ wɛɛ tam. 27 Se, toovenim lɛ, ɛnʋʋ KƖPAƔLƲ, Izirɛɛlɩ Ɛsɔ ɖɔŋ tɩnɛ tʋ ɛlɩzɩnɩ ɛ-taa tɔm nɛ eheyi ɛnʋʋ ɛ-tʋmlaɖʋ. Se, eheyi ɛnʋ se, ɛkɔŋ ɛnʋʋ maʋ ɖɩɣa nakɛyɛ. Se, pʋ-yɔɔ ɛnʋʋ ɛ-tʋmlaɖʋ pɩha ɛnʋʋ ɖɔŋ se etendi-i se, 28 ɛnʋʋ ɛ-KƖPAƔLƲ Ɛsɔ, ɛnʋʋ lɛ Ɛsɔ. Se, ndʋ ɛyɔɔdʋʋ yɔ, tɩkɛ toovenim, nɛ eheyi ɛnʋʋ lɛɛlɛɛyɔ se ɛnʋ wɛɣ koboyaɣ ŋga ka-taa! 29 Se, ye ḿbʋ, ɛnʋ tendiɣ-i se ɛwazɩ ɛnʋʋ ɛ-tʋmlaɖʋ ɛ-hɔʋ taa ñɩma yɔɔ, nɛ ɛnʋ sɛyɩnaa tɔɔ kewiyaɣ tam ɛ-ɛsɩndaa. Se, mbʋ pʋyɔɔ yɔ, ɛnʋʋ ɛnʋ Kɩpaɣlʋ Ɛsɔ, ɛnʋ ɖʋna se, ɛwazɩɣ ɛnʋ hɔʋ taa ñɩma yɔɔ nɛ ɛ-wazɩtʋ wɛɛ pɔ-yɔɔ tam.