8
Daaviidi wabʋ ajɛɛ wena añɔtɩnɩ Izirɛɛlɩ yɔ a-taa ñɩma yɔ
(Ɩcɔnɩ 1Awiya tɔm kɛdʋʋ cɔlɩɩ 18:1-13)
1 Se, pʋwayɩ lɛ, Daaviidi wa Filisitii ñɩma nɛ eluzi-wɛ ɛ-tɛɛ, nɛ ɛmʋ ɖoŋ weyi paawɛnɩ egeetiye nɖɩ ɖɩ-yɔɔ yɔ. 2 Se, ɛwabɩ ɖɔɖɔ Mowaabɩ ñɩma. Ɛkpa-wɛ nɛ ɖoŋ nɛ pahɩnɩ tɛɛtaa nɛ ɛkʋ pa-taa ɛyaa naalɛ, naadozo yɔɔ (2/3), ɛyʋ kʋɖʋm koŋ ɛkazɩ naadozo yɔɔ nɛ ɛ-ɛsɛ. Pʋbʋ wayɩ lɛ, Mowaabɩ ñɩma pɩsɩ Daaviidi tʋmlaɖaa nɛ pɛhɛyɩɣ-ɩ lambuu. 3 Se, Daaviidi wabɩ ɖɔɖɔ Rehoovi pɩyalʋ Hadaadezɛɛrɩ. Ɛkɛ Covaa egeetiye taa wiyaʋ. Alɩwaatʋ ndʋ ɛ́lɛ caɣaɣ se ɛɖaɣnɩ lɛɣʋ Efiraatɩ pɔɔ egeetiye yɔ́ɔ, ɛkʋyɩ ɛ́lɛ yɔɔ nɛ ɛwabɩ-ɩ. 4 Se, Daaviidi kpa ɛ́lɛ kpaŋnaŋ caɣyaa kutoku nɛ taŋga nɛ nasɩlɛ ( 1.700) nɛ youlaɖaa kutokiŋ nɩɩlɛ (20.000) nɛ ɛpɩsɩ-wɛ yomaa. Piyele ɛsɩɩ ɛ-tɩ, kpaŋnaŋ ɛzɩ mɩnʋʋ ḿbʋ yɔ se ɛhɔm-ɩ lɔɔɖa nɛ eyele pɛsɛtɩ pa-kpaŋnaŋ lɛɛŋ tɩnɛ naŋgbanzɩ wayɩ ñɩnzɩ naatakɩŋ tɛɛ hola . 5 Se, pɩlabɩ ḿbʋ lɛ, Siirii ñɩma mba pɛwɛ Daamaasɩ tɛtʋ taa yɔ, powolo se paɖʋʋ Hadaadɛzɛɛrɩ nesi. Ɛlɛ, Daaviidi kʋyɩ paba yɔɔ ɖɔɖɔ nɛ ɛkʋ pa-taa ɛyaa kʋtokɩŋ naalɛ (2.000). 6 Ɛlɛ ɛsɩɩ ageeta yɔɔ cɔnɩyaa nɛ ɖoŋ pɛ-ɛjaɖɛ taa nɛ papɩsɩ ɛ-tʋmlaɖaa nɛ pɛhɛyɩɣ-ɩ lambuu. Mbʋʋ KƖPAƔLƲ yeba nɛ Daaviidi wa mba pa-tɩnɛ payɩ ɛkʋyɩ pɔ-yɔɔ yɔ. 7 Se, pɩlabɩ ḿbʋ lɛ, Daaviidi kpaɣ Hadaadɛzɛɛrɩ tʋmlaɖaa ñɩɣlɩm kɔɔkasɩ nɛ ewoni-sɩ Yeruusamɛm tɛtʋ taa. 8 Se, ɛmʋ ɖɔɖɔ ñɩɣyʋʋ ŋgʋ payaɣ se bɩrɔɔnzɩ yɔ́ɔ, sakkɩyɛ. Kɩwɛ Hadaadɛzɛɛrɩ tɛtʋ, Bɛɛtaa nɛ Berootayi pa-taa.
9 Se, pʋkɔma lɛ, Hamaatɩ wiyaʋ Toyi nɩɩ se Daaviidi wabɩ Hadaadɛzɛɛrɩ youlaɖaa tɩnɛ. 10 Pʋ-yɔɔ ɛ́lɛ tiyi ɛ-pɩyalʋ Yooram wiyaʋ Daaviidi cɔlɔ se ewolo ɛsɛɛ-ɩ nɛ ɛyɩɣyɩ-ɩ se ɛkʋyɩ Hadaadɛzɛɛrɩ yɔɔ nɛ ɛwabɩ-ɩ. Mbʋ pʋyɔɔ yɔ, Hadaadɛzɛɛrɩ kɛ e-koyindu. Peeye Yooram ñowoni Daaviidi, sika nɛ liidiye nɛ ñɩɣyʋʋ ŋgʋ payaɣ se bɩrɔɔzɩ yɔ, po-wondu. 11 Se, Daaviidi ñakpaɣ-tʋ nɛ ɛha ɖɔɖɔ Ɛsɔ, ɛzɩ ɛɛlabʋ liidiye nɛ sika mba ɛɛkpaɣ ajɛɛ lɛɛna wena ɛwabɩ a-taa ñɩma yɔ, a-taa yɔ. Mba ɛwabɩ-wɛ yɔ, mbaa yɔ: 12 Aram nɛ Mowaabɩ nɛ Amoonii nɛ Filisitii nɛ Amaalɛɛkɩ pa-ñɩma. Pɩkpɛndɩnɩ ɖɔɖɔ ñɩm mbʋ ɛmʋ Covaa tɛtʋ taa wiyaʋ, Rehoovi pɩyalʋ, Hadaadɛzɛɛrɩ cɔlɔ yɔ. 13 Se, Daaviidi tɛm wabʋ Siirii ɛjaɖɛ taa ñɩma lɛ, ekiti nɛ ɛwa ɖɔɖɔ Edom ñɩma ɖɔm kajalɩŋa taa nɛ ɛkʋ pa-taa ɛyaa kutokiŋ hiu nɛ lutozo (18.000). Mbʋʋ pɩlaba nɛ Daaviidi yɩɖɛ sɛɛ.
14 Peeye Daaviidi sɩ ageeta yɔɔ cɔnɩyaa nɛ ɖoŋ Edom ɛjaɖɛ tɩnɛ taa nɛ ɖɩ-taa ñɩma pɩsɩ ɛ-tʋmlaɖaa. Paa le Daaviidi ewoba yɔ, KƖPAƔLƲ yekaɣ nɛ ɛwakɩ.
Daaviidi tʋmlaɖaa
(1Awiya tɔm kɛdʋʋ cɔlɩɩ 18. 14-17)
15 Se, Daaviidi tɔɔ kewiyaɣ Izirɛɛlɩ ɛjaɖɛ tɩnɛ payɩ taa ñɩma yɔɔ. Ɛɖɔŋaɣ paɣtʋ yɔɔ nɛ ɛcɔŋnɩ pɔ-yɔɔ nɛ toovenim. 16 Se, Yowaabɩ weyi payaɣ e-ɖoo se Ceruuyaa yɔ, ɛnʋʋ lɛ youlaɖaa ñʋʋdʋ nɛ piyele Alihuudi pɩyalʋ, Yehoosaafaatɩ , ñɔyɔɔdʋʋnɩ wiyaʋ nɔɔ. 17 Se, Ahituuvi pɩyalʋ, Saadɔɔkɩ nɛ Abiyaataarɩ pɩyalʋ Ahiimelɛɛkɩ paba ñaakɛ cɔjɔnaa nɛ Serayaa ñɛkɛ takayaɣ taa mayʋ. 18 Se, Yehoyadaa pɩyalʋ, Benayahuu ñɔcɔŋaɣnɩ Kɩrɛɛtɩ nɛ Peletii pɛ-tɛtʋ taa ñɩma ḿba pɛkɛ wiyaʋ yɔɔ ɖaŋɩyaa yɔ, pɔ-yɔɔ nɛ piyele Daaviidi pɩyalaa ñɛkɛ cɔjɔnaa.