15
Abisalom caɣʋ se ɛmʋ Daaviidi kewiyaɣ yɔ
1 Se, pʋwayɩ lɛ, Abisalom pɩsɩ ɛwɛna you lɔɔɖɩyɛ nɛ kpaŋnaŋ nɛ ɛyaa nɩɩnʋwa (50) mba peseɣ ɛ-lɔɔɖɩyɛ nɖɩ ɖɩ-ɛsɩndaa yɔ. 2 Se, kifeŋ tanaŋ cu lɛ, Abisalom lɩɩ ɛsɩŋ tɛtʋ nɔnɔɔ taa habɩyɛ nɔɔ nɛ ye nɔɔyʋ ewoki wiyaʋ tɛ se pahʋʋ ɛ-tɔm nɛ peɖesi-i lɛ, ɛnʋ yaa-ɩ nɛ ɛpɔzɩ-ɩ se, ɛlɩnɩ le? Ɛ́lɛ ñocosi-i se, ɛlɩna Izirɛɛlɩ ñɩma cejewiye ɖɩnɛ yaa ndɩ yɔ ɖɩ-taa. 3 Abisalom tɔŋ se, tɔɔ! Pɩtɛ ɛyʋ tɔm wɛ ɖeu nɛ tɩtɛ tiɖe. Ɛlɛ, ɛna se nɔɔyʋ fɛyɩ se ɛpɩzɩɣ ewelesina-ɩ nɛ wiyaʋ nɔɔ. 4 Se, ɛtasɩ yɔɔdʋʋ se, ye ɛnʋ ɛɛkɛ ɛjaɖɛ ndɩ ɖɩ-taa tɔm hʋyʋ! Pʋbʋ, mba poyou yaa pɛwɛnɩ tɔm se pahʋʋ-wɛ yɔ, paawoba nɛ pana ɛnʋ nɛ piyele ɛhʋʋ pɔ-tɔm nɛ eɖezi-wɛ. 5 Se, ye pɩtɛ ɛyʋ ɛñɔtɩnɩ Abisalom nɛ eluŋ tɛɛtaa ɛ-ɛsɩndaa yɔ, Abisalom haɣ-ɩ nesi nɛ ɛɖɔkɩ-ɩ nɛ ekpiikina-ɩ.
6 Se, mbʋʋ Abisalom lakaɣ ɛyaa mba powokaɣ wiyaʋ tɛ se ɛhʋʋ pɔ-tɔm nɛ eɖezi-wɛ yɔ. Mbʋʋ ɛlaba nɛ ɛkɛzɩ Izirɛɛlɩ ñɩma lɩmaɣza nɛ ɛ-yɔɔ nɛ ajiitu.
7 Se, pʋkɔm pɩlakɩ ɛzɩ pɩnzɩ naanza ḿbʋ yɔ lɛ, Abisalom heyi wiyaʋ se, ɛha-ɩ waɖɛ nɛ ewolo Hɛbɩrɔɔnɩ tɛtʋ taa nɛ ɛla mbʋ eeɖuuni Kɩpaɣlʋ se ɛlakɩ yɔ. 8 Se, toovenim lɛ, alɩwaatʋ ndʋ ɛɛwɛ Gesuuri tɛtʋa taa Siirii ɛjaɖɛ taa yɔ, eeɖuuni Kɩpaɣlʋ se, ye ɛpɩsɩnɩ-ɩ Yeruusalɛm tɛtʋ taa yɔ, ewoki Hɛbɩrɔɔnɩ tɛtʋ taa nɛ ɛlaa-ɩ kɩlaŋ. 9 Ɛyɔɔdɩ ḿbʋ lɛ, wiyaʋ heyi-i se, ewobini laŋhɛzɩyɛ. Peeye Abisalom kʋyaa nɛ ewolo Hɛbɩrɔɔnɩ tɛtʋ taa. 10 Se ɛwɛ peeye ḿbʋ lɛ, ɛkʋsɩ ɛyaa nɛ etiyi-wɛ Izirɛɛlɩ ñɩma cejewe tɩnɛ taa mɛsaɣ tɛɛ se powolo peheyi a-taa ñɩma se, ye pɔkɔm panɩɩ pahhʋlʋʋ ɛgandɩyɛ lɛ, pɔtɔ se, Abisalom tɔɔ kewiyaɣ Hɛbɩrɔɔnɩ tɛtʋ taa. 11 Abisalom kaya abalaa nabɛyɛ, pɛwɛ nasɩlɛ (200). Se, paba sɩɩ-ɩ nɛ Yeruusalɛm pa nɛ ɩ powolo peeye nɛ laŋɩyɛ kɩbanɖɛ, patana tɔm ndʋ tʋ-yɔɔ.
12 Se, Abisalom kɔma nɛ ɛlaɣ kɩlaŋ lɛ, etiyi se powolo Giiloo tɛtʋb taa nɛ payaa-ɩ Daaviidi tɔm tasɩyʋ, Ahitoofɛɛlɩ. Ɛkɛ tɩ-taa tʋ. Se, mbʋʋ pɩlaba nɛ ɛyaa mba pɛwɛ Abisalom yɔɔ yɔ, pɛtɛsɩɣ ɖɔʋ nɛ
Daaviidi seu Yeruusalɛm tɛtʋ taa yɔ
13 Se, pɩkɛdaa lɛ, nɔɔyʋ wolo nɛ eheyi Daaviidi se, Izirɛɛlɩ ñɩma kɛzɩ pa-tɩ nɛ Abisalom yɔɔ. 14 Kpaagbaa ḿbʋ lɛ, Daaviidi heyi ɛ-tʋmlaɖaa ḿba paawɛ ɛ-cɔlɔ Yeruusalɛm yɔ se, pése, pɩtɛkɛ mbʋ, Abisalom eeyeki-wɛ. Se, ḿba ɛla lɛɛlɛɛ! pɩtɛkɛ mbʋ, ewoki nɛ ɛkʋyɩ ḿba yɔɔ nɛ ɛkʋ samaɣ tɩnɛ nɛ asayʋʋ sʋʋ tɛtʋ taa. 15 Se, Daaviidi tʋmlaɖaa ḿba peheyi-i se, ɛnʋʋ lɛ ḿba wiyaʋ, paa ɛyɔɔda se we yɔ, ḿba tɩŋɩɣ-ɩ. 16 Peeye wiyaʋ nɛ ɛ-hɔʋ taa ñɩma tɩnɛ palɩwa nɛ pakpaɣ nʋmɔʋ nɩŋgbanzɩ. Ɛ-halaa lɛlaa ɖeke eyeba se pɔcɔŋnɩ kewiyaɣ ɖɩɣa yɔɔ. Paawɛ hiu (10).
17 Se, wiyaʋ nɛ mba patɩŋaɣ-ɩ yɔ pa-tɩnɛ pakpaɣ nʋmɔʋ nɩŋgbanzɩ nɛ palɩɣ Yeruusalɛm tɛtʋ taa lɛ, patalɩ pasɩŋ ɖɩɣa ŋga pʋtɔyɩnɩ-kɛ yɔ kɔ-cɔlɔ. 18 Se pasɩŋa ḿbʋ lɛ, wiyaʋ tʋmlaɖaa pazɩ ɖɔm afaya ɖɔnɖɛ, Kɩrɛɛtɩ ñɩma nɛ Palɛsɩtiini ñɩma mba pɛkɛ ɛ-yɔɔ ɖaŋɩyaa yɔ, njɛ Gaatɩ tɛtʋc taa sɔɔjanaa taŋga nɛ mɩnʋʋ (600) mba patɩŋ Daaviidi yɔ. Pa-tɩnɛ pɔɖɔŋ afaya ɖɔnɖɛ wiyaʋ ɛsɩndaa. 19 Peeye wiyaʋ pɔza Gaatɩ sɔɔjanaa ñʋʋdʋ Itayi se, pɩlaba ɛsɩna nɛ ɛcaɣ se ɛtɩŋ-wɛ? Se, ɛ́pɩsɩ́ tɛtʋ taa nɛ ɛ nɛ wiyaʋ kɩfalʋ pɛwɛɛ. Se, ɛkɛ ɛgɔm, halɩ pɔɖɔɔnɩ-ɩ ɛ-ɛjaɖɛ taa. 20 Se, ɛtalʋʋ ɛnʋ cɔlɔ yɔ, piteleɖida, nɛ kɩyakʋ ŋgʋ, ɛnʋ kpɛndɩɣnɩ-ɩ kpaagbaa mbʋ, ŋgʋ, ɛnʋ tatɩɩsɩm ɖenɖe ɛnʋ woki yɔ, yaa we? Se, ɛkpɛndɩnɩ ɛ-ñɩma nɛ ɛ́pɩsɩ tɛtʋ taa. Se, Kɩpaɣlʋ ɛlabɩ-ɩ ɖeu nɛ ɛtɛ ɛlabɩ-ɩ mbʋ ɛɖʋwa yɔ! 21 Ɛlɛ, Itayi heyi-i se, ɛnʋ ɖuuni Kɩpaɣlʋ nɛ wiyaʋ se, ɖenɖe wiyaʋ wɛɣ yɔ, peeye ɛnʋ wɛɣ, nɛ ɛ nɛ ɩ pɛwɛɛ yaa ɛ nɛ ɩ pasɩ. 22 Peeye Daaviidi tɔm se, tɔɔ! Ye ḿbʋ, ɛɖɛɛ nɔɔ.
Ḿbʋ labɩna nɛ Itayi nɛ ɛ-sɔɔjanaa nɛ pɔ-hɔŋ taa ñɩma pɛɖɛɛ nɔɔ. 23 Se, Sɔɔjanaa ɖɔŋaɣ afaya ɖɔnɖɛ ḿbʋ lɛ, ɛyaa tɩnɛ ñewiliɣ nɛ pamakɩ kubusi. Se, halɩ wiyaʋ maɣmaɣ nɛ ɛ-wayɩ ñɩma pɔɖɔma nɛ pɛtɛzɩ Cedirooni pɔɔd nɛ pakpaɣ lakʋ taa nʋmɔʋ. 24 Se, Cɔjɔ weyi payaɣ se Saadɔɔkɩ yɔ, nɛ Leevii liɖe taa ñɩma mba pasɩɣlɩɣ Ɛsɔ Nɔɔ Haʋ Aɖakaɣ yɔ, paawɛ peeye ɖɔɖɔ. Se, paba kowona Nɔɔ Haʋ Aɖakaɣ ŋga, pasɩɩ nɛ cɔjɔ weyi payaɣ se Abiyaataarɩ yɔ, ɛlaa kɩlaŋ nɛ puwolo pɩsɩna alɩwaatʋ ndʋ mba palɩɣaɣna tɛtʋ taa yɔ, pɔɖɔma pa-tɩnɛ payɩ nɛ pɛɖɛɛ yɔ. 25 Se, peeye wiyaʋ heyi Saadɔɔkɩ se ɛpɩsɩna Nɔɔ Haʋ aɖakaɣ tɛtʋ taa. Se, ye Kɩpaɣlʋ ɛlaba ɛnʋʋ ɖeu yɔ, ɛpɩsɩɣna-ɩ nɛ ɛha-ɩ waɖɛ nɛ ɛna aɖakaɣ ŋga nɛ ɛ-kɩɖanɖʋʋ. 26 Se, ɛlɛ, ye ɛtɔma se ɛmʋʋ ɖeu mbʋ ɛlaba ɛnʋ yɔ́ɔ ɛnʋ cɔlɔ yɔ, tɔɔ! Ɛ́la ɛnʋ ɛzɩ pɩkɛdɩnaʋ-ɩ yɔ! 27 Pʋwayɩ lɛ, wiyaʋ tasɩ heyuu Saadɔɔkɩ se, ɛna wɛtʋ ndʋ tɩ-taa pɛwɛɛ yɔ, se, ɛ nɛ ɛ-pɩyalʋ Ahimaacɩ nɛ Abiyaataarɩ ñɩnʋ Yonaataanɩ papɩsɩ tɛtʋ taa hɛɛɛ. 28 Se, piyele ɛnʋ lɛ, ɛnʋ ñacakɩ kataŋa taa, lakʋ taa ɖenɖe patɩŋɩɣna nɛ pɛtɛzɩɣ Yɔɔrɩdaŋ pɔɔ yɔ nɛ puwolo pɩsɩna alɩwaatʋ ndʋ ɛnʋ nɩ pɔ-nɔsɩ taa natʋyʋ yɔ. 29 Ḿbʋ labina nɛ Sadɔɔkɩ nɛ Abiyaataarɩ papɩsɩna Nɔɔ Haʋ Aɖakaɣ Yeruusalɛm nɛ pacaɣ peeye.
Daaviidi tiyuu Husayi se ewolo efeŋ Abisalom yɔ
30 Se, Daaviidi woba se ɛkpaɣ Somiŋ pʋʋe, ɛkpaɣaɣna wiluu. Eehuuza ɛ-ɛsɩndaa kɛdɛɛka nɛ ɛɖɔŋ nɩŋgbaŋzɩ kpɛɖɛ. Mba pa nɛ pakpaɣaɣ yɔ, paahuuza dɔɖɔ pɛ-ɛsɛ yɔɔ nɛ pewiliɣ. 31 Se, pɩkɛdaa lɛ, nɔɔyʋ wolo ehey Daaviidi se, Ahitoofɛɛlɩ wɛ mba pa nɛ Abisalom palɩɣ ɛ-wayɩ yɔ pa-taa. Peeye Daaviidi tɔm se, KƖPAƔLƲ éyele nɛ tɔm ndʋ Ahitoofɛɛlɩ tasɩ-ɩ yɔ, tɩ́pɩzɩ kɩmɛlɛndʋ! 32 Daaviidi kɔm ɛtala Somiŋ pʋʋ yɔɔ ɖenɖe poluŋuu Ɛsɔ tɛɛ yɔ lɛ, ɛ-tɔm tasɩyʋ, Arikii tʋ, Husayi katɩ-ɩ peeye, e-toko cɩyaa nɛ mʋzʋʋ wɛɛ ɛ-ñʋʋ taa. 33 Daaviidi heyi-i se, ɛtaatɩŋ ɛnʋ wayɩ, pɩtɛkɛ mbʋ, ɛkɛɣna ɛnʋʋ sʋʋtʋ. 34 Se, ɛtɛzɩ pɩsʋʋ tɛtʋ taa nɛ ewolo eheyi Abisalom se, ɛnʋ kɛɣ ɛnʋʋ Dajaa wiyaʋ ɛ-tʋmlaɖʋ. Se, ɖooo lɛ, ɛnʋ kɛkɛ ɛ-caa tʋmlaɖʋ. Lɛɛlɛɛyɔ lɛ, ɛ-maɣmaɣ, ɛnʋ lakɩ tʋmɩyɛ. Se, pʋ-yɔɔ lɛ, ɛpɩzɩɣ ekizi tɔm ndʋ Ahitoofɛɛlɩ tasɩ-ɩ yɔ nɛ piyele ɛsɩna ɛnʋ. 35 Ɖɔɖɔ lɛ, cɔjɔnaa Saadɔɔkɩ nɛ Abiyaataarɩ patɩnɩɣ ɛ-yɔɔ. Éheyiɣ-wɛ ndʋ tɩ-tɩnɛ payɩ ɛnɩɣ wiyaʋ ɖɩɣa taa yɔ. 36 Saadɔɔkɩ pɩyalʋ Ahiimaasɩ nɛ Abiyaataarɩ pɩyalʋ Yonaataanɩ, pa-naalɛ pɛwɛ pɔ-cɔlɔ. Se, pétiyiɣ-wɛ nɛ powoki peheyiɣ ɛnʋʋ tɔm ndʋ panɩɣ yɔ, tɩ-tɩnɛ payɩ. 37 Mbʋʋ pɩlaba nɛ Daaviidi tɔm tasɩyʋ Husayɩ wolo Yeruusalɛm, alɩwaatʋ ndʋ Abisalom ñowokaɣ yɔ.