14
Abisolom pɩsʋʋ Yeruusalɛm yɔ, pʋ-tɔm
1 Se, Ceruuyaa pɩyalʋ Yowaabɩ nawa se wiyaʋ Daaviidi teyele Abisalom yɔɔ maɣzʋʋ. 2 Peeye halʋ lɔŋsɩnɖʋ nɔɔyʋ, payaɣ-ɩ se Tekowaa nɛ eheyi-i se ɛ́cɛtɩ se ɛ-ñɩnʋ nɔɔyʋ fɛyɩ nɛ ɛcaɣ pʋdʋ leɣa. Se, ésuu kʋñɔŋ wondu, se, ɛtaaɖʋ tɩlaaɖɩ, se, ɛla ɛzɩ ɛwɛɛ ewiɣ sɩɖʋ ɛnʋʋ ɖooo lɔŋ yɔ. 3 Se, ewolo mbʋʋ wiyaʋ cɔlɔ nɛ eheyi-i ndʋ ɛnʋ heyiɣ-i yɔ. Ɖɩnɛɛ Yowaabɩ heyi-i ndʋ eewolo nɛ eheyi wiyaʋ yɔ. 4 Se, halʋ ɛnʋ ewobi wiyaʋ cɔlɔ lɛ, ɛtɔlɩ ɛ-tɛɛ nɛ ɛpa ɛ-ɛza nɛ tɛtʋ nɛ ɛyaa-ɩ se wiyaʋ nɛ eheyi-i se ɛya ɛnʋ ñʋʋ! 5 Wiyaʋ pɔzɩ-ɩ se, ɛbɛ cɛyɩɣ-ɩ? Ecosi-i se, tɔɔ! Ɛnʋ kɛ lelu, se, ɛnʋ walʋ sɩba. 6 Se, ɛnʋ kɛwɛnɩ abalɩbiya naalɛ nɛ nakʋyʋ wiye powolo tɛyɛ yɔɔ nɛ poyoo, nɛ pama ɖama nɛ pa-taa lɛlʋ kʋ lɛlʋ. Mbʋ pʋyɔɔ yɔ, nɔɔyʋ taawɛɛ se ɛyasɩ-wɛ. 7 Se, pɩlabɩ ḿbʋ lɛ, ɛnʋ cejewiye taa ñɔma tɩnɛ payɩ kʋyɩ ɛnʋ yɔɔ se, ɛ́cɛlɩ-wɛ, weyi ɛkʋ pɛ-ɛyʋ yɔ, nɛ ḿba kʋ-ɩ nɛ pakpana kɩmɩyɛ. Se mbʋʋ ḿba kʋʋ ɖɔɖɔ weyi ɛkaɣ kpaɣʋ ɛ-caa ñɩm yɔ. Se, mbʋʋ pacaɣ se peɖisi tamaɣ pazɩ ŋga pɩkaza ɛnʋ yɔ, nɛ pɩtaakazɩ nɔɔyʋ ɛnʋ walʋ liɖe taa nɛ paayana yɩɖɛ tɛtʋ yɔɔ.
8 Se, ɛyɔɔdɩ ḿbʋ lɛ, wiyaʋ heyi-i se, ɛ́pɩsɩ ɛkpe ɛ-tɛ se, ɛnʋ maɣmaɣ ɛhaɣ nɔɔ nɛ pɔcɔŋna ɛ-tɔm ndʋ ti-ɖeɖe. 9 Se, ɛyɔɔdɩ ḿbʋ lɛ, halʋ ɛnʋ ɛyaa-ɩ se Ɖajaa, nɛ eheyi-i se, paa pɩtɩɩlakɩ ɛsɩna yaa ɛsna yɔ, ɛ-maɣmaɣ nɛ ɛ-hɔʋ taa ñɩma petisaa se pasɩɣlɩɣ tɔm ndʋ tɩ-sʋʋtʋ. Se tɩtaacaɣ ɛnʋʋ wiyaʋ yaa e-kewiyaɣ pa-taa nɔɔyʋ ñʋʋ taa. 10 Se wiyaʋ tasɩ-ɩ heyuu se, ye nɔɔyʋ ɛyɔɔdɩ-ɩ tɔm natʋyʋ lɛ, éwoni-ɩ ɛnʋ cɔlɔ. Pʋbʋ, pɩtɛ ɛyʋ ɛtasɩɣ-ɩ labʋʋ mbʋ pɩfɛyɩ ɖeu yɔ.
11 Se, halʋ ɛnʋ ɛtasɩ wiyaʋ heyuu se, Ɛnʋʋ wiyaʋ ɛtɔzɩ weyi ɛ-Kɩpaɣlʋ Ɛsɔ kɛnaa yɔ, ɛ-yɔɔ! Se, pɩtɛkɛ ḿbʋ, abalʋ weyi pʋwɛɛ se ɛkpa ɛnʋ pɩyalʋ sɔsɔ sɩm kɩmɩyɛ yɔa, ɛtasɩɣ kʋʋ weyi pɩkazɩ ɛnʋ yɔ, nɛ ɛnʋ tɛzɩ sʋʋ kʋñɔŋ taa kpem. Peeye wiyaʋ heyi-i se, ɛnʋ ɖʋʋna Kɩaɣlʋ weyi ɛwɛ wezuu yɔ se, ɛ-pɩyalʋ ñʋʋ taa ñɔyaɣ nakɛyɛ ɛɛkaɣ tɔlʋʋ tɛɛtaa kaʋ.
12 Ɖɩnɛɛ halʋ ɛnʋ ɛtasɩ yɔɔdʋʋ se, ɛnʋʋ Ɖajaa wiyaʋ, ɛha ɛnʋʋ waɖɛ nɛ ɛnʋ tasɩ-ɩ heyʋʋ natʋyʋ . Ɛ́lɛ heyi-i se, ɛ́yɔɔdɩ! 13 Wiyaʋ heyi halʋ ɛnʋʋ ḿbʋ lɛ, halʋ ɛnʋ ɛpɔzɩ-ɩ se, pɩlaba ɛsɩna nɛ ɛkʋyɩ Ɛsɔ samaɣ yɔɔ ḿbʋ? Se, tɔm ndʋ ɛyɔɔdɩ lɛɛlɛɛyɔ yɔ, pʋwɛ ɛzɩ ɛkaɖaa kpayɩ se, ɛ-tɔm sɩba yɔ. Mbʋ pʋyɔɔyɔ, ɛɛhaɣ Abisalom waɖɛ se ɛlɩna ɛjaɖɛ ndɩ ɖɩ-taa ɛɖɔɔnɩ-ɩ nɛ ewolo ɛmɛlɩ yɔ, ɖɩ-taa nɛ ɛpɩsɩ. 14 Se, pʋwɛɛ se ḿba ɛsɩ pa-tɩnɛ kɩyakʋ nakʋyʋ. Se, pʋyɔɔ lɛ, ḿba wɛ ɛzɩ lɩm mbʋ pɛkpɛdɩ tɛɛtaa nɛ paapɩzɩɣ pokuu-pʋ kaʋ yɔ. Se, ɛlɛ, pɩtɛkɛ mbʋʋ Ɛsɔ ɖʋwa se pɩtɛmna Abisalom lɛɛlɛɛyɔ. Ɛɖʋwa se, weyi pɔɖɔɔnɩ-ɩ nɛ ɛɖɛɛ poliŋ yɔ, ɛtaasayɩ peeye nɛ eposini-ib. 15 Se, ɛyaa labina nɛ sɔɔndʋ kpa ɛnʋ, pʋ-yɔɔ ɛnʋ wobi lɛɛlɛɛyɔ se eheyi ɛnʋʋ wiyaʋ mbʋ. Se, ɛnʋ ɖʋ ɛ-taa se, ɛnʋ heyiɣ-tʋ wiyaʋ nɛ pɩtatɩlɩ yɔ, ɛɛla ndʋ ɛnʋ heyi-i yɔ. 16 Se, etisiɣ nɛ ɛlɩzɩ ɛnʋʋ, weyɩ ɛcaɣ se ɛlɩzɩ ɛnʋ nɛ ɛnʋ pɩyalʋ, Ɛsɔ samaɣc taa yɔ, e-nesi taa. 17 Se, toovenim lɛ, ɛnʋ kaɖʋ ɛ-taa se, paa pɩɩla ɛsɩna ndʋ wiyaʋ yɔɔdʋʋ yɔ, tiyeki nɛ laŋhɛzɩyɛ kɔɔ. Mbʋ pʋyɔɔ yɔ, wiyaʋ wɛ ɛzɩ Ɛsɔ tiyiyu nɔɔyʋ yɔ. Ɛsɩma mbʋ pʋwɛ ɖeu yɔ, nɛ mbʋ pɩfɛyɩ ɖu yɔ.Se ye ḿbʋ, ɛKɩpaɣlʋ Ɛsɔ ɛwɛɛ ɛ-cɔlɔ!
18 Peeye wiyaʋ heyi halʋ ɛnʋ se, ɛnʋ tɔm natʋyʋ se ɛpɔzʋʋ-ɩ. Se, ye ɛnʋ ɛpɔzɩ-ɩ lɛ, éheyi ɛnʋʋ toovenim , ɛ́taamɛsɩ ɛnʋʋ natʋyʋ. Halʋ ɛnʋ, eheyi-i se ɛnʋʋ wiyaʋ ɛyɔɔdɩ se ɛnʋ welesiɣna-ɩ. 19 Ɖɩnɛɛ wiyaʋ pɔzɩ-ɩ se Pɩtɛkɛ Yowaabɩ wɩlɩna-ɩ nʋmɔʋ tɔm tʋnɛ tɩ-taa yaa we? Halʋ ɛnʋ, ecosi se, ɛnʋ ɖuuna ɛnʋʋ wiyaʋ se toovenim lɛ, ɛnʋ! Se ɛ-tʋmlaɖʋ Yowaabɩ ɖʋna-ɩ mbʋ. Se, enʋ heyina-ɩ ndʋ ɛɛyɔɔdɩ yɔ. 20 Se ɛ́lɛ laba mbʋ se, tɔm ndʋ, tɩlɛɣzɩ wɛtʋ. Ɛlɛ, ɛnʋu wiyaʋ ɛwɛnɩ lɔŋsɩnɖɛ ɛzɩ Ɛsɔ tiyiyu nɔɔyʋ yɔ, nɛ ɛnɩɣ ndʋ tɩ-tɩnɛ tɩlakɩ tɛtʋ yɔɔ yɔ, tɩ-taa.
21 Se, pʋwayɩ lɛ, wiyaʋ wolo Yowaabɩ cɔlɔ nɛ eheyi-i se, ɛnʋ tisaa se ɛlakɩ ndʋ etiyaa se peheyi ɛnʋ yɔ. Se, ewolo ɛñɩnɩ Abisalom nɛ ɛpɩsɩna-ɩ peeye. 22 Se, eheyi Yowaabɩ ḿbʋ lɛ, ɛ́lɛ luŋ tɛɛtaa ɛ-tɛɛ nɛ ɛsɛɛ-ɩ se, ɛnʋ na lɛɛlɛɛyɔ se wiyaʋ wɛɛ nɛ ɛwɩlɩɣ-ɩ ɛ-camɩyɛ lakasɩ. Mbʋ pʋyɔɔ yɔ, etisaa se ɛlakɩ ndʋ enʋ tiyaa se peheyi-i yɔ.
23 Yowaabɩ yɔɔdɩ ḿbʋ lɛ, ɛkpaɣ nʋmɔʋ nɛ ewolo Gesuurid tɛtʋ taa nɛ ɛkpaɣ Abisalom nɛ ɛpɩsɩnɩ-ɩ Yeruusalɛm ñɩndʋ taa. 24 Ɛlɛ, wiyaʋ tɔ se, pʋwɛɛ Abisalom ewolo ɛ-maɣmaɣ ɛ-tɛ! Se, ɛtaawolo ɛnʋ ɛsɩndaa nɛ ɛnʋ na-ɩ. Pʋ-yɔɔ Abisalom woba ɛ-tɛ nɛ ɛtana wiyaʋ.
Daaviidi nɛ Abisalom peceɣʋ yɔ
25 Se, ɛnʋ heyiɣ-wɛ se, Izirɛɛlɩ ɛjaɖɛ tɩnɛ payɩ taa lɛ, nɔɔyʋ taawɛɛ se ɛwɛ ɖeu nɛ ɛtɛ ɛwɛɛ cɔnaʋ nɛ pɩtala Abisalom. Kpaɣ ɛ-naataŋ nɛ puwolo pɩsɩna ɛ-ñɔsɩ, e-ɖoli nɔɔyʋ tɛwɛɛkɩ. 26 Se, paa pɩnaɣ ŋga, kɔkɔŋ se kɛtɛŋ lɛ, ɛhʋŋ ɛ-ñɔsɩ. Mbʋ pʋyɔɔ yɔ, sɩkɩlaɣ yuŋ. Si-yuŋ kɛɖɛ ɛzɩ kiiloonaa naalɛ yɔ. 27 Se, Abisalom kalʋlɩ abalɩbiya naadozo(3) nɛ halɩbɩɣa kʋɖʋmaɣ. Payaɣ-kɛ se Taamaarɩ, kaaɖewa kamaɣ fɛyɩ.
28 Se, Abisalom labɩ pɩnzɩ naalɛ Yeruusalɛm, wiyaʋ tayaa-ɩ se ewolo ɛ-tɛ. 29 Nakʋyʋ wiye lɛ, etiyi se payaa Yowaabɩ nɛ ewolo nɛ ɛnʋ tiyi-i wiyaʋ cɔlɔ. Ɛlɛ, Yowaabɩ kizi se eewoki ɛ-tɛ. Pʋwayɩ lɛ, Abisalom tasɩ nɔɔyʋ tiyuu, nɛ Yawaabɩ tasɩ kizuu. 30 Peeye Abisalom heyi ɛ-tʋmlaɖaa se pana tɔɔnaɣ ŋga payaɣ se Ɔɔrɩjɩ yɔ, ka-hayɩm mbʋ pʋwɛ ɛnʋ ɩ̃mbʋ cɔlɔ yɔ, Yowaabɩ tɩna-pʋ. Se, powolo posobɩ-bʋ miŋ! Ɛ-tʋmlaɖaa la mbʋ ɖɔɖɔ. 31 Se kpaagbaa ḿbʋ lɛ, Yowaabɩ kʋyɩ nɛ ewolo Abisalom tɛ nɛ ɛpɔzɩ-ɩ se, pɩlaba ɛsɩna nɛ ɛ́lɛ tʋmlaɖaa sɔ ɛnʋ hayɩm miŋ? 32 Abisalom cosi-i se, ɛnʋ ya-ɩ se ewolo nɛ ɛna ɛnʋ nɛ ekizi. Se, ɛnʋ caɣaɣ se ɛnʋ tiyi-i wiyaʋ cɔlɔ nɛ ewolo ɛpɔzɩ-ɩ se, ɛbɛ yɔɔ ɛnʋ lɩna Gesuuri nɛ ɛpɩsɩ? Se, pɩkɩla weewee se ɛnʋ ɛ́pɩsɩ nɛ ɛwɛɛ peeye! Se, lɛɛlɛɛyɔ, ɛnʋ caɣ se wiyaʋ ɛmʋ ɛnʋ, nɛ ye ɛnʋ tɔm ɛsɩba lɛ, pakʋ ɛnʋ! 33 Se, Yowaabɩ woba eheyi wiyaʋ Abɩsalɔm tɔm lɛ, ,ɛ́lɛ tyi se payaa Abisalom. Se Abislom woba wiyaʋ cɔlɔ lɛ, eluŋ tɛɛtaa ɛ́lɛ tɛɛ nɛ wiyaʋ kpibi-i nɛ ekpiikini-i.