16
1 Daaviidi tɩkɔma nɛ ɛɖɛɛ piyaɣ ñʋʋ taa pazɩ lɛ, Mefiibosɛɛtɩ tʋmlaɖʋ Civa katɩ-ɩ. Ɛɖɔkɩ kpaŋasɩ naalɛ, sɩsɩɣla kɔnɔnaa nasɩlɛ (200) nɛ tɩŋ weyi popuu e-pe sʋlʋm yɔ, e-pe tikiŋ weyi ɛwɩlaa yɔ́ɔ mɩnʋʋ (100), nɛ hiiwe mɩnʋʋ (100) nɛ sʋlʋm pɛʋ . 2 Se, wiyaʋ Daaviidi pɔzɩ-ɩ se, ɛbɛ ɛlakɩna-wɛ? - Civa cosi-i se, ɛnʋʋ Ɖajaa, ɛ-hɔʋ taa ñɩma cakɩ kpaŋasɩ nzɩ sɩ-yɔɔ nɛ ɛ-sɔɔjanaa tɔɔ kɔnɔnaa nɛ tɩŋ pe, nɛ piyele mba pɩnɩɣ-wɛ lakʋ taa yɔ, paba ñɔñɔɔ sʋlʋm. 3 Ɛyɔɔdɩ ḿbʋ lɛ, wiyaʋ tasɩ-ɩ pɔzʋʋ se, nɛ lee ɛnʋ caa Sawʋlɩ sayɩ, Mefiibosɛɛtɩ wɛɛ yɔ? Civa cosi-i se, ɛcaɣ Yetruusalɛm, Mbʋ pʋyɔɔ yɔ, ɛmaɣzaa se alɩwaatʋ ndʋ tɩ-taa Izirɛɛlɩ ñɩma cɛlɩɣ-ɩ ɛ-caa kewiyaɣ. 4 Peeye Daaviidi heyi Ciiva se, tɔɔ! Ɛnʋ cɛlɩɣ-ɩ mbʋ pɩ-tɩnɛ payɩ pɩɩkɛ Mefiibosɛɛtɩ ñɩm yɔ, nɛ pɩkɛ ɛ-ñɩm. Ɖɩnɛɛ Ciiva luŋa tɛɛtaa nɛ ɛsɛɛ-ɩ ɖeu mbʋ ɛlabɩ-ɩ yɔ, pʋ-yɔɔ se ɛnʋʋ Ɖajaa ɛlabaɣ lɛ.
Simeyi wɩlʋʋ Daaviidi kpalʋʋ yɔ
5 Daaviidi kɔma ɛtala Bahuurim tɛtʋ taa lɛ, abalʋ nɔɔyʋ lɩɩ peeye nɛ ɛpazɩ Daaviidi wɩlʋʋ kpalʋʋ. Ɛkɛ Sawʋlɩ cejewiye taa tʋ, payaɣ-ɩ se, Simeyi, ɛ-caa se Geraarɩ. 6 Ɛlɔwaɣ Daaviidi nɛ ɛ-tʋmlaɖaa pɛ, ŋgʋ, samaɣ nɛ sɔɔjanaa pɔɖɔŋaɣ ɛnʋʋ wiyaʋ ɛ-nɩwaŋ nɛ ɛ-nɩmɩyɛ pɔ-yɔɔ. 7 Ɛwɩlaɣ-ɩ kpalʋʋ nɛ ɛmakɩ kubusi se, kaawazaɣ! Ɛyaa kʋyʋ! 8 Kɩpaɣlʋ kpaɣ-ɩ mba ɛkʋ Sawʋlɩ hɔʋ taa yɔ, pa-kɩmɩyɛ. Se, ɛmɩlɩ Sawʋlɩ kewiyaɣ, pʋ-yɔɔ Kɩpaɣlʋ mʋ-kɛ nɛ ɛcɛlɛ ɛ-pɩyalʋ Abisalom. Se, piyele ɛnʋ lɛ, ɛwɛ kʋñɔŋ taa lɛɛlɛɛyɔ, mbʋ pʋyɔɔ yɔ, ɛkɛ ɛyaa kʋyʋ! 9 Peeye, Ceruuyaa pɩyalʋ Aviisayɩ pɔzɩ wiyaʋ se, pɩlaba ɛsɩna nɛ haɣ macaaci ɛnɛ ɛwɩlɩɣ wiyaʋ kpalʋʋ mbʋ? Se eyele ɛnʋ nɛ ɛnʋ wolo ɛsɛtɩ ɛ-ñʋʋ. 10 Ɛlɛ, wiyaʋ pɔzɩ Aviisayɩ se, ɛ nɛ e-neu Yowaabɩ pa-ñɩndʋ se we? Se, ye Kɩpaɣlʋ eheyina abalʋ ɛnʋ se ɛwɩlɩ ɛnʋʋ kpalʋʋ ḿbʋʋ lɛ, apɩzɩɣ ɛkalɩ-ɩ? 11 Daaviidi tasɩ yɔɔdɩnaʋ Aviisayɩ nɛ ɛ-tʋmlaɖaa tɩnɛ se, Ye ɛnʋ pɩyalʋ maɣmaɣ ɛñɩnɩɣ se ɛkʋ ɛnʋ lɛ, ɛsɩna Bineyaamiini liɖe taa tʋ ɛnʋ ñaalakɩ ḿbʋ yɔa? Se, ye Kɩpaɣlʋ eheyina-ɩ se ɛwɩlɩ ɛnʋʋ kpalʋʋ yɔ, pʋbʋ péyebi-i ɖiɣdiɣ! 12 Se pɩtatɩlɩ, Kɩpaɣlʋ naɣ ɛnʋ kʋñɔŋ nɛ sɔnɔ ɛlɛɣzɩ ɛ-kpalʋʋ wɩlʋʋ mbʋ nɛ laŋhɛzɩyɛ.
13 Daaviidi nɛ ɛ-sɔɔjanaa pɛwɛ pa-nʋmɔʋ taa lɛ, Simeyi ñaaɖɔŋaɣ pʋʋ yɔɔ, etoposina Daaviidi. Ɛɛwɛɛ nɛ ɛwɩlɩɣ-wɛ kpalʋʋ nɛ ɛyakɩ-wɛ pɛ nɛ tɛtʋ. 14 Se, Daaviidi nɛ ɛ-sɔɔjanaa pɔkɔm patala Yɔɔrɩdaŋ pɔɔ nɔɔ lɛ, pɩnɩ-wɛ, nɛ pacaɣ peeye nɛ pɛhɛzɩɣ.
Husayi wobu nɛ ɛsɔzɩ Abisalom yɔɔ yɔ
15 Se, Abisalom nɛ Izirɛɛlɩ samaɣ powobina Yeruusalɛm. Ahitoofɛɛlɩ kɛwɛ ɖɔɖɔ ɛ-cɔlɔ. 16 Se, Daaviidi taabalʋ, Arikii cejewiyen taa tʋ Husayɩ kɔm ɛtala Abisalom cɔlɔ lɛ, eholi ɖoŋ se, wiyaʋ ɛwɛɛ wezuu! Wiyaʋ ɛwɛɛ wezuu! 17 Peeye Abisalom pɔzɩ-ɩ se, mbʋʋ ɛlakɩ mbʋ ɛ-taabalʋ Daaviidi ɖʋwa yɔ yaa we? Se, pɩlaba ɛsɩna ɛ́lɛ ɖɛɣaɣ lɛ, ɛtatɩŋ ɛ́lɛ wayɩ? 18 Husayɩ cosi-i se, pɩlɩ, pɩɩlakɩ ḿbʋ! Se, Kɩpaɣlʋ nɛ Izirɛɛlɩ samaɣ tɩnɛ palɩzɩ nɔɔyʋ se ɛkɛ wiyaʋ. Se, wiyaʋ ɛnʋ ɛ-ñɩnʋ ɛkɛnaa, se, ye ḿbʋ, cakɩ ɛ-cɔlɔ. 19 Se, ɖɔɖɔ lɛ, pɩtɛkɛ paa anɩ ɛ- ɛnʋ lakɩ tʋmɩyɛ. Se, ɛnʋ laba ɛ́lɛ caa tʋmɩyɛ nɛ pɩsɩna puwiye nɖɩ, se, kpaɣ kɩyakʋ ŋgʋ lɛ, ɛnʋʋ ɛlakɩ tʋmɩyɛ.
20 Peeye Abisalom heya Ahitoofɛɛlɩ se, pɔ́yɔɔdɩna ɖama nɛ pana mbʋ pʋwɛɛ se ḿba ɛla yɔ. 21 Ahitoofɛɛlɩ heyi Abisalom kpaagbaa se, ewolo nɛ ɛ nɛ ɛ-caa halaa mba ɛ́lɛ yeba se pɔcɔŋna kewiyaɣ ɖɩɣa yɔɔ yɔ pahɩnɩb. Se, pʋbʋ, ɛ-caa ɛɛnaɣ-ɩ nɛ ɛsɩyɛ nɛ piyele Izirɛɛlɩ ñɩma tɩnɛ nɩɩ nɛ pɩtɛzɩ seɣduu ɛ-ɛgbaadɩnaa. 22 Peeye palabɩ Abisalom kɩɖanɖʋʋ kɩɖanɖʋʋ nakʋyʋ wiyaʋ ɖɩɣa ñʋʋ taa nɛ ewolo nɛ ɛ nɛ ɛ-caa halaa pahɩnɩɣ Izirɛɛlɩ ñɩma tɩnɛ ɛsɩndaac.
23 Alɩwaatʋ ndʋ lɛ, ɛyaa welisaɣaɣ tɔm ndʋ Ahitoofɛɛlɩ tazaɣ yɔ, ɛzɩ Ɛsɔ maɣmaɣ tɔm yɔ. Ḿbʋ ɖɔɖɔ Daaviidi nɛ Abisalom pewelisaɣaɣ tɔm ndʋ ɛtasaɣ-wɛ yɔ tɩ-tɩnɛ.