5
Palabʋ Daaviidi sɔnzɩ nɛ ɛkɛ wiyaʋ yɔ
(Ɩcɔnɩ Awiya tɔm cɔlɩɩ 11.1-9)
1 Nakʋyʋ wiye Izirɛɛlɩ cejewe tɩnɛ taa ñɩma wobi Daaviidi cɔlɔ Hɛbɩrɔɔnɩ tɛtʋa taa nɛ peheyi-i se, pa nɛ ɩ pɛkɛ hɔʋ kʋɖʋmʋʋ taa ñɩma. 2 Se, ɖooo Sawʋlɩ kɛkɛ pe-wiyaʋ lɛ, ɛ́lɛ cɔŋaɣnɩnɩ Izirɛɛlɩ sɔɔjanaa lɩʋ nɛ pa-sʋʋ pɔ-yɔɔ. Se alɩwaatʋ ndʋ tɩ-taa, Kɩpaɣlʋ kɛtɛm ɛlɛɛ heyuiu se, ɛ́lɛ kaɣnɩ cɔnaʋ ɛ-samaɣ taa ñɩma, Izirɛɛlɩ ñɩma yɔɔ, se, ɛnʋ kaɣnɩ kɛʋ pe-wiyaʋ. 3 Izirɛɛlɩ ñɩma sɔsaa tɩnɛ wobi ɖɔɖɔ wiyaʋ Daaviidi cɔlɔ, Hɛbɩrɔɔnɩ nɛ pa nɛ ɩ pɛpɛlɩ ñɩyʋʋ Kɩpaɣlʋ ɛsɩndaa. Peeye palabɩ-ɩ sɔnzɩ nɛ num nɛ ɛkɛ wiyaʋ. 4 Daaviidi kɛwɛnɩ pɩnzɩ niidozo nɛ pʋcɔ ɛtɔɔ kewiyaɣ nɛ ɛtɔɔ-kɛ pɩnzɩ nɩɩnaza. 5 Ɛɛwɛ Hɛbɩrɔɔnɩ lɛ, Bineyaamiini cejewe taa ñɩma yɔɔ ɛtɔɔ kewiyaɣ pɩnzɩ lʋbɛ (7) nɛ hɔɔlʋʋ. Pʋwayɩ lɛ, ɛwɛɛ Yeruusalɛm nɛ ɛtɔɔ kewiyaɣ Izirɛɛlɩ ñɩma nɛ Yuuda ñɩma pɔ-yɔɔ, pɩnzɩ niidozo nɛ naadozo (33)b.
Daaviidi mʋʋ Yeruusalem tɛtʋ yɔ
6 Nakʋyʋ wiye Daaviidi nɛ ɛ-ɛyaa powokaɣ Yeruusalem se pakʋyɩ Yeebuusii ñɩmac mba pɛwɛ egeetiye nɖɩ ɖɩ-taa yɔ, pɔ-yɔɔ. Peeye paba heyi-i se, ɛɛsʋʋ ḿba tɛtʋ taa, mbʋ pʋyɔɔ yɔ, halɩ pɩkpɛndɩnɩ yʋlɩmaa nɛ taladɩnaa paɖɩkɩ-ɩ nʋmʋ. Pɔyɔɔdʋʋ mbʋ yɔ, pacaɣ se pɔtɔ se Daaviidi ɛɛtɩɩpɩzɩɣ nɛ ɛmʋ ḿba tɛtʋ kpem. 7 Paa mbʋʋ yɔ, Daaviidi mʋ tɛtʋ hɔɔlʋʋ ŋgʋ pɔcɔzɩ-kʋ kolonzi sɔsɔsɩ nɛ pata yɔ. Payaɣ-kʋ se Siiyɔɔ. Kaɣ alɩwaatʋ ńdʋ lɛ, payaɣ-kʋ se “Daaviidi tɛtʋ”. 8 Kɩyakʋ ŋgʋʋ Daaviidi tɔm se, ye nɔɔyʋ ɛcaɣ se ɛwa Yeebuusii ñɩma yɔ, pʋdʋ ɛtɩŋnɩ tɛtɛɛ pɔʋ taa nɛ ɛkʋyɩ pɔ-yɔɔ nɛ ehiɣ-wɛ. Se, ɛnʋ ɛɛnaɣ taladɩnaa ḿba nɛ yʋlɩmaa ḿba nɛ ɛsɩyɛ kpem. Pʋ-yɔɔ pɔtɔŋ se, pɩfɛyɩ se taladɩnaa nɛ yʋlɩmaa pasʋʋ Ɛsɔɖɩɣa taa.
9 Pʋwayɩ lɛ, Daaviidi wolo ɛwɛɛ ɖenɖe pɔcɔzɩ kolonzi nɛ pata ḿbʋ yɔ. Ɛ-maɣmaɣ ɛyanɩ hɔɔlʋʋ ŋgʋ se “Daaviidi tɛtʋ”. Pʋbʋ wayɩ eyeba nɛ pama kolonzɩ lɛɛsɩ, tendene nɖɩ payaɣ se Miiloo yɔ nɛ ɛ-ɖɩɣa pɛ-hɛkʋ taa nɛ pɔcɔɔ nɛ pata. 10 Mbʋʋ Daaviidi kɛwɛɛ nɛ ɛtɛzɩɣ kpaʋ ɖoŋ, mbʋ pʋyɔɔ yɔ, Kedeŋa kpeekpe Kɩpaɣlʋ, Ɛsɔ kɛwɛ ɛ-cɔlɔ.
11 Nakʋyʋ wiye lɛ, Tiiti wiyaʋ Hiiram tiyi ɛyaa nabɛyɛ Daaviidi cɔlɔ. Se, powoni tɩʋ ŋgʋ payaɣ se sɛɛdrɩ yɔ, kɩ-ɖasɩ nɛ kafintanaa nɛ pɛ saɣyaa se powolo pama-ɩ awiya ɖɩɣa nakɛyɛ. 12 Peeye Daaviidi nawa se Kɩpaɣlʋ maɣmaɣ lɩzɩnɩ-ɩ se ɛkɛ Izirɛɛlɩ ñɩma wiyaʋ. Se, ɛ́lɛ yebina nɛ ɛnʋ kewiyaɣ kpa ɖoŋ ɛ-samaɣ Izirɛɛlɩ ñɩma pɔ-yɔɔ.
Piya ḿba Daaviidi lʋlɩ Yeruusalem yɔ
(Ɩcɔnɩ Awiya tɔm kɛdʋʋ cɔlɩɩ 14.3)
13 Daaviidi kʋyɩ Hɛbɩrɔɔnɩ nɛ ewolo Yeruusalɛm lɛ, ɛtasɩ kpaɣʋ halaa lɛlaa nɛ palʋlɩ-ɩ abalɩbiya nɛ halɩbiya. 14 Abalɩbiya nzɩ palʋlɩ Yeruusalem yɔ, nzɩɩ yɔ: Samuwaa nɛ Sovaavɩ nɛ Naataanɩ nɛ Salomɔɔ 15 nɛ Yivaarɩ nɛ Eliisuwa nɛ Nɛfɛɛgɩ nɛ Yafiya 16 nɛ Elisamaa nɛ Eliyaadaa nɛ Eliifɛlɛɛtɩ.
Daaviidi wabʋ Filsitii ñɩma yɔ
(Ɩcɔnɩ Awiya tɔm kɛdʋʋ cɔlɩɩ 14.8)
17 Filisitii ñɩma kɔm panɩɩ se palabɩ Daaviidi sɔnzɩ nɛ num nɛ ɛkɛ wiyaʋ lɛ, pakʋyɩ pa-tɩnɛ se powoki pañɩnɩ-ɩ nɛ pakpa-ɩ. Ɛ́lɛ ñanɩ ḿbʋ lɛ, ewolo lonɛ nɖɩ pɔcɔzɩ-ɖɩ, kolonzi nɛ pata yɔ, ɖɩ-taa. 18 Filisitii ñɩma kɔm patalɩ lɛ, pamɩzɩ ɖama Reefaa ñɩma kajalaŋa tɩnɛ taa. 19 Pɩlakaɣ ḿbʋ lɛ, Daaviidi yɔɔdɔnɩ Kɩpaɣlʋ se ɛna. Ɛpɔzɩ-ɩ se, ɛnʋ ewolo nɛ ɛkʋyɩ Fiilisitii ñɩma yɔɔ yaa we? Se, ɛkpaɣ-wɛ nɛ ɛɖʋzɩ ɛnʋ nesi taa yaa we? Ɛ́lɛ ñocosi-i se, ɛɛɛ! Se, ewolo ɛkʋyɩ pɔ-yɔɔ, se, ɛnʋ kpaɣ-wɛ nɛ ɛɖʋ e-nesi taa.
20 Peeye Daaviidi wobi Baalɩperaciim nɛ ɛkʋyɩ Filisitii ñɩma yɔɔ nɛ ɛwabɩ-wɛ. Ɖɩnɛɛ ɛtɔm se, KƖPAƔLƲ tʋlɩ ɛnʋ koyindinaa taa pɔʋ nakʋyʋ ɛzɩ lɩm tʋlʋʋʋ ɛkɔlɩ taa pɔʋ yɔ. Pʋyɔɔ paya lone nɖɩ se, Baalɩperaciim. Pʋ-tɔbʋʋ se, Pɔŋ caa. 21 Fiilisitii ñɩma kesawa nɛ peyele pa-sɩʋkpeliei, peeye nɛ Daaviidi nɛ ɛ-ɛyaa pakpaɣ-sɩ.
22 Pʋwayɩ lɛ, Fiilisitii ñɩma tasɩ wobu se pakʋyʋʋ Daaviidi yɔɔ. Pɔkɔm patalɩ lɛ, pamɩzɩ ɖama Reefaa ñɩma kajalaŋa taa. 23 Peeye Daaviidi tasɩ yɔɔdɩnaʋ KƖPALƲ se ɛna. Ɛ́lɛ ñeheyi-i se, ɛtaawobini pɛ-ɛsɩndaa peeye se ɛkʋyʋʋ pɔ-yɔɔ. Se, ewolo ɛmɛlɩ pa-wayɩ nɛ ɛpɩsɩnɩ pɔ-yɔɔ tulɩŋa law ɛsɩndaa. 24 Se, ye ɛkɔm ɛnɩɩ nɩŋgbanzɩ nasɩyɩ taŋ tɩ́ŋ ñʋʋ taa lɛ, ɛkʋyɩ pɔ-yɔɔ kpaagbaa. Mbʋ pʋyɔɔ yɔ, alɩwaatʋ ndʋʋ ɛnʋ ɖɛɣ ɛ-ɛsɩndaa se ɛkʋ Fiilisitii ñɩma sɔɔjanaa. 25 KƖPAƔLƲ heyi Daaviidi ḿbʋ lɛ, ɛla pʋ-yɔɔ nɛ ɛpɩsɩ ɛwa Fiilisitii ñɩma nɛ ɛɖɔɔnɩ-wɛ nɛ ɖooo Gɛɛvaa tɛtʋd taa nɛ ɛkɔɔ ɛtalɩ Gɛzɛɛrɩ ñɩndʋe.