4
Baanaa nɛ Reekaavɩ pakʋʋ Isiboosɛɛtɩ yɔ
1 Sawʋlɩ pɩyalʋ Isiboosɛɛtɩ kɔm ɛnɩɩ se Avɩnɛɛrɩ sɩbɩ Hɛbɩrɔɔnɩ tɛtʋ taa lɛ, pitii e-tome taa yem yɔɔ nɛ piliɣti Izirɛɛlɩ ñɩma tɩŋa. 2 Abalaa nabɛyɛ kɛwɛ Sawʋlɩ pɩyalʋ ɛnʋ ɛ-tɛ, pɛkɛ ɛ-sɔɔjanaa tikasɩ naalɛ ñʋndɩnaa. Payaɣ lɛlʋ se Baanaa nɛ lɛlʋ se Reekaavɩ. Pɛkɛ Bineyaamiini cejewiye taa tʋ, Beerooti tɛtʋa taa tʋ, Riimɔɔnɩ pɩyalaa. Mbʋ pɔyɔɔ yɔ, paakpaɣ Beerooti tɛtʋ se tɩkɛ Bineyaamiini cejewiye taa ñɩma tɛtʋ. 3 Beerooti tɛtʋ ńdʋ, tɩ-taa ñɩma kesewa nɛ powolo Gitaayim ñɩndʋ taa, nɛ pa-sayɩnaa wɛɛ peeye halɩ nɛ sɔnɔ. 4 Ɖɔɖɔ lɛ, Yonaataanɩ weyi ɛkɛ Sawʋlɩ piyalʋ yɔ, ɛɛwɛnɩ ɖɔɖɔ pɩyalʋ, payaɣ ɛ́lɛ se Mefiibosɛɛtɩ. Pakʋ Sawʋlɩ nɛ Yonaataanɩ nɛ pa-sɩm tɔm talɩ Yizireyɛɛlɩ tɛtʋ taa lɛ, ɛ́lɛ kɛwɛnɩ pɩnzɩ kagbaanzɩ. Ɛ-pʋnʋʋyʋ nɩ ḿbʋ lɛ, ɛkʋyɩ nɛ ɛkpaɣ-ɩ se eseɣ. E-kpedisuu taa lɛ, pɩɣa lɩɩ kɔtɔlɩ nɛ pɩcam ka-nɩŋgbanzɩ naalɛ nɛ kɛwɛɛ mbʋ.
5 Pɩlabɩ ḿbʋ lɛ, Beerooti tɛtʋ taa tʋ Riimɔɔnɩ pɩyalaa, Reekaavɩ nɛ Baanaa pakʋyɩnɩ wisi kaalaŋa nɛ pɔkɔɔ patalɩ Isiboosɛɛtɩ tɛ nɛ pamaɣnɩ ɛ́lɛ hɩnaa nɛ eɖou. 6-7 Patalaa lɛ, pasʋʋ ɖɩɣa ɛzɩ powoni tɔɔnaɣ ŋga payaɣ se bilee yɔ. Peeye pasʋ ɖooo kuduyuu tɛɛ nɛ pamaɣnɩ Isiboosɛɛtɩ, ɛhɩnaa nɛ eɖou wisi taa ɖom. Ɖɩnɛɛ pamabɩ e-lotu taa nɛ pakʋ-ɩ. Ɛsɩba lɛ, ɛyaa mba pa-naalɛ pɛsɛtɩ ɛ-ñʋʋ nɛ pɛkpɛndɩnɩ-kʋ nɛ pɛɖɛɛ. Pʋwayɩ lɛ, patɩŋ Yɔɔrɩdaŋ kajalaŋa taa nʋmɔʋ ɖoo nɛ a-tɛɛ pilim. 8 Powoni Isiboosɛɛtɩ ñʋʋ, wiyaʋ Daaviidi cɔlɔ Hɛbɩrɔɔnɩ tɛtʋ taa. Powoni-kʋ lɛ, payaa-ɩ se Dajaa nɛ peheyi-i se, ɛcɔna nɛ ɛna e-koyindu Sawʋlɩ, pɩyalʋ Isiboosɛɛtɩ weyi ɛcaɣaɣ se ɛkʋ-ɩ yɔ, ɛ-ñʋʋ\f + \fr 4.8
e-koyindu Sawʋlɩ, pɩyalʋ Isiboosɛɛtɩ weyi ɛcaɣaɣ se ɛkʋ-ɩ yɔ, ɛ-ñʋʋ \ft: Tɔm ńdʋ, pɛɖɛsɩ-tʋ takayɩsɩ lɛɛsɩ taa se, Sawʋlɩ pɩyalʋ, ño-koyindu Isiboosɛɛtɩ ñʋʋ\f*. Se, kɩyakʋ ŋgʋ, Kɩpaɣlʋ kpa Sawʋlɩ nɛ ɛ-sayɩnaa ɛnʋʋ Daaviidi ɛ-kɩmɩyɛ. 9 Peeye Daaviidi tɔm se, ɛnʋ ɖuuni Kɩpaɣlʋ weyi ɛlɩzɩ ɛnʋʋ cɛyɩtʋ tɩnɛ taa yɔ se, 10 weyi ewoba nɛ eheyi ɛnʋʋ Sawʋlɩ sim tɔm yɔ, ɛmaɣzaa se eheyi ɛnʋʋ tɔm kɩbandʋ natʋyʋ. Se, tɔɔ! Ɛnʋ yeba pakpa-ɩ nɛ pakʋ-ɩ Cikilaagɩ tɛtʋb taa. Se, mbʋʋ ɛnʋ hɛyɩ-ɩ ɛ-tɔm kɩbandʋ yɔɔ. 11 Se ɛsɩna ɛnʋ pɩsɩɣ ɛhɛyɩ ɛyaa azaɣa mba powobi ɛyʋ ɖɩɣa taa nɛ pakʋ-ɩ ɛ-ñalʋʋ yɔɔ dulum yɔ yɔ? Se ɛnʋ hɔŋ pa-nɩŋgbaŋ nɛ eyele se pataatasɩ-wɛ naʋ tɛtʋ yɔɔ, se, pakʋ ɛyʋ.
12 Peeye Daaviidi ha ɛ-sɔɔjanaa nɔɔ nɛ pakʋ Reekaavɩ nɛ Baanaa nɛ pɛsɛtɩ pe-nesi nɛ pa-nɩŋgbanzɩ nɛ popuzi-wɛ Hɛbɩrɔɔnɩ tɛtʋ taa kujomuu nɔɔ. Pʋwayɩ lɛ, pakpaɣ Isiboosɛɛtɩ ñʋʋ nɛ powoni pepi Nɛɛrɩ pɩyalʋ Avɩnɛɛrɩ pɩlaʋ taa, Hɛbɩrɔɔnɩ peeye.