21
Gabawɔɔ tɛtʋ taa ñɩma nɛ Sawʋlɩ sɛyɩnaa pɔ-tɔm
1 Se, ñɔɔsɩ nasɩyɩ lɩna Daaviidi alɩwaatʋ taa nɛ sɩla pɩnzɩ naadozo (3). Daaviidi woba ɛyɔɔdɩna Kɩpaɣlʋ lɛ, ɛ́lɛ heyi-i se, Sawʋlɩ nɛ ɛ-hɔʋ taa ñɩma, ɛyaa kʋyaa pɔ-yɔɔ sɩlɩwa. Mbʋ pʋyɔɔ yɔ, pakʋ Gabawɔɔ tɛtʋ taa ñɩma.
2 Peeye wiyaʋ ya Gabawɔɔ ñɩma se ɛyɔɔdʋʋna-wɛ. Gabawɔɔ ñɩma ḿba, pataatasɩ wɛʋ Izirɛɛlɩ ñɩma taa, ɛlɛ, paakpɛnda Amoorii ñɩma mba pɩkazaa yɔ, pɔ-yɔɔ. Izirɛɛlɩ ñɩma koɖuwaa se, paakʋʋ-wɛ. Paa mbʋʋ yɔ, Izirɛɛlɩ ñɩma nɛ Yuuda ñɩma pɛ-kɛzɛɣa sɔsɔɔ yɔɔ lɛ, Sawʋlɩ ñɩnaɣ se ɛkʋ pa-tɩŋa. 3 Se, powoba lɛ, Daaviidi pɔzɩ-wɛ se, ɛlabɩ-wɛ we? Ɛsɩna ɛñɔɔzʋʋ ɛzaɣtʋ ndʋ palaba-wɛ yɔ nɛ pawazɩ KƖPAƔLƲ samaɣ yɔɔ? 4 Gabawɔɔ ñɩma cosi-wɛ se, pɩtɛkɛ liidiye yaa sika tɔm wɛna ḿba nɛ Sawʋlɩ nɛ ɛ-sɛyɩnaa pɛ-hɛkʋ taa. Se, ḿba taɖʋ se pakʋʋ Izirɛɛlɩ tʋ nɔɔyʋ. Wiyaʋ heyi-wɛ se, peheyi-i mbʋ pe-liu wɛɛ yɔ, se, ɛlakɩ-wɛ-pʋ 5 Se, peeye peheya wiyaʋ se, abalʋ weyi ɛcaɣaɣ se eɖesi-wɛ nɛ ɛmaɣzɩ se ɛkʋ ḿba tɩnɛ Izirɛɛlɩ ɛjaɖɛ tɩnɛ taa nɛ pɩtakazɩ nɔɔyʋ yɔ, 6 pɛ́cɛlɛ mbaa ɛ-sɛyɩnaa lʋbɛ (7) nɛ ḿba cɩyɩ-wɛ nɛ posusi-wɛ KƖPAƔLƲ ɛsɩndaa, Giiveyaa tɛtʋtaa. Tɛtʋ ndʋ tɩ-taa Sawʋlɩ weyi KƖPAƔLƲ lɩzaa yɔ, ɛɛwɛɛ yɔ. Wiyaʋ heyi-wɛ se, ɛnʋ cɛlɩɣ-wɛ-wɛ. 7 Ɛlɛ, wiyaʋ lɩza Sawʋlɩ sɛyɩ, Yonaataanɩ pɩyalʋ Mefiibosɛɛtɩ pɩ-taa. Mbʋ pʋyɔɔ yɔ, Daaviidi nɛ Yonaataanɩ paaɖuuna KƖPAƔLƲ se ḿba kɛ taabalaa 8 Pʋ-yɔɔ wiyaʋ kpaɣ Ayaa pɛlɛ Riicipaa pɩyalaa: Aarɩmɔɔnɩ nɛ Mefiibosɛɛtɩ mba ɛlʋla Sawʋlɩ yɔ, pa-naalɛ, nɛ Sawʋlɩ pɛlɛ Miikaalɩ pɩyalaa kagbaanzɩ mba ɛlʋla AbɛɛlɩMehoolaa tʋ Baarɩziilayɩ pɩyalʋ Adriyɛɛlɩ yɔ, 9 nɛ ɛɖʋzɩ-wɛ Gabawɔɔ ñɩma nesi taa nɛ paba wona-wɛ pʋʋ nakʋyʋ yɔɔ nɛ posusina-wɛ ɖaʋ KƖPAƔLƲ ɛsɩndaa. Pakʋ-wɛ tɔɔnaɣ ŋga payaɣ se ɔɔrɩjɩ yɔ, ka-kʋm alɩwaatʋ taa nɛ pa-lʋbɛ (7) pɛkpɛndɩ sɩbʋ. 10 Pɩlaba ḿbʋ lɛ, Sawʋlɩ lelu Riicipaa kpaɣ kʋñɔŋ wondu ndʋ esuu yɔ nɛ ɛpɔ ɛwaɣ yɔɔ, kpaɣ kʋmtʋ ɖɩpazɩyɛ taa nɛ puwolo pɩsɩna alɩwaatʋ ndʋ tɛʋ paza nɩʋ ɛyaa ḿba pɔ-yɔɔ yɔ. Eteyele se sumasɩ ɛcaɣ pɔ-yɔɔ wɩsɩ taa, yaa kpɩna, ɖoo taa. 11 Ɛlɛ, powolo peheyi Daaviidi mbʋ mbʋ Riicipaa ɛnʋ ɛlaba yɔ. 12 Peeye ɛ́lɛ woba nɛ ɛmʋ Sawʋlɩ nɛ ɛ́lɛ pɩyalʋ Yonaataanɩ pɔ-mɔɔ, Yaavɛɛsɩ ñɩma cɔlɔ, Gaalaadɩ tɛtʋ taa. Toovenim lɛ, Filisitii ñɩma waba Sawʋlɩ Gilibowaa tɛtʋ taa lɛ, popusi ɛ nɛ Yonaataanɩ Beyiti Seyaanɩ tɛtʋ kadaɣ taa nɛ Yaavɛɛsɩ ñɩma wolo pamɩlɩ-wɛ. 13 Daaviidi mʋ Sawʋlɩ nɛ ɛ-pɩyalʋ pɔ-mɔɔ lɛ, ɛkpaɣ-yɛ. Eyeba nɛ pekpeɣli ɖɔɖɔ ɛyaa lʋbɛ (7) mba popusa-wɛ yɔ, pɔ-mɔɔ. 14 Pʋwayɩ lɛ, pɛkpɛndɩ-yɛ Sawʋlɩ nɛ Yonaataanɩ pɔ-mɔɔ yɔɔ nɛ powona Bineyaamiini ɛjaɖɛ taa nɛ pepi Sawʋlɩ caa Kiisi pɩlaʋ taa Celaa tɛtʋ taa. Se, palaba pɩ-tɩnɛ ɛzɩ wiyaʋ ɖʋʋ yɔ lɛ, Ɛsɔ la pɛ-ɛjaɖɛ taa ñɩma ɖeu.
Izirɛɛlɩ ñɩma ɖaɣnʋʋ kʋyʋʋ Filisitii ñɩma yɔɔ yɔ
( Ɩ́cɔna 1Awiya tɔm cɔlɩɩ 20.4-8)
15 Se, pʋkɔma lɛ, Filisitii ñɩma nɛ Izirɛɛlɩ ñɩma patasɩ you nɛ Daaviidi nɛ ɛ-sɔɔjanaa powolo pakʋyɩ Filisitii ñɩma ḿba pɔ-yɔɔ. Pɩkɛdaa lɛ, pɩɖɛ Daaviidi. 16 Peeye Yisibiibenoovi weyi ɛkɛ Harafaaa sɛyɩnaa taa lɛlʋ yɔ, ɛɖʋwa se ɛkʋʋ Daaviidi. Ɛɛwɛna you wondu kɩfatʋ nɛ ɛ-kɩkpɛzɛŋ nɔɔ taa sɩɣa yuŋ ɖɛɛ ɛzɩ kiiloonaa naadozo yɔɔ yɔ. 17 Ɛlɛ, Ceruuyaa pɩyalʋ Aviisayi wolo ɛsɩna-ɩ nɛ ɛkʋ Filisitii tʋ ɛnʋ. Ɖɩnɛɛ Daaviidi sɔɔjanaa heya-ɩ se, ɛ́taatasɩ pa-wayɩ tɩŋʋʋ you taa. Pɩtɛkɛ ḿbʋ, Izirɛɛlɩ kanɖʋ ɛtaaɖi ḿbʋ.
18 Pʋwayɩ lɛ, Izirɛɛlɩ ñɩma nɛ Filisitii ñɩma patasɩ you ɖenɖe payaɣ se Goovi yɔ. Kɩ-taa Husaa tʋ Sibekayi kʋ Harafaa sɛyɩ lɛlʋ, payaɣ ɛ́lɛ se, Saafɩ. 19 Se, you lɛɛkʋ kɔma kɩtasɩ lɩʋ ɖɔɖɔ Izirɛɛlɩ ñɩma nɛ Filisitii ñɩma pɛ-hɛkʋ taa, Goovi peeye. Kɩ-taa Bɛtɩlɛhɛm tʋ Yaare Oregim pɩyalʋ Ɛlɩhanaanɩ kʋ Gaatɩ tʋ Gooliyaatɩ weyi ɛ-kɩkpɛzɛŋ ɖaʋ kɛwɛ ɛzɩ pɩsaŋ lʋyaa ɖaʋ ɖaʋ yɔ. 20 You lɛɛkʋ tasɩ lɩʋ Gaatɩ tɛtʋ taa. Sɔdʋʋ nakʋyʋ kɛwɛɛ, kɩwɛna nimbe loɖo (6), loɖo e-nesi yɔɔ nɛ naabe loɖo (6), loɖo, ɛ-aŋgbaŋzɩ yɔɔ, nɛ a-tɩŋa akpɛndɩ nɩɩlɛ nɛ naanza (24). Ɛ́lɛ ɖɔɖɔ ɛkɛ Harafaa sɛyɩ nɔɔyʋ. 21 Ɛ́lɛ tʋ Izirɛɛlɩ ñɩma, nɛ Daaviidi ɖalʋ Siimeyaa pɩyalʋ Yehonataanɩ ñakʋ-ɩ. 22 Filisitii sɔɔjanaa ḿba, pa-nanza (4), paakɛ Gaatɩ tɛtʋ taa Harafaa sɛyɩnaa, Daaviidi nɛ ɛ-sɔɔjanaa pakʋ-wɛ.