20
S Sɛvaa kʋyʋʋ Daaviidi yɔɔ yɔ
1 Abalʋ nɔɔyʋ kɛwɛ Giligaalɩ ɛjaɖɛ taa Bineyaamiini liɖe taa, payaɣ-ɩ se Bikirii, ɛkɛ kaawazaɣ. Nakʋyʋ wiye lɛ, ɛhʋlɩ nɔndɔʋ nɛ ɛtɔ se,
pa nɛ Daaviidi paayaɣ ɖama pʋyʋ,
pa nɛ Yeesee pɩyalʋ ɛnʋ, patakaa pʋyʋ,
mbaa Izirɛɛlɩ ñɩma, paa anɩ ɛ́pɩsɩ ɛ-tɛa! 2 Peeye Izirɛɛlɩ ñɩma yeba Daaviidi nɛ patɩŋ Sɛvaa wayɩ nɛ piyele Yuuda ñɩma ɖeke pe-wiyaʋ cɔlɔ nɛ pasɩɩ-ɩ nɛ Yɔɔrɩdaŋ pɔɔ nɔɔ nɛ powona-ɩ Yeruusalɛm.
3 Wiyaʋ Daaviidi kɔma ɛtala kewiyaɣ ɖɩɣa taa lɛ, ɛyaa ɛ-halaa lɛlaa hiu mba eeyeba se paɖaŋ-kɛ yɔ, nɛ ɛɖʋ-wɛ ɖɩɣa nakɛyɛ taa nɛ nabɛyɛ ɖaŋ kɔ-yɔɔ camɩyɛ nɛ ɛcɛlɩɣ-wɛ mbʋ paañɔɔzʋʋna pa-tɩ yɔ. Ɛlɛ, ɛ nɛ wɛ patatasɩ caɣʋ. Paɖɩɣ pɔ-yɔɔ ḿbʋ nɛ pʋkɔɔ pɩsɩna pa-sɩm. Pɛwɛ ɛzɩ lelaa yɔ, ŋgʋ, pa-walʋ nɛ ɛ-ɛsɛ.
Yowaabɩ kʋʋ Amaasaa yɔ
4 Se, pʋwayɩ lɛ, wiyaʋ heyi Amaasaa se, ɛyaa Yuuda ñɩma sɔɔjanaa tɩŋa! Se, ɛnʋ ha-ɩ kɩyakɩŋ naadozo se ɛyaa-wɛ nɛ pa nɛ-ɩ powolo ɛ-cɔlɔ peeye. 5 Ɖɩnɛɛ Amaasaa woba ɛyaa-wɛ, ɛlɛ, ɛlaɣ wayɩ alɩwaatʋ ndʋ wiyaʋ ɖʋ-ɩ yɔ tʋ-yɔɔ. 6 Pɩlaba ḿbʋ lɛ, Daaviidi heyi Aviisayɩ se, alɩwaatʋ ndʋ tɩ-taa lɛ, Bikirii pɩyalʋ Sɛvaa tɔm pɩsaa tɩkɩlɩɣ mbaa kaɖɛ, Abisalom ñɩndʋ. Se, ye ḿbʋ, ɛ-maɣmaɣ ɛ́ɖɛɛ ɛnʋ sɔɔjanaa nɔɔ nɛ paɖʋ Sɛvaa ɛnʋ ɛ-wayɩ nɛ ɛtaakɔɔ ɛsʋʋ ɖɩcɔzɩyɛ tɛtʋ natʋyʋ taa nɛ ɛtʋlɩ ḿba.
7 Wiyaʋ heya Aviisayɩ ḿbʋ lɛ, ɛ́lɛ ɖɛɛ nɔɔ nɛ Yowaabɩ sɔɔjanaa nɛ Kereetii nɛ Peletii pɛ-tɛtʋ taa ñɩma nɛ sɔdɩŋ tɩŋa patɩŋ ɛ-wayɩ. Pakʋya Yeruusalɛm nɛ paɖʋ Bikirii pɩyalʋ Sɛvaa wayɩ. 8 Pɩyɛ sɔsɔɖɛ naɖɩyɛ kɛwɛ tɛtʋ ńdʋ payaɣ se Gabawɔɔb yɔ, tɩ-cɔlɔ. Pɛwɛ pɩyɛ ndɩ ɖɩ-cɔlɔ lɛ, Amaasaa tala pɔ-cɔlɔ. Ŋgʋ, Yowaabɩ kosu e-you wondu. Paɖʋ ɛ-tɩnaɣ yɔɔ, tɩ-tɔnaɣ nakɛyɛ taa you sɩɣa, kɛwɛ ko-huyuu taa. Yowaabɩ ɖɔŋaɣ lɛ, sɩɣa ŋ́ga kɔtɔlɩ. 9 Amaasaa talaa lɛ, Yowaabɩ yaa se ɛ-taabalʋ nɛ ɛpɔzʋʋ-ɩ se ɛwɛ alaafɩya? Nɛ esesi ɛɖɔkɩ Amaasaa tandʋʋ nɛ e-nesi kɩbanzɩ se ekpiikiɣna-ɩ. 10 Amaasaa taana se Yowaabɩ kpaɣ sɩɣa ŋ́ga nɛ ɛɖɔkɩ ɛ-nɩmɩyɛ taa. Ekitina-kɛ nɛ ɛsɔ Amaasaa lotu taa nɛ e-lotu mɩzɩ tɛɛtaa nɛ ɛsɩ, Yowaabɩ tacazɩ-ɩ sɔbʋʋ naalɛ ñɩŋga.
Yowaabɩ yebu nɛ pakʋ Sɛvaa yɔ
11 Pɩlaba ḿbʋ lɛ, Yowaabɩ sɔɔja nɔɔyʋ caɣ Amaasaa cɔlɔ nɛ ɛtɔŋ se, Yowaabɩ ɛgbaadɩnaa nɛ mba pɛwɛ Daaviidi yɔɔ yɔ, pátɩŋ Yowaabɩ wayɩ! 12 Paa mbʋʋ yɔ, Amaasaa kepilima ɛ-calɩm taa nɩmaatakaɣ taa nɛ sɔɔja ɛnʋ, ɛna se ɛyaa tɩŋa takaɣ nɛ pasɩŋɩɣ. Peeye etu-i nɛ eposina nʋmɔʋ. Ewona-ɩ hayɩm nabʋyʋ taa nɛ ehuuzi ɛ-yɔɔ pɩsaʋ nakʋyʋ. 13 Ɛkɛza-ɩ ḿbʋ lɛ, sɔɔjanaa ɖɛɣ kpaagbaa nɛ patɩŋɩɣ Yowaabɩ wayɩ se paɖʋʋ Sɛvaa wayɩ.
14 Yowaabɩ cɔ Izirɛɛlɩ ñɩma cejewe tɩŋa taa nɛ ɛkɔɔ ɛtala Avɛɛlɩ Bɛɛtɩmaaka tɛtʋc taa. Beriim ñɩma tɩŋa kpeɣlaa nɛ patɩŋ-wɛ ɖɔɖɔ. 15 se, Yowaabɩ nɛ ɛ-sɔɔjanaa powolo pɔcɔɔ Avɛɛlɩ Bɛɛtɩmaaka tɛtʋ nɛ pata, mbʋ pʋyɔɔ yɔ, tɩ-taa Sɛvaa wɛɛ. Powoba lɛ, posuyi tɛtʋ nɛ pɩkpa tɛtʋ koloŋa kajalaɣ ñɩŋga. Pʋwayɩ lɛ, papazɩ-kɛ cɛzʋʋ se kɔtɔlɩ.
16 Se, pɩkɛdaa lɛ, halʋ nɔɔyʋ na nɛ ɛma kubuka nɛ tɛtʋ taa se, pewelesi! Pewelesi! Se, ɛnʋ tenda-wɛ se payaa Yowaabɩ nɛ peheyi-i se, ewolo ɖooo ɛnʋ cɔlɔ, se ɛnʋ wɛna natʋyʋ se eheyiɣ-i! 17 Yowaabɩ woba lɛ, halʋ ɛnʋ ɛpɔzɩ-ɩ se, ɛnʋʋ lɛ Yowaabɩ toovenim naa we? Ɛ́lɛ cosi-i se, ɛɛɛ, ɛnʋʋ lɛ kpem! halʋ ɛnʋ eheyi-i se, ɛnʋ tenda-ɩ se éwelesina-ɩ. Yowaabɩ heyi-i se, ɛnʋ welesiɣna-ɩ. 18 Peeye halʋ ɛnʋ ɛtɔma se, ɖooo lɛ, pɩɩmalɩna ɛyaa nɛ pɔyɔɔdʋʋ se, pɔ́pɔzɩ Avɛɛlɩ Bɛɛtɩmaaka tɛtʋ taa ñɩma tɔm, pʋbʋ, cɛyɩtʋ sɩɣ tɩnaɣ! 19 Se, ḿba tɛtʋ taa ñɩma kɩlɩna wɛʋ hɛɛɛ nɛ pakɩlɩɣ labʋʋ mbʋ pɑɖʋwa yɔ́ɔ Izirɛɛlɩ ɛjaɖɛ taa nɛ piyele ɛnʋ ñacaɣ se ɛkʋ ndʋʋ Izirɛlɩ tɛtʋ ndʋ tɩkɛ wazaɣ tɛtʋ taa lɛɛtʋ yɔ, tɩ-taa ñɩma naawe? Pɩlaba ɛsɩna kpem nɛ ɛcaɣ se eɖisi KƖPAƔLƲ ñɩm? 20 Se, Yowaabɩ cosi se, pɩɩtɩɩlakɩ ḿbʋ kpem! Se, ɛnʋ tatɩɩɖʋʋ ɛ-taa paa ñɩɩɩ se ɛwɛɛkɩɣ yaa eɖisiɣ nabʋyʋ kaʋ. 21 Se, pɩtɛkɛ pʋ-tɔm. Ɛlɛ, Efiraayim pʋʋ taa abalʋ nɔɔyʋ, payaɣ-ɩ se Sɛvaa, ɛnʋʋ lɛ, Bikirii pɩyalʋ, ɛkʋyaa nɛ ɛkaɖɩna wiyaʋ Daaviidi. Se, pálɩzɩ e-ɖeke koŋ pɛcɛlɩ-ɩ, pʋbʋ ɛ nɛ ɛ-ɛyaa pɛɖɛɣ. Halʋ ɛnʋ eheyi Yowaabɩ se, tɔɔ! Se, pɔlɔʋ ɛ-ñʋʋ nɛ tɛtʋ koloŋa! 22 Peeye halʋ ɛnʋ ewoba ɛna tɛtʋ taa ñɩma nɛ ɛyɔɔdɩna-wɛ tɔm nɛ lɔŋ nɛ sɩnɖɛ se pala mbʋ. Ɖɩnɛɛ pɛsɛta Sɛvaa ñʋʋ nɛ pɔlɔ-kʋ Yowaabɩ nɛ koloŋa. Piyele Yowaabɩ hʋlɩ ŋgandɩyɛ nɛ sɔɔjanaa kʋyɩ tɛtʋ taa kpaagbaa nɛ pekpe pɛ-tɛ pɛ-tɛ, nɛ Yowaabɩ maɣmaɣ ñapɩsɩ wiyaʋ cɔlɔ, Yeruusalɛm.
Daaviidi tʋmlaɖaa yɩla yɔ
23 Se, Yowaabɩ cɔŋaɣnɩna Izirɛɛlɩ ñɩma sɔɔjanaa tɩŋa yɔɔ. Yehoyadaa pɩyalʋ Benayaa ñɔcɔŋna Keretii ñɩma nɛ Peletii ñɩma nɛ sɔɔjanaa mba paɖaŋɩɣ wiyaʋ yɔɔ yɔ, pɔ-yɔɔ. 24 Adooram cɔŋaɣna kɩcɛyʋʋ tʋma yɔɔ. Ahiluudi pɩyalʋ Yehosafaatɩ lɛ weyi ɛyɔɔdʋʋna wiyaʋ nɔɔ yɔ. 25 Sewaa lɛ, takayaɣ taa mayʋ. Saadɔɔkɩ nɛ Abiyaataarɩ lɛ cɔjɔnaa. 26 Yayiiri hɔʋ taa tʋ Iiraa kɛ ɖɔɖɔ cɔjɔ, Daaviidi tʋmɩyɛ taa.