Ibrani i

Surat ber tomwat

Ibranyar

Ngribatin Luryain

Kit to tafai feti ise ma narengi surat ye fali na surat ye dalam to rfalak tomwate ngarany. Nempa nof ayatar ketnir, kit bise ma tafai feti tomwate ma narengi surat ye i a ne Timotius tbwariny. Ma i ndengar Ibar Ngamone nof Yesus Ni manglartar (Ibr. 2:3). I nafai desar na Yahudyar nir adat, ma Ratu Ni Yoyoding Wangim ma nose nor tomwat Israelar. Ma I nafai Yunani liriny a nbal, ma nafai ma narengi liliri ne ma nangafel.

Tomwate ma narengi surat Ibrani ye to nfalak feti narengi surat ye ber se nre se. Nempa nof safe ma narengi na surat ye dalam, kit tafai feti i narengi surat ye ber tomwat Yahudyar ma ralele Yesus lo. Tomwatar a ne ma biase rtar sir feti tomwat Israelar nre tomwat Ibranyar. Iane nwayat ma sir rfalak surat ye feti surat ber tomwat Ibranyar. Tomwate ma narengi surat ye npaki contoh ma ayatar yadin nof kitpar na Yoyoding Wangim. I nal tomwat Yahudyar nir adat, nir yayatrwar ma rsampayang, ma nfalyole na Yesus. Ma Tomwat Yahudyar ye rkoman suse fali ralele Yesus (Ibr. 10:32-34; 13:3, 13). Ma wanir Yahudyar ketnir a rfule sir, nwayat ma ketla rsue sir ma ratliur Yesus.

Tomwate ne narengi surat ye la nafkoran tomwat Yahudyar ma ralele Yesus, nema kete rsue sir ma ratliur Yesus. Tomwate ma narengi surat ye nfalak ber sir feti Yesus ne Ratu Anaky (1:2-4) ma neluk Mangsomp Silai (2:17-18). I nfalyole ber sir feti Yesus ye Ni kuase nlie nlengan nof malaektar (1:5-14) ma silai I nlengan nof Musa (3:1-6). Yesus ne Mangsomp Silai ma nlie nlengan nof tomwat Yahudyar nir mangsompar, fali Yesus ye to Ni sal. Ma I to neluk Mangsomp Silai na Ratu Ni befak na saryamprene nempa neluk Mangsomp Silai na Ratu Ni Das ma botuan na surga. (4:14; 7:28). Ratu nose Ni Yoyoding Beberi ne nor tomwatar nalyole Yesus. Yoyoding Beberi ne nangafel a nlengan nof Yoyoding Wangim ma nose luryain a ne (8:1; 10:18). Ma famudi e, tomwate ma narengi surat ye nsurat tomwat Ibranyar nema ramkoran ma ralele Yesus ma kete rsue sir. (3:6; 3:14; 4:14; 10:23; 10:32-36). I nsurat sir a nbal ma ka rsabar ma rabare nir suse ne (12:4-13).

Surat ye isiny

1:1; 2:18 Yesus Ni kuase nlie nlengan nof malaektar

3:1; 7:28 Yesus ye silai I nlengan nof Musa ma tomwat Yahudyar nir mangsomp silayar monuk

8:1; 10:18 Yesus ye ma neluk ninr Mangsomp Silai, ma Ratu nose Ni Yoyoding Beberi nor tomwatar nalyole I a nbal

10:19; 13:21 Tomwatar ma ralele Yesus nir wewelmpampane

13:22-25 Penutup.