Ratu nsurat kit nema dedesar ma talele I
12:1-17
1 Wangur, kit tafai feti tomwat luryanir a ne rmorip e ralele Ratu ma reluk contoh ber kit lo. Sir a ne farlan tomwatar ma rlarat pertandingan falae ma rait finis baluan lo. Ma lere ye rsalan kit ma tafla na pertandingan falae. Tomwatar ma rlarat pertandingan falae, ka rnau nir safe kabain nema rafla e to sasaf a rfarangal sir. Mpa kit a nbal e ka tnau kalin safe-safe monuk ma tabare ne, ma tate ninr salar ma rfarangal kit a ne. Farlan tose farane kit bise ma tamkoran ma tafla na pertandingan falae ma Ratu ntetak ber kit a ne lo. 2 Mpa ka talmate lan ma tsalan Yesus fali Yesus ye neluk dalamtene ber kit nema dedesar ma tikloi ma talele Ratu nof luryain terik ler famudi. Ma Yesus boany nal ma nabare Ni suse na katutun sangwalu terik ma nmat. Ma boloka tomwatar rarikan I a na katutun sangwalu ne nempa to nfaduli, fali I nafai feti keta Ratu nose ma I nsenang na lere ma nma ne. Ma lere ye I namtoran na Ratu seriny fian ma nfarete.
3 No mdyaun Yesus Ni susar noak ma tomwat salar rsiksa I ma nlie nlengan desar. Boloka farane nempa Yesus dedesar ma nsabar ma nabare Ni suse ne. I nose farane nema dedesar ma mimkoran ma milele I ma kete msyue kmi. 4 Wangur, botuan feti mireke ma mbyangal kabain yatkar ma nose ma mfyufw far sale dalam. Nempa noak ma mbyangal kabain yatkar, kmi to lain sa ma darmir a rtarbui terik ma myat farlan Yesus ma darany a ntarbui terik ma nmat a na katutun sangwalu. 5 Ka kete mimlufe Ratu Ni snyurtar ber a kmi a ne. I nsurat a kmi farlan makenar sa ma nsurat angkir. I nfalak farye:
“Angkur, ka mdyengar fen ngamone Ratu Ni snyurtar a ne, ma myose mlyarat nema mifbweberi mbyali mir momorip,
ma kete dalmir suse noak ma narese kmi.*
6 Fali Ratu nbabal tomwatar ma nkamis sir.
Ma nukun sir a nbal, sir a ne ma nal sir ma neluk angkir.”
7 Mpa ka msyabar ma mibare mir suse ne farlan Ratu nsurat ma nukun a kmi. Ka mdyaun feti Ratu nsurat ma nukun a kmi, iane farlan makenar sa ma nsurat ma nukun angkir, fali makenar monuk ka rsurat ma rukun angkir. 8 Tomwatar monuk ma Ratu nal sir ma reluk angkir a ne I nsurat ma nukun sir. Mpa farlan Ratu to nsurat ma nukun a kmi, iane feti kmi to myeluk Ratu angkir nempa kmi farlan kanak bubut dalam. 9 Boloka amninrar na saryamprene ye nsurat ma nukun kit nempa talang sir. Ma nlengan a nbal e, Ratu ma neluk Amninrar na surga. Noak ma I nsurat ma nukun kit a ne, ka tlarat desar I nema tonri momorip dedesar. 10 Amninrar na saryamprene ye rsurat kit nof lan ma kanak kit terik ma tatabwer nre tabatdar mpa to dodo. Ma rsurat kit rlarat safe ma rdaun feti iane nangafel. Nempa Ratu nsurat kit fen ninr ngamone nema tmorip e tanglerap farlan I ma nlerap a ne. 11 Botuan feti noak ma Amninrar na surga nsurat ma nukun kit e, to nose ma tsenang nempa nose ma isninrar ntafal ma maninik. Ma nof ma nsurat ma nukun kit nbal e, nose ma kit bise ma tfenai, nwayat ma tmorip e tamlonry ma tangamon.
12 Iane nwayat ma ka mtyafal ma mimkoran ma milele Ratu. Farlan tomwate ma nlarat pertandingan falae, ka i nafkoran limnir ma turnir ma to ramkoran a ne.* 13 Ma ka mijak fen ngamone nema dedesar ma mpyan a na lan dalamten malonri. Kmi myose farane nema tomwatar ma to ramkoran ma ralele Ratu ne to ratliur I, nempa rtafal ma ramkoran ma ralele I farlan kmi a nbal.*
14 Wangur ka mireke ma myorip e mingamon myor tomwatar monuk. Ma ka mireke nbal ma myorip e minglerap na Ratu sounlury, fali tomwate ma ni momorip to nanglerap keta to nkeban Ratu. 15 Ka mijake kmi nema to tomwate fen lese nof a kmi ye ma natliur Ratu ma nfatutu Ni dalamy ngamone ber i a ne. Fali tomwate ma natliur Ratu ne keta ni momorip nayatak, ma nwayat ma tomwat walyetar rayatak a nbal. Iane farlan racun ma nafyatak tomwatar ma ralele Ratu ma nose ma rose sale.* 16 Ka mijake kmi fen ngamone nema to tomwate fen lese nof a kmi ye ma nalalin ma to nalang Ratu. Ma ka mijake kmi nema to tomwate fen lese nof a kmi ye ma nbalak Esau ma to nalang Ratu Ni berkat ma nal ber i a ne. Ratu nberkat Esau lo ma neluk kanak keyai nema ni kuase ma nonri monuk amany ni kabanir, nempa i nlikur ni kuase ne nor anwayat mpinan dalam.* 17 Ma kmi mifai lo feti famudi e Esau nmpeang ma nonri nbali ni kuase ne nempa amany to nlampir ma nal ber i. Ma boloka ntasing ber amany ma ntak a nbali ni kuase ne nempa to dalamten ngamon ber i ma nafdiat ni sale ma nose ne lo.*
Kete mitliur Ratu farlan tomwat Israelar luryain a ne
12:18-29
18 Wangur, noak ma Ratu ninr Mangnrure natanuk nor tomwat Israelar luryain a ne, sir rti rakmat I a na bubuar Sinai. Bubuar a ne namin saryamprene mpa sir bise ma rsalan ma rfofur. Na iano sir rsalan bubuar a ne makrokap desar fali mutan mekafal a nbobe bubuar a ne. Ma rsalan au ma nfolura ma mnaur uman a nbal. Nempa kmi e to mbyalak tomwat Israelar ma ka rti rakmat Ratu na bubuar Sinai ne.* 19 Noak ma sir ramin bubuar a ne sir rdengar terompet delak ma silai desar. Ma sir rdengar a nbal Ratu liriny ma silai desar. Iane nwayat ma rtak Musa nema Ratu kete natanuk ber sir farane lo fali sir ramtaut desar. 20 Ma sir to bonir ral ma rlangun farete nof liliri ma rdengar a ne. Liliri ne nfalak farye: “Ise motak ma nomat bubuar a ne, boloka binatang i, ka rakjai i terik ma nmat.”* 21 Safe ma tomwat Israelar rsalan na bubuar a ne nose ma ramtaut desar. Iane nwayat ma Musa nfalak, “Yakw kumtaut ma kngwangasar.”* 22 Ma kmi e to mtyi bubuar Sinai ne, nempa mtyi bubuar Sion lo. Bubuar Sion a ne iane kote Yerusalem ma namin surga. Iane ain ma Ratu ma nmorip a ne namin. Na iano kmi mitungan myor Ratu Ni malaektar ma yadin desar ma rafburat sir, ma rampumpuki sir la rdangin I. 23 Na iano kmi mitungan myor tomwatar ma reluk Ratu angkir baluan. Sir a ne ma rarengi ngarnir a na surga lo. Ma na iano nbal mitungan myor Ratu ma ntetak tomwatar monuk nir ngriar. Ma mitungan a mbyal myor tomwat luryanir ma rmat a ne. Ma noak ma sir lolone rmorip e, ramlonry a na Ratu sounlury, ma lere ye Ratu nafdiat sir lo. 24 Na iano nbal mitungan myor Yesus. I ye ma neluk lenre ber Ratu ma tomwatar la nafkoran Ratu Ni Yoyoding Beberi. Yesus nmat ma darany a ntarbui na katutun sangwalu. Ma Yesus darany a ne nangafel nlengan nof Habel darany. Fali Habel darany nwayat ma ka rukun tomwatar, nempa Yesus darany e nwayat ma ralin tomwatar nof nir salar.*
25 Iane nwayat ma ka mijak fen ngamone nema ka kete mitliur Ratu noak ma natanuk nor a kmi. Fali luryain e Ratu nukun tomwat Israelar ma to rdengar Ni ngribatnir noak ma natanuk nor Musa la ntampu sir. Musa natanuk la ntampu sir a ne nof saryamprene. Ma nlengan e kit ma tdengar Ratu natanuk nof surga. Farlan to tmpeang ma tdengar I, keta I nukun kit e nlengan a nbal. * 26 Noak a ne Ratu natanuk nor tomwat Israelar nor liriny silai desar nwayat ma saryamprene nawawan. Nempa lere ye I nyoding farye, “Keta kose ma saryamprene nawawan lain lese nbal, ma to lan saryamprene nempa langit a nbal.”* 27 Ratu nfalak, “lain lese nbal.” I nfalak farane iane nfatutu feti I keta nose ma safe-safe monuk ma ramin saryamprene ye rawawan ma rayatak. Iane nwayat ma safe-safe ma to rawawan a ne keta rmon dedesar.