Ka tlarat tomwat luryanir ma rmorip e ralele Ratu
11:1-40
1 Wangur,
farlan kit tfalak feti talele Ratu,
ni botuan e,
kit tafai lo feti la tonri safe-safe ma tak tof I a ne,
boloka to tsalan a fuky.
2 Ma luryain a ne empninrar nusninrar ralele Ratu mpa I nsenang nor sir.
3 Ma nof ma talele Ratu mpa kit tafai feti I nose langit ma saryamprene nof ma nfalak.
Mpa safe-safe monuk ma kit tsalan ye,
Ratu nose nof safe ma to tsalan.*
4 Ma Habel nalele Ratu,
mpa nloik snyompe ber Ratu e,
nangafel a nlengan nof snyompe ma wainy Kain nloik ber Ratu.
Ma nof ma nalele Ratu ne nwayat ma nlangun ni snyompe ne ma Ratu nafdiat i a na sounlury.
Ma Habel nalele Ratu na ni momorip,
mpa neluk contoh ber kit terik lere ye boloka nmat dodo lo.*
5 Ma Henok nalele Ratu mpa i to nmat,
nempa Ratu nfair nafmomorip i far surga.
Ma to tomwate fen lese ma ntungan i fali Ratu nfair i lo.
Ma noak ma Ratu to nfair i a fuky e,
Ratu nfalak feti Henok ye ma nafsenange I dalamy.*
6 Nempa tomwatar to bise ma rafsenange Ratu dalamy farlan to ralele I.
Fali tomwatar ma ranriak Ratu ka ralele feti Ratu namin.
Ma ka ralele nbal feti Ratu keta nal safe-safe ma rangafel ber sir ma rareke ma ranriak I a ne.
7 Contoh sa nbal far Nuh.
Noak a ne Ratu nafbotin safe-safe ma keta diat tomwatar.
Ma Nuh nalele Ratu ma nose nlarat Ni faretar boloka to nsalan kabanir a ne fuky.
Mpa nose kabal silayar sa ma keta nor ni dasdalam ramin nema kete ratloram ma rmat.
Ma fali Nuh nalele Ratu mpa Ratu nfalak feti i namlonry na sounlury.
Nuh nalele Ratu ma nose nlarat Ratu Ni faretar,
nempa tomwatar na saryamprene e to rose rlarat Ratu Ni faretar,
iane nwayat ma ka Ratu nukun sir. *
8 Contoh far Abraham a nbal.
Noak a ne Ratu nluan Abraham ma nti nus walyetar sa ma nyoding ber i a ne.
Ma Abraham nalele Ratu mpa nlarat safe ma Ratu nluan i a ne ma nti nus walyete ne,
boloka to nafai ain a ne fuky.*
9 Ma fali Abraham nalele Ratu mpa boloka nmorip ma neluk tomwat mangum na nuse ma Ratu nyoding ber i a ne,
nempa dedesar ma namin ain a ne.
Ma Ratu nyoding nuse ne nbal ber Abraham anaky Ishak ma empuny Yakub.
Sir ramin nuse ne ma rmorip a na befkar.*
10 Abraham nmorip farane fali ndaf kote ma keta Ratu nyoding ber i a ne.
Kote ne ma keta Ratu koko I a nafdiri nlarat Ni andaun.
Ratu nafdiri kote ne na fanderen ma namkoran.
11 Abraham ye nalele Ratu mpa boloka namaken lo ma sawany Sara nmakw,
nempa Ratu nose ma Sara nakeban sou i ma empnir nusnir yadin.
Sir radu angkir fali Abraham nalele feti Ratu dedesar ma nafdiat safe ma nyoding a ne.*
12 Noak a ne Abraham namaken lo ma ketla nmat,
nempa nof koko i e,
ni dasdalam farlan knryai na dol,
ma ftunar na langit ma tomwatar to rfayaki ral.*
13 Tomwatar monuk a ne dedesar ma ralele Ratu terik ma rmat.
Ma boloka to ronri safe ma Ratu nyoding ber sir a ne fuky,
nempa noak ma rmorip e,
dedesar ma ranremi Ratu Ni yoyoding a ne,
ma rdaf ror dalmir senange.
Iane nwayat ma rfalak feti sir rmorip a na saryamprene ye keta to dodo farlan tomwat mangum.*
14 Tomwatar ma rfalak farane iane rfatutu feti sir rareke desar ma ranriak ain ma keta ramin dedesar.
15 Nempa ain ma rareke ma ramin a ne,
iane to ain ma rti a rtate luryain a ne.
Fali farlan ranremi ain ma rti a rtate luryain a ne keta let yadin ber sir ma rbali sir far ain a ne.
16 Nempa ain ma rareke ma ramin a ne,
ain ma nangafel desar iane ain na surga.
Iane nwayat ma Ratu to nmeat ma neluk Ratu ber sir,
fali I nau kotar sa ber sir lo ma ramin.
17-18 Noak ma Ratu nteman Abraham,
i dedesar ma nalele Ratu.
Noak a ne Ratu nluan Abraham ma nfen anaky Ishak ma neluk snyompe ber Ratu,
safo luryain e Ratu nyoding ber i lo feti,
keta nose ma ni dasdalam yadin nof anaky desar a ne.
Boloka farane Abraham nlarat motak ma nfen anaky mesan a ne neluk snyompe ber Ratu.*
19 Fali Abraham nalele feti Ratu Ni kuase ma nafmorip a nbali Ishak nof ni mamate.
Ma famudi e,
Ratu nfalak ber Abraham ma kete nfen Ishak.
Ma iane feleles farlan ma Abraham a nlangun a nbali Ishak nof ni mamate lo.
20 Ma Ishak a nbal.
Fali i nalele Ratu mpa noak ma nberkat anaky Yakub ma Esau e,
i nafbotin Ratu Ni yoyoding ber sir ma keta ronri na lere ma nma ne.*
21 Ma Yakub nalele Ratu nbal mpa noak ma ketla nmat e,
i ntak Ratu ma nberkat Yusuf angkir du a ne.
Ne i nomat tetekan ma namdir betno nsampayang ber Ratu.*
22 Ma Yusuf nalele Ratu nbal mpa noak ma ketla nmat e,
nfalak feti keta tomwat Israelar rbie rof Mesir.
Ma i nfalak feti farlan nmat lo ka ral ni duryar ma ronr a rbie rof Mesir a nbal.*
23 Musa enany amany ralele Ratu mpa to ramtaut ma rbangal rai ni farete ma nluan ma rfen kanak merwanar monuk ma betno ramtoranbabe sir.
Mpa noak ma ramtoranbabe Musa e,
sir ramudim i doan bulnar tel,
fali rsalan anaky a ne e nangafel resi.*
24 Ma Musa ye nalele Ratu mpa noak ma silai i e,
to nmpeang ma rtar i feti rai Mesir empuny,
safo rai Mesir anaky bate ne ma nal Musa fen anaky.*
25 Musa nmpeang ma nkoman suse nor Ratu Ni tomwatar,
nlengan nof ma nmorip e,
nsenang ma nose kabain yatkar.
Fali ndaun feti nmorip farane,
keta to dodo.
26 Musa ndaun feti ni ngafele e,
tomwatar rarikan i fali nalele Ray Silai ma Ratu nyoding I a ne.
I ndaun feti iane ma ubany nlengan nof ma nonri kabanir monuk na Mesir.
Ma Musa ntikloi ma nalele Ratu fali nafai feti keta na ler famudi e,
Ratu nal sewe ber i.
27 Ma fali Musa nalele Ratu mpa ntetak ma nti a ntate Mesir ma to namtaut feti keta rai Mesir narese i.
Ma i nalmate na lan safe ma ntetak a ne ma dedesar ma nsabar ma nabare ni suse ne.
I nsabar ma nabare ni suse ne fali nalmate na lan ma nsalan Ratu,
safo tomwatar to bise ma rsalan Ratu.*
28 Ma Musa nalele Ratu,
mpa nluan tomwat Israelar ma rose ler silai Paskah.
I nluan a nbal ma rfen domba ma ral darany la ryonge na nir fofoltar.
Sir rose farane nema noak ma Ratu Ni malaekat nma ma nfen tomwat Mesirar nir kanak keyayar e,
ka kete nfen nir kanak keyayar.*
29 Tomwat Israelar ralele Ratu mpa sir bise ma rmpan ralyole rof tasik memeye ne.
Sir rmpan ralyole tasik ne farlan ma rmpan a na ompak mangretu.
Nempa noak ma tomwat Mesirar rareke ma rlanre rof a ne sir ratloram.*
30 Ma tomwat Israelar ralele Ratu mpa noak ma rmpan a rlole kote Yerikho doan lerar itw,
tembok ma nbebar kote ne namsos monuk.*
31 Rahab ye bat yatak i,
nempa i nalele Ratu mpa to rfen i ror tomwatar ma rbangal Ratu ma ramin ni kote ne.
Fali noak ma tomwat Israelar ketnir rma ma ranaumat ni kote ne,
i nlangun sir ma nangafel na ni das.*
32 Ma lolone tomwatar yadin ma kose ma kusaur na sir a nbal,
nempa keta kusaur sir e melawas desar.
Mpa keta to kusaur na Gideon,
Barak,
Simson,
Yefta,
Daud,
Samuel,
ma nabi walyetar a nbal.*
33 Ma sir monuk a ne ralele Ratu mpa ketnir nof sir a ne bonir ral ma rafufu rayar,
ketnir e rfarete nir nusar ror malonri,
ketnir e ronri safe ma Ratu nyoding ber sir a ne,
ma ketnir a nbal e bise ma repat singar babnir.*
34 Ketnir e ramin au ma nfolur dedesar nempa to rmat,
ketnir e rose ma rfen sir ror smadar nempa bise ma rliak sir,
ketnir e to ramkoran nempa Ratu nose ma ramkoran.
Ma ketnir a nbal e,
Ratu nafkoran sir ma rafufu nir muswar ma rof nus walyetar,
nwayat ma muswar a ne rafla buiyefar sir.*
35 Ma batar ketnir ralele Ratu mpa sir bise ma rtungan a rbali nir dasdalmir ma rmat a ne,
fali Ratu nafmorip a nbali sir.
Nempa tomwatar ketnir e,
rsiksa sir terik ma rmat fali ralele Ratu.
Tomwatar bise ma ralin sir rof nir susar a ne farlan ramsoal Ratu ma to ralele I a nbal,
nempa to rmpeang ma rose farane.
Sir rmpeang ma rsiksa sir motak terik ma rmat,
fali rafai feti lama rmat e Ratu keta nafmorip a nbali sir ma rmorip e nangafel desar.*
36 Tomwatar ketnir e,
ralele Ratu mpa tomwatar rarikan sir,
ma ketnir e tomwatar rsil a rbabal sir,
ma ketnir a nbal e rkete sir ror rewe ma rnau sir a na sel.*
37 Ma ketnir e tomwatar rakjai sir terik ma rmat,
ketnir e rorin tenir a rmpan du,
ketnir e ral smade la rfen sir.
Ma ketnir a nbal e,
rawatan desar ma rmpan a rol.
Sir rfonak rabtyar rof domba kulit nre mpimpi kulit.
Tomwatar dedesar ma rtean sir ma rsiksa sir a nbal.*
38 Sir rmpan a rol a na ain letkape ma lenir.
Ma ramin a nbal bangar ma baty losar.
Sir to bise ma rmorip a na saryamprene fali ralele Ratu nwayat ma tomwat saryamprenar rsiksa sir.
39 Ratu nsenang nor tomwatar a ne fali ramkoran ma ralele I,
boloka noak ma rmorip e,
sir to ronri safe ma Ratu nyoding ber sir a ne.
40 Sir to ronri safe ma Ratu nyoding ber sir a ne,
fali nau kabain ngamonar sa ma nangafel desar ber sir lo.
Ma Ratu nau kabain ngamonar a ne ber kit a nbal.
Ratu nmpeang ma taktem a tonri safe ma nyoding a ne,
nema taktem a tamlonry a na Ratu sounlury.