Yakobus i

Yakobus ni surat

Ngribatin Luryain

Tomwate ma narengi surat ye ngarany Yakobus. I ye Yesus wainy (Mrk. 6:3; Gal. 1:19) ma neluk mangnrure ber soranyar na Yerusalem. I narengi surat ye ber tomwat Yahudyar ma ralele Yesus lo ma ramin mpenempen na saryamprene ye. Tomwatar ma to ralele Yesus rsiksa sir nwayat ma rakes rasam sir far Siprus, Antiokhia ma Siria (Kis. 8:1; 11:19). Tomwatar yadin nof sir a ne ma rmorip e nir safe kabain to dengan (1:9).

Yakobus narengi surat ye la nafkoran tomwatar ma rakes rasam sir a ne. I naftutu sir ma nsurat sir (1:2-4; 1:12). I nfalak feti sir ka rabare nir suse ne ror dalmir senange. I nsurat sir nema rtafal ma ramkoran ma ralele Yesus ninr Ray Silai, farlan katutun ma wakrir raolibab (1:2-18; 5:7-11). I nsurat tomwatar ma ralele Yesus a nbal feti ka rmorip farpe.

Surat ye isiny

1:1 Yakobus ni ngribatin luryain

1:2-18 Tomwatar ka rabare nir suse ror dalmir senange

1:19; 2:26 Yakobus nsurat tomwatar ma kete rdengar motak Ratu Ni ngribatnir nempa ka rose rlarat

3:1-18 Ka rajake suknir fen ngamone

4:1-17 Kete rlarat makeus saryamprenar ma ka rlarat Ratu

5:1-20 Yakobus ni snyurtar.