Petrus nfalyole na safema nadiris tomwatar ma to Yahudi sir
11:1-18
1 Mangsidkwar numur tomwatar ma ralele Yesus na propinsi Yudea ni kateman, rdengar feti tomwatar ma to Yahudi sir rlangun Ratu Ni ngribatnir a nbal. 2 Noak ma Petrus nait Yerusalem, tomwat Yahudyar ma ralele Yesus a ne rabangal ror i. 3 Ma rfalak, “Safema ko mtwi tomwatar ma to Yahudi sir a ne nir dasar, ma mtwame mor sir?” 4 Mpe Petrus nfalyole safe-safe monuk nof luryain ber sir ma nfalak, 5 “Ler sa e, yakw kswampayang na pnu Yope, metryat e, kswalan kabanir sa far maloly melabar ma rkete susnir fat far das, ma rtolar rof langit na soungwlury. 6 Ne kswalan e, binatngar emnir fafat felnir mpane, binatngar ma rtalir, binatngar ma rlar ma mangkyar.” 7 Ne kdwengar liliri ma nfalak, “Petrus, mpwote ko! Mkwet sir ma mune!” 8 Nempa kfwalak, “Tate Mangnrur Silai! To kune kabanir ma rarai ma ramoli sir a fuky.” 9 Nempa ndengar a nbal liliri fen lain du nof langit ma nfalak feti, “Safe ma Ratu nfalak feti bise ma mune ka kete mumoli sir.” 10 Mpe ngrie ne nalang tely ber i, betno maloli ne nsail i far langit. 11 Na lere ne nbal tomwatar tel ma rsiduk sir rof Kaisarea, rait das ma kumin a ne. 12 Ne Ratu Smwangtany a nfalak ber yakw feti, kete mdwaun sasaf ma mtwi motak. Ne tomwatar nem ma ralele Yesus ma rof pnu Yope ye rlarat yakw nbal, ma mti Kornelius ni das na Kaisarea. 13 Mpene Kornelius nasaur ber kam feti, malaekat nma ma nfatutu felany ber i a na das dalam. Malaekat a ne nfalak, “Mlwuan tomwatar ma rti pnu Yope ma ral Simon ma rtar a nbal feti Petrus. 14 Keta i nafbotin ber ko feti felan farpe ma Ratu nalin ko mor nim dasdalam myof mir salar.” 15 Noak ma kutanuk e, sir rfen ber Ratu Smwangtany, feleles farlan ma nfen ber kit a na ler Pentakosta. 16 Ne kunremi safe ma Yesus ninr Mangnrur Silai nfalak, “Yohanes nal weye la nadiris tomwatar, nempa to dodo a nbal e, Amangw nadiris a kmi. Iane kmi mfyen ber Ratu Smwangtany.* 17 Ratu nal Ni Smwangtany a nbal ber tomwatar ma to Yahudi sir, feleles farlan ma nal ber kit noak ma talele Yesus ninr Ray Silai ma neluk ninr Mangnrure. Farlan Ratu nose farane e, bise ma kose ktweri I e?” 18 Lama rdengar farane rtatutuk, ne rdangin Ratu ma rfalak, “Farlan farane e, Ratu nal let ber tomwatar ma to Yahudi sir nema rasesal nir salar ma ronri momorip dedesar!”
Tomwatar ma ralele Yesus na Antiokhia
11:19-30
19 Lama rfen Stefanus e, rsiksa nbal tomwatar ma ralele Yesus, nwayat ma rakes rasam sir far mpenempen. Ketnir ramin Fenisia, ma ketnir a nbal ramin Siprus ma Antiokhia. Boloka farane sir rafwibar Ratu Ni ngribatnir ber lan tomwat Yahudyar.* 20 Nempa nof sir a ne tomwat Siprusar ma Kirenar ketnir, rti Antiokhia ma rafwibar Ibar Ngamone na Yesus ninr Mangnrur Silai ber tomwat Yunanyar. 21 Ratu Ni kuase norang sir nwayat ma tomwatar yadin ralele ma rlarat ninr Mangnrur Silai. 22 Soranyar a na Yerusalem rdengar ngrie ne mpa rsiduk Barnabas ma nti Antiokhia. 23 Lama nait iano i nsalan e, Ratu nal nimet silai ber tomwatar a ne, mpa nsenang resi. Ne nsurat sir ma ka rlarat dedesar ninr Mangnrur Silai ror dalmir kateman. 24 Barnabas ye tomwat ngamonar sa i ma nfen ber Ratu Smwangtany ma nalele resi Ratu. Iane nwayat ma tomwatar yadin rlarat ninr Mangnrur Silai. 25 Mpene Barnabas nti Tarsus ma nanriak Saulus, 26 lama ntungan i, nor i far Antiokhia. Sir ror soranyar na iane ngarak dalam, ma raftutu tomwat ngayadin. Mpe na Antiokhia ye, tomwatar betno rafngare tomwatar ma ralele Yesus feti tomwat Kristenar. 27 Noak a ne nabyar ketnir rof Yerusalem rti Antiokhia. 28 Tomwatar sa nof sir ngarany Agabus. I nfen ber Ratu Smwangtany ma nfalak feti, keta lafar silai nsor monuk saryamprene. Ngrie ne nbotin noak Kaisar Klaudius nfarete.* 29 Mpe Yesus Ni manglartar yoyouk lese ma rabutin mpane nir dotyar rlarat safe ma bise ral ma ronry ber soranyar ma ramin propinsi Yudea. 30 Sir rose farane, betno rsiduk Barnabas radu Saulus ma ronry dotyar a ne ber mangonbain gerejar na propinsi Yudea.