Malaekat nluan Kornelius ma ntar Petrus
10:1-8
1 Na Kaisarea tomwatar sa ngarany Kornelius.
I nose ulun ber suldadu kompi lese nof suldadwar ma rtar feti “Suldadw Italiar.”
2 I ye tomwate ma nlarat dedesar Ratu ma nor ni dasdalam rsatngur ber Ratu.
I ntulung tomwat Yahudyar ma rawatan ma nsampayang dedesar ber Ratu.
3 Na ler da sa fafa jam tiga,
Kornelius nsalan desar feti malaektar sa nma ma ntar i,
“Kornelius!”
4 Ne i nfon malaekat a ne ma namtaut ma nfalak,
“Maken,
safe ne?”
Malaekat a nfalak,
“Ratu ndengar nim sampangar ma nanremi nim dalam ngamone ne.
5 Mpa lere ye mlwuan tomwatar ketnir ma rti pnu Yope ma ral Simon ma rtar a nbal feti Petrus.
6 I namin tomwat sa ni das ma namin laran.
Tomwate ne ngarany Simon ma ni karyae e,
nose kabanir nof binatang kultir.”
7 Malaekat a ne nfalak monuk e,
nti a ntate i.
Ne ntar ni mangkaryayar du numur suldadw sa ma nlarat dedesar Ratu nof tomwatar ma dedesar e,
ror i.
8 Ma nasaur safe safe monuk ma malaekat nfalak a ne betno nluan sir ma rti pnu Yope.
Petrus nsalan kabanir sa ntompur nof langit
10:9-16
9 Ni bobole ne ni ler fardu langit e,
Petrus nfangat far bubungan dasa ma nsampayang.
Noak a ne tomwatar ma Kornelius nluan sir a ne ketla rait pnu Yope.
10 Ne i nkoman lafar ma nmpeang ma ntame,
ma lolone rasusan tnyame ber i metryat e,
Ratu nfatutu kabanir sa ber i.
11 Ne nsalan e langit ntakbanril ma kabanir sa far maloly melabar ma rkete susnir fat far das ma rtolar far ompak.
12
Petrus nsalan binatngar felnir mpane na maloly melabar (10:12)
binatngar emnir fafat felnir mpane numur binatngar ma rlar ma mangkyar.
13 Ne ndengar liliri ma nfalak,
“Petrus,
mpwote ko!
Mkwet binatngar a ne ma mune!”
14 Nempa i nfalak,
“Tate,
Mangnrur Silai!
To kune kabanir ma rarai ma ramoli sir.”
15 Ne ndengar a nbal liliri fen lain du ma nfalak,
“Safe ma Ratu nfalak feti bise ma mune,
ka kete mumoli sir.”
16 Mpene ngrie ne nalang tely ber i,
betno maloli ne nsail i far langit.
Petrus nfalak Mangnrur Silai Ni snyurat ber Kornelius
10:17-33
17 Ne Petrus naenrat na dalamy feti safe ma nsalan a ne isiny farpe.
Noak a ne tomwatar ma Kornelius nluan sir a ne rtungan Simon ni das ma rait fofolat fakar lo.
18 Ne rtar tomwatar sa ma renrat,
“Ali Simon ma rtar feti Petrus ne namin ye e?”
19 Noak ma Petrus nadaun safe ma nsalan a ne,
Ratu Smwangtany a nfalak,
“Hei Petrus,
tomwatar tel ranriak ko.
20 Mpwote ko ma mtwompur far bab ma mlwarat sir,
ma kete mudaun sasaf fali Yakw klwuan sir ma rma ye.”
21 Ne Petrus ntompur far bab ma nfalak ber tomwatar a ne,
“I ma kmi minriak i a ne yakw ye lo.
Mya ma myose safe ye?”
22 Mpe rfalak,
“Suldadw Romar nir ulun sa ngarany Kornelius,
nluan kam ma makmat ko.
I ye tomwat ngamonar sa i ma namtaut Ratu,
ma tomwat Yahudyar monuk ralang resi i.
Malaekat lelerpar sa nluan i ma ntar ko ma mtwi ni das nema ndengar safe ma keta mfwalak.”
23 Ne Petrus nfalak ber sir ma rarwa iane.
Ma ni bobole ne betno Petrus nor tomwatar ketnir ma ralele Yesus rof pnu Yope ma raktem tomwatar a ne rti.
24 Ni bengdu e,
sir rait Kaisarea.
Na iano Kornelius ma urany wainy numur tbwarnir rafburat sir ma rdaf Petrus ka.
25 Lama Petrus nait das,
Kornelius nlangun i ma nsangitil a na sounlury.
26 Nempa Petrus nfair i ma nfalak,
“Mumdir,
fali yakw ye tomwat biase motak.”
27 Sir ratanuk ma rti dalam,
ne Petrus nsalan tomwatar yadin rafburat sir lo.
28 Ne i nfalak ber sir,
“Kmi mifai monuk lo nre,
nof Yahudyar nir yayatrwar,
kam to matbwarin mor tomwatar ma to Yahudi sir ma to mti nir dasar a nbal.
Nempa Ratu nfatutu kabanir sa ber yakw ma nfalak feti kete kfwalak tomwatar ma to Yahudi sir a ne rarai.
29 Iane nwayat ma klwangun motak ma kmwa ye ma to ningw lol sasaf.
Nema kufai feti safema mtyar yakw.”
30 Mpe Kornelius a nfalak,
“Lerar fat ma rsapat a ne,
na lere da jam tiga farye yakw kswampayang na das.
Metryat e,
merwan sa ma ni rabit namamas,
namdir soungwlury.
31 Tomwate ne nfalak,
‘Kornelius,
Ratu ndengar nim sampangar lo ma nanremi nim dalam ngamone ber sir ma rawatan.
32 Mpa mlwuan tomwatar ma rti pnu Yope ma ral Simon ma rtar a nbal feti Petrus.
I namin Simon ni das.
Simon ye ni karyae e,
nose kabanir nof binatang kultir,
ma ni das a namin laran.’
33 Iane nwayat ma klwuan desar tomwatar ma rti rtar ko,
mpe mwa e,
mor dalam senange.
Mpa lere ye mabut kam monuk na ye,
na Ratu sounlury,
nema mdengar monuk safe ma Ratu nsurat ko ma mfwalak ber kam.”
Petrus nafwibar Ibar Ngamone ber Kornelius ka
10:34-43
34 Mpene Petrus nfalak ber sir,
“Yakw kufai feti ni botuan e,
Ratu to nasalan sou.*
35 Ratu nlangun tomwatar ma rof nusar monuk ma ramtaut I ma rose rlarat Ni mpempeang.
36 Kmi mifai Ibar nof Ratu ma nfalak ber Israelar feti farlan tomwatar ralele Yesus keta raktem Ratu rangamon a rbali.
37 Kmi mifai nbal safe safe monuk ma diat propinsi Yudea ni kateman,
terik Galilea ntabw ma Yohanes nafwibar feti tomwatar ka radiris sir.
38 Ka mifai nbal feti Ratu nfil Yesus tomwat Nasaret a ne,
ma nal Smwangtany ma kuase silai ber I.
Mpe I nal far mpenempen ma nose kabain ngamonar.
I nafngamone tomwatar ma natian kalin smwangat yatkar nir ulun fali Ratu nor I.
39 Ma kam mfalak farye fali koko kam ma msalan safe-safe monuk ma nose na propinsi Yudea ma Yerusalem;
Nempa famudi e,
rtikloi I a na katutun sangwalu.
40 Ma lerar tel e,
Ratu nafmorip a nbali I,
ma nose ma tomwatar bise ma rsalan I.
41 Nempa tomwatar monuk to bise ma rsalan Ratu,
lan tomwatar ma nfil sir a ne.
Mpe kam ye lo ma mtame menum mor I ntabw nof ma nmorip a nbali.
42 Ma nluan kam ma mafwibar Ibar Ngamone ne ber tomwat walyetar ma mafbotin feti Ratu nfil I lo ma neluk mangtetak ber mangmorpyar a ma mangmwatar.
43 Nabyar monuk rafbotin na Yesus feti ise ma nalele I,
keta Ratu nlure ni salar fali Ni kuase.”
Tomwatar ma to Yahudi sir rfen ber Ratu Smwangtany
10:44-48
44 Petrus lolone natanuk e,
tomwatar monuk ma rdengar ibar a ne rfen ber Ratu Smwangtany.
45 Tomwat Yahudyar ma ralele Yesus ma rlarat Petrus,
sir rampriang fali rsalan Ratu nal Smwangtany ber tomwatar ma to Yahudi sir a ne nbal.
46 Sir rdengar ma tomwatar a ne rdangin Ratu ror liliri ma koko sir to rkaul ral.
Mpa Petrus nfalak,
47 “No msyalan tomwatar ye,
sir ronri Ratu Smwangtany farlan kam a nbal.
Mpa ise bise nose nteri ma radiris sir.”
48 Mpene Petrus nluan ma radiris sir ror Yesus ninr Ray Silai ngarany.
Lama radiris monuk sir,
sir rtak Petrus ma nor sir lerar fir a na iane.