Saulus ntate ni salar
9:1-19
1 Noak a ne Saulus dedesar ma naftaut Yesus Ni manglartar ma nareke ma nfen sir.
I nti nakmat Mangsomp Silai,
2 ma ntak surat kuase ma nonry ber ulnir na Yahudyar nir das sampayang na kote Damsyik,
nema farlan ntungan bate nre merwane ma rmpan a rlarat Yesus ninr Mangnrur Silai Ni dalamtene e,
i nomat sir ma nor sir far Yerusalem.
3 Na dalamtene let ma ketla nait Damsyik,
metryat e,
snyain nof langit nbebar i.
4 Ne nfufw ma ndengar liliri ma nfalak,
“Saulus,
Saulus,
safema mtwean Yakw?”
5 Saulus nenrat,
“Mangnrur Silai,
Ise Ko?”
Ne nfalak,
“Yakw ye Yesus,
ma ko mtwean Yakw ne.
6 Mumdir ma mtwi kote dalam.
Na iano la betno rfalak safe ma mose.”
7 Tomwatar ma rlarat Saulus a ne rampriang ma to rafai feti rose safe,
fali rdengar liliri nempa to rsalan kekes.
8 Ne Saulus namdir ma nbelar matnir e,
to nakeban lo,
mpa tomwatar ma raktem a ne rkolat i ma rti Damsyik.
9 I to nakeban lerar tel ma to ntame nenum a nbal.
10 Na kote Damsyik a ne,
Yesus Ni manglarat sa ngarany Ananias.
I nsalan desar ma Mangnrur Silai natanuk nor i ma nfalak,
“Ananias!”
Ne nbali,
“Yakw ye Mangnrur Silai!”
11 Ne Mangnrur Silai nfalak,
“Mtwi Yudas ni das na dalamtene ma ngarany Dalamten Malonri,
ma munriak tomwat sa nof Tarsus ngarany Saulus.
I lolone nsampayang a ne,
12 ma na ni sampayang dalam e,
natrufe feti merwanar sa ngarany Ananias nti nakmat i ma nsaup limnir a na i,
nema bise ma nakeban a nbali.”
13 Ne Ananias a nfalak,
“Mangnrur Silai,
tomwatar yadin rfalak na tomwate ne ni adat yatkar yadin ma nose ber Nim manglartar na Yerusalem.
14 Mpe lere ye i nma ma nonry surat kuase nof mangsompar ulnir ma nomat tomwatar monuk ma ralele Ko.”
15 Nempa Mangnrur Silai nfalak ber i,
“Mtwi motak!
Fali Yakw kfwil i ma neluk Ningw mangsiduk,
ma nafwibar na Yakw ber nus walyetar ma to Yahudi sir numur rayar ma tomwat Israelar.
16 Ma kfwatutu ber i feti keta nabare susar yadin fali Yakw ngarangw.”
17 Ne Ananias nti das a ne ma nsaup limnir a na Saulus ma nfalak,
“Waingw Saulus,
Yesus ninr Ray Silai ma nafbotin I ber ko a na dalamtene ma mof a ne,
I nluan ma kukmat ko,
nema mukeban a mbwali ma mfwen ber Ratu Smwangtany.”
18 Nof a ne,
kabar sa far ian kikit nbie nof Saulus matnir,
mpa nakeban a nbali.
Ne namdir ma radiris i.
19a Lama ntame monuk e,
nmakoran a nbali.
Saulus nafwibar Ibar Ngamone na kote Damsyik
9:19-25
19b Saulus namin Damsyik lerar fir a ne nor Yesus Ni Manglartar.
20 Ntabw nof a ne i nti das sampangar,
ma nafwibar feti Yesus ye Ratu Anaky.
21 Tomwatar monuk ma rdengar ibar a ne rampriang ma rfalak,
“Tomwate ye ma nfen tomwatar ma rtar Yesus ngarany na Yerusalem nre?
Ma nma ye ma nomat sir ma nor sir ber Mangsomp Silayar.”
22 Nempa nti a nti e,
Saulus ni kuase ma naftutu tomwatar ntafal ma namkoran.
Iane nwayat ma tomwat Yahudyar ma ramin Damsyik to rbangal ral i fali nafdiat feti Yesus ye Ray Silai.
23 Lerar fir a ne rsak,
tomwat Yahudyar reng ma rfen Saulus.*
24 Lere nronram e,
sir rajak dedesar na kote ni finru matnir monuk,
nema bise ma rfen i.
Nempa Saulus nafai nir rerengyar a ne.
25 Mpa nronram sa e,
Saulus ni manglartar ror i ma rnau i a na keranjang sa dalam betno rtolar i rof tembok ni dianele far burit.
Tembok a ne rose ma nbebar kote ne.
Saulus nbali i far Yerusalem
9:26-31
26 Lama Saulus nait Yerusalem e,
nti nakmat Yesus Ni manglartar ma nose ma nabut i nor sir,
nempa sir monuk ramtaut fali to ralele feti i nalele Yesus lo.
27 Nempa Barnabas nlangun i ma nor i ber mangsidkwar ma nfalak ber sir feti Saulus ye ma nkeban Mangnrur Silai ma natanuk nor i na dalamtene let ma nal far kote Damsyik.
Ma nfalak a nbal feti i nbaran ma nal Yesus ngarany la naftutu na Damsyik.
28 Ne rlangun i ma raktem a ramin Yerusalem.
Ma nbaran ma naftutu nor Yesus ninr Mangnrur Silai ngarany.
29 I natanuk a nbal nor tomwat Yahudyar ma ral Yunani liriny ma raktem a raale andaun,
nempa sir rareke ma rfen i.
30 Lama tomwat walyetar ma ralele Yesus rafai ngrie ne,
sir ror i far Kaisarea betno rof a ne far Tarsus.
31 Noak a ne soranyar ma ramin propinsi Yudea ni kateman,
Galilea,
ma Samaria rmorip ror dalmir senange fali to kekes a rose suse sir.
Sir ralele Mangnrur Silai ror dalmir kateman fali Ratu Smwangtany nafkoran sir,
mpa rtafal ma yadin.
Petrus nose kabain mpasalnar na pnu Lida ma Yope
9:32-43
32 Na ler sa e,
Petrus nmpan a nlole ma naninuk soranyar na mpenempen.
Ma nwelat a nbal pnu Lida ma nsalan tomwatar ma ralele Yesus na iane.
33 Na iano i natungan nor merwan sa ngarany Eneas.
I narwa lan ain fali namlukut ngarkar wal e lo.
34 Ne Petrus a nfalak ber i,
“Eneas,
Yesus ninr Ray Silai nafngamone ko.
Mpa mpwote ko ma mususan nim arwan ain!”
Ne Eneas npote desar i.
35 Tomwatar monuk na pnu Lida ma Saron rsalan feti nangamon lo,
ne rbali sir ber ninr Mangnrur Silai.
36 Na pnu Yope e,
batar sa ma ngarany Tabita,
ma Yunani liriny nfalak a nbal feti Dorkas.
I ye Yesus Ni manglartar sa.
I dedesar ma nose kabain ngamonar ma ntulung tomwatar ma rawatan.
37 Noak a ne i nafanas ma nmat.
Ma radiris i ma rfele i a na kamar na loteng.
38 Pnu Lida ne nlosir pnu Yope.
Yesus Ni manglartar rdengar feti Petrus namin pnu Lida,
mpa rluan tomwatar du ma rti rakmat i ma rfalak feti,
“Musnyalik ma mwa ye fuky.”
39 Ne Petrus nti nor tomwatar du a ne.
Lama rait e,
sir ror i far kamar na loteng.
Bat somar monuk ma ramin a ne rkolu i ma rtasing.
Sir rfatutu rabtyar ma rabit melaswar ma nsot noak ma nmorip.
40 Mpe Petrus nluan sir monuk ma rti burit,
ne nsangitil ma nsampayang.
Betno nfon mangmwate ne ma nfalak,
“Tabita,
mpwote ko!”
Ne nbelar matnir.
Lama nsalan Petrus e,
npote i ma namtoran.
41 Ne Petrus nomat limany ma ntulung i ma namdir.
Mpene i ntar tomwatar ma ralele Yesus numur bat somar ma ramin a ne,
ma nfatutu ber sir feti bate ne nmorip a nbali lo.
42 Ibar na ngrie ne namelir monuk na pnu Yope mpa tomwatar yadin ma ralele Yesus ninr Mangnrur Silai.
43 Ne Petrus namin pnu Yope far dodo,
na tomwat sa ni das,
ngarany Simon.
Simon ye ni karyae e,
nose kabanir nof binatang kultir.