Kete tlarat makeus saryamprenar ma ka tlarat Ratu
4:1-10
1 Soranyar,
safe nwayat ma mkyafre ma mibangal?
Kmi myose farane fali mir makeus yatkar ma ramin a kmi a ne.
Ma mir makeus a ne ma nose ma kmi dedesar mbyangal Ratu Ni mpempeang.
2 Kmi mimkeus kabanir sa nempa to myonri mpa keta dalmir maninik ma mpyeang ma mfyen tomwatar.
Kmi mpyeang desar ma myonri kabanir sa nempa to bise ma myonri mpa mibangal ma mkyafre.
Ma kmi to myonri safe ma mpyeang a ne fali to msyampayang.
3 Ma boloka msyampayang nempa to myonri sasaf fali noak ma msyampayang e dalmir to ramlonry,
ma safe safe monuk ma mtyak a ne keta mpyaki ma mifsenange kmi motak.
4 Hei tomwatar a kmi ma to mlyarat Ratu!
Kmi to mifai e,
feti farlan kmi mpyeang kabain saryamprenar iane feti to mpyeang Ratu?
Mpa ise ma natbwarin nor kabain saryamprenar i a ne Ratu Ni musu.
5 Kete mdyaun feti safe ma rarengi na Kitap Lelerap dalam a ne to botuan.
Na Kitap Lelerap dalam a ne rarengi farye,
“Ratu nau Smwangtany na dalminrar nempa dalminrar a ne nfen ber makeus yatkar.”
6 Boloka farane Ratu nfatutu Ni dalamy ngamone ber kit nlengan nof ninr makeus yatkar a ne.
Iane nwayat ma rarengi na Kitap Lelerap dalam feti,
“Ratu to nlangun tomwatar ma rafdas sir,
nempa keta nfatutu Ni dalamy ngamone ber tomwatar ma to rafdas sir.”
7 Mpa ka milele botuan Ratu ma myose mlyarat Ni mpempeang.
Ma ka mbyangal smwangat yatkar nir ulun,
mpe keta nafla ntate kmi.
8 Ma ka dedesar ma mlyosir Ratu mpe keta I nlosir kmi a nbal.
Ma tomwat salar a kmi,
kete myose sale lo.
Ma kmi ma milele Ratu myor dalmir tubun,
ka miflerap dalmir.
9 Ka misesal botuan ma mtyasing ma milol.
Ka kete myalip nempa ka mtyasing,
ma ka kete dalmir a rsenang nempa ka dalmir suse.
10 Ma ka mifufu kmi a na Ratu sounlury,
mpe keta I nafdas a kmi.
Ka kete mifmpusuk tomwatar ngarnir
4:11-12
11 Soranyar mir kateman!
Ka kete mifmpusuk tomwatar ngarnir.
Fali farlan mifmpusuk nre mfyasale wamir ma ralele Yesus,
iane farlan ma mifmpusuk nre mfyasale Ratu Ni tetetkar.
Ma farlan mfyasale Ratu Ni tetetkar iane feti to mlyarat tetetkar a ne,
nempa mpyeang ma myeluk mangtetak la mfyasale Ratu Ni tetetkar a ne.
12 Ni botuan e,
lan lese ma nal tetetak ber kit ma lan I ma Ni kuase ma ntetak ninr ngriar.
Iane Ratu,
ma Ni kuase ma nfair ma nukun kit.
Ma kmi ye mpear,
ma mbyaran ma mfyasale tomwatar?
Ka kete mimlufe Ratu na safe ma mryeng
4:13-17
13 Mpa mdyengar ma kfwalak,
tomwatar a kmi ma mfyalak farye,
“Lere ye nre bobole kam mti kotar sa,
ma mamin iano fen ngarak dalam ma mafenry kabain ma manriak doit.”
14 Kmi mfyalak farane safo to mifai fuky feti bobole e,
safe diat a kmi.
Fali mir momorip a ne farlan masu ma betno tsalan nempa to dodo a nbal e nlai lo.
15 Ni botuan e,
ka mfyalak feti farlan Ratu nlarat e,
keta kam morip ma mose farye farye.
16 Safo kmi to myose farane,
nempa mifdas a kmi ma mitanuk rut.
Mpe mir adat ma farane,
iane feti myose salar lo.
17 Mpa ise ma nafai feti ka nose safe ma nangafel nempa to nose,
iane feti nose salar lo.