Yesus ninr Ray Silai nanrenre I ma nmat lain lese terik ma dedesar
10:1-18
1 Wangur mir kateman, tetetkar ma Ratu nal ber Musa ne neluk contoh motak nof kabain ngamonar ma keta tonri tof Yesus na lere ma nma ne. Nempa tetetkar a ne to nose ma tonri monuk kabain ngamonar a ne. Boloka na ngarkar mpane e, tomwatar dedesar rma ma rakmat Ratu ma rloik nir snyompar rof binatang darnir a ne, nempa tetetkar a ne to bise nose ma rafdiat sir a na Ratu sounlury.* 2 Fali farlan snyompar rof binatang darnir ma rloik a ne nose ma rafdiat sir a na Ratu sounlury, keta rdaun feti Ratu nlure sir lain lese lo terik ma dedesar. Mpa rdaun feti to nir sal e lo, nwayat ma keta to rloik nir snyompar rof binatang darnir a ne ber Ratu lo. 3 Nempa ni botuan e to farane, fali snyompar rof binatang darnir ma rloik ngarkar mpane ne ntafal ma nose ma ranremi rbali nir salar. 4 Fali dare nof sapi merwane nre mpimpi merwane ne to bise ma nlure tomwatar nir salar.
5 Mpa noak ma Yesus ninr Ray Silai nma saryamprene, I nfalak ber Ratu,
“O Amo, Ko to mpweang ma tomwatar rloik snyompar nof binatang darnir nre snyomp walyetar ma ber Ko,
nempa Ko mose tenangw ye ma keta klwoik neluk snyompe ber Ko.*
6 Ko to mpweang snyompar nof binatngar ma rtun sir a ne
nre snyompar nof binatang darnir la nkes kalin tomwatar nir salar.
7 Iane nwayat ma Yakw kfwalak, O Amo, Yakw ye lo.
Yakw kmwa saryamprene ye ma kose klwarat Nim mpempeang,
iane feleles farlan ma luryain e, rarengi na Yakw na Kitap Lelerap dalam lo.”
8 Yesus ninr Ray Silai nfalak lo feti Ratu to nmpeang snyompar nof binatang darnir nre snyomp walyetar. Ma I to nmpeang snyompar nof binatngar ma rtun sir a ne nre snyompar nof binatang darnir la nkes kalin nir salar a ne nbal. Safo sir rloik snyompar a ne rlarat tetetkar ma Ratu nal ber Musa. 9 Ne I nfalak a nbal, “O Amo, Yakw ye lo. Yakw kmwa saryamprene ye ma kose klwarat Nim mpempeang.” Mpa Yesus to nloik snyompar nlarat yayatrwar na Yoyoding Wangim a ne. Nempa nanrenre I ma neluk snyompe nlarat Ratu Ni mpempeang ma nlikur Yoyoding Wangim a ne nor Yoyoding Beberi. 10 Yesus ninr Ray Silai nose nlarat Ratu Ni mpempeang lo, ma I nanrenre tenany neluk snyompe ber Ratu. I nose farane nema naflerap ninr salar lain lese terik ma dedesar.
11 Lerar monuk e tomwat Yahudyar nir mangsompar rafmpwane nir karyayar. Sir dedesar ma rloik snyompar nof binatngar a ne ber Ratu. Nempa snyompar ma rloik a ne to bise ma nkes kalin tomwatar nir salar.* 12 Nempa Yesus ninr Ray Silai nanrenre tenany neluk snyompe ber Ratu lan lain lese nema nkes kalin tomwatar nir salar terik ma dedesar. Lama nanrenre tenany neluk snyompe, I namtoran Ratu seriny fian ma nfarete nor Ratu.* 13 Ma lere ye Yesus ninr Ray Silai ndaf ni tewat ma Ratu nafufu Ni muswar.* 14 Yesus ninr Ray Silai nanrenre tenany neluk snyompe lan lain lese. I nose farane la naflerap kit nof ninr salar, ma nafdiat kit ma teluk Ni tomwatar terik ma dedesar.
15 Ma Ratu Smwangtany nafdiat ngrie ne nbal ma nfalak ber kit lo.
16 Na Kitap Lelerap dalam e nfalak farye: “Keta kose Yoyoding Beberi kor sir
na lere ma nma ne.
Keta Yakw knwau Ningw yayatrwar na dalmir,
ma kurengi nbal na nir andanwar.”*
17 Ma Ratu nfalak a nbal,
“Keta to kunremi nir salar lo,
ma to kunremi nbal nir adat yatkar lo.”*
18 Mpa noak ma Ratu nlure monuk ninr salar lo, iane feti keta to tperlu ma tloik ninr snyompar ber I nema nkes kalin ninr salar.
Mya ma takmat Ratu tor dalminrar kateman
10:19-39
19 Wangur mir kateman, Yesus ninr Ray Silai nmat ma darany ntarbui ber kit lo. Iane nwayat ma to tamtaut ma takmat Ratu lo. Iane feleles a nbal farlan ma to tamtaut ma ti Ain ma Nlerap Desar a ne. 20 Kit bise ma ti Ain ma Nlerap Desar a ne, fali Yesus neluk dalamten ngamone ber kit lo. I nanrenre tenany ma nmat nema bise ma tmorip dedesar tor I. Noak ma nanrenre tenany ma nmat a ne, iane feleles farlan ma nbis maloly melabar ma neluk sasake na Ain ma Nlerap Desar a ne. Maloli ne nfatutu Yesus koko I tenany. 21 Ma lere ye Yesus neluk ninr Mangsomp Silai ma neluk Mangnrure na Ratu Ni Das Silai, iane feti Ratu Ni tomwatar kit. 22 Yesus darany naflerap dalminrar lo mpa to tdaun ninr salar lo. Ma I nadiris kit nor weye ma nlerap la naflerap teninrar. Mpa mya ma takmat Ratu tor dalminrar kateman, ma ka tamkoran ma talele I.* 23 Mya ma tamkoran ma talele Yesus ma tyoding I a na tomwatar sonirlury, fali Ratu dedesar ma nose nlarat safe ma nyoding ber kit a ne. 24 Mya ma tasalan kit ma tafkoran mpane kit, nema takamis kit, ma tose kabain ngamonar ber tomwatar. 25 Tomwatar ketnir biase rsisrat ma rsampayang, mpa kete mlyarat sir. Nempa ka mngyabo ma mifburat a kmi ma mifkoran mpane kmi. Ma ka mtyafal ma myose farane fali mifai feti ni tewat lo ma ninr Mangnrure nma nbali saryamprene.
26 Fali farlan tlangun anftutw botunar nof Ratu lo nempa dedesar ma tose sale, ma tose lole ma to tafai feti iane sale, mpe keta to snyomp walyet ma tloik la nkes kalin ninr salar a ne. 27 Mpa farlan kit tmorip farane keta tamtaut desar la tdaf motak ni tewat ma Ratu ntetak ninr ngriar. Ma keta tamtaut desar ma tdaf ma nukun kit na au ma nfolur dedesar a ne. Au ne ma keta napu nafere tomwatar monuk ma rbangal I a ne.* 28 Mpa farlan tomwatar sa to nlarat tetetkar ma luryain e Ratu nal ber Musa ne, ma tomwatar fen du nre tel ma rsalan desar ngrie ne ma rfalak feti nose sale, keta rfen i e to nir lolompang.* 29 Tomwatar ma rlangas tetetkar ma Ratu nal ber Musa motak e rukun sir farane, ma keta nlengan e tomwatar ma to releng Ratu Anaky. Iane feleles farlan ratai Ratu Anaky ngarany ma rdaun feti darany a ne to ubany. Safo I darany a ne ma naflerap kit nof ninr salar, ma nafkoran Ratu Ni yoyoding ma nose nor kit a ne. Ma sir rafbwere Ratu Smwangtany a nbal ma nfatutu Ni dalamy ngamone ber sir a ne lo. Sir ma rose farane keta rtafal ma rukun sir ma nlie nlengan desar.* 30 Fali kit tafai desar Ratu. Na Kitap Lelerap dalam e I nfalak: “Yakw Ningw kuase ma kbwalas tomwatar ma rose kabain yatkar, ma keta kukun sir.” Ma rarengi nbal na Kitap Lelerap dalam, “Ratu ninr Mangnrure keta ntetak Ni tomwatar nir ngriar.”* 31 Wangur, tamtaut desar farlan Ratu ma nmorip a ne nukun kit.
32 Ka minremi noak ma betno milele Yesus ninr Ray Silai. Noak a ne kmi mkyoman susar yadin fali mlyarat I. Boloka farane kmi to msyue kmi nempa mimkoran ma milele I. 33 Noak a ne tomwatar rarikan ma rtean tomwatar ketnir nof a kmi a ne na tomwat ngayadin sonirlury. Ma farpe ne e tomwatar rtean waninrar ma ralele Yesus, ma mtyulung sir ma miktem a mibare nir suse ne nbal. 34 Ma noak ma rnau waninrar na sel fali ralele Yesus, kmi mtyulung sir ma mibare nir susar a ne nbal. Ma boloka tomwatar rkampres mir safe kabain, nempa kmi mlyangun monuk a ne myor dalmir senange. Kmi msyenang fali mifai feti keta mlyangun kabanir ma rangafel ma nlie nlengan nof Ratu. Kabanir a ne ma keta ramin dedesar. 35 Mpa wangur, ka kete msyue kmi nempa ka dedesar ma mimkoran ma milele Yesus, fali Ratu keta nal sewe silai ber a kmi. 36 Mpa boloka tomwatar rsiksa kmi nempa ka msyabar ma mibare mir susar a ne. Kmi myose farane iane feti kmi myose mlyarat Ratu Ni mpempeang. Farlan myose farane keta myonri monuk safe ma Ratu nyoding ber a kmi lo. 37 Fali na Kitap Lelerap dalam e rarengi farye:
“Botuan feti I ma tdaf I a ne nma ye lo,
ma keta to dodo a nbal,
ma I to ndaf dodo ma nma lo.*
38 Nempa Ningw tomwatar ma rmorip e rafsenange dalangw,
sir keta dedesar ma rmorip fali ralele Yakw.
Nempa tomwatar ma rsue sir a ne keta to kmpweang sir.”
39 Ma kit ye to tomwatar ma tsue kit ma tatliur Ratu nwayat ma keta I nukun kit ma maberat desar. Nempa kit ye tomwatar ma talele Ratu mpa keta nfair kit.