Yayatrwar ma ka tomwat Israelar rose na Ratu Ni befak luryain a ne
9:1-10
1 Wangur mir kateman,
noak ma Ratu nose Ni Yoyoding Wangim nor tomwat Israelar e,
I nose yayatrwar.
Yayatrwar a ne nfatutu tomwatar feti felan farpe ma rsampayang ber Ratu.
Ma nfatutu tomwatar a nbal na Ratu Ni befak na saryamprene.
2 Tomwatar rtar ain ma rsampayang na iane feti Ratu Ni befak.
Sir rsak Ratu Ni befak a ne rmpan du.
Mangtan lury a ne rtar feti Ain Lelerap.
Na ain a ne rnau diri ma rtikloi faduk a na ma mede.
Ma na mede ne rnau roti ma mangsompar rloik ber Ratu.
3 Sir rtikloi maloly melabar ma neluk sasake la nsak mangtan lury ma mangtan mudy.
Ma mangtan mudy a ne rtar feti Ain ma Nlerap Desar.
4 Na Ain ma Nlerap Desar a ne rnau snyompe ain ma biase rapu natan a na.
Snyompe ain a ne mangtan burit e rose rof mase.
Na ain a ne rnau babatak sa ma rtar feti Ratu Ni babatak yoyoding.
Babatak ne mangtan burit e rose rof mase.
Na babatak a ne dalam e rnau ngusi mase,
ma na ngusi dalam e rnau manna.a
Na babatak a ne dalam rnau Harun ni tetekan a nbal.
Tetekan a ne ma luryain e natrump.
Ma na babatak a ne sir rnau batyar du a nbal.
Na baty dasyar a ne rarengi Ratu Ni farete buti na.*
5 Ma na babatak ne das e rnau waltwar du.
Waltwar du a ne felnir farlan Ratu Ni malaektar ma rtar feti bKerub.
Kerub a ne slyapnir rbelar babatak ni epat ma nfatutu feti Ratu ma Ni kuase nlie nlengan a ne namin iane.
Babatak epat a ne,
iane ain ma Ratu nlure tomwatar nir salar.
Nempa lere ye to ni tewat ma kfwalyole kabanir a ne leles mpane ber a kmi a fuky.
6 Mpe sir rasusan monuk kabanir a ne na befak dalam farane.
Ma lerar monuk e,
mangsompar rti Ain Lelerap a ne ma rafmpwane nir karyayar.
7 Nempa lan mangsomp silai ma nti Ain ma Nlerap Desar.
I nose farane lan lain lese na ngarak dalam.
Noak ma nti dalam e,
ka nonry binatang darnir ma neluk snyompe ber Ratu.
Baluan e,
ka i nloik binatang darany ma neluk snyompe ber Ratu,
nema Ratu nkes kalin koko i ni salar a fuky.
Betno ka i nloik binatang darany a nbal ma neluk snyompe ber Ratu,
nema Ratu nkes kalin salar ma tomwatar to rfenai ma rose ne.
8 Nof yayatrwar a ne Ratu Smwangtany nfatutu feti farlan tomwatar lolone rpaki Ain Lelerap a ne,
ni botuan e sir to bise ma rti rakmat Ratu na Ain ma Nlerap Desar,
fali lan mangsomp silai ma bise ma nti ain a ne.
9 Ngriar monuk ma rose luryain a ne neluk pupule motak la nfatutu kit ninr momorip na are ye.
Botuan feti mangsompar a ne rloik binatang darany ma neluk snyompe ber Ratu,
ma rloik snyomp walyetar a nbal.
Nempa snyompar ma rloik a ne to bise nose ma dalmir a rlerap na Ratu sounlury.
10 Fali farlan tlarat Yoyoding Wangim e,
yayatrwar monuk a ne nayatur na lan tomwatar nir enu tnyame ma raflerap tenir felnir mpane.
Nempa yayatrwar a ne nayatur lan kabanir ma ramin tenir burit ma to nayatur na dalmir.
Ratu nal yayatrwar a ne ber tomwatar ma rafmpwane terik ma I nose Ni Yoyoding Beberi.
Yesus ninr Ray Silai nloik darany neluk snyompe la nalin kit nof ninr salar
9:11-28
11 Lere ye Yesus ninr Ray Silai nma ma neluk Mangsomp Silai lo.
I ye ma nonry kabain ngamonar ma Ratu nyoding ber kit a ne.
Ma I nti Ratu Ni befak na surga.
Befak a ne ma nangafel desar ma nlie nlengan nof befak ma tomwatar rose na saryamprene.
Ratu Ni befak a ne iane ain ma nlerap desar.
Befak a ne tomwatar to rose ma to nof saryamprene ye.
12 Ma noak ma Yesus nti Ain ma Nlerap Desar a ne,
I nti e to nonry domba merwane darany nre lembu anak darany ma neluk snyompe ber Ratu,
farlan ma luryain e mangsomp silayar rose.
Nempa nanrenre koko I tenany ma nmat nema darany a ne neluk snyompe ber Ratu la nalin kit tof ninr salar.
I nose farane lan lain lese terik ma dedesar.
13 Nof tetetkar ma luryain e Ratu nal ber Musa ne,
mangsompe ka nal mpimpi merwane darany nre sapi merwane darany la nyefar na tomwatar ma rose sale rlarat yayatur agame.
Nre ka I ntun sapi anak bate terik ma neluk afu,
betno nal afu ne ma nyefar na tomwatar a ne.
I nose farane nema tenir a rlerap ma bise ma rbali sir ma rsatngur ber Ratu.
14 Binatang darnir a ne motak e,
rose ma tomwatar tenir a rlerap,
mpe keta nlengan desar e,
Yesus ninr Ray Silai daran.
Yesus ma to Ni sal sasaf a ne nanrenre I ma nmat nema darany neluk snyompe ma nangafel desar ber Ratu.
Ma Ratu Smwangtany ma nmorip dedesar a ne nose ma Yesus ninr Ray Silai nanrenre I.
I darany ma ntarbui a ne la naflerap dalminrar nof kabanir ma to ubnir sasaf,
nema kit bise ma tsatngur ber Ratu ma nmorip a ne.
15 Noak ma tomwatar lolone rafmpwane Yoyoding Wangim ma Ratu nal ber Musa ne,
sir rlangas Ratu Ni yoyoding a ne.
Iane nwayat ma ninr Ray Silai nanrenre I ma nmat nema nalin sir nof nir salar.
Ma I neluk lenre ber tomwatar ror Ratu,
ma nonry Yoyoding Beberi nbal.
I nose farane nema tomwatar monuk ma Ratu nfil sir a ne bise ma ronri berkat ma to terik,
farlan ma Ratu nyoding ber Ni tomwatar a ne lo.
16 Contoh farye,
noak ma makenar sa nose ma nsaman ni kabanir ber angkir e,
i ka nose surat wasiat a fuky.
Nempa angkir a ne bise ma rsaman kabanir a ne farlan amany a nmat lo,
fali ni mamate ne la nafkoran surat wasiat ma nose ne.
17 Fali tomwatar sa ka nmat a fuky betno surat wasiat a ne ubany ber sir.
Nempa farlan lolone nmorip e,
surat wasiat a ne to ubany ber sir.
18 Iane feleles farlan Yoyoding Wangim ma Ratu nose nor empninrar nusninrar.
Sir ka rfen binatang sa ma darany a ne neluk snyompe ber Ratu,
betno Ratu Ni yoyoding a ne ubany ber sir.
19 Luryain e,
Musa nafbotin tetetkar monuk ma Ratu nal ber i a ne ber tomwat Israelar.
Lama nafbotin monuk e,
i nal sapi anak darany ma mpimpi merwane darany ma nabali nor weye.
Ne nal katutun hisop donyar ma nbebe nor benang wol memeye ma nsob a na dare ne,
betno nyefar na cKitap Lelerap ma rarengi tetetkar a ne,
ma nyefar na tomwat Israelar monuk a nbal.
20 Noak ma nose farane i nfalak,
“Dare ye ma Ratu npaki la nafkoran Ni yoyoding ma nose nor a kmi a ne nema myose mlyarat.”
21 Ne Musa nal dare ne ma nyefar a nbal na Ratu Ni befak,
ma kabanir monuk ma rpaki la rsampayang ber Ratu ma ramin befak a ne.
22 Botuan feti farlan tlarat tetetkar a ne ketla kabanir monuk a ne ka ryefar sir ror dare la raflerap sir.
Ma farlan to rfen binatang ma ral daran neluk snyompe,
keta Ratu to nlure tomwatar nir salar.
23 Mpa Ratu Ni befak ma kabanir monuk ma ramin befak a ne neluk contoh motak ma ketla feleles farlan kabanir ma ramin surga.
Nempa kabanir ma ramin surga ne rangafel a rlengan rof kabanir ma ramin Ratu Ni befak na saryamprene.
Mpa ka ral nir snyompe ma nangafel a nlengan a nbal,
la raflerap kabanir ma ramin surga ne.
24 Ma ninr Ray Silai ne nti Ain ma Nlerap Desar na surga.
I to nti Ain ma Nlerap Desar ma tomwatar rose na saryamprene.
Ain ma tomwatar rose na saryamprene ne lan contoh motak ma ketla feleles farlan Ain ma Nlerap Desar ma botuan na surga.
Lere ye ninr Ray Silai namin ain a ne lo.
I nti nakmat Ratu ma neluk lenre ber kit na Ratu sounlury.
25 Luryain e,
mangsomp silai ka nti Ain ma Nlerap Desar na Ratu Ni befak,
ma nonry binatang darany.
Ka i nose farane na ngarkar mpane.
Nempa Yesus ninr Ray Silai to far Yahudyar nir mangsomp silai ne.
Yesus nti Ain ma Nlerap Desar na surga lan lain lese,
ma nonry koko I darany ma neluk snyompe ber Ratu.
26 Fali farlan ninr Ray Silai nti ain a ne na ngarkar mpane,
iane feti ka I nkoman suse lain yadin lo ntabw nof ma Ratu nose saryamprene.
Nempa na lere ye nait ma saryamprene ketla namsos,
Yesus nma ma nanrenre I ma nmat lan lain lese neluk snyompe,
nema nkes kalin tomwatar nir salar.
27 Ma iane feleles farlan ma Ratu ntetak feti keta ni tewat e tomwatar ka rmat,
ma lama sir rmat betno Ratu ntetak nir ngriar.
28 Feleles a nbal farlan ninr Ray Silai ma nmat lan lain lese ma neluk snyompe la nkes kalin tomwatar nir salar.
Ma keta I nma nbali saryamprene fen lain du.
Noak ma I nma e,
to nkes kalin tomwatar nir salar lo,
nempa I nfair tomwatar ma dedesar e rdaf I a ne.